Maqkuv 7
7
Tawqka Lef-euq Zanroer
Mt 15:1-20
1Khoerngae, Paqliqsaer deuq hawr-eu Yeqlursaqlaeq-anr nae oe-euq zanr maeq-eu heumyav ghaq, Yeqsur jawr-eu gar uiqle-euq mae. 2Aqyawfmaf, Yeqsur-euq zaqlanr tiqpavnav deuq, aqlaf maqshawr-aer hawq dzaq-eu gar ya’mawr-awr aerdoer-eu mae. Aqlaf maqshawr-eu laer aer-eu-aq, zanr jav-eu lof-aer aqlaf maqdzuif-euq gar aer-eu mae. 3Paqliqsaer deuq hawr-eu Yurdav tsawrhaq dawqtawvluf, tsawrmawq deuq nae tawqka lef-euq zanroer jav-eu lof-aer, aqlaf maqdzuif-euq khoer-aq hawq maqdzaq-a. 4Aqyawfmaf laev dzuf-ir-awr ghoflar ngae khawf, ircuf maqdzuif-euq khoer-aq, hawq maqdzaq-a. Khoeruqtaf, ircuf khmqmaq, irpuq hawr-eu guiqshuir khmqmaq deuq-anr jov-eu zanr, khawqdaq laeftsiq-eu zanr hawr-eu zanr nuijeq ghawqmya ni-anr aqyawfmaf tawqluf-eu mae.
5Khoerngae, Paqliqsaer deuq hawr-eu zanr maeq-eu deuq, Yeqsur-anr narhaq-eu, “Aqjeq mirnae nawq-euq zaqlanr deuq, tsawrmawq deuq nae tawqka lef-euq zanroer-anr maq cantae-aer, aqlaf maqshawrni hawq dzaq-eu la?”
6Yeqsur, aqyawf maf-anr aerkhof naeq-eu lafkhoer heulof-aer aer-eu mae, “Yawmuiq janrgeuf-eu tsawrhaq deuq-or! Irsaqyar nae nawmaf-euq garkawv Miqyaer gharduq ngaeqdan taq-euq-aq, tsaq duidui ngar-a.
Yaerbof-euq lafkhoer heulof-aer boftaq-euq mae:
‘Tsawrhaq heudeuq-aq, khaqmae, ngaq-anr taqhuiq taqmanr-eu khawf,
Aqyawf maf-euq nuima, ngaq-anr nae zawr kaq-eu mae.
7 Tsawrhaq-euq zanrtaq khoftaq deuq jan-eu jeq lof-aer maeq-eu mirnae,
Aqyawfmaf, ngaq-anr uqduq tanq-eu-aq, tiqjeq-iq gardanr maqtsoeq-a.’ (Isy 29:13)
8Nawmaf-aq, Miqyaer-euq zanrdawq khofdawq-anr byaerdzae-awr, tsawrhaq nae tawqka lef-euq zanroer heudeuq-anr zifdanni tuvtaeq taq-euq mae. Irpuq, ircuf khmqmaq hawr-eu guiqshuir khmqmaq deuq-anr jov-eu zanr hawr-eu zanr nuijeq ghawqmya ni-anr tawqluf-eu mae.”
9Yeqsur, aqyawf maf-anr heulof-aer par aernaeq-euq mae, “Nawmaf-aq, nawmaf-euq zanroer tawqnya’ni, Miqyaer-euq zanrdawq khofdawq-anr byaerdzae-eu beu.
