Matiyò 28

Jisòs lôtì a yi kpû

(Mâk 16.1-10; Lûk 24.1-12; Jon 20.1-10)

1Te ghɨ tì yusa hi yə tuk wu laku, tuku yû wu tuk wu shyə a ngâm, Mèli wù Màtalà nì Mèli wùlè kaha yen a Jisòs a tô yì sì. 2A mô ya ma anjèl à Bâba ti chwo ben a nyə̂, luktu nêk nâ haŋaŋ, yi yen a Jisòs yi jwô yì sì bɨŋhi chyâkhì ti ye a jwô yì sì kwok ndokò a tô atɨ̂n. 3Kə̂k yì anjèl à Bâba yê hì bana kə te yuchwî, njusu wunsu fufa kəta yi bwû. 4Te luktu ndùku nêkà ni, sojà sê su ndùku chînà sî yê hì fânà, chɨŋtê mô kə te ghɨt a kputena.

5Ywen ghe bên, anjèl àtɨ̂n ki jîs ha ghɨna na, “Kə ghàn fan. Mu khəlò na ghàn khɨŋa Jisòs we ghɨ che bante a kàkfùtàfù. 6Wù wijə afân, wù ti lôtì a yi kpû kə yi ghəl te wù tì jìsa. Ghàn ben lê ma ghàn yen luk we ghɨ che niŋhe wun atɨ̂n. 7Ghàn yen, ghàn nyâŋhì yê fokti ha jùmtìbàmsu wunsu na, wù ti lôtì a yi kpû hì chwo yênà a ghàn ashyə̂ a Galìlî na ghàn ye yen wûn afû. Ba ghàn ti yû te mu jìsa.”

8Ywen atɨna nyâŋhì lo a jwô yi sì hì nyiŋa yênà hi fòktì ha jùmtìbàmsu Jisòs su. Ghɨna ndùku mô yâ baha fânà kə yi fân, biyani saŋlê nâ haŋaŋ.

9Wu lum kə ni, Jisòs kwônà ghê ghɨna toŋti ha ghɨna, ghɨna yen wûn, yen khɨti wulu wunu hì kokhe wûn. 10Jisòs ki jîs ha ghɨna na, “Kə ghàn fan. Ghàn yê jis ha wana noma na ghɨna yen a Galìlî ma ghɨna yen mu afû.”

Tû laku ghɨt a Jûs fo ka ha chìn se na ghɨna hi wama fəmi

11Te ywen ghe tì lo hì baha gbê yênà wu lûm, sojàsu lesu atɨ̂n à se su ndùku chînà sî Jisòs yâ, lyi yên atɨ̂n à yi lak fôktì gha ghe ghɨ gana nâ à jɨ̀m ha ngàŋsu ndâ Fùyènsu chiksu. 12Ngàŋsu chiksu nì chəhsu lak su khɨti yi yûŋtì fati na ghɨ fo ka ha sojàsu tɨnsu wu dô, 13Ma ghɨ jis ha ghɨna na, “Ghàn hi jîsà kə ha ghɨta na, ‘À ndùku mô ntuksu, jùmtìbàmsu wunsu bên, ghàh bwunê chwoŋ lô nì gun yi wuni.’ 14Gòbnà ki yu yi gha tɨni, ma ghàh nê khɨli nâbi gha ye ghàh nè fôktè ha wûn hi chìlè wûn na kə ghàn lye a ngə̂k.” 15Sojà se fyi ka we, ni kə te ghɨna jìsa. Fəm ye ghɨna tì bakte gbî lak mi ye yì jɨ̀m, hi bè tàn lân ghɨt a Jûs chyə khə kə na ghɨ tì chwoŋ lô gun yi Jisòs.

Jisòs fwu a jùmtìbàmsu wunsu yi kə̀k

(Mâk 16.14-18; Lûk 24.36-49; Jon 20.19-23; Fêt 1.6-8)

16Jùmtìbàmsu Jisòs sù njwò yì mòk yu tum à wûn yen tan a Galìlî lo kwok a tô kùn yìlè, wu lùk afa wù tì fòkte ha ghɨna. 17Te ghɨna ye tana afû yen wûn hì boŋa kokhe wûn ghɨ le hì baha kante na a mò kə nâ wun ni agha. 18Jisòs yen kûmhì ha ghɨna ki jîs na, “Yènfù ti fo jyaka ha mu a nyə̂ fî fo a chyə̂ na mu nê hi saka nâ gha à jɨ̀m. 19Ghàn yen lê, ha ghɨta lak tu mbyi tu nâ tù jɨ̀m ma ghàn fokti tum à mì yi jùŋ ha ghɨna, shyəma ghɨna bimi ma boŋà jumti mu, ma ghàn fo mòlû ha ghɨna, a Bì yi yet, nì Wan nì Yohnà Yulena. 20Ghɨna ki bimî, ghàn yiki ghɨna na ghɨna lem gha à jɨ̀m ghe a mu hì mô ma mu ti fôktì ha ghàn na ghàn hi nê. Ghàn hi khə hamok na mu nè hì mô kə yi mô nì ghàn bu hi bè de ghàn nâ shyəma mbyi bê mi.”

Currently Selected:

Matiyò 28: bmv

Highlight

Copy