Lurkaf 16
16
Myawqganq Jeqhmq-eu Tiq Ghaq
1Yeqsur, zaqlanr deuq-anr heulof-aer par aernaeq-euq mae: “Smrmuiq aqda tiq ghaq, aqyawf-euq myawqganq hawpir-eu tiq ghaq jawr-eu mae. Myawqganq hawpir-eu heughaq, aqyawf-euq pyurshuir myawqganq zmqdzae luf-eu garkawv, aqcawq, aqyawf-anr ja’naeq-euq mae. 2Smrmuiq aqda khoerghaq, aqyawf-anr kur-awr aernaeq-eu, ‘Nawq-euq garkawv ngaq nae yagaq-euq khoer aqjox-aer la? Nawr myawqganq hawpir-eu nanqmyaq sanqbof khoer ngaq-anr bifnaeq laf-awq. Aqkar nar-aq, nawq-anr myawqganq hawpir-eu ghaq maqpar bigeuf ma.’
3Khoerngae, myawqganq hawpir-eu ghaq nuima-euq lafkhoer heulof-aer sharnoeq-eu mae, ‘Yawsanr ghaq, ngaq-anr myawqganq hawpir-eu gar heu maqpar bimrni yurdzae naeqlaf-eu mirnae. Ngar aqjox-aer ghae-eu paq nga? Mirtsaq-anr duqduq-aer maq mrdzaqcoer nya. Aqcawq-anr shardzaq shardawr-ir-eu khawf shafdawr mir-a nawq. 4Myawqganq hawpir-eu ghaq maqya geuf-aer pyeuf-ir ngae, aqcawq, ngaq-anr aqyawf ha-euq nymr-euq lafkhoer hageufanr naeqlafni, ngar aqjox-aer yajanr-eu nga laer noeqdov taq-euq ma.’
5Khoerngae, aqyawf, aqyawf-euq yawsanr ghaq-anr dzirdzov khardav-eu tiqghaq sair tiqghaq-anr kur-euq mae. Khoernar-aq, aqyawf, yawbae ghaq-anr narhaq-eu, ‘Nawr, ngaq-euq yawsanr ghaq-anr dzirdzov armyavni dav-eu le?’ 6Khoerghaq, aqyawf-anr aerkhof naeq-eu, ‘Tsir 100 keuv dav ma.’ Khoerngae, myawqganq hawpir-eu ghaq aer-eu, ‘Yawkawr-aer nuir-awr, nawq-euq dzirdzov pardmq yur-awr, 50 keuv laer bof-awq.’
7Khoernar-aq, yawqghaq yawq-anr narhaq-eu, ‘Nawr dzirdzov armyavni davle?’ Aqyawf aer-eu, ‘Caer 100 zeur dav-eu ma.’ Myawqganq hawpir-eu ghaq aernaeq-eu, ‘Nawq-euq dzirdzov pardmq yur-awr, 80 zeur laer boftaq-awq.’
8Maqdawr-aer maqtsaq-eu myawqganq hawpir-eu heughaq zaqsiq tsawrganr zmqnya-eu mirnae, yawsanr ghaq, aqyawf-anr jaceuq-euq mae. Mirtsaq-euq zaqdeuq-aq, aqyawf maf-euq heuzir lafkhoer, yawshaef-euq zaqdeuq navmaqtser zaqsiq tsawrganr zmqnya dzaeq-eu mae.
9“Ngar, nawmaf-anr aernaeq nyar, maqtsaq maqdawr-eu pyurshuir myawqganq zmq-awr aqcawq naeq-aer cawq cawq-awq. Nawmaf-euq pyurshuir myawqganq deuq byovjir ngae, aqyawfmaf, nawmaf-anr mqmaq maqbyav yarzir daef-eu jawrduq-anr hageuf naeqlaf taef-a.