10Morseq heulof-aer aertaq-euq mae, ‘Nawqma nawqda-anr yawzeu baw-awq.’ (Di 20:12; Dm 5:16)
‘Yawqha-euq aqma aqda-anr yaqkhaer yaq-eu tsawrhaq-aq, yabi diqsaef-eu mae.’ (Di 21:17; Lb 20:9; Dd 20:20)
11Aerkhawf, nawmaf aer-eu, ‘Tsawrhaq tiq ghaq, yawqha-euq aqma aqda-anr, “Nawq-anr bif paq-aer ghae-eu jeq, ngar, Gawqbaq laer kur-eu lafsawq lof-aer Miqyaer-anr bifnaeq dzeur-euq ma” ’ laer aernaeq ghaq-euq nar-aq, 12nawmaf, tsawrhaq khoerghaq, yawqha-euq aqma aqda-anr tiqjeq-iq maqpar bi cawba-a. 13Nawmaf khoerlof-aer aer-awr, zanroer tawq-eu mirnae, Miqyaer-euq dawq byov-ir byawq-ir ni janr-eu mae. Nawmaf khoerlof-aer ghae-eu zanroer ghawqmya’ni tawqluf-eu mae.”
Tsawrhaq-anr Bi Jawflar Nya-eu Jeq
Mt 15:10-20
14Khoernar-aq, Yeqsur, tsawrhaq ghawqmya ni-anr kur-awr heulof-aer aernaeq-euq mae, “Nawmaf dawqtawvluf ngaq-euq dawq-anr narhaq-awr ghovshaw geuf-awq. 15Lafnyir paw nae anr-ir-eu jeq-aq, tsawrhaq-anr maqshawrni bi pyeuflar nya-eu maqngeur-a. Lafkhoer paw nae dovlar-eu jeq taef-aer tsawrhaq-anr maqshawrni bi pyeuflar nya-eu mae. 16Naqbawr tsof-awr khar gaqnya-eu tsawrhaq narhaq-awq!”
17Yeqsur, tsawrhaq armaf mafma-anr ghawq-awr, irkanr urler ngae, aqyawf-euq zaqlanr deuq, aqyawf-anr yawjeq majeq dawq khoerdawq-euq dawqtsuif narhaq-eu mae. 18Yeqsur, aqyawf maf-anr heulof-aer aernaeq-euq mae, “Nawmaf keuvni maq ghovshawnya nya siq lor? Lafnyir paw nae kharanr-ir-eu tiqjeq-iq tsawrhaq-anr maqshawrni maqbi pyeuflar nya-a laer maq mawrlar nya siq laq? 19Aqjeq mirnae aernar-aq, aqyawf-euq nuima-euq lafkhoer anr-ir-eu maqngeur-aer, aqyawf-euq uqmav-euq lafkhoer anr-ir-awr, lafnyir paw irdov dzae-eu mae.” (Yeqsur khoerlof-aer aer-eu-aq, dzaqdzaq dawrdawr dawqtawvluf yawshawr mae laer aermawf-eu mae).
20Yeqsur heulof-aer paraer-eu mae: “Tsawrhaq-euq lafkhoer nae dovlar-eu jeq, tsawrhaq-anr maqshawrni bi pyeuflar nya-eu mae. 21Aqjeq mirnae aernar-aq, tsawrhaq-euq nuima-euq lafkhoer nae heudeuq dovlar-eu mae, Nuinoeq yawdoer, banq-awr joe-eu, banq-awr muv-eu, tsawrhaq-anr saef-eu, 22smrkhoeq khoeq-eu, aqcawq-euq myawq-anr maerjuir juir-eu, yawcawv jeq mr-eu, jaqmyawf myawf-eu, jawflafni daef-eu, myavnav nav-eu, yaeqbawq saerlu-aer aer-eu, nuima huiq-eu, aqdzawq argan gan-eu, 23yawdoer heudeuq dawqtawvluf, tsawrhaq-euq lafkhoer paw nae dovlar-awr, tsawrhaq-anr maqshawrni bi pyeuflar nya-eu mae.”
