Maqtaeq 28
28
Yeqsur Ghofdaef Lar-euq
Mk 16:1-14; Lk 24:1-12; Yh 20:1-18
1Landaw jawrnan dzeur-awr, tiqjaw-euq lafkhoer yawbae ngae nan uqbya byataw, Maqliv Maqgaqdaqlar hawr-eu Maqliv laer kur-eu yawqghaqyawq lmqbymr-anr haw-ir-euq mae.
2Khoerngae, mirluvluv duidui lar-euq mae. Aqjeq mirnae aernar-aq, Sanqpaq Miqyaer-euq mqtav ghaqkhaer mq-anr nae zafka le-awr, khaqlo khoersiq ghaqkhaeq-anr nae ngawqdzae-awr, khaqlo khoersiq-euq khoertav nuirluf-eu mae. 3Aqyawf-euq myavpyawq mqmyawf myawf-eu lof-aer byacaevni ghae-awr, aqyawf-euq maeqtsoeq-aq, ngaer lof-aer pyurdeuqni ghae-eu mae. 4Lmqbymr-anr lofpir-eu deuq, aqyawf-anr guv-ir-awr, yawdzuq gan’gan-aer, shir-euq tsawrhaq lof-aer pyeuf-ir-euq mae.
5Khoerngae, mqtav ghaqkhaer, zaqmiq aqbur khoer nyiq ghaq-anr heulof-aer aernaeq-euq mae, “Taqguv, nawnyaf, lafyaq-euq khoertav bi tafsaef-euq Yeqsur, khoerghaq-anr povle-euq nga laer ngar siqnya ma. 6Aqyawf heugar maqpar jawr mae. Aqyawf nae aertaq-euq lof-aer, aqyawf ghofdaef lar-euq mae. Nawmaf, Sanqpaq Yeqsur baftaq duq-anr hawlar-awq. 7Yawkawr-aer ghofler-awr, aqyawf shir-euq gar nae ghofdaef lar-euq mae laer aqyawf-euq zaqlanr deuq-anr dzawrgaq ler-awq. Khoeruqtaf, aqyawf, nawmaf-euq maeqhu nae Gaqliqlaer mirkhanq-anr leluf-eu mae. Khoergar nawmaf, aqyawf-anr ya’mawr taef-a laer aernaeq-awq. Haeq, heu-aq, ngar, nawnyaf-anr aernaeq-eu ma.”
8Khoerngae, aqyawfnyaf guv khawf guv, laqkhaq khawf caer duidui-eu lafkhoer, aqyawf-euq zaqlanr deuq-anr dzawrnaeq ler-eu laer lmqbymr-anr nae yawkawr-aer caevghof lef-euq mae. 9Aqyawf-euq zaqlanr deuq-anr dzawrnaeq ler-eu laer ghoflerluf ngae, Yeqsur, aqyawf nyaf-euq maeqshi dovle-awr aer-eu, “Nuisar of luf-ur.” Aqyawfnyaf, aqyawf jawr-eu gar lepae-awr, aqyawf-euq aqkuir-anr byartaeq-awr, aqyawf-anr uqduq tanq-euq mae. 10Khoerngae, Yeqsur, aqyawf nyaf-anr aernaeq-eu, “Taqguv. Ngaq-euq aqyuif aqnyir deuq-anr Gaqliqlaer mirkhanq-anr le-awq laer aernaeq ler-awq. Khoergar aqyawfmaf, ngaq-anr ya’mawr taef-a.”
Pirma Aqyuif Deuq Maqngeur-eu Jeq Dzawr-eu
11Aqyawfnyaf ghoflerluf ngae, lmqbymr-anr lofpir-eu guirzaq heumyav ghaq meuq-anr urler-awr, khar pyeuflar-euq dawqtawvluf pirma aqyuif deuq-anr dzawrnaeq-euq mae. 12Pirma aqyuif deuq, aqyuif aqtsu deuq naeq-aer uiqler-awr bawqdzaq-awr, guirzaq khoerdeuq-anr pyur ghawqmya’ni bif-awr nae, 13heulof-aer aernaeq-euq mae, “Nawmaf, aqcawq-anr, ‘Uqcif paw nga’maf yufkhavluf ngae, aqyawf-euq zaqlanr deuq oe-awr, aqyawf-euq mawrdo-anr bafkhoeq le-euq mae’ laer aernaeq-awq. 14Garkawv heu meuqsanr-anr gaqkeuvler nar-aq, nawmaf tiqjeq-iq maqlaeq-a laer nga’maf japirnaeq ma.”
15Guirzaq khoerdeuq pyur yur-awr, aqyawf maf-anr kharbi ngaeq-euq lof-aer taef-aer ngaeq-euq mae. Yurdav tsawrhaq-euq lafkhoer, dawq khoerdawq iqnan keuvni jaluf-a siq.
Sanqpaq Yeqsur-euq Huiq-eu Khaerdawq
Mk 16:14-18; Lk 24:36-49; Yh 20:19-23; Ghkh 1:6-8
16Khoerngae, zaqlanr 11 ghaq, Yeqsur nae aqyawf maf-anr tsafdzoer taq-euq Gaqliqlaer mirkhanq-anr jav-eu gawqjawq-anr le-euq mae. 17Aqyawfmaf, Yeqsur-anr ya’mawr ngae, aqyawf-anr uqduq tanq-euq mae. Aerkhawf, tiqpavnav deuq maq jancoer-a. 18Yeqsur, aqyawf maf-euq dawqpae jivlar-awr heulof-aer aernaeq-euq mae: “Mq-euq khoertav hawr-eu mirtsaq-euq khoertav-euq aryaq dawqtawvluf, ngaq-anr bifnaeq laf-euq mae. 19Khoermirnae, nawmaf ir-awr, tsawrjeuq tsawrca dawqtawvluf, ngaq-euq zaqlanr pyeuflarni mr-ir-awq. Aqda, Zaqyo hawr-eu Yawshawr Saflar-euq tsawrmyanr-euq uqmov, aqyawf maf-anr bartirsaq mrnaeq-awq. 20Ngaq nae nawmaf-anr biftaq-euq dawq yawqdawq navluf-anr aqyawfmaf narhaq geufni maeqnaeq tsovnaeq-awq. Mirtsaq heu arsaqsaq ngae keuvni, ngar, nawmaf naeq-aer aqmyanluf jawr ma.” Aqmeq.
Currently Selected:
Maqtaeq 28: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
