Maqkuv 1
1
Yorhaq Dawqmaeq Maeq-eu
Mt 3:1-12; Lk 3:1-20; Yh 1:6-8,15-37
1Miqyaer-euq Zaqyo, Yeqsur Kali-euq guiqlanqdawq ardanq heulof-aer bae-euq mae. 2Miqyaer gharduq ngaeqdan-eu Irsaqyar heulof-aer boftaq-euq mae:
“Hawde-eq! Ngar, nawq-euq garma bi shardanr-eu gharduq,
Nawq-euq maeqhu ngaq-euq ghaqzaq ghaqkhaer-anr khaerghae-awr bi’ir ma. (Mlk 3:1)
3 Tsawrhaq tiq ghaq bawrtsanq bawrdanr-anr jawr-awr gur-eu,
‘ Sanqpaq Miqyaer -euq gharduq garma shardanr-awr, aqyawf-euq cankawv dawrcoeni shardawr-awq.’ ” (Isy 40:3)
4Bartirsaq mrnaeq-eu Yorhaq bawrtsanq bawrdanr-anr dovle-awr, Miqyaer, iqbax pyaeq-eu jeq za’ni, noeqpov noeqpar-awr bartirsaq hageuf-eu garkawv dawqmaeq maeqluf-eu mae. 5Yurdav mirkhanq doeni jawr-eu tsawrhaq hawr-eu Yeqlursaqlaeq-anr jawr-eu tsawrhaq dawqtawvluf, Yorhaq jawr-eu gar ir-awr, aqyawfmaf, yawqha-euq iqbax jadov jadov-aer, Yawrdaq lawrbaq-euq lafkhoer Yorhaq nae bartirsaq bi mrnaeq-euq mae. 6Yorhaq-aq, lawtaw cafhm-euq maeqtsoeq dm-awr, jof-anr shaqkhov jofpaf paftaq-awr nae, nyaevbanr hawr-eu bawrtsanq-euq byaquir dzaq-eu mae. 7Aqyawf dawqmaeq maeqmaeq-aer aer-eu, “Ngaq-euq maeqnan oeluf-eu ghaq-aq, ngaq-euq navmaqtser ghaq khavdzaeq-eu mae. Ngar-aq, awkhof-awr aqyawf-euq saeqnawv-euq arcav-anr tseuvpuir naeq-eu taef khawf maqgeux-a. 8Ngar, nawmaf-anr ircuf nae bartirsaq mrnaeq luf-eu ma. Aerkhawf, aqyawf-aq, nawmaf-anr Yawshawr Saflar nae bartirsaq mrnaeqlaf taef-a.”
Yeqsur Bartirsaq Hageuf-euq
Mt 3:13-17; Lk 3:21-22
9Khoerngae, heulof-aer pyeuflar-euq mae. Yeqsur, Gaqliqlaer mirkhanq Naqzaqlaer-anr nae oe-awr, Yawrdaq lawrbaq-euq lafkhoer Yorhaq nae bartirsaq bi mrnaeq-euq mae. 10Aqyawf, ircuf-anr nae dovlar-euq naeq-aer mq panlar-eu gar ya’mawr-awr, Yawshawr Saflar, khaqkhoeq lof-aer aqyawf-euq khoertav zafka le-euq mae. 11Khoernar-aq, mq-anr nae tersar ngaeqdov lef-eu, “Nawr-aq, ngar zawr gaq-eu ngaq-euq Zaqyo ma. Ngar, nawq-anr nuikhanrshir duidui ma.”
Yeqsur Murjur Jur-eu Gar Yadaq-euq
Mt 4:1-11; Lk 4:1-13
12Khoernar-aq, tiqpov taef-aer Yawshawr Saflar, Yeqsur-anr bawrtsanq bawrdanr-euq lafkhoer khaerghae-awr bi’ir-euq mae. 13Aqyawf bawrtsanq bawrdanr-anr 40 nan jawr ngae, naef Saqdaq, aqyawf-anr murjur jur-awr, bawrtsanq-euq jeqzaq yawghae deuq naeq-aer jawr-euq mae. Khoernar-aq, mqtav ghaqkhaer, aqyawf-anr ngaeqghae naeqle-euq mae.
Yeqsur Gar Mrdanq Bae-euq
Mt 4:12-17; Lk 4:14-15
14Yorhaq kuv-euq lafkhoer bi nyaefur ghaq-euq nar-aq, Yeqsur, Gaqliqlaer mirkhanq-anr lar-awr, Miqyaer uvlanr-eu garkawv guiqlanqdawq maeq-euq mae. 15Aqyawf aer-eu, “Aryamq tsaqlar-euq mae. Miqyaer uvlanr-eu jeq dawqpae keuvle taq-euq mae! Nawmaf noeqpov noeqpar-awr, guiqlanq dawq-anr jan-awq.”