10Yawnyir jeq-anr sarjax zif-eu tsawrhaq-aq, yawhuiq jeq-anr khawf sarjax zif taef-a. Yawnyir jeq-anr maqdawr-aer maqtsaq-eu tsawrhaq-aq, yawhuiq jeq-anr khawf maqdawr-aer maqtsaq-ar. 11Nawmaf maqtsaq maqdawr-eu pyurshuir myawqganq zmq ngae, sarjax maqzif nar-aq, aqsur ghaq nawmaf-anr aqdir aqmar zif-awr gmq-eu jeq a’naeqpeuq nmr-mq? 12Nawmaf, aqcawq-euq myawqganq zmq ngae sarjax maqzif nar-aq, aqsur ghaq nawmaf-anr of-eu myawqganq bifnaeqlaf mawf nmr-mq?
13“Zaqkhav tiq ghaq yawsanr nyiq ghaq-euq zaqkhav maqgeuf nya-ar. Tiq ghaq-anr byae nar-aq, tiq ghaq-anr gaq-eu mae. Maqngeur nar-aq, tiq ghaq-anr yawzeu baw-awr, tiq ghaq-anr yaeqbawq-aer ghae-eu mae. Nawmaf, Miqyaer-euq zaqkhav geufluf ngae, pyurshuir myawqganq-euq zaqkhav maq geufnya-a.”
14Paqliqsaer deuq-aq, pyurshuir-anr maerjuir juir-eu tsawrhaq mirnae, aqyawfmaf khoerdeuq dawqtawv luf-anr yagaq ngae, Yeqsur-anr aqjaf jafjaf-aer uir-eu mae. 15Khoerngae, Yeqsur, aqyawf maf-anr heulof-aer aernaeq-euq mae, “Nawmaf-aq, tsawrhaq-euq maeqshi tsaq-awr dawr-eu janrgeuf-eu khawf, Miqyaer, nawmaf-euq nuima-anr siqnya mae. Aqjeq mirnae aernar-aq, tsawrhaq taqhuiq-eu jeq-anr Miqyaer nuidav dav-eu mae.
Zanrdawq Hawr-eu Miqyaer Uvlanr-eu Jeq
Mt 11:12-13
16“Zanrdawq hawr-eu Miqyaer gharduq ngaeqdan-eu deuq-euq dawq-aq, Yorhaq-euq zir-anr keuvni aertaq-euq mae. Khoerngae yamq-anr nae nar-aq, Miqyaer uvlanr-eu garkawv guiqlanqdawq maeqnaeq-euq mirnae, yawqghaq navluf nawrnawr ngarngar-aer tanqdzae tanqdzae-aer urler luf-eu mae. 17Mq hawr-eu mir byov-ir-eu-aq, zanrdawq-euq lafkhoer-euq arbof bofzaq tiq bof byov-ir-eu navmaqtser awqdzaeq-eu mae.
Miqzaq Khof-eu Garkawv
Mt 5:31-32; Mk 10:11-12
18“Yawqha-euq miqzaq khof-awr, yawqghaqyawq sheuq-eu aqsur ghaq maqkaq, banq-awr joe-euq jeq pyeuf-eu mae. Aqcawq-euq miqkhof sheuq-eu tsawrhaq khawf banq-awr joe-eu jeq pyeuf-eu mae.
Smrmuiq Tiq Ghaq Hawr-eu Laqzaqlur
19“Smrmuiq smrbaw tiq ghaq jawr-eu mae. Aqyawf nerpuir puir-eu maeqtsoeq hawr-eu sheqsha#16:19 Sheqsha Heudawq-aq, Heqbyaer dawq mae. “Pishta” laer kur-eu arbawq-anr nae janrdov laf-euq zawr poeq-eu saqpar-anr aermawf-eu mae. maeqtsoeq dm-awr, yawqnan navluf byaeqlaeq shaevdae-aer yawbui builuf-eu mae. 20Khoerngae, mawrdo dolan-aer shaqciq ciq-eu Laqzaqlur laer kur-eu hawqshar shardzaq-eu tiq ghaq jawr-eu mae. Aqcawq, aqyawf-anr smrmuiq smrbaw khoerghaq-euq larghov khaeq-anr baftaq lar-euq mae. 21Aqyawf-aq, smrmuiq smrbaw khoerghaq-euq hawqje-anr nae gaka taq-euq dzardeuq-anr dzaqmawf-eu mae. Khoeruqtaf, aqkuiq deuq larlar-aer aqyawf-euq shaqciq-anr myeuflar-eu mae.
