Lurkaf 18
18
Miqcoeq Miqma Hawr-eu Yarkhaq Dar-eu Tiq Ghaq
1Aqyawfmaf nuima maqcawv-aer, yawqjawr navluf guiqlanq sharni, Yeqsur, aqyawf maf-anr yawjeq majeq dawq-anr nae heulof-aer maeqnaeq-euq mae: 2“Meuq tiq meuq-euq lafkhoer, Miqyaer-anr maqguv-aer, tsawrhaq-anr yawzeu maqbaw-eu yarkhaq dar-eu tiq ghaq jawr-eu mae. 3Meuq khoermeuq-anr miqcoeq miqma tiq ghaq jawr-eu mae. Aqyawf yarkhaq dar-eu heughaq jawr-eu gar le-awr aer-eu, ‘Ngaq-anr yarkhaq jaghaq mawf-eu ghaq, ngaq-anr mrbanq taq-euq gar, dawrcoeni darnaeq laf-awq.’
4Yarkhaq dar-eu heughaq maq darnaeqni tiqkhaeq jawr-euq mae. Khoernar-aq, aqyawf-euq nuima-euq lafkhoer heulof-aer noeq-eu mae, ‘Ngar-aq, Miqyaer-anr maqguv-aer, tsawrhaq-anr yawzeu maqbaw-eu khawf, 5miqcoeq miqma heughaq ngaq-anr lavbanq lar-eu mirnae, ngar, aqyawf-anr dawrcoeni darnaeq ma. Maqngeur nar-aq, aqyawf larlar-aer ngaq-anr ghaqdoer doerlar paq-aer lavbanq lar-eu jeq nga.’ ”
6Khoerngae, Sanqpaq Yeqsur heulof-aer aer-eu mae, “Maqdawr-aer maqtsaq-eu yarkhaq dar-eu heughaq aer-eu gar narhaq sher-eq. 7Miqyaer nae tserdov taq-euq tsawrhaq uqcif nan’ghanr maqaer, aqyawf-anr shar nar-aq, Miqyaer, aqyawf maf-euq gharduq yawtsaq yawdawr dawr-aer maq janrnaeqni, nyinaq nyinaq-aer jawr taef-a lor? 8Ngar, nawmaf-anr aernaeq nyar, aqyawf maf-euq gharduq yawtsaq yawdawr jeq yawkawr-aer janrnaeq taef-a. Aerkhawf, Tsawrhaq-euq Zaqyo zafkale ngae, mirtsaq-euq khoertav jan-eu jeq javluf-eu gar aqdir ya’mawr taef-a laq?”
Paqliqsaer Hawr-eu Jeq Taf-eu Tiq Ghaq Guiqlanq Shar-eu
9Yawqhar yawqha tsaq-awr dawr-eu tsawrhaq ma laer yawduq baw-awr, aqcawq-anr taqnyir-eu tsawrhaq deuq-anr Yeqsur yawjeq majeq dawq-anr nae heulof-aer aernaeq-euq mae: 10“Tsawrhaq nyiq ghaq, uqduq tanqnymr nymrma-anr guiqlanq sharler-euq mae. Tiq ghaq-aq, Paqliqsaer mae. Tiq ghaq-aq, jeq taf-eu tsawrhaq mae. 11Paqliqsaer khoerghaq gawqyawf yawf-awr, guiqlanq heulof-aer shar-eu mae, ‘Miqyaer-or! Ngar-aq, aqcawq-anr maqdur-eu mirnae, nawq-euq guiqlanq-anr jaceuq ma. Aqcawq-aq, khaeqdzaq khavdzaq-eu tsawrhaq, maqdawr-aer maqtsaq-eu tsawrhaq hawr-eu banq-awr joe-eu tsawrhaq mae. Khoeruqtaf, ngar-aq, jeq taf-eu teughaq-anr khawf maqdur. 12Ngar-aq, tiqjaw-euq lafkhoer nyiq nan dzardzaq sheuqluf-eu ma. Ngar kharza-euq yawqjeq navluf tserbymr tiqbymr dawvluf-eu ma.’
