Matyù 20
20
Ngàŋə àfàʼà amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù
1“Ànwùə̀ nɨ̀fò nɨ̀pwuurə̀ a chyə̂ tsaʼa ngàŋə̀ ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù nɨ à lə̀ furə̀nə a ngẅùʼə ngẅùʼə ngə̀ a nɨ tàʼà ngàŋə àfàʼà nchyâ amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù e. 2Nkwùə̀ nɨ pobə pɨ pobə lə̀ pyiimə̀nə aŋunə ndùnə̀ nkabə̀ a nɨ twuə̀ a ghobə aŋunə taʼà njyə̂, à lə̀ tsàa a ghobə amwuə ɨ̀swùumə e ghu. 3À lə̀ furə̀ ndèrə̀ alyiʼə mɨ̀tàanə aŋunə pɨ̀nẅùumə̀ nɨ̀pwùʼə ndzəənə̀ pànə̀ pɨ̀tse təəmə̀ ghu ka pə fàʼà a ghobə àzwuumə̀ àtse. 4Lenəla, a shwəŋə̀ ambo pobə lo, ‘Nɨ̀ lèrə̀ àzɨghə amwuə ɨ̀swùumə mɨ̀ntàamə mɨ mɨ̀lùʼù ẅùə̀, mbɨ twuə̀ a wɨghə nɨ nkabə̀ nɨ ɨ̀ kùʼnə̀nə.’ 5Lenəla, ngàŋə àfàʼà ghu lèrə̀.
“À lə̀ kɨ nchi nfurə̀ aŋunə pɨ̀nẅùumə̀ ntsòbə̀ ɨpaa ghobə pɨ̀nẅùumə̀ pɨtarə nkẅirə̀ ngɨ̀rə̀ tyìʼə̀ a lenə. 6A lə̀ kɨ pə tsaʼa pɨ̀nẅùumə̀ pɨtaanə̀ a chi nfurə̀ ndèrə̀ alyiʼə mɨ̀tàanə nkɨ chi ndzəənə̀ a pɨ̀tse pə̀ənə̀ təəmə̀ ghu, a pyiitə̀ a ghobə lo, ‘À ghɨ̀rə̀ àkə nɨ̀ təəmə̀ a nɨ̀ghə̂ aŋunə njyə̂ zə̀ ka pə fàʼà a wɨghə àzwuumə̀ àtse?’ 7Pobə kẅùə̀ lo, ‘Ntiinə ka ŋònə̀ ɨ̀tse a ŋâ e àfàʼà ambo pəə.’ A shwəŋə̀ ambo pobə lo, ‘Nɨ̀ kɨ ndèrə̀ àzɨghə nfàʼà amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù mə̀.’
8“Nkwùə̀ nɨ nkwùə̀ nkwə̌ ɨ̀ lə̀ kùʼnə̀nə, ngàŋə̀ ɨ̀swùumə a shwəŋə̀ ambo àtwuə̀ ngàŋə àfàʼà lo, ‘Fuŋə̀ ngàŋə àfàʼà ntwuə̀ a ghobə mbìʼnə̀ aŋunə pànə̀ nɨ pɨ tənə ndẅùutə̀ ntô ngə̀ ndẅùutə̀ aŋunə pànə̀ nɨ pɨ tənə ndzàamə̀ ntô.’ 9Lenəla, pɨ lə̀ twuə̀ pànə̀ nɨ pobə lə̀ pìʼnə̀nə àfàʼà aŋunə pɨ̀nẅùumə̀ pɨtaanə̀ nɨ ndwùnə̀ nkabə̀ nɨ pɨ lə̀ pyiimə̀nə aŋunə taʼà njyə̂ àfàʼà. 10Nkwùə̀ nɨ pànə̀ pa nɨ pobə lə̀ pìʼnə̀nə àfàʼà a ngẅùʼə ngẅùʼə lə̀ tônə a nɨ kẅiirə̀ àzobə nkabə̀, pobə lə̀ mə nkwàŋə̀ lo pɨ̌ twuə̀ a ghobə nɨ nkabə̀ yɨ̀noʼnə. La pɨ kɨ ŋŋâ a ghobə nɨ ndwùnə̀ nɨ pɨ lə̀ pyiimə̀nə aŋunə taʼà njyə̂. 11Nkwùə̀ nɨ pobə lə̀ kẅiirə̀nə a zèrə, pobə lə̀ pìʼnə̀ a nɨ lẅùmpə̀ aŋunə ŋònə̀ nɨ à lə̀ lòonə a ghobə àfàʼà. 12Pobə shwəŋə̀ lo, ‘Pànə̀ pə nɨ wə̀ lòonə a ghobə a ndzùmə̀ lə̀ fàʼà pə aŋunə taʼà awà la pəə fàʼà aŋunə taʼà njyə̂ a ɨ̀sùmə nẅùumə̀, wə̀ twuə̀ a wəə pɨ pobə nɨ taʼà àzwuumə̀!’
