Matyù 25
25
Àshwəŋnə̀ nàanə nàanə mbə̀ʼə ngwàngòonə̀ nɨ̀ghumə̀
1“Nkwùə̀ ghu, ànwùə̀ nɨ̀fò a nɨ̀pwuurə̀ a ghǎ pə la tsaʼa ngwàngòonə̀ nɨ̀ghumə̀ nɨ lə̀ lòonə pɨ̀làamə̀ ɨ̀pobə a nɨ ghə̀ mbwùumə̀ a ndwuumə̀ ngɨ̀ɨnə̀ nɨ pèrə. 2Pɨ pɨtaanə̀ lə̀ pə ɨ̀puukə̀, pyə̀ pɨtaanə̀ pə nɨ àzhìʼtə̀. 3Pyə̀ pa nɨ pobə lə̀ pənə ɨ̀puukə̀ la lə̀ lòo pɨ̀làamə̀ ɨ̀pobə la ka chi twuʼtə̀ a ghobə a mɨ̀tse mɨ̀ghurə̀ mɨ làamə̀ amwuə pɨ̀məndzìrə̀. 4La pɨ̀zhìʼtə̀nə pa twuʼtə̀ mɨ̀ghurə̀ mɨ̀nyaanə amwuə pɨ̀məndzìrə̀ ɨ̀pobə. 5Tsaʼnə ndwuumə̀ ngɨ̀ɨnə̀ wa à lə̀ lyàrə̀nə a nɨ tô la, pobə pɨ̀tsùmə̀ lə̀ tyiʼə̀ mmə ntsə̀grə̀ a pɨlô ndzùŋə̀ ndyə̂.
6“A lə̀ pə a ntɨ̀ŋnə̀ ɨ̀twuʼə̀, pɨ kyiinə̀ nshwəŋə̀ lo, ‘Ndwuumə̀ ngɨ̀ɨnə̀ wa à tô mə! Nɨ̀ furə̀ pə̀ənə̀ ghə̀ ntsirə̀ e.’
7“Ɨ̀pôngwàngòonə̀ pa pɨ̀tsùmə̀ lə̀ lòo a ɨ̀shyə̂ nkoʼkə̀ pɨ̀làamə̀ ɨ̀pobə. 8Pyə̀ pa nɨ pɨ lə̀ puukə̀nə la shwəŋə̀ ambo pyə̀ pa nɨ pɨ lə̀ zhìʼtə̀nə la lo, ‘Nɨ̀ ŋâ a wəə nɨ mɨ̀ghurə̀ mɨ làamə̀ ɨ̀mɨghə ma mɨ̀tse ntiinə pɨ̀làamə̀ ɨ̀pəə pə ntyiʼə̀ mbyaatə̀.’
9“La pɨ̀zhìʼtə̀nə pa shwəŋə̀ ambo pobə lo, ‘Pəə tə ŋâ a mɨ̀tse ambo pɨghə, mèrə kùʼnə̀ e ambo pə̀ənə̀ pɨ̀tsùmə̀ apə̀. Nɨ̀ ghə̀ ambo ngàŋə̀ mɨ̀tàanə ndzwuunə̀ ɨ̀mɨghə.’
10“La nkwùə̀ nɨ pobə lə̀ ghə̀nə a nɨ zwuunə̀ la, ndwuumə̀ ngɨ̀ɨnə̀ wa a tô. Ndòo pyə̀ nɨ pobə lə̀ chwuʼtə̀nə mbɨ̀ŋmə̀ ɨzobə mmə mbyabə̀ e pobə pɨ pobə kwuunə̀ a ndâ nɨ̀zoʼò gha ngwùʼnə̀ ntswùə̀ ndâ.
11“A lə̀ kɨ pə tyìʼə̀ lə, pyə̀ ɨ̀pôngwàngòonə̀ pa nɨ pobə lə̀ lèrə̀nə a nɨ zwuunə̀ mɨ̀ghurə̀ mɨ làamə̀ la lə̀ kɨ ntô mmə ntsòotə̀ ntswùə̀ ndâ nshwəŋə̀ lo, ‘Ndòʼnə̀mbyə̂, Ndòʼnə̀mbyə̂, ẅùʼə̀ ntswùə̀ ndâ pəə kwuunə̀ àzəə.’