Kurbae Bae-euq Zaqlanr Deuq
Mt 4:18-22; Lk 5:1-11
16Yeqsur, Gaqliqlaer lan landzer canluf ngae, Sirmoq hawr-eu aqyawf-euq maernmr Aqdaeqlaeq, lan-euq lafkhoer za dzaeluf-eu gar ya’mawr-euq mae. Aqnyaf nmr-aq, ngaqshaq nyaef-eu tsawrhaq mae. 17Khoerngae, Yeqsur, aqnyaf nmr-anr aernaeq-eu, “Ngaq-euq maeqnan cantae lar-awq. Ngar, nawnyaf-anr ngaqshaq pov-eu lof-aer, tsawrhaq-anr pov-eu tsawrhaq bigeuf ma.” 18Aqnyafnmr tiqpov taef-aer za byaerdzae yaf-awr, aqyawf-euq maeqnan cantae ghae-euq mae.
19Yeqsur maeqhu paw uicuiv par can’ghae ngae, Zeqbeqdaer-euq zaqyo Yaqkov hawr-eu aqyawf-euq aqnyir Yorhaq, lawq-euq lafkhoer za dofluf-eu gar ya’mawr-euq mae. 20Yeqsur, tiqpov taef-aer aqnyaf nmr-anr kur-euq mae. Khoerngae, aqnyafnmr, aqyawf nyaf-euq aqda Zeqbeqdaer hawr-eu ghaqmanr manrdzaq-eu deuq-anr lawq-euq lafkhoer byaerdzae yaf-awr, Yeqsur-euq maeqnan cantae ghae-euq mae.
Naef Yawjawf-anr Taedov-euq
Lk 4:31-37
21Aqyawfmaf Gaqbeqneqoq-anr le-euq mae. Landaw jawrnan ngae nan Yeqsur, zanrdawq khawqnymr-anr le’ur-awr maeqnaeq tsovnaeq-euq mae. 22Aqyawfmaf, Yeqsur maeqnaeq tsovnaeq-eu gar zanq duidui ler-euq mae. Aqjeq mirnae aernar-aq, aqyawf-aq, zanr maeq-eu deuq lof-aer maqngeurni, aryaq jav-eu tiq ghaq lof-aer maeqnaeq tsovnaeq-eu mae.
23Khoerngae, zanrdawq khawqnymr-euq lafkhoer jawr-eu tsawrhaq tiq ghaq-anr naef yawjawf urler-awr gur-eu mae. 24Aqyawf aer-eu, “Naqzaqlaer tsawrhaq Yeqsur-or! Nawr, nga’maf-anr aqjeq taf-eu le? Nga’maf-anr lavcawv le-euq le lor? Nawr aqsur ghaq-a laer ngar siqnya ma. Nawr-aq, Miqyaer-euq Yawshawr ghaq mae.”
25Khoerngae, Yeqsur, aqyawf-anr daeq-awr aernaeq-eu, “Aqcircu, teughaq-euq lafkhoer nae dovle-awq.” 26Naef yawjawf khoermawr, tsawrhaq khoerghaq-anr yawkhav-aer bi teuvlar-awr, gurkhav lef-awr nae dovle-euq mae. 27Tsawrhaq khoerdeuq dawqtawvluf zanqler jir-awr, aqyawf maf-euq yawkaq ja-eu, “Aqjeq aqjox-aer nga heu? Aqgar-euq dawqmaeq dawqtsov yawshuif nga? Aqyawf aryaq jav-eu lafkhoer naef yawjawf deuq-anr dawq bif ngae, naef yawjawf deuq khawf, aqyawf-euq dawq-anr narhaq geuf-eu nga.”
28Khoermirnae, Yeqsur-euq tsawrmyanr Gaqliqlaer mirkhanq jawqlaw jawrlawr doeni yawkawr-aer gaqdoe-ir-euq mae.
