Matyù 19
19
Yěsû a nèrə̀ ànwùə̀ mbə̀ʼə nɨ̀sìimə̀ a nɨ̀zoʼò
(Mrk 10.1-12)
1Nkwùə̀ nɨ Yěsû à lə̀ myàanə̀nə nshwəŋə̀ ɨ̀nwùə̀ pèrə pə̀ ɨ̀tsùmə̀, à lə̀ myàʼtə̀ àlaʼà Galìlyə̂ ngə̀ nkwuunə̀ a pàa àlaʼà Judyà a ndzìnə nchyə Jodànə̀. 2Ɨ̀pùŋə̀ pə̀ənə̀ pɨ̀noʼnə lə̀ zùŋə̀ e a parə̀ mɨghoonə ɨ̀mobə.
3Pɨ̀Farìsî pɨ̀tse lə̀ tô ambo ze a nɨ kwàʼnə̀ e mbyiitə̀ e lo, “Mbòