Jon 1

Tum ye yì nè na ghɨta hi chyə̂

1À ndùku mô shyəma mbyi yimi, ma tum à Fùyèn hì làwû. Wù ndùku mô ghê Yènfù, a mô kəbi wûn Yènfù, 2À ndùku mô kə nâ a yìmi, tum à Fùyèn mô kə nâ ghê Yènfù amok. 3À tì fate wûn mwə̀ mù jɨ̀m a Yènfù a jyak, ma à ndùku bu ha wun ma ghɨ tà tì fati jə shyə ale ghe ghɨ hì mô ma ghɨ ti fatî. 4Wù ndùku kəta chyənà, chyənà àtɨ̂n fo yi ban ha ghɨta. 5Ban mi yin bana atɨ̂n à bɨn a finana, ma bɨn a finana mɨ ghɨ̂n wi hi lɨmhî.

6Yènfù tì tum wùt, ghɨ toŋte na Jon, 7na wù ben ma wù hi fôktè kum yi ban mi yîn shyəma ghɨta yu gha ghe a wù jìsà ma ghɨ bimi. 8Jon ndùku wijə yi ban mi yê nâ ha wun a ngɨŋ. Wù tì ben kə te fòktì kum yi ban mi yîn. 9Ban mi yinâ Jon ndùku mô fòktì àtɨ̂n, ndùku mô kə nâ yi ban hamok te yi tì bèna a mbyî hi fo yi ban ha ghɨt à jɨ̀m.

10Tum à Fùyèn mi yina ndùku mô a mbyî, biyani ghɨt a mbye mana Wûn nâbi te mbye àtɨ̂n ndùku mô ma à fati Wûn. 11Wù ben, tan kə nâ a ghɨna yi lak, ghɨt a wuna ghɨ laka tunhi hi fye wûn. 12Biyani, ghɨt ale fyi wûn bimi ha wûn, wù fo a jyak na ghɨna hi mô wana Fùyènà. 13Ghɨna tà tì kahi jə a wana Fùyènà wu lum afa wùt kòŋà wu bwɨ mwəlà mù wûn ghɨna hi mô wana wuna. À ndùku mô kə nâ yi lêm yi Fùyènì na ghɨna hi mô wana wuna.

14Tum mi yinâ tî kahi hì mô kəbi wût, ben chyəti a ghàhnà fùtɨ̂n. Ghàh tì yen jyak a wuna, a mô a jyak a Wâ Fùyèn wù mòk we fu ndùku kəta te wù lo a Bè wun à ngwùŋ ben ma wù ti lun nì kwohi seni fî lun nâ kəbi nì ghə ghe ghɨ mô hamok kum Fùyèn.

15À mô wûn we Jon ndùku jîsà bê a jyə̂ yì ta na, “Wùna mò a we mu ndùku jîsà ha ghàn na, wùt bênàlò a mu yi bàm, chyâ mu beka ghɨ tì shihi bwə mu ma wù hì mô.”

16Kwohi seni wuni mô ma yi ti lun kpenâ, ghàhnà à jɨ̀m ghɨ hì kəta yutìnì kə a tô yile. 17Yènfù tì shihi fo yi sâk yi chya a Musìs a wô. Kwohi seni che shihi bèn, nâbi nì ghə ghe ghɨ mô hamok, chya a Jisòs Klistù a wô. 18Wùt tà timi yen jə Yènfù, à chwùti Wâ Fùyèn wù mòk we wù mò kəbi Fùyèn, yê mô kə a Bè wun a ngwùŋ chwûtè te Yènfù mò ha ghɨta.

Jon Fo Mòlû tunhi na à wijə yi we ghɨ chwoka lema

(Mat 3.1-12; Mâk 1.1-8; Lûk 3.1-18)

19Ghɨt a tihena ghɨt a Jûs ghe ghɨ ndùku mô a Jèlusalèm tì tum ngàŋsù ndâ Fùyènsu nì ghɨta yi sah yi nda Lefì na yê buf ha Jon Fo Mòlû na, “Wù mò nde agha?”

20Te ghɨna yèna hì bufa bê ni, Jon fôktì mihì kə yi mîhì na, “À wijə mu we ghɨ chwoka lema.”

21Ghɨna fî buf kpenhi ha wun na, “Wò wu hì mô nâ nde? À mò wò Ìlajà ma?”

Jon jis na yi wijə Ìlajà.

Ghɨna fî buf na wò mò fòktì yì chìk ye ghɨ tì chwùne ma?

Jon fî tunhi kə yi tunhî.

22Ghɨna jis ha wun na, “Fòkti lê ha ghàh na wò mò nde? Ghàh khɨŋa kə nâ hi yu a wo yi jwô shyəma ghàh kahà yê fokti ha ghɨt ghe ghɨ tuma ghàh.”

23Jon ki fôktì te fòktì Ìsayà tì jìsa na,

“Mu mò wut we wù toŋa jîsà bê yi lak yi sùsi ya na,

Ghàn fati lumu Bâba ma wu hi nânà ma wù shihi bèn ma wù chya atɨ̂n.”

24À ndùku mô yâ, ma à tum ghɨt a Falàsî ghɨt ghɨ̂n ha Jon. 25Ghɨna buf gokhì ha wun na, “Wò wijə we a ghɨ chwoka lema, bu Ìlajà, bu fòktì wù chìk we ghɨ tì chwùne, hì fo mòlû mù ghə?”

26-27Jon fîsì na, “Mu Fo Mòlû ha ghàn kə nì mòlû mù jwò biyani bênà a wùt ashyə̂, wù mô kə nâ a ghàn a fùtɨ̂n chîn, ghàn khə wi, nâ mu kpene wi hi tè fèt te a kwôs ghe ghɨ yêntè gwusu wunsu wùsu.”