Yeqsur, Nargawr Lavtaq-euq
Mt 8:14-17; Lk 4:38-41
29Aqyawfmaf zanrdawq khawqnymr-anr nae dovle-euq nar-aq, Yaqkov hawr-eu Yorhaq naeq-aer tiqpov taef-aer Sirmoq hawr-eu Aqdaeqlaeq-euq nymr-euq lafkhoer urler-euq mae. 30Khoerngae, Sirmoq-euq aqmawq aqbur ghaq pyaqpyaq-aer yufluf-eu mae. Aqcawq, aqyawf pyaqluf-eu garkawv, Yeqsur-anr aernaeq-euq mae. 31Khoermirnae, Yeqsur, aqyawf-euq maeqshi le-awr, aqyawf-euq aqlaf-anr nyaeftaeq-awr nae gheuturnaeq ngae, pyaq-eu khoer lawq-ir-awr, Sirmoq-euq aqmawq, aqyawf maf-anr hawqbyawr lavdawv naeq-euq mae.
32Nanrma ga’anr-awr, uqcif cifleluf ngae, aqcawq nar-awr gawr-eu tsawrhaq dawqtawvluf hawr-eu naef ur-eu tsawrhaq, Yeqsur jawr-eu gar sheuqlaf-euq mae. 33Meuq-anr kharjawr-eu tsawrhaq, nymr-euq ghovkhaeq-anr uiqlar taq-euq mae. 34Khoerngae, Yeqsur nargawr ghawqmya jeq narluf-eu tsawrhaq ghawqmya ghaq-anr lavtaq naeq-euq uqtaf, naef khawf ghawqmya mawr taedov-euq mae. Naef khoerdeuq, aqyawf-anr siqnya-eu mirnae, Yeqsur, naef khoerdeuq-anr dawq maqbi ngaeq-aq.
Gaqliqlaer-anr Dawqmaeq Maeq-euq
Lk 4:42-44
35Yeqsur uqshawq yawnaf-aer tur-awr, cofngaerni ghae-eu jawrduq-anr dov-ir-awr, khoergar guiqlanq shar-euq mae.
36Sirmoq hawr-eu aqyawf naeq-aer jawr-eu deuq, Yeqsur-anr pov-ir-euq mae.
37Aqyawfmaf, Yeqsur-anr povmawr ngae, aqyawf-anr aernaeq-eu, “Yawqghaq navluf, nawq-anr povluf-eu mae.”
38Khoerngae, Yeqsur, aqyawf maf-anr aernaeq-eu, “Ngar, dawqpae jav-eu meuqdeuq pudeuq-anr khawf, dawqmaeq ya’maeqni, aqduimaf maeqhu paw ir kar-eur. Aqjeq mirnae aernar-aq, ngar heulof-aer mr-eu laer oe-euq ma.”
39Khoernar-aq, aqyawfmaf Gaqliqlaer mirkhanq doeni ir-awr, aqyawf maf-euq zanrdawq khawqnymr-euq lafkhoer dawqmaeq maeq-awr, naef-anr khawf taedov naeq-euq mae.
Yeqsur, Coiqdoi Bi Shawrlar-euq
Mt 8:2-4; Lk 5:12-16
40Khoerngae, coiqdoi nar-eu tiq ghaq, Yeqsur jawr-eu gar lar-awr, pawqtsuif pawqdmq dmq-awr nae tanqshar-eu, “Nawr janrmawf nar-aq, ngar shawrlarni, nawr janrnya mae.” 41Yeqsur, aqyawf-anr ghawqshaq hawgaq-awr, aqlaf cawqja-awr, aqyawf-euq khoertav toeqciv-awr nae aer-eu, “Ngar janrmawf mir-a. Nawr shawrlar-awq!” 42Yeqsur khoerlof-aer aerghaq-euq naeq-aer, khoerghaq-euq coiqdoi nargawr khoer, tiqpov taef-aer byovjir-awr shawrlar-euq mae. 43Khoernar-aq, Yeqsur, aqyawf-anr dawq yawkhav-aer bif-awr, bighof-ir-euq mae. 44Yeqsur, aqyawf-anr aernaeq-eu, “Nawr, tiqghaq-anr-iq tiqjeq-iq taq ja’naeq de-eq. Pirma jawr-eu gar le-awr, nawq-euq mawrdo-anr bi tsermrhaw ler-awq. Nawr shawrlar-euq gar aqcawq yasiqni, Morseq nae dawq biftaq-euq lof-aer lawrnaeq-eu jeq lawrler-awq.”
45Aerkhawf, aqyawf dov-ir-awr nae garkawv khoer yawkhav-aer jakhawq ghae-awr, yawqgar navluf gaqdoe-ir taq-euq mae. Khoermirnae, Yeqsur, meuq-euq lafkhoer byacaevni maqpar urler nya-aer, bawrtsanq doeni jawrluf ngae, kharngeur-eu gar jawr-eu tsawrhaq deuq, aqyawf jawr-eu gar lar-euq mae.
Currently Selected:
Maqkuv 1: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
