Maqtaeq 20
20
Aqgaf Yarkmr-anr Gar Mr-eu Deuq
1“Aqjeq mirnae aernar-aq, mqtav mirkhanq-aq, heulof-aer dur-eu mae, yarsanr aqda tiq ghaq uqshawq yawnaf-aer dov-ir-awr, aqyawf-euq aqgaf yarkmr-euq lafkhoer ghaqmanr manrdzaq-eu tsawrhaq pov-ir-euq mae. 2Tiq nan pyur marbyav tiq byav bif ma laer jatsaq-awr, aqyawf maf-anr aqgaf yarkmr-euq lafkhoer gar bimr-ir-euq mae.
3Uqshawq paw naqliq ghoeq laf teukaq-anr aqyawf pardov-ir ngae, gar mr-eu maqjav-aer laev-anr yawfluf-eu tsawrhaq ya’mawr-euq mae. 4‘Nawmaf khawf, aqgaf yarkmr-euq lafkhoer gar mrlar-awq, ngar, nawmaf-anr ghaqgarpoeq hawtsaqnaeq ma’ laer aqyawf maf-anr aernaeq ngae, aqyawfmaf khawf mrler-euq mae. 5Nanlov caelar ngae hawr-eu uqciftaw naqliq smr laf teukaq-anr aqyawf pardov-ir-awr, khoerlof-aer par povlaq-ir-euq mae. 6Uqciftaw naqliq ngaq laf teukaq-anr aqyawf pardov-ir-awr, tsawrhaq tiqdeuq, laev-anr tiqjeq-iq maqmr-aer sarsuqni yawfluf-eu gar parya mawr-euq mae. Aqyawf narhaq-eu, ‘Nawmaf aqjeq mirnae nan’ga-i tiqjeq-iq maqmr-aer yawfluf-eu le?’
7Khoerngae, aqyawfmaf aer-eu, ‘Tsawrhaq tiqghaq-iq, nga’maf-anr gar bimr-eu laer maq povle-eu beu.’ Aqyawf, aqyawf maf-anr aernaeq-eu, ‘Tox-aer mar-iq, nawmaf khawf, aqgaf yarkmr-euq lafkhoer gar mrlar-awq, mrpoeq tsaqtsaqni za taef-a.’
8“Uqcif cifle ngae, aqgaf yarkmr-euq yawsanr ghaq, yar-anr hawpir-eu ghaq-anr kur-awr aernaeq-eu, ‘Gar mrlar-euq deuq-anr kur-awr ghaqgarpoeq bifnaeq-awq. Mrsaq saqle-euq deuq-anr jeqhu bif-awr, mrbae baele-euq deuq-anr bifsaq saq-awq.’
9Khoerngae, uqciftaw naqliq ngaq laf aerghaq teukaq-anr mrlar-euq deuq lar-awr, tiq ghaq pyur marbyav tiq byav za-euq mae. 10Mrbae baelar-euq khoerdeuq-anr keuvlar ngae, aqyawfmaf, aqcawq myavmaqtser za taef-a laer noeq-euq mae. Aerkhawf, yawqghaq navluf tiq ghaq pyur marbyav tiq byav za-euq taef mae. 11Aqyawfmaf ghaqgarpoeq zaghaq ngae, yarsanr ghaq-anr dawqghof dovdov-aer aer-eu, 12‘Mrsaq saqle-euq khoerdeuq naqliq tiq laf mr-euq taef khawf, nga’maf nan’ga-i mrsaef lef-euq deuq-anr sawxnaeq-eu lof-aer, nawr, aqyawf maf-anr sawxnaeq-eu le laq?’
13Yarsanr ghaq, aqyawf maf-euq lafkhoer-euq tiq ghaq-anr heulof-aer aernaeq-euq mae, ‘Cawq-or! Ngar, nawq-anr maqtsaq-eu jeq maq janrnaeq-aq. Ngar, nawq-anr pyur marbyav tiq byav bif ma laer jatsaq taq-euq maqngeur-a lor? 14Nawq-euq pyur yur-awr ghof-ir-awq. Ngar, nawq-anr bif-eu lof-aer mrsaq saqle-euq khoerdeuq-anr khawf ngar bifmawf-eu lof-aer bif ma. 15Ngaq-euq pyur ngar janrmawf-eu lof-aer maqjanr nya-ar lor? Ngar yawmuiq mirnae, nawr myavnav nav-eu le laq?’
16Khoerlof-aer durni, aqcawq-euq maeqnan jawr-eu tsawrhaq-aq, aqcawq-euq maeqhu yajawr taef-a. Aqcawq-euq maeqhu jawr-eu tsawrhaq-aq, aqcawq-euq maeqnan yajawr-ir taef-a. Aqjeq mirnae aernar-aq, bikur-euq tsawrhaq yawmyaq khawf, tserdov-euq tsawrhaq-aq, yawcuiv mae.”
Yeqsur Yashir Mae Laer Paraer-eu
Mk 10:32-34; Lk 18:31-34
17Yeqsur, Yeqlursaqlaeq-anr leluf ngae, aqyawf-euq zaqlanr 12 ghaq-anr sheuqceuv dov-awr can ngae, aqyawf maf-anr heulof-aer aernaeq-euq mae: 18“Hawsher-eq, aqduimaf, Yeqlursaqlaeq-anr leluf-eu ma. Tsawrhaq-euq Zaqyo-aq, pirma aqyuif deuq hawr-eu zanr maeq-eu deuq-euq aqlaf-euq lafkhoer ya’anr-ir-awr, aqyawf yashirni aqyawfmaf yarkhaqdar taef-a. 19Khoernar-aq, aqcawq tsawrjeuq tsawrca-euq aqlaf-euq lafkhoer a’naeq-awr, aqyawf-anr aqjaf jafnaeq-awr, yanqcav nae juif-awr nae lafyaq-euq khoertav tafsaef taef-a. Aerkhawf, smq nan keuvlar nar-aq, aqyawf ghofdaeflar taef-a.”