28Nâ gha mɨ ghɨ̂n à jɨ̀m ndùku gânà yi tèk yi Betanì yi jin jwô Jodàn wu lùk afa Jon ndùku fo mòlû.

Jon chwûtì Jisòs ha ghɨta

29Tuku tì yû, Jon yen te Jisòs bènà, wù chwûtì wûn ha ghɨta jis na, “Wùna mò ni a mô Wâ Njyə̀ we Yènfù chinhe na wù lyê chyakhi be a mbyî. 30À mò wûn we mu chehì fôktè ha ghàn na, ‘Wùt nè bênàlò a mu yi bàm, chyâ mu, beka ghɨ tì shihi bwə mu ma wù hì mô.’ 31Mu chehì boŋa khə wi wûn biyani gha ye mu che be hì fo mòlû nì mòlû mù jwò mò hi bakte a təm a ghɨ̂tà shyəma wù nê shihi bèn ma ghɨt a Isalì yen à khɨli wûn.”

32Yìna ndùku mô kəbi jîs yi fòktì yìlè te Jon tì jìsa na. “Mu yen te Yohnà Yulena chwo bênà a nyə̂ te à làtàta ben ndokò a wun a tû. 33Mu khə wi wûn. Nâ mu che yen khɨli wûn kə kum gha ye Yènfù tì shihi tum a mu jis na, ‘Wò be yen nâbi nde te Yohnà Yulena chwo ndoko a wun a tû, wo hi khə na à mò wun we wù bèna hi tè fo mòlû ha ghɨta nì Yohnà Yulena.’ 34Mu ti yen te gha mi yin gàna, hì fôktè ha ghàn na wùt wunâ mò Wâ Fùyèn.”

Jisòs lyi jùmtìbàmsu wunsu shyəsu

35Tuku fî yû, Jon ghê jùmtìbàmsù wunsu sùbà yen timi wu lùk afa ghɨna ndùku yusa atɨ̂n, 36wù yen Jisòs te wù chyàlà jis ha ghɨna na, “À chyàlà Njyə̀ à Fùyèn ni.”

37Jùmtìbàmsu wun se yu ya lo hì yênà kə Jisòs yi bàm. 38Jisòs kaha kî yen ghɨna bênà a wun a yi bàm buf ha ghɨna na, “Ghàn khɨŋa ghə?”

Ghɨna fîsì na, “Labi, a mô na chichà, wò chyə afa?”

39Wù jis ha ghɨna na, “Ghàn bê yen.” Ghê ghɨna yen yen luk we wù chyə̂ atɨ̂n, ma à hì mô a mbɨŋlu sù kìk wu yu kolô ghɨna yus kə afû ni tuku jyə̂ ghɨna ki lô.

40Wùt wùlè atɨ̂n à ghɨt afa à bà ndùku mô Andùlù wâ nè Samùn Bità a wù tì ywo gha ye Jon jìsa jûmtì Jisòs. 41Wù lo wu lùk afa Jisòs ndùku mô, khɨŋ yen nì wâ nè wûn Samùn jis ha wun na, “Ghàh ti yen Wùt we ghɨ chwoka lema a mô Klistù.” 42Ni, wù lyi yen nì Samùn ha Jisòs.

Jisòs yen wun jis na, “À mò wò Samùn a wâ Jon, biyani ghɨ nè hì toŋte wò chin na Sefàs.” Sefàs nì Bità mò kə yi yet yì mòk mô na yi wo.

Jisòs lyi Filîb ghê Nàtanyèl ha jùmtìbàmsu wunsu

43À hì mô wu tuk wu kumtenu Jisòs shihi yèn a Galìlî, yen Filîb jis ha wun na wù jumti yi. 44À ndùku mô ni, ma Filîb fwu ben a yi tèk yi Bèsadà a ye Andùlù ghê Bità ndùku chyə. 45Filîb khɨŋ yen nì Nàtanyèl jis ha wun na, “Ghàh ti yen wùt we Musìs tì nyàka kum wûn a ŋwàklù yì sak, fòktìsu chiksu boŋ nyâk. Wù mò Jisòs wù Nasalì a wâ Josèf.”

46Nàtanyèl buf na, “Nasalì, a shyə a jûŋà làhi fwo a Nasalì?”

Filîb fîsì na wù ben ma wù yen.

47Ni te Jisòs yena Nàtanyèl wu bênà, jis ha wun na, “À mò kə nâ wùt à Isalì a wù bênà ni. Wù jìsà kə hamok.”

48Nàtanyèl buf ha wun na, “Wò gbi yàni hi khɨle mu?”

Jisòs fîsì na, “Mu ye yen wò a yu afa wò yê hì mô a sah à fùkàk fu fikfù shyəma Filîb toŋa wò.”

49Nàtanyèl ki jîs na, “Labi, wò mò Wâ Fùyèn, wò mò fə̀n à ghɨt a Isalì.”

50Jisòs jis na, “Wò bimi beka mu ye jisa na mu te yen wò a yi sah à fùkàk fu fikfù. Biyani wò nè fê yenalò gha ale ghɨ chyâ yinâ.” 51Wù jis yâ, fî jis kpenhi na, “Mu jìsà kə nâ hamok na, ghàn bè yenalò te nyə jìme ma anjèlsù Fùyènsu bê hi kwokâ chwô gbê kə tum à Wâ Wùt.”

Currently Selected:

Jon 1: bmv

Highlight

Copy