Маттэ 14

14-НЭ ЕДЗЫГЪУЭ

УмэхъакӀуэ Иуан и щхьэр зэрыпаупщӀар

(Марк 6:14-29; Лука 9:7-9)

1Пщы Ирод,#14:1 пщы Ирод – Ирод Антипэ хъужырщ. Хьисэ къэхъун и пэкӀэ 4-рей гъэм къыщыщӀэдзауэ Хьисэ къэхъуа нэужь 39-рей гъэм нэсыху, ар Галилей, Перей хэкухэм япщу щытащ. Хьисэ и хъыбарыр зэхихати, 2и ӀуэхутхьэбзащӀэхэм яжриӀащ а махуэхэм:

– Ар умэхъакӀуэ Иуанырауэ къыщӀэкӀынщ. Ар лӀахэм къахэтэджыкӀыжащ, аращ апхуэдэ къару зыхэлъ телъыджэхэр щӀилэжьыр.

3-4Ирод ар щӀыжиӀар мыращ: ФилиппкӀэ зэджэ и къуэшыр псэу пэтми, Ирод а Филиппым и фыз Иродиадэ зи цӀэр къишэжат. Абы ар къызэришэжам щхьэкӀэ, Иуан Ирод жриӀэрт: «Уи къуэшым и фыз къэпшэжыныр хабзэм къезэгъыркъым». Иродиадэ и лъэӀукӀэ Ирод и зауэлӀхэм Иуан яригъэубыдщ, Ӏэхъулъэхъу ярыригъалъхьэри, лъэхъуэщым щӀригъэдзащ абы и ужькӀэ. 5Ирод Иуан иригъэукӀыну хуейт, ауэ цӀыхухэм ящышынэрт, абыхэм Иуан бегъымбару ялъытэрти.

6Ирод къыщалъхуа махуэр щагъэлъапӀэм, Иродиадэ и пхъур зэхуэсахэм я пащхьэм къыщыфащ икӀи ар пщы Ирод игу ирихьащ.

7Ирод хъыджэбзыр игу ирихьати, абы тхьэ хуиӀуащ:

– Сыт ухуейми, уэстынщ.

8И анэм игъэӀущати, хъыджэбзым жиӀащ:

– УмэхъакӀуэ Иуан и щхьэр лагъэм илъу къызэт.

9Пащтыхьым ар щызэхихым, хуабжьу гущӀыхьэ щыхъуащ, арщхьэкӀэ хьэщӀэхэм я пащхьэм тхьэ щиӀуати, хъыджэбзыр зыхуейр иратыну унафэ ищӀри, 10Иуан и щхьэр лъэхъуэщым щыпиупщӀыну зауэлӀ гуэр игъэкӀуащ. 11Иуан и щхьэр лагъэм илъу къахьри, хъыджэбзым иратащ, абы ар и анэм хуихьащ. 12Иуан и гъуэгу ирикӀуэхэр къакӀуэщ, Иуан и хьэдэр лъэхъуэщым къыщӀахыжри щӀалъхьэжащ итӀанэ. ЩӀалъхьэжа нэужь, кӀуэри къэхъуар Хьисэ хуаӀуэтэжащ.

Хьисэ цӀыху минитху зэригъэшхар

(Марк 6:30-44; Лука 9:10-17; Иуан 6:1-14)

13А хъыбарыр щызэхихым, цӀыхухэм яхэкӀри, щӀыпӀэ пхыдза гуэрымкӀэ и закъуэу кхъуафэжьейкӀэ иунэтӀащ Хьисэ. Ар щызэхахым, цӀыху гупышхуэ къалэхэм къыдэкӀри, Хьисэ лъэсу кӀэлъыкӀуащ. 14Хьисэ кхъуэфэжьейм къикӀыу, цӀыху гупышхуэр щилъагъум, игу ящӀэгъури, сымаджэу яхэтыр игъэхъужащ.

15Пщыхьэщхьэр къыщысым, и гъуэгу ирикӀуэхэр къыбгъэдыхьэри, Хьисэ къыжраӀащ:

– Мы щӀыпӀэр пхыдзащ, махуэри хэкӀуэтакӀэщ. Жылэхэм кӀуэуэ гъуэмылэ къыщащэхун щхьэкӀэ, цӀыхухэр утӀыпщ.

16– Ахэр щӀэкӀуэн щыӀэкъым. Фэ вгъашхэ ахэр, – яжриӀащ Хьисэ абыхэм.

17– Дэ щӀакхъуитхурэ бдзэжьеитӀрэ фӀэкӀа диӀэкъым, – къыжраӀащ адрейхэм.