Heqlaqsarma Tiq Ghaq-euq Nuijan
Mt 15:21-28
24Khoernar-aq, Yeqsur tur-awr khoergar nae dov-ir-awr, Durlu mirkhanq hawr-eu Sirdoq mirkhanq paw ir-euq mae. Aqyawf, nymr tiq nymr-anr ur-ir-awr, aqyawf khoergar jawr-eu garkawv aqcawq-anr maqbi siqnya mawf-a. Aerkhawf, aqyawf maq jawrzaf nya-a. 25Naef yawjawf ur-eu aqbur tiq ghaq-euq aqma, Yeqsur-euq garkawv yagaq-euq naeq-aer lar-awr, Yeqsur-euq maeqshi pawqtsuif pawqdmq dmq-euq mae. 26Aqma khoerghaq-aq, Surliv Pirniv mirkhanq-anr daefle-euq Heqlaqsarma mae. Aqyawf, ‘Ngaqbur-euq lafkhoer ur-eu naef-anr taedov naeqlaf-awq’ laer, Yeqsur-anr shar duidui-eu mae.
27Yeqsur, aqyawf-anr aernaeq-eu, “Zaqdeuq-anr jeqhu yabi dzaqdaev-eu mae. Zaq dzaq-eu kaqmur yur-awr, aqkuiq-anr dzaenaeq-awr bidzaq-eu-aq maqtsaq-a.”
28Khoerngae, aqma khoerghaq aerkhof-eu, “Sanqpaq-or, ngeur mae. Aerkhawf, hawqje-euq uqmov jawr-eu aqkuiq khawf, zaq nae dzaqdzae-euq jeq-anr ghovdzaq-eu mae.”
29Khoerngae, Yeqsur, aqyawf-anr aernaeq-eu, “Nawq-euq dawq teudawq-euq baqda’nae, nawr ghof-ir-awq, nawqbur-anr ur-eu naef dov-ir dzeur-euq mae.”
30Khoernar-aq, aqyawf irkanr ghofkeuv-ir ngae, naef khoermawr dov-ir-awr, aqyawf-euq aqbur, yufzar-anr yufluf-eu gar ya’mawr-euq mae.
Dawq Maq Ngaeqnya-eu Naqbawq Tiq Ghaq
31Khoernar-aq, Yeqsur, Durlu mirkhanq-anr nae dov-ir-awr, Sirdoq mirkhanq-anr nae Deqgaqborlir mirkhanq-anr irpav-awr, Gaqliqlaer lan-anr irkeuv-euq mae. 32Khoerngae, aqcawq, dawq maq ngaeqlawv nya-eu naqbawq tiq ghaq-anr Yeqsur jawr-eu gar sheuqlaf-awr, Yeqsur-anr aqyawf-euq khoertav aqlaf bafdav naeq-awq laer shar-eu mae.
33Yeqsur, aqyawf-anr tsawrhaq armaf mafma-euq lafkhoer nae sheuqceuvdov ghae-euq mae. Khoernar-aq, aqyawf-euq naqbawr-anr lafnoer soeqanr-awr, duqkhaq khashaeq-awr, aqyawf-euq maeqlar-anr toeqciv naeq-euq mae.
34Khoernar-aq, Yeqsur mq paw haw-awr, saf safma ghawrdav-awr nae, “Irpaqdaq” laer aqyawf-anr aernaeq-euq mae. Dawqtsuif-aq, “Panlar-awq” laer aermawf-eu mae. 35Khoerngae, tsawrhaq khoerghaq-euq naqbawr tiqpov taef-aer panlar-awr, maeqlar juvlar-awr nae, aqyawf dawq ngaeqnya lar-euq mae.
36Khoernar-aq, garkawv heu tiqghaq-anr-iq maqya ja’naeqni, Yeqsur, aqyawf maf-anr dawq bif-euq mae. Aerkhawf, aqyawf, dawq ngaeq-aer bif nar-aq, aqyawfmaf ngaeq-aer jabyan ghae-euq mae. 37Aqyawfmaf maq aernya paq-aer zanq duidui ler-awr aer-eu, “Aqyawf nae kharmr-euq yawqjeq navluf arnavni muiq-eu nga. Naqbawq deuq gaqnya lar-awr, aqdzawq deuq, dawq ngaeqnya lar-eu gar keuvni, aqyawf janrnya-eu nga.”
Currently Selected:
Maqkuv 7: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