12“La ndwuumə̀ ngɨ̀ɨnə̀ wə̀ a kẅùə̀ ambo pobə lo, ‘Ǹshwəŋə̀ tyìʼə̀ nkǔŋə nkuŋə ambo pɨghə lo ka ǹzhyə̂ mə̀ a wɨghə.’
13“Lenəla, Yěsû a lẅùutə̀ nshwəŋə̀ lo, ‘Nɨ̀ lyə̂ a nɨ̀lyìinə̀ mmə mbyabə̀ ntiinə ka nɨ̀ zhyə̂ a wɨghə njyə̂ ghu kə̀ nkwùə̀ ghu.’”
Àshwəŋnə̀ nàanə nàanə mbə̀ʼə ngàŋə àfàʼà ɨtarə
14“Amwuə nkwùə̀ ghu, ànwùə̀ Nɨ̀fò nɨ̀pwuurə̀ a ghǎ pə tsaʼa ŋònə̀ nɨ à lə̀ mənə ndèrə̀ e a àkarə̀ ŋŋâ ɨ̀pwuumə̀ ɨ̀pe ambo ngàŋə àfàʼà ze lo pobə̂ mə nnaŋə̀. 15À lə̀ ŋâ pɨ̀talent pɨtaanə̀ ambo taʼà ŋwùə̀, ŋŋâ pɨ̀talent pɨpaa ambo ghùtse, nkɨ nchi ŋŋâ a taʼà talent ambo ndẅùə̀ndzùmə̀ a nɨ zùŋə̀ tsaʼnə mbə̀ʼə pobə fàʼà nɨ zèrə. 16Ŋònə̀ wa nɨ à lə̀ kẅiirə̀nə pɨ̀talent pɨtaanə̀ la à lə̀ lòo zèrə̀ ndzùŋə̀ nchyâ aŋunə mɨ̀tàanə, zèrə̀ kɨ ŋŋâ e nɨ àpìi pɨ̀talent pɨtaanə̀. 17Lenəla ẅùə̀ wa nɨ à lə̀ pənə pɨ̀talent pɨpaa la à lə̀ kɨ nchyâ ɨze aŋunə mɨ̀tàanə, ɨ̀ kɨ ŋŋâ e nɨ àpìi pɨ̀talent pɨpaa. 18La ŋònə̀ wa nɨ à lə̀ kẅiirə̀nə a taʼà talent la, à lə̀ lòo nkabə̀ masàa e ngə̀ ntsùŋə̀ alyiʼə a ɨ̀shyə̂ ndə̀əmə̀ a zèrə̀ ghu.
19“Ntyə̌ nkwùə̀ ɨ̀tse lə̀ làŋə̀ nɨ masàa pɨ̀ghàŋə pɨ àfàʼà pə̀ a lə̀ kwə̂nə ntyiʼə̀ nnaŋə̀ tsaʼnə pobə lə̀ fàʼnə nɨ nkabə̀ ghu. 20Ŋònə̀ wa nɨ a lə̀ kẅiirə̀nə pɨ̀talent pɨtaanə̀ la, a lə̀ tô nɨ ɨze nkabə̀ nkẅìʼnə̀ nɨ pɨ̀talent pɨtaanə̀, nshwəŋə̀ ambo ze lo, Ghò lə̀ ŋâ mə̀ nɨ pɨ̀talent pɨtaanə̀ lə kùmə̀ mbə pɨ̀tse pɨ̀talent pɨtaanə̀ nɨ ǹdzɨghə̀nə tsaʼa àpìi mə̀.