18– Ахэр сэ къысхуэфхьыт, – жиӀащ Хьисэ.

19Хьисэ цӀыху гупышхуэхэм яжриӀащ удзыпцӀэм хэтӀысхьэну. ЩӀакхъуитхумрэ бдзэжьеитӀымрэ къищтэщ, уафэм дэплъейри, Тхьэм фӀыщӀэ хуищӀащ. ЩӀакхъуэхэр зэгуищӀыкӀыурэ, и гъуэгу ирикӀуэхэм яритащ итӀанэ; абыхэм цӀыху гупышхуэхэм хуагуэшащ. 20Арати, псори шхащ, псоми загъэнщӀащ. Къадэхуа щӀакхъуэ бзыгъэхэр зэхуахьэсыжри, матэ пщыкӀутӀым ярызу хъуащ. 21ЦӀыхубзхэмрэ сабийхэмрэ нэмыщӀ, шхахэр цӀыху минитху хуэдиз хъурт.

Хьисэ псы гущӀыӀум тету зэрыкӀуар

(Марк 6:45-52; Иуан 6:16-21)

22Хьисэ цӀыху гупышхуэхэр иригъэжьэжыху зыпимыгъаплъэу, и гъуэгу ирикӀуэхэр кхъуафэжьейм иригъэтӀысхьащ итӀанэ, гуэлым зэпрыкӀын щхьэкӀэ. 23ЦӀыхухэр иутӀыпщыжа нэужь, Тхьэм елъэӀуну Ӏуащхьэм и закъуэ дэкӀуеящ. Пщыхьэщхьэр щыхъуам, ар и закъуэу абдеж къытенащ. 24Плъэмэ, кхъуафэжьейр гуэлым и кум нэсат, ауэ жьы къепщэрти, толъкъунхэр къыжьэхэуэурэ, кхъуафэжьейр зэхэзедзэ хъуащ.

25Джэд Ӏуэгъуэм деж Хьисэ, псы щӀыӀум тету, кхъуафэжьейм исхэм я лъэныкъуэкӀэ кӀуащ. 26Псы гущӀыӀум тету Хьисэ къакӀуэу щалъагъум, и гъуэгу ирикӀуэхэм ар хьэдэджадэу къафӀэщӀри, хуабжьу шынауэ зэрыгъэкӀиящ. 27Хьисэ абыхэм къажриӀащ а сыхьэтым:

– Фымыдзыхэ, сэращ ар, фымышынэ!

28– Зиусхьэн, ар уэрауэ щытмэ, псы гущӀыӀум сытету, уи деж сынэкӀуэну унафэ щӀы, – жриӀащ Петр Хьисэ.

29– КъакӀуэ! – жиӀащ Хьисэ.

Петр кхъуафэжьейм къикӀри, псы гущӀыӀум тету, Хьисэ деж кӀуэну ежьащ. 30Ауэ жьышхуэр къыщыкъуэум, гузавэри, къэшынащ. Псым щӀилъафэ щыхъум, къэгуоуащ:

– Зиусхьэн, сыкъегъэл.

31Петр ар щыжиӀэм, Хьисэ и Ӏэр хуишийщ, ар иубыдри жриӀащ:

– Уэ, фӀэщхъуныгъэ зи мащӀэ, дзыхь щхьэ къысхуумыщӀырэ?

32Арати, кхъуафэжьейм исхэм тӀури яхэтӀысхьэжащ, жьапщэри увыӀэжащ. 33ЩыувыӀэжым, кхъуафэжьейм исхэр лъэгуажьэмыщхьэу Хьисэ и пащхьэм итӀысхьэри, жаӀащ:

– ИпэжыпӀэкӀэ, уэ Тхьэм ури-Къуэщ.

Геннисарет хэкум Хьисэ сымаджэхэр зэрыщигъэхъужар

(Марк 6:53-56)

34Гуэлым зэпрыкӀри, Геннисарет нэсащ. 35А щӀыпӀэм щыпсэухэм Хьисэ къыщацӀыхужым, а хэкум дэнэкӀи ис цӀыхухэм хъыбар ирагъащӀэри, сымаджэу ис псори абы къыхуашащ. 36НэгъуэщӀ мыхъуми, Хьисэ и щыгъын кӀапэм иригъэӀусэну лъаӀуэрт сымаджэхэр, щыгъын кӀапэм еӀуса псори узыншэ хъужырт.

Currently Selected:

Маттэ 14: KbdNTGP2017

Highlight

Copy