Jon 2

Jisòs yen wu lùk wu malanu a Kanà

1Tuk mù tî chya mù bà, tuku yû, malâ yìlè hì mô yi tèk yi Kanà a Galìlî, nè Jisòs mô afû. 2A mô ni, ma ghɨ ti boŋ lâkà Jisòs ghê jùmtìbàmsu wunsu a malâ afû. 3Ghɨ ne nyu mihì mu lûk, nè Jisòs ben jis ha wun na, “Lùkû ti mî wu lùk wu malanu afân.”

4Jisòs jis na, “Wò wu hì jîsà na mu ni ghə a wùt ywên? Yu mu tà ye kpen jə̂.”

5Nè Jisòs jis yen ha ghɨt a fetana ghe ghɨ ndùku mô wu lùk wu malanu afû na, “Wù jis kəbi nâ ghə ghàn ni kə yâ.”

6À ndùku mô ni, ma ghɨt a Jûs ti chwuf te ha khɨ̀ŋ tufa lem hi tè lèmà mòlû atɨ̂n nì hi tè sù wulu atɨ̂n na ghɨna hi yule a Yènfù ashyə̂. À ndùku mô a wu lùk wu malanu afân ma ghɨ ti ben tomti khɨŋ ghɨ̂n tufa, ghɨ ghakle kə ni, ghɨ mô hi kpite tom mù mòlû atɨ̂n mtât shyəma yì mòk lun. 7Jisòs ki jîs ha ghɨt a fetana tɨna na, “Ghàn lunhi mòlû a khɨ̀ŋ afân.” Ghɨna tu mòlû lunhi khɨŋa tɨna. 8Wù ki fê jìs ha ghɨna na, “Ghàn sef mùlè ma ghàn yê fo ha wùt we wù tihe gha malani yîn.” Ghɨna sef yen folò. 9Ni te wù mòmà ma mù ti kahi ha mu lùk wù hì khə wi na mù lo afa agha. Biyani ghɨt a fetana ghe ghɨ tì to mòlû mù tɨ̂n khə. Wù ki toŋa lɨm à wùt ywên, 10hì jîsà ha wun na, “Ghɨ yè bɨlà fo mu lûk mu jùŋ na ghɨ nyu ashyə̂ ghɨta nyû shihi tè saŋlî ghɨ ki bên nì me mù tòkà jwôfà wi, à gan ghə shyəma wò hi bênà nì mùna chin agha?”

11Yìna mò gha kanani yi shyə ye Jisòs tì ne yi tèk yi Kanà a Galìlî hi chwùtè mihè a jyak a wuna, jùmtìbàmsu wunsu bimi na à mò we ghɨ chwoka lema.

12À hì mô yi bàm atɨ̂n wù lô ghê nè wûn nì wana ne wuna nì jùmtìbàmsu wunsu hi chwo yèn yi tèk yi Kàbanùm hi chyəte kwok afû a mu tuk mùlè.

Jisòs yen a ndâ Fùyèn yì chìk a Jèlusalèm

(Mat 21.12, 13; Mâk 11.15-17; Lûk 19.45, 46)

13À ndùku bakhe yènà a mu tuk afa ghɨt a Jûs yè yə yi yə Daŋa Chyalani, Jisòs lo kwok a Jèlusalèm, 14yen lye a bɨn a ndâ Fùyènà yen ghɨta mô afû, bəkle nyamsu mbòloŋsu, nì bwusu njyə̀sù, nì làtàmù, ghɨ le mô a tô wu bâŋ kwune mu kâ. 15Wù fati fukwô sam jum fihi nyamsu na sù jɨ̀m a ndâ afû, sah waŋhi ka we ghɨta kwune, fî bâklì baŋ we ghɨna ndùku kwune ka a tô àtɨ̂n, 16yen ha ghe ghɨna ndùku bəkle làtà me, kan jis ha ghɨna na, “Ghàn lyê fwu nì munù afân. Kə ghàn fati ndâ Ba mù te wu wən.” 17Te wù jìsa ni, jùmtìbàmsu yɨ̂ŋtì te ghɨ nyàka a ŋwàklù Fùyèn na, “Səm à mì a wo ndâ, à Yènfù, lùmà kə ni.”

18Ghɨt a Jûs kaha ben buf ha Jisòs na, “Wò làhi ne yi gha kanani hi chwùtì na a fo Fùyèn jyaka ha wò na wò hi nê gha kanana agha?”

19Jisòs fîsì jis ha ghɨna na, “Ghàn shyakti ndâ Fùyèn yinâ, ma mu kahà ba kə a mu tuk mù tât.”

20Ghɨna fî buf ha wun na, “A wò làhi kaha ba nda yinâ a mu tuk mù tât ma ghɨ tì lyi lɨ̂m mkìk njwò tufa hi ba yì yin agha?”

21À ndùku mò ya Jisòs jîsà a ndâ Fùyèn, a mô kə nâ wu wun wu wunu. 22Wù tî kpû kaha lôtì, jùmtìbàmsu kaha yɨ̂ŋtì na wù ndùku jîsà kə nâ ni, bimi gha ye ŋwàklù Fùyèn jìsa nì gha ghe Jisòs ndùku jîsà.

Jisòs khəlò kwâktu ghɨ̂t tù jɨ̀m

23À ndùku mô te Jisòs mò a Jèlusalèm a mu tuk mù Dàŋa Chyalamù, ghɨta bimi na wù mò wùt we ghɨ chwoka lema, dô kə ni, beka gha kanana ghe ghɨna yena te wù ne. 24Biyani Jisòs tê fo jə̀ ngɨŋ à wûn ha ghɨna beka wù ndùku khəlò chyənà su ghɨna su nâ sù jɨ̀m. 25Wùt hì fê bu hi tè fòktì yi fôktì shyə ghe wùt mò ghɨna ha wûn beka wù khəlò kwâktu ghɨ̂tù.

Currently Selected:

Jon 2: bmv

Highlight

Copy