21“Masàa e a kẅùə̀ lo, ‘Wə̀ ghɨ̀rə̀ ɨ̀shìʼnə̀ mbǎ ngàŋə̀ àfàʼà mə̀ ghù ɨ̀shìʼnə̀ nɨ wə̀ pənə nɨ nkǔŋə nkuŋə! Wə̀ pə nɨ nkǔŋə nkuŋə a nɨ twuʼtə̀ a mɨlyiʼə nkabə̀ njiilo, mbɨ ghɨ̀rə̀ wə̀ twuʼtə̀ a yɨ̀ ngẅùunə. Tô pɨghə masàa o pwuutə̀ aŋunə nɨ̀ghaʼà.’
22“Ẅùə̀ ŋònə̀ nɨ à lə̀ pənə nɨ pɨ̀talent pɨpaa la à lə̀ kɨ ntô àze, nshwəŋə̀ ambo masàa e lo, ‘Wə̀ lə̀ ŋâ mə̀ nɨ pɨ̀talent pɨpaa. Zəənə̀! Lə kùmə̀ nkɨ mbə pɨ̀tse pɨ̀talent pɨpaa nɨ ǹdzɨghə̀nə tsaʼa àpìi mə̀.’
23“Masàa e a kẅùə̀ lo, ‘Wə̀ ghɨ̀rə̀ ɨ̀shìʼnə̀ mbǎ ngàŋə̀ àfàʼà mə̀ ɨ̀shìʼnə̀ nɨ wə̀ pənə nɨ nkǔŋə nkuŋə. Wə̀ pə nɨ nkǔŋə nkuŋə a nɨ twuʼtə̀ a mɨlyiʼə nkabə̀, njiilo mbɨ ghɨ̀rə̀ wə̀ twuʼtə̀ nkabə̀ yɨ̀noʼnə. Tô pɨghə masàa o pwuutə̀ aŋunə nɨ̀ghaʼà!’
24“Lenəla ẅùə̀ ŋònə̀ nɨ à lə̀ kẅiirə̀nə a taʼà talent la à lə̀ tô nshwəŋə̀ ambo masàa e lo, ‘Ǹzhyə̂ lo ghò la ŋònə̀ ntɨ̀ŋnə̀ nɨ wə̀ wa nfùʼù alyiʼə nɨ ka wə̀ màʼà o mbyə ɨ̀pwuumə̀, nshwatə̀ mɨ̀zɨghə̀ alyiʼə nɨ ka wə̀ pyə̀ o! 25Ndə̀ mə mbô o, nfurə̀ ngə̀ nnaŋə̀ alyiʼə, ntuŋə̀ ndə̀əmə̀ nkabə̀ o za ghu. Zəənə̀! Lə̌ nkabə̀ o lə.’
26“Masàa e a kẅùə̀ lo, ‘Ghò ngàŋə̀ àfàʼà ɨ̀soomə̀ nkɨ nchi mbə ndòŋə! Njiilo, wə̀ zhyə̂ lo ngwa nfùʼù mɨ̀zɨghə̀ alyiʼə nɨ ka mmàʼà mə̀ mbyə ɨ̀pwuumə̀, nkɨ mmə nshwatə̀ mɨ̀zɨghə̀ alyiʼə nɨ ka m̀byə̀ mə̀? 27Lenəla, wə̀ lə̀ pə nchyâ nkabə̀ mə̀ amwuə baŋə̀, njiilo nkwùə̀ nɨ ǹkwə̂nə ǹkẅiirə̀ a zèrə̀ nɨ àpìi.’
28“Njiilo, kẅiirə̀ nkabə̀ mə̀ ghu ambo ze ŋŋâ ambo ẅùə̀ wa nɨ a pə nɨ pɨ̀talent nɨ̀ghumə̀ la. 29Ntiinə ŋònə̀ wa ntsùmə̀ nɨ à twuʼtə̀nə àzwuumə̀ la, â zhyə̂ lo, yè noʼnə a pɨ kẅìʼnə̀, njiilo à twuʼtə̀ pɨ̀noʼnə. Ŋònə̀ wa nɨ ka à twuʼtə̀ e àzwuumə̀ àtse la â zhyə̂ lo, mbaa pə mɨlyiʼə nɨ à twuʼtə̀nə la, pɨ̌ kẅiirə̀ a ẅèrə ambo ze. 30Ngə̀ aŋunə àfǐfǐ ngàŋə̀ àfàʼà wa, nɨ̀ màʼà e a àpyìinə amwuə ndzùmə; alyiʼə nɨ pànə̌ tyiʼə̀ yìi kwurə̀ mɨsoŋə ɨ̀mobə.”
