Лука 2

2 къаьм

Иса авараг ахъийо водо

1Гьогло водла̄ъ Август къайсарила амролакьа дуниялликьа гаьгьийа къацӀцӀа̄ аьдамла ча̄хал нуцӀос зукъона гей. 2Вагьли аьдамла ча̄хийолъи зукъона гей аьᵸйдда̄ш, Квиринийли Шамлиъ наиблъи йогьцала замалла̄ъ. 3МекьейолӀо къацӀцӀа̄ гьӣ-гьидела шагьарба̄ъ жуво̄л чахиллал. 4Галилеялис Назарет шагьарбаъаш аьгъиъна Усупна Ягьудияллиъ БетлегьемлӀо нисойо Давудила шагьарбаъ кьодо эᵸкьейо жу чахиллал, судлӀо нисода гьули Давудила насло-зуриятлисна билӀосна сукӀо зукъойо. 5Гьолцогъой къацӀо зукъойо гьолцол магьар гулло оᵸх гаьгьийо ахъо Мариянна. 6Гьулиъ гьоддо̄л мокъолъ, гьоглӀол къова ахъал мех мокъойо. 7Марияни о̄йо аьᵸйдда̄ш къова, оьжо. Бета къӣла̄ъна оьлӀна голло гьолълъо гьули синакӀбаъ, жуво̄л бецал билӀоъ маьче михъаъалъ.

Малаиклана века̄на

8ГьоглӀо мицаъ зувакъона гей авлахълиъ нише гьидеш боцӀи богъоцас века̄. 9Гьоглодой Бичаслис малаик оᵸкъойо, БетӀергьаллила Нурли гангъизи бо̄йо гьолло̄л, гьолълъохъа века̄на йилӀа гьийабачӀейо. 10Малаикли нисос века̄хъа:

– ГьийабацӀа̄къа, до мизол бакъойо къацӀцӀола аьламлил бахъцас букъо рохел. 11Жейса Давудила шагьарбаъ ахъна гей Аллагьли аьдамла тиса ба̄гъал э̄ᵸйо Кьодда̄с Масигь. 12Гьуна, миже вагьалълъокьа боьважаллъийо аьламат: мизол иᵸхъос синакӀбаъ оьлӀна голло къова.

13Гелокьасзу малаиклигъой къацӀо йоᵸкъос гьаᵸсаъла агьлолас йукъо гьаз. Аллагьлил тасбигьна йогьна гьолло нисос:

14– Гьаᵸсаъла Аллагьлил рецна,

ЛӀийо дуниялликьа Аллагьли цӀоб гулла̄л – рекъелна!

15Малаикла гьаᵸсаъ мекьена муьгъатта̄, века̄ сидхъа гьоᵸсо нисос:

– БетӀергьалли илол тухъал битӀилло вагьдо хабарна, гьулиъ йахъийо жона йикъелал Бетлегьемлиъ иле мекьал.

16Вагьаллиъисзу кьапӀун мекьейа̄ гьоллол, мийахъос Мариянна, Усупна, синакӀбаъ укилло къована. 17Къова эга̄йоназу века̄ нисос, къова ахъийас хабар гьидел малаикли илгьам бо̄йолӀо. 18Гьодлохъа энекзи бахъийа̄ къацӀцӀа̄ аьдамла аьжаиб ба̄хъна гьихбалъос века̄ нисойо жойлакьа. 19Нисова жойлаш маънана богьна, Марияни шоваълечӀе йакӀкьа йовахийо гьолло шибаблис йаьжбо. 20Малаикли нисогъа гьидел тухъанна бега̄нна битӀилло хабар битӀун михъолъ, Аллагьлил рецна тасбигьна богьна века̄ кьа̄ь боьвачош.

Исал суннат бо̄йо

21БелӀен водиъис къовал суннат бо̄слаъ, гьолцокьа Иса ца̄ᵸ гулца. Вагьли ца̄ᵸ зукъойо малаикли Мариян оᵸх гаьгьийо йахъал аьᵸйда̄ гулалӀо нисойо ца̄ᵸ.

Иса Аллагьлила билӀоъ акъойо

22Мусала къанонликьа гьогго̄л ма̄цолцас водбо йоᵸвакъолъ, гьолло оьжо Иерусалимлиъ акъос БетӀергьаллил назро#2:22 Назро – Аллагьлил нилӀанна йованна нуцӀойо тӀаддаб илагьияб жо. огьна нилӀал. (23Аллагьлила амролакьа ийола сиᵸйаъас гисакийо шибаб абодда̄с насло БетӀергьаллил назролъилаъ икъелца зукъона.) 24Вагьалълъо динияб къанонликьа къурбаллил мухал нуцӀос зукъона гей къона ванаъас илба, йаги илбалис къона лӀапан.

