Maqkuv 5
5
Naef Ur-eu Gaqdaqlar Tsawrhaq
Mt 8:28-34; Lk 8:26-39
1Khoernar-aq, aqyawfmaf, lan-euq khoerpaw baq-anr jav-eu Gaqdaqlar mirkhanq-anr irkeuv-euq mae. 2Yeqsur, lawq-anr nae oeka-euq naeq-aer, naef yawjawf ur-eu tsawrhaq tiq ghaq lmqbymr-anr nae dovle-awr, Yeqsur-anr dzoerle-euq mae. 3Tsawrhaq heughaq-aq, lmqbymr-anr taef-aer jawr-eu mae. Tiqghaq-iq aqyawf-anr maq paftawftaq nya-a. Shmrcav nae paf-eu khawf maq paftawftaq nya-a.
4Aqcawq ghawqmya pov aqyawf-anr kuirtawf tawf-awr, shmrcav paf-euq khawf, aqyawf, shmrcav khoer-anr gheutsaev-awr, aqyawf-euq aqkuir-anr tawftaq-euq kuirtawf-anr khawf teuvtsaev-eu mae. Tiqghaq-iq aqyawf-anr maq lavyan nya-a. 5Aqyawf uqcif nan’ghanr maqaer, yawqjawr navluf lmqbymr hawr-eu gawqjawq-anr gurgur-aer can-eu uqtaf, khaqlo nae yawqhar yawqha yaeq-eu mae.
6Tsawrhaq heughaq garmanr kaq-eu gar nae, Yeqsur-anr hawmawr-awr, Yeqsur jawr-eu gar caevghae-awr uqduq tanq-euq mae. 7Khoernar-aq, aqyawf tersar yawkhav-aer gur-eu, “Gor duidui-eu Miqyaer-euq Zaqyo Yeqsur-or! Ngar, nawq naeq-aer aqjeq taf-eu la? Ngaq-anr taq khaeqnaeqlaf laer ngar, Miqyaer-anr ghoe-awr nawq-anr shar-eu ma.”
8Aqjeq mirnae aernar-aq, Yeqsur, aqyawf-anr heulof-aer aernaeq-euq mae, “Naef yawjawf-or! Aqyawf-euq lafkhoer nae dovle-awq.”
9Yeqsur, aqyawf-anr narhaq-eu, “Nawq-euq tsawrmyanr aqjeq laer le?” Khoerngae, aqyawf aer-eu, “Nga’maf-aq, zawr myaq-eu mirnae, ngaq-euq tsawrmyanr-aq, Guirmaf laer kur-eu ma.”
10Aqyawf maf-anr Mirkhanq heukhanq-anr nae taq taedzae naeqlaf laer aqyawf, Yeqsur-anr shar duidui-euq mae.
11Gawqjawq khoerjawq-euq baqgha-anr aqzaf ghawqmya’ni gavdzaq luf-eu mae. 12Naef khoerdeuq dawqtawvluf, Yeqsur-anr shar-eu, “Nga’maf-anr aqzaf khoermaf-euq lafkhoer biur-ir naeqlaf-awq.”
13Yeqsur, aqyawf maf-anr pyaeq-awr bidov-ir-euq naeq-aer, naef yawjawf khoerdeuq, aqzaf-euq lafkhoer urler-euq mae. Khoerngae, aqzaf khoermaf baqghashaq-anr nae lan-anr caevka ghae-awr, lan-anr gapufsaef jir-euq mae. Aqzaf khoerdeuq-aq 2,000 mawr aerghaqni byan-eu mae.
14Aqzaf bo-eu deuq caevghof ghae-awr, garkawv khoer meuq hawr-eu pudeuq-anr dzawrnaeq-ir-euq mae. Garkawv khoer aqjox-aer pyeuflar-euq nga laer yasiqni tsawrhaq tiqdeuq hawlar-euq mae. 15Aqyawfmaf, Yeqsur jawr-eu gar larkeuv ngae, naef-euq guirmaf ur-euq tsawrhaq khoerghaq maeqtsoeq dm-awr, nuima muiqkhof lar-awr nae nuirluf-eu gar ya’mawr ngae guv duidui-ir-euq mae. 16Yawbae ngae nae mawrluf-eu tsawrhaq deuq, naef ur-euq khoerghaq-euq garkawv hawr-eu aqzaf khoerdeuq-anr aqjox-aer pyeuflar-euq garkawv, hawlar-euq deuq-anr dzawrnaeq-euq mae. 17Khoernar-aq, aqyawfmaf ardanq bae-awr, Yeqsur-anr aqyawf maf-euq jawrkhanq-anr nae dov-ir naeqlaf laer shar-eu mae.