Ndẅùutə ntsoʼtə̀ ɨ̀sàʼa
31“Nkwùə̀ nɨ Moonə̀ Ŋwùə̀ à ghǎ tô amwuə àghuʼtə̀ e pobə pəngèrə̀ pɨ̀tsùmə̀ tsaʼa ɨ̀fò la, à ghǎ nwuunə̀ aŋunə aləŋə nɨ̀fò e a nɨ̀pwuurə̀. 32Pànə̀ pɨ̀tsùmə̀ àtwuə̀ ɨ̀shyə̂ tô shwatə̀ a mbyə̀ ze. Lenəla à pɨ ghàbə̀ a ghobə aŋunə ɨlyiʼə ɨpaa, tyiʼə̀ tsaʼa ɨ̀mbyabə̀ mɨ̀mbyə̂ à fuukə̀ mɨ̀mbyə̂ mɨ̀ndzìrə̀ amwuə mɨ̀mbyə̂ mɨ̀ndoŋə̀. 33À pɨ nùŋə̀ mɨ̀mbyə̂ mɨ̀ndzìrə̀ a pàa àpô ze yè zɨghə̀nə, nnùŋə̀ mɨ̀mbyə̂ mɨ̀ndoŋə̀ a pàa àpô ze yè kẅàbə̀.
34“Lenəla, ɨ̀fò à pɨ shwəŋə̀ ambo pànə̀ pa àpô ze yè zɨghə̀nə lo, Nɨ̀ tô Tǎ ɨwəə â ŋâ mborə̀ ɨzɨghə. Nɨ̀ Tô nkẅiirə̀ nɨ̀fò ɨ̀tse nɨ pɨ lə̀ tsùŋə̀nə ambo pɨghə a nɨ furə̀ njyə̂ nɨ pɨ lə̀ tsùŋə̀nə àtwuə̀ ɨ̀shyə̂. 35Njyə̀ ɨ̀ lə̀ mə ndzaŋə̀ mə̀ nɨ̀ ŋâ àzwuumə̀ wə̀ ǹdzɨghə̀, njyə̀ nchyə ɨ̀ mə ndzaŋə̀ mə̀ nɨ̀ ŋâ nchyə ǹnô, ndə̀ pə ngàŋə̀ nɨ̀ghaanə̀ nɨ̀ kẅiirə̀ mə̀ amwuə mɨ̀ndâ ɨ̀mɨghə, 36mbə ntǔmnə̀ nɨ̀ ŋâ ɨtsəʼə wə̀ ǹgẅî, m̀mə ngòonə̀ nɨ̀ pyatə̀ mə̀, mbə amwuə ɨ̀tsaŋə̀ nɨ̀ tô naŋə̀ mə̀.
37“Lenəla, pànə̀ nɨ mɨ̀nwùə̀ ɨ̀mobə təəmə̀nə pɨ̌ kẅùə̀ e lo, ‘Ndòʼnə̀mbyə̂, a nkwùə̀ àkə nɨ pəə zəənə̀nə o nɨ njyə̀ ŋŋâ mɨ̀zɨghə̀ wa, kə̀ a nkwùə̀ àkə nɨ njyə̀ nchyə ɨ̀ mənə ndzaŋə̀ o pəə ŋâ nchyə wa? 38A nkwùə̀ àkə nɨ pəə lə̀ zəənə̀nə o wə̀ pə ngàŋə̀ nɨ̀ghaanə̀ nkẅiirə̀ o amwuə mɨ̀ndâ ɨ̀məə kə̀ ŋŋâ ɨtsəʼə wa nkwùə̀ nɨ wə̀ pənə ntǔmnə̀? 39A nkwùə̀ àkə nɨ pəə zəənə̀ mə o wə̀ mə ngòonə̀ kə̀ mbə a ndâ ɨ̀tsaŋə̀ pəə tô naŋə̀ o?’