25Гьуна вагьалълъо мехлаъ, Иерусалимлиъ зукъона гей СимеонлӀо нисойо сукӀо. Гьули зукъона динияб муъмин ва Израиллис халкъ БетӀергьалли тапшур боваллакьа йакӀо гаьгьийо сукӀо. Гьолцогъой зукъона Илагьияб Ругьна. 26Гьолцол Илагьияб Ругьли тухъал йитӀилло жу Бичаслис Масигь эгайчӀе угъаъцаслъи. 27ВагьаглӀо водиъ гьули Илагьияб Ругьли оᵸкъолло Аллагьлила билӀоъ. Ийо-абона акъос итӀино Иса гьулиъ, Гьолцол бовал нуцӀойо динияб аьдат бовал. 28Симеони окчиш Гьули ко̄ъ, бета Аллагьлил рецна богьна нисос:

Симеони муьгъалӀ йахъцас жо нисос

29– Йа̄ Рабби дие БетӀергьан, до Дибо лагъ, мокъола дил къадар до угъал, Ми нисова йаьжкьа рекъенна богьна. 30-31Ми къацӀцӀола халкъилал йикъалъгъа гьаьдур йо̄йо хъосарлъи йега̄йо диела гьаьйда̄л, 32мажусла̄л канлъи-лъай, дибола Израил халкъилал рецна къадрона.

33Оьждикьас Симеони вагьла̄ нисолъ, ийо-або гьайран-гьикмат ба̄хъийо. 34Гьоллол доьъана богьна Симеони нисос Мариянхъа, оьждила ийохъа:

– Гьуна, вагьацо оьждиъкьа̄ телида̄с Израил халкъилас аьдамла бейакца, телида̄с кьоддаба̄кца, вагьди къова ахъца Аллагьлис аьламатцой, амма тели аьдамла гьолцол данде бечеш, 35– дибона йакӀо балъаййахъа лъукъзи йахъца, – телилас йакӀиъ гаьгьийа̄ пикрована загьир йа̄хъалъгъа.

Гьаннати муьгъалӀ йахъцас жо нисос

36Зукъойо гьулиъ гьиниъ караматлъи гаьгьийо Гьаннат – Пенуэлис кид, Ашерила кьибиллиъис, йилӀа ицлолъийо аьдам. Гьинила бетӀергьаллигъой ахъо йеᵸкьена муьгъатта̄ алӀна лӀи йагъос. 37БелӀнайигна оьᵸкъона лӀи йеᵸкьецал къоролай нитоназу Аллагьлила билӀоъос йолъаъас зукъона гей нишена-хискьана БетӀергьаллил какна-кӀална йогьна, тӀаъат-ибадатликьа йечена. 38Вагьалълъо мехлаъ гьолълъо Аллагьлил рец-бакъ богьна ме̄ш зукъойо Исас хабар, Иерусалим тапшур боваллакьа йакӀо гаьгьийа къацӀола аьдамла̄л.

Кьа̄ь Назаретлиъ мекьейо

39Бета гьолло̄л, БетӀергьаллила къанонликьа бовал нуцӀойо аьдатна богьна, мекьена мокъос Галилеялиъ, гьидела шагьар Назаретлиъ. 40ИтӀино укълъис зукъойо, къуватабна аькъилабна ахъца зукъойо, Аллагьлис баркат зукъойо Гьолцоъ.

АцӀона къонлӀис Иса Аллагьлила билӀоъ

41Шибаб лӀиъ Гьолцос ийо-або мекьа̄гьийо Иерусалимлиъ ПасхалӀо нисоцала ид-водил. 42Гьолцол ацӀона къона лӀи йеᵸкьелъ, аьдатликьа ид-водил гьолло̄л мекьейо кьодо Иерусалимлиъ. 43Бета ид-водо йолъона муьгъатта̄ гьолло̄л кьа̄ь мекьейо, гьихлъос гьоллос насло Иса Иерусалимлиъ; гьули гьихлъо̄лъи икъаъас ийолна аболна. 44ГицӀийолӀо гьодлол Гьули го̄слӀона бадлогъой. ЙалӀокъе̄ш йагъойо гьино йолъона муьгъатта̄, муьхобалъийолӀо гьолло̄л гьули иᵸзал аьгарлъилаъна бега-бийакъейа̄ъна. 45Гьулина иᵸхъечӀе, кьа̄ь кӀаьймуьхона мекьейолӀо гьолло̄л Иерусалимлиъ гьолцогъойна миздабана. 46Лъанасла водиъ Гьули иᵸхъона гей Аллагьлила билӀоъ муалимла̄ъ алӀо къе̄на эчена, гьоглохъа энекзи ахъна гьоглол суалла нийаццас. 47КъацӀцӀа̄ энекзи бахъийа гьайран-гьикмат бовагьца зукъона гьолцола аᵸкълолана жавабла̄на. 48Гьули эгалъ, ийо-або гьикмат ба̄хъийо; гьолцола ийо оьждихъа нисос:

– Йа̄ дие оьжо, сийод ми илол йо̄йо. Гьуна, дибо абона дона йукъа пашманлъилаъ ми иᵸзийо.

49Гьолцо гьоллохъа нисос:

– Суд миже до иᵸзал нуцӀос? Мизол икъаъасди зукъойо до диела Абола билӀоъ ахъал нуцӀоцаслъи?

50Амма ийо-абол биджи йахъеэш гьолцо нисо̄ йаьжла̄ш маъна. 51Бета Гьули аьгъиъна эᵸкьейо гьоллогъой лӀийо Назаретлиъ. Гьули ийо-або нисогъа уьᵸхо-аьᵸхейо. Ийона гьогцос йаьжбо шоваълечӀе йакӀкьа йовахийо.

52Иса укълъийо, аьдамла̄ла аᵸкъло-пикролаъ оᵸкъойо, Аллагьлинна аьдамла̄нна Гьули йилӀа атӀийо.

Currently Selected:

Лука 2: KapPROLUK

Highlight

Copy