13“Aerkhawf, jeq taf-eu khoerghaq-aq, garmanr kaq-eu gar yawf-awr, myavpyawq mq paw maq ghawrleur peuq-aer, khanq-anr terter-aer aer-eu, ‘Miqyaer-or! Ngar-aq, iqbaxzaq mir-a. Ngaq-anr ghawqshaq gaqnaeq laf-awq.’ 14Ngar, nawmaf-anr aernaeq nyar, Paqliqsaer khoerghaq navmaqtser, jeq taf-eu khoerghaq tsaq-awr dawr-eu tsawrhaq pyeuflar-awr, irkanr ghof-ir-euq mae. Aqjeq mirnae aernar-aq, yawqhar yawqha taqhuiq-eu tsawrhaq yawqghaq navluf, taqnyir-eu gar yadaq-awr, yawqhar yawqha taqnyir-eu aqgeu ghaq maqkaq, yabi taqhuiq taef-a.”
Yeqsur, Zaqdeuq-anr Dawq Ngaeqghae Naeq-euq
Mt 19:13-15; Mk 10:13-16
15Khoerngae, Yeqsur nae zaqdeuq-anr bi toeqciv-eu laer aqcawq, Yeqsur jawr-eu gar aqyawf maf-anr sheuqlaf-euq mae. Aerkhawf, zaqlanr deuq ya’mawr ngae, zaq sheuqlaf-euq deuq-anr daeqnaeq-euq mae. 16Aerkhawf, Yeqsur, zaqlanr deuq-anr kur-awr heulof-aer aernaeq-euq mae, “Zaqdeuq-anr maq lavtsoeqni ngar jawr-eu gar bilar-awq. Aqjeq mirnae aernar-aq, heulof-aer ghae-eu deuq-aq, Miqyaer uvlanr-eu lafkhoer jawrluf-eu mae. 17Ngar, nawmaf-anr aqdirma-aer aernaeq nyar, aqsur ghaq maqkaq, zaq yawnyir lof-aer nuima taq-awr Miqyaer uvlanr-eu jeq-anr maq hageuf nar-aq, Miqyaer uvlanr-eu lafkhoer maqya urler-ar.”
Smrmuiq Smrbaw Hawr-eu Miqyaer-euq Mirkhanq
Mt 19:16-30; Mk 10:17-31
18Khoerngae, uvlanr-eu aqyuif tiq ghaq, Yeqsur-anr narhaq-eu, “Muiq-eu saqlaq-or! Ngar mqmaq maqbyav yarzir daef-eu jeq za’ni aqjeq ya’mr-eu la?” 19Yeqsur, aqyawf-anr heulof-aer aernaeq-euq mae, “Aqjeq mirnae nawr, ngaq-anr muiq-eu ghaq laer kur-eu le? Miqyaer maqngeur nar-aq, yawmuiq tiqghaq-iq maqjawr-a. 20Nawr, zanrdawq khofdawq-anr siqnya mae,
‘Aqcawq-anr taqbanq taqjoe,’ ‘Tsawrhaq-anr taqsaef,’ ‘Smrkhoeq taqkhoeq,’ ‘Maqtsaq maqdawr-eu sarkir taqkamq,’ ‘Nawqma nawqda-anr yawzeu baw-awq.’ ” (Di 20:12-16; Dm 5:16-20)
21Khoerngae, aqyawf aer-eu, “Ngar, yawnyir ngae nae heudeuq dawqtawv luf-anr mrcaw laf-euq ma.”
22Yeqsur dawq khoerdawq-anr yagaq ngae khoerghaq-anr aernaeq-eu, “Nawr tiqjeq maqjir nga siq. Nawr kharjav-eu jeq dawqtawvluf anqdzae jir-awr, irshaqzaq-anr birnaeq-ir-awq. Khoerlof-aer janr nar-aq, mq-euq khoertav zawr poeq-eu pyurshuir myawqganq jav taef-a. Khoernar-aq, lar-awr ngaq-euq maeqnan cantae lar-awq.”
23Aerkhawf, aqyawf dawq khoerdawq-anr yagaq ngae, noeqshaq duidui-eu mae. Aqjeq mirnae aernar-aq, aqyawf-aq, smrmuiqmuiq duidui-eu tiq ghaq mae. 24Yeqsur, aqyawf noeqshaq duidui luf-eu gar ya’mawr ngae aer-eu, “Smrmuiq smrbaw-aq, Miqyaer uvlanr-eu lafkhoer urler-eu arnavni shaq-eu nga! 25Lawtaw aqghawf-euq lafnaq-anr urler-eu-aq, smrmuiq smrbaw, Miqyaer uvlanr-eu lafkhoer urler-eu navmaqtser awq-eu mae.”
26Khoerngae, yagaq-euq tsawrhaq deuq aer-eu, “Tox-aer mar-iq, kakhof-eu jeq aqsur ghaq za’nya-eu paq nga?”