40“Ɨ̀fò a tyiʼə̀ nkẅùə̀ lo, ‘Ǹshwəŋə̀ tyìʼə̀ nkǔŋə nkuŋə ambo pɨghə lo, ànwùə̀ za àtsùmə̀ nɨ nɨ̀ ghɨ̀rə̀ mə ambo mɨlyiʼə ndyimə mə̀ wə̀ yɨ̀tse, nɨ̀ ghɨ̀rə̀ la ambo mɨ̀ŋə̀.’
41“Lenəla, a pɨ shwəŋə̀ ambo pànə̀ pa àpô ze yè kẅàbə̀ lo, ‘Pɨghə pa nɨ nɨ̀ pə mə nɨ ndòonə̀, nɨ̀ lòo a wɨghə a nɨ̀pwùnə mɨ̀ŋə̀, ndèrə̀ amwuə àkɨɨnə̀ ɨ̀mǔ tɨ pyaatə̀ nɨ pɨ tsùŋə̀ mə ambo Satàanə̀ pobə pəngèrə̀ ɨ̀pe. 42Ntiinə njyə̀ ɨ̀ lə̀ mə ndzaŋə̀ mə̀ ka nɨ̀ ŋâ wɨghə mɨ̀zɨghə̀ n̂dzɨghə̀, njyə̀ nchyə ɨ̀ mə ndzaŋə̀ mə̀ ka nɨ̀ ŋâ wɨghə nchyə wə̀ lo n̂nô. 43Ndə̀ pə ngàŋə̀ nɨ̀ghaanə̀ la ka nɨ̀ kẅiirə̀ wɨghə a gha amwuə ndâ, mbə ntǔmnə̀ ka nɨ̀ ŋâ wɨghə ɨtsəʼə ambo mɨ̀ŋə̀, mmə ngòonə̀ nkɨ mbə a ndâ ɨ̀tsaŋə̀ ka nɨ̀ tô naŋə̀ wɨghə a gha.’
44“Lenəla, pobə kɨ mbə̀ŋə̀ nkẅùə̀ lo, ‘Ndòʼnə̀mbyə̂, a nkwùə̀ àkə nɨ pəə lə̀ zəənə̀nə o wə̀ pə nɨ njyə̀, kə̀ njyə̀ nchyə ɨ̀ mə ndzaŋə̀ o, kə̀ tsaʼa ngàŋə̀ nɨ̀ghaanə̀, kə̀ tɨ atsəʼə, kə̀ nɨ nɨ̀ghòonə̀, kə̀ a ndâ ɨ̀tsaŋə̀, ka yèmpə̀ wəə a ghò?’
45“Ɨ̀fò ǎ kẅùə̀ lo, ‘Ǹshwəŋə̀ a wɨghə tyìʼə̀ nkǔŋə nkuŋə lo, ànwùə̀ za àtsùmə̀ nɨ ka nɨ̀ ghɨ̀rə̀ a wɨghə ambo mɨlyiʼə ndyimə mə̀ wə̀ yɨ̀tse la, ka nɨ̀ ghɨ̀rə̀ a wɨghə la ambo mɨ̀ŋə̀.’
46“Lenəla, pobə pɨ lèrə̀ amwuə ngəʼə̀ nɨ ɨ̀ ghoŋə̀nə nɨ nkuŋə̀, la pànə̀ nɨ mɨ̀nwùə̀ ɨ̀mobə təəmə̀nə lèrə̀ amwuə nɨ̀chyə̂mbyə̂ nɨ à ghoŋə̀nə nɨ nkuŋə̀.”
Currently Selected:
Matyù 25: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