18Yeqsur, lawq-anr urlerluf ngae, naef urhaw-euq khoerghaq, Yeqsur naeq-aer bi’ir naeqlaf laer shar-eu mae. 19Aerkhawf, Yeqsur, aqyawf-anr maqbi cantae larni aernaeq-eu, “Nawr, irkanr ghof-ir-awr, Sanqpaq Miqyaer nae nawq-anr arnavni cawba naeqlaf-euq garkawv hawr-eu aqyawf, nawq-anr ghawqshaq arnavni gaqnaeq laf-euq garkawv dzawrnaeq-ir-awq.”
20Khoernar-aq, aqyawf ghof-ir-awr, Yeqsur, aqyawf-anr arnavni cawba naeqlaf-euq garkawv, Deqgaqborlir mirkhanq doeni dzawrnaeq-euq mirnae, tsawrhaq dawqtawvluf zanqler-euq mae.
Yaqirlu-euq Zaqmiq Hawr-eu Shiq Dovdov-aer Nar-eu Zaqmiq Aqbur
Mt 9:18-26; Lk 8:40-56
21Yeqsur, lawq-anr ur-awr, lan-euq khoerpaw baq-anr partsaev-ir-euq mae. Aqyawf, lan landzer jawr ngae, myaq duidui-eu tsawrhaq baqmaf aqyawf jawr-eu gar uiqle-euq mae. 22Khoerngae, Yaqirlu laer kur-eu zanrdawq khawqnymr-euq aqyuif tiq ghaq lar-euq mae. Aqyawf, Yeqsur-anr ya’mawr-euq naeq-aer, aqyawf-euq maeqshi awbyav-awr, 23aqyawf-anr shar duidui-eu, “Ngaq-euq aqburzaq shir shaw-iq mae. Aqyawf taqler-awr, yawdaef yadaefni, nawr, aqyawf-euq khoertav aqlaf bafdav naeqle sher-eq.”
24Khoermirnae, Yeqsur, aqyawf naeq-aer ir-euq mae.
Tsawrhaq armaf mafma, aqyawf-euq maeqnan tanqsuf tanqsuf-aer cantae luf-eu mae. 25Khoergar, 12 khof byanni shiq dovdov-aer narluf-eu zaqmiq aqbur tiq ghaq jawr-eu mae. 26Nargawr lavsav-eu tsawrhaq ghawqmya ghaq-euq aqlaf-euq lafkhoer ghawqmya jeq yashaq yadaq-awr, aqyawf kharjav-eu jeq zmq-awr lavsav-euq khawf, tiqpawf-iq maq muiqlar-euq uqtaf, par nardzaeq lar-euq mae. 27Aqyawf, Yeqsur-euq garkawv ya gaqhaw-euq mirnae, tsawrhaq armaf mafma-euq ghanrcae Yeqsur-euq maeqnan tanqur lef-awr, paerkhanq-anr toeqciv ler-euq mae. 28Aqjeq mirnae aernar-aq, aqyawf aer-eu, “Ngar, aqyawf-euq paerkhanq-anr ya toeqciv-euq taef khawf taqler taef-a.”
29Khoerngae, aqyawf daqluf-eu shiq dov-eu tsirler-awr shaqzanq nargawr taqler-euq mir-a laer aqyawf-euq mawrdo-anr siqler-euq mae.
30Khoerngae, Yeqsur tiqpov taef-aer aqyawf-euq lafkhoer nae baoq dov-ir-euq mir-a laer siqler-awr, tsawrhaq armaf mafma-euq ghanrcae narkhan paw ciqpyawr-awr nae narhaq-eu, “Ngaq-euq paerkhanq-anr toeqciv-euq aqsur ghaq la?”