13“A kẅùə̀ a taʼà ŋwùə̀ ghu yɨ̀tse lo, ‘Ngɨ̀ɨnə̀ mə̀, ka ǹgɨ̀rə̀ mə̀ ànwùə̀ àtse nɨ a pɨ̂nə ambo ghò. Yi pùu lə̀ pyiimə̀ la aŋunə nkabə̀ nɨ ɨ̀ kùʼnə̀nə aŋunə àfàʼà taʼà njyə̂? 14Kẅiirə̀ nkabə̀ o ndèrə̀ o. Ǹtàʼà ŋâ nkabə̀ ambo ngàŋə̀ àfàʼà ndẅùə̀ndzùmə̀ wə̀ tsaʼnə ǹkɨnə ŋŋâ ambo ghò. 15Kə̀ ka ǹtwuʼtə̀ mə̀ ɨ̀tɨ̀ŋnə̀ a nɨ ghɨ̀rə̀ tsaʼnə ǹkòŋə̀nə aŋunə zhyə̀ nɨ a pənə àzâ? Kə̀ nɨ̌ ghə̀ʼnə̀ mə̀ ntiinə ngwə̀ ngàbə̀ àpô?’
16“Lenəla, ndẅùə̀ndzùmə̀ à ghǎ pə ntsàambyə̀, ntsàambyə̀ â pə ndẅùə̀ndzùmə̀.”
Yěsû a chi nshwəŋə̀ mbə̀ʼə nɨ̀wɨghə̀ e
17Tsaʼnə Yěsû à lə̀ pənə nkoʼò ndèrə̀ a Yèrusalèmə̀ la, à lə̀ lòo ɨ̀zùŋə̀ ndzùmə̀ ɨ̀pe ntsòbə̀ ɨpaa mmìntə̀ a nɨ̀pwùnə, pobə pɨ pobə pə ngyìinə̀, a shwəŋə̀ ambo pobə lo, 18“Nɨ̀ zəənə̀! Pə̀ənə̀ koʼò ndèrə̀ a Yèrusalèmə̀, la pɨ̌ ŋâ a Moonə̀ Ŋwùə̀ ambo pɨ̀fò màʼà Nẅùə̀ nɨ pɨ̀nèrə̀ mbòomə pɨ̀ saʼà ɨ̀sàʼa e ndə̂ lo pɨ̌ zhwuutə̀ e, 19lenəla, ŋâ e ambo pànə̀ nɨ ka pobə pə ghobə pɨ̀Jew lo pɨ̀ nyèŋə̀ e, nkəʼə̀ e, nkẅùumə̀ e aŋunə àtɨ̀ghə pànkə̀nə, njyə̂ kɨ làŋə̀ ɨtarə â zhwuumə̀ a nɨ̀wɨghə̀.”
Àpyiitə̀ mǎ
20Mǎ pɨ ɨ̀poonə̀ pɨ Zebedì a tô ambo Yěsû pobə ɨ̀poonə̀ ɨ̀pe ntə̂ mɨ̀kwìʼtə ɨ̀me a ɨ̀shyə̂ ndoonə̀ lo â ghɨ̀rə̀ ànwùə̀ àtse ambo ze.
21Yěsû a pyiitə̀ ambo ze lo, “Wə̀ tàʼà la àkə ambo mɨ̀ŋə̀?”
Mǎ wa a shwəŋə̀ lo, “Kàʼà ambo mɨ̀ŋə̀ lo ɨ̀poonə̀ ɨ̀pâ pɨ mbyàŋnə̀ pə̀ pɨpaa ghǎ nwuunə̀ a nɨ̀pwùnə ghò, taʼà â nwuunə̀ àpô ghò yè zɨghə̀nə, ẅùə̀ a kɨ nnwuunə̀ aŋunə yè kẅàbə̀ amwuə alyiʼə nɨ̀fò o.”
22Yěsû a kẅùə̀ ambo pobə lo, “Ka nɨ̀ zhyə̂ a wɨghə ànwùə̀ nɨ nɨ̀ wə̀ mbyiitə̀. Mbə̀ʼə nɨ̀ nô ndoŋə̀ nɨ mbɨ nô?”