Kuirlaf Geuf-eu Aqyuif Aqtsu
Mk 10:35-45
20Khoerngae, Zeqbeqdaer-euq zaqyo-euq aqma hawr-eu aqyawf-euq zaqyo nyiq ghaq, Yeqsur jawr-eu gar lar-awr, aqma ghaq pawqtsuif pawqdmq dmq-awr Yeqsur-anr tiq jeq shar-eu mae.
21Yeqsur, aqyawf-anr narhaq-eu, “Nawr aqjeq sharmawf-eu le?” Khoerngae, aqma khoerghaq shar-eu, “Nawr uvlanr-eu lafkhoer, ngaqli heu nyiq ghaq-anr nawq-euq armar paw tiq ghaq, arcar paw tiq ghaq binuir law de-eq.”
22Khoerngae, Yeqsur aer-eu, “Nawmaf aqjeq sharluf-eu le laer maq siqnya-a. Ngar dawr-eu laer ghae-eu khmqmaq, nawnyafnmr dawrnya-awr, ngaq nae hageuf-euq bartirsaq hageufnya ma laq?” Khoerngae, aqnyafnmr aer-eu, “Euq, nga’nyaf dawrnya-awr hageufnya ma.”
23Yeqsur, aqyawf nyaf-anr aernaeq-eu, “Nawnyaf, ngaq nae dawr-euq khmqmaq, aqdir yadawr-awr, ngaq nae hageuf-euq bartirsaq-anr khawf nawnyaf ya hageuf taef-a. Aerkhawf, ngaq-euq arcar paw hawr-eu armar paw ya’nuirni ngar bifnya-eu maqngeur. Nuirduq khoer-aq, ngaqDa nae aqsur ghaq-euq gharduq laeqhmq taq-euq nar-aq, khoerghaq ya’nuir-eu mae.”
24Zaqlanr nuideuq tser ghaq, garkawv khoer-anr yagaq ngae, aqnyaf nmr-anr nuima paer duidui-eu mae. 25Yeqsur, aqyawf maf-anr kurlaf-awr heulof-aer aernaeq-euq mae, “Aqcawq tsawrjeuq tsawrca-euq sanqpaq deuq-aq, mirkhanqzaq-anr zuivghaq-awr, aqyuif geuf-eu deuq, aqyawf maf-euq khoertav aryaq yawkhav-aer zmq-eu mae laer nawmaf siqnya-eu mae. 26Aerkhawf, nawmaf-euq lafkhoer-aq, khoerlof-aer taqbi pyeuf. Nawmaf-euq lafkhoer, huiqmawf manrmawf-eu ghaq-aq, nawmaf-euq kuirlaf zaqkhav yageuf taef-a. 27Nawmaf-euq lafkhoer aqyuif geufmawf-eu ghaq-aq, nawmaf-euq zaqkhav yageuf taef-a. 28Aqjeq mirnae aernar-aq, Tsawrhaq-euq Zaqyo-aq, aqcawq-anr yawqha-euq kuirlaf bigeuf-eu laer oe-euq maqngeur-eu. Aqcawq-euq kuirlaf geuf-awr, tsawrhaq ghawqmya ni-euq gharduq yawqha-euq daefzir bif-awr kakhof-eu laer oe-euq mae.”
Myavbaef-anr Bi Mawnya Lar-euq
Mk 10:46-52; Lk 18:35-43
29Aqyawfmaf, Yeqlirkor-anr nae dov-ir luf ngae, tsawrhaq armaf mafma ghawqmya’ni Yeqsur-euq maeqnan cantae luf-eu mae. 30Khoerngae, garma gardzer nuirluf-eu myavbaef nyiq ghaq, Yeqsur irtsaev luf-eu gar yagaq-awr gur-eu, “Daqbir-euq Zaqyo, Sanqpaq-or! Nga’nyaf-anr ghawqshaq gaqnaeq laf-awq.”
31Tsawrhaq armaf mafma deuq, aqyawf nyaf-anr, ciqcurni jawr-awq laer daeq-euq mae. Aerkhawf, aqyawfnyaf ngaeq-aer aernar-aq ngaeq-aer gur-eu, “Daqbir-euq Zaqyo, Sanqpaq-or! Nga’nyaf-anr ghawqshaq gaqnaeq laf-awq.”
32Khoerngae, Yeqsur naqler-awr, aqyawf nyaf-anr kurlaf-awr nae narhaq-eu, “Ngaq nae nawnyaf-anr aqjeq bi janrnaeq mawf-eu nya?”
33Khoerngae aqyawfnyaf aer-eu, “Sanqpaq-or! Nga’nyaf-euq myavnuiv bi mawrnyalar naeqlaf-awq.”
34Yeqsur ghawqshaq gaq-awr, aqyawf nyaf-euq myavnuiv-anr toeqciv ngae, aqyawf nyaf-euq myavnuiv tiqpov taef-aer mawrnya lar-awr, Yeqsur-euq maeqnan cantae ghae-euq mae.
Currently Selected:
Maqtaeq 20: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