22“Tiqnan keuvlar ngae, hawqshar shardzaq-eu heughaq shir-awr, mqtav ghaqkhaer deuq nae Aqbyaqhaq-euq bawkhanr-anr sheuqkeuv naeqler-euq mae. Smrmuiq smrbaw khoerghaq khawf shir-awr, bafpanq-euq mae. 23Aqyawf-aq, shir-eu mirkhanq-euq lafkhoer shaqdui zanq duidui-eu gar ya daqluf-eu mae. Aqyawf ghawrleur-awr haw ngae, garmanr kaq-eu gar Aqbyaqhaq-anr mawr-awr, Laqzaqlur, Aqbyaqhaq-euq bawkhanr-anr jawrluf-eu gar khawf ya’mawr-euq mae.
24“Khoerngae, aqyawf gur-eu, ‘Aqda Aqbyaqhaq-or! Ngaq-anr ghawqshaq gaqnaeq laf-awq. Miqdzaq heu-euq lafkhoer ngar yadaq duidui luf-eu mirnae, Laqzaqlur-anr khaer-awr, lafnoer ircuf-anr cawqpuf-awr, ngaq-euq maeqlar cof-ir ni bi dzavaq naeqlaf sher-eq.’
25Aqbyaqhaq heulof-aer aernaeq-euq mae, ‘Aqli-or! Nawr yawdaefdaef ngae, yawmuiq bymr yatawv-awr, Laqzaqlur-aq, yawdoer jeq za-euq gar taqngaer de-eq. Nymq-mr aqyawf heugar nuisar of-eu lafkhoer yajawr-awr, nawr-aq, shaqdui zanq duidui-eu gar ya daqluf-eu mae. 26Khoeruqtaf, nga’maf hawr-eu nawmaf-euq yawkaq-anr kuqkaq kaqma bi javtaq-awr, aqsur ghaq maqkaq, nga’maf jawr-eu gar nae nawmaf jawr-eu gar oemawf khawf maq oetawf nya-aer, nawmaf jawr-eu gar nae nga’maf jawr-eu gar maq lartsaev nya-a.’
27“Khoerngae, smrmuiq smrbaw khoerghaq heulof-aer aer-eu mae, ‘Aqda-or! Tox-aer mar-iq, Laqzaqlur, ngaqda-euq nymr-anr khaerghae sher-eq laer ngar, nawq-anr shar ma. 28Aqjeq mirnae aernar-aq, ngar maernmr ngaq ghaq jawr-eu le siq. Aqyawfmaf, shaqdui zanq duidui-eu jawrduq heutsanr-anr maqya oeni, Laqzaqlur nae aqyawf maf-anr sarkir bikamq-ir sher-eq.’ 29Aqbyaqhaq aer-eu, ‘Aqyawfmaf jawr-eu gar Morseq-euq dawq hawr-eu Miqyaer gharduq ngaeqdan-eu deuq-euq dawq jav mae. Aqyawfmaf dawq khoerdeuq-anr narhaq luf-ur.’ 30Khoerngae, smrmuiq smrbaw khoerghaq aer-eu, ‘Aqda Aqbyaqhaq-or! Teulof-aer taef-aer maqngeur-ar. Shir-awr nae ghofdaef lar-euq tiqghaqnav aqyawfmaf jawr-eu gar ir nar-aq, aqyawfmaf noeqpov noeqpar taef-a.’
31Aqbyaqhaq, aqyawf-anr aernaeq-eu, ‘Aqyawfmaf, Morseq-euq dawq hawr-eu Miqyaer gharduq ngaeqdan-eu deuq-euq dawq-anr maq narhaq nar-aq, shir-euq tsawrhaq tiqghaqnav ghofdaef lar-euq khawf, aqyawf maf-anr maq lavjan nya-ar.’ ”
Currently Selected:
Lurkaf 16: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