Pobə kẅùə̀ lo, “Mbə̀ʼə pəə nô.”
23Yěsû a shwəŋə̀ ambo pobə lo, “Nɨ̌ nô ndoŋə̀ ngəʼə̀ mə̀, la ngə̀ a nɨ nwuunə̀ a pàa àpô mɨ̀ŋə̀ yè zɨghə̀nə kə̀ yè kẅàbə̀, ka a pə e alyiʼə ànwùə̀ mə̀ a nɨ tiitə̀. La ɨlyiʼə pɨ̀ghu chyə̂ ambo pànə̀ pyə̀ nɨ Tǎ ɨwəə à lə̀ tsùŋə̀nə ambo pobə.”
24Nkwùə̀ nɨ pyə̀ ɨ̀zùŋə̀ ndzùmə̀ Yěsû pa nɨ̀ghumə̀ lə̀ zuʼnə, pobə lə̀ zaŋə̀ a loŋə aŋunə pɨlyimə pa pɨpaa. 25Lenəla, Yěsû a fuŋə̀ a ghobə pobə tô a shwəŋə̀ ambo pobə lo, “Nɨ̀ zhyə̂ lo ɨ̀twuə̀ ɨ̀laʼà pànə̀ nɨ ka pobə pə ghobə pɨ̀Jew pa mbuʼtə̀ a ghobə nɨ mɨ̀tɨ̀ŋnə̀ ɨ̀mobə, pə̀ənə̀ ɨ̀pobə pɨ̀ẅùunə kɨ mmə mbuʼtə̀ a ghobə nɨ ɨ̀mobə mɨ̀tɨ̀ŋnə̀. 26Lenəla, kò a pə e a lenə a tɨ̀tɨ̀rə̀ pɨghə, la ŋònə̀ nɨ à tàʼnə lo pə ŋònə̀ ngẅùunə amwuə pɨghə, ǎ pə ngàŋə̀ àfàʼà ɨwɨghə. 27Lenəla, ŋònə̀ nɨ à tàʼnə lo pə ntsàambyə̀, ǎ pə àpùʼù àzɨghə, 28ntiinə tyìʼə̀ Moonə̀ Ŋwùə̀ ka à lə̀ tô e pə lo pɨ̀ fàʼà ambo ze. À lə̀ tô pə lo fàʼà, ŋŋâ a nɨ̀chyə̂mbyə̂ e lo tsuʼù ɨ̀twuə̀ pànə̀ pɨ̀noʼnə ghu.”
Yěsû a parə̀ pɨ̀fə̀ pɨpaa
29Tsaʼnə Yěsû pobə ɨ̀zùŋə̀ ndzùmə̀ ɨ̀pe lə̀ mənə mmyàʼtə̀ àlaʼà Jèrikò la, àpùŋə̀ pə̀ənə̀ pɨ̀noʼnə a lə̀ zùŋə̀ a ghobə. 30Pɨ̀fə̀ pɨpaa lə̀ nwuunə̀ a nɨ̀pwùnə àlàŋə, nkwùə̀ nɨ pobə lə̀ zuʼnə lo Yěsû à wə̀ ndàŋə̀ la, pobə lə̀ kyiinə̀ nshwəŋə̀ lo, “Ndòʼnə̀mbyə̂, Moonə̀ Dàfirə̀, koorə̀ mɨ̀lɨŋə̀ ɨ̀məə!”
31Àpùŋə̀ pə̀ənə̀ za a saʼà a ghobə nshwəŋə̀ lo pobə̂ zhwemnə̀. La pobə lə̀ chi nkyiinə̀ nɨ mɨ̀tɨ̀ŋnə̀ lo, “Ndòʼnə̀mbyə̂, Moonə̀ Dàfirə̀, koorə̀ mɨ̀lɨŋə̀ ɨ̀məə!”
32Yěsû à lə̀ təəmə̀ nfuŋə̀ a ghobə, mbyiitə̀ lo, “Nɨ̀ tàʼà lo n̂gɨ̀rə̀ ɨla nɨ pɨghə?”
33Pobə kẅùə̀ lo, “Ndòʼnə̀mbyə̂, pəə tàʼà zəənə̀ ɨlyiʼə.”
34Yěsû à lə̀ sòmnə̀ aŋunə pobə ntyiʼə̀ mbètə̀ ɨ̀myə̂ ɨ̀mobə. Tyìʼə̀ nkwùə̀ ghu, pobə lə̀ zùŋə̀ ndzəənə̀ ɨlyiʼə, ndzùŋə̀ e.
Currently Selected:
Matyù 20: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