27Aerkhawf, Yeqsur aer-eu, “Tsawrhaq maq janrnya-eu jeq-anr Miqyaer janrnya-eu mae.”
28Khoerngae, Beqtuvluv aer-eu, “Hawsher-eq. Nga’maf yawqjeq navluf byaerdzae yaf-awr, nawq-euq maeqnan cantae luf-eu ma.”
29Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, Miqyaer uvlanr-eu jeq-euq gharduq, nymr, miqzaq, maernmr, aqma aqda hawr-eu zaqdeuq-anr byaerdzae yaf-euq tsawrhaq aqgeu ghaq maqkaq, 30heuzir-euq lafkhoer ghawqmya bymr hawr-eu aqkar karzir-euq lafkhoer mqmaq maqbyav yarzir daef-eu jeq maqza-aer maqghae-ar.”
Yeqsur Yashir Mae Laer Paraer-eu
Mt 20:17-19; Mk 10:32-34
31Khoerngae, Yeqsur, ghaqkhaer 12 ghaq-anr sheuqceuv dov-awr heulof-aer aernaeq-euq mae: “Narhaq sher-eq, Aqduimaf, Yeqlursaqlaeq-anr leluf-eu ma. Tsawrhaq-euq Zaqyo-euq garkawv, Miqyaer gharduq ngaeqdan-eu deuq nae khar boftaq-euq dawqtawvluf ya byanlar taef-a. 32Aqyawf, aqcawq tsawrjeuq tsawrca-euq aqlaf-euq lafkhoer yabi a’naeq-awr, aqcawq, aqyawf-anr aqjaf jafnaeq-awr, shafdawrlar paq-aer janrnaeq-eu uqtaf, duqkhaq khashaeqnaeq taef-a. 33Aqyawfmaf, aqyawf-anr juif-awr saef taef-a. Smq nan keuvlar nar-aq, aqyawf ghofdaeflar taef-a.”
34Aerkhawf, zaqlanr deuq garkawv heudeuq-anr tiqpawf-iq maq ghovshaw nya-a. Aqyawf maf-euq gharduq dawqtsuif khoer zaftaq-euq jeq pyeuf-awr, aqyawf aer-eu gar aqyawfmaf maq siqnya-a.
Myavbaef-anr Bi Mawrnya Lar-euq
Mt 20:29-34; Mk 10:46-52
35Yeqsur, Yeqlirkor-euq dawqpae irkeuv ngae, myavbaef tiq ghaq garma gardzer-anr nuir-awr hawqshar shardzaq luf-eu mae. 36Aqyawf, tsawrhaq armaf mafma cantsaev-eu tersar yagaq ngae aqjeq pyeuflar-euq la laer narhaq-eu mae. 37Aqyawfmaf, aqyawf-anr Naqzaqlaer tsawrhaq Yeqsur cantsaev luf-eu nga laer aernaeq-euq mae.
38Khoerngae, aqyawf gur-eu, “Daqbir-euq Zaqyo Yeqsur-or! Ngaq-anr ghawqshaq gaqnaeq laf-awq!”
39Maeqhu paw canluf-eu deuq, aqyawf-anr ciqcurni jawr-awq laer daeqnaeq-euq mae. Aerkhawf, aqyawf yawkhav-aer pargur-eu, “Daqbir-euq Zaqyo-or! Ngaq-anr ghawqshaq gaqnaeq laf-awq!”
40Khoerngae, Yeqsur naqler-awr, aqyawf jawr-eu gar sheuqlafni dawq bif-euq mae. Dawqpae larkeuv ngae, Yeqsur, aqyawf-anr narhaq-eu, 41“Ngar, nawq-anr aqjeq bi janrnaeq mawf-eu nya?” Khoerngae, aqyawf aer-eu, “Sanqpaq-or! Ngaq-anr bi mawrnyalar naeqlaf-awq.”
42Khoerngae, Yeqsur aer-eu, “Nawr mawrnya lar-awq. Nawr jan-eu jeq, nawq-anr bi taqler-euq mae.”
43Khoerngae, myavbaef khoerghaq tiqpov taef-aer mawrnya lar-awr, Miqyaer-anr jaceuq jaceuq-aer Yeqsur-euq maeqnan cantae ghae-euq mae. Tsawrhaq dawqtawvluf khoer-anr ya’mawr ngae, Miqyaer-anr jaceuq-eu mae.
Currently Selected:
Lurkaf 18: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