31Zaqlanr deuq, aqyawf-anr aernaeq-eu, “Tsawrhaq armaf mafma, nawq-anr tanqsuflar luf-eu gar nawr mawrluf-eu khawf, ‘Ngaq-anr aqsur ghaq toeqciv-euq la?’ laer nawr par narhaq-eu le laq?”
32Khoerngae, Yeqsur, aqyawf-anr toeqciv-euq zaqmiq aqbur khoerghaq-anr ya’mawrni jawqjawq-aer hawluf-eu mae. 33Zaqmiq aqbur khoerghaq, aqyawf-anr aqjox-aer pyeuflar-euq gar siqnya-eu mirnae, guv-awr yawdzuq dzuqluf-eu mae. Khoernar-aq, aqyawf oe-awr, Yeqsur-euq maeqshi awbyav-awr nae garkawv dawqtawvluf, aqyawf-anr dawrcoeni aernaeq-euq mae. 34Khoerngae, Yeqsur, aqyawf-anr aernaeq-eu, “Zaqmiq-or! Nawq-euq jan-eu jeq nae, nawq-anr bi taqler-euq mae. Nuima sarlaevni ghof-ir-awq. Nawq-euq shaqzanq nargawr taqler-euq mae.”
35Yeqsur khoerlof-aer aernaeqluf ngae, zanrdawq khawqnymr-euq aqyuif khoerghaq-euq nymr-anr nae tiqdeuq lar-awr aer-eu, “Nawqbur shirtsaev dzeur-euq mae. Saqlaq-anr taqpar lavbanq.”
36Yeqsur dawq khoerdeuq-anr yagaq-euq naeq-aer zanrdawq khawqnymr-euq aqyuif khoerghaq-anr aernaeq-eu, “Khanq taqlanr, jan nar-aq ghaq-ar.”
37Khoernar-aq, Beqtuvluv, Yaqkov hawr-eu Yaqkov-euq maernmr Yorhaq-anr taef-aer sheuq-awr ir-euq mae. Nuideuq-anr-aq, aqyawf-euq maeqnan maqbi cantae le-aq. 38Yeqsur, zanrdawq khawqnymr-euq aqyuif khoerghaq-euq nymr-anr irkeuv ngae, tsawrngoer uiui-aer ngoerngoer-aer, banqgha lawfgha luf-eu gar ya’mawr-euq mae. 39Khoerngae, Yeqsur, lafkhoer urler-awr aqyawf maf-anr aernaeq-eu, “Nawmaf aqjeq mirnae ngoerngoer-aer banqgha lawfgha luf-eu le? Aqburzaq heughaq shir-euq maqngeur-a, yufkhav luf-eu taef mae.”
40Khoerngae, aqyawfmaf, Yeqsur-anr uir-eu mae. Yeqsur, aqyawfmaf dawqtawv luf-anr taedov jir-awr, zaq khoerghaq-euq aqma aqda hawr-eu aqyawf-euq maeqnan cantae lef-euq tsawrhaq sheuq-awr nae, aqburzaq khoerghaq baftaq-euq tsanr-anr urler-euq mae. 41Khoernar-aq, Yeqsur, aqburzaq khoerghaq-euq aqlaf-anr nyaeftaeq-awr aernaeq-eu, “Daqlirdaq gurmir.” Dawqtsuif-aq, “Aqburzaq-or! Turlar-awq laer ngar, nawq-anr aernaeq ma” laer aermawf-eu mae.
42Khoerngae, aqburzaq khoerghaq, aqyawf ngaejawr nae turlar-awr can-eu mae. Aqyawf-aq, 12 khof khawvlar-euq mae. Tsawrhaq khoerdeuq maq aernya paq-aer zanq duidui ler-euq mae. 43Garkawv heu tiqghaq-anr-iq maqya bisiqni, Yeqsur, aqyawf maf-anr dawq yawkhav-aer bif-awr, aqyawf-anr tiqjeqpaq bidzaqni khawf dawq bif-euq mae.
Currently Selected:
Maqkuv 5: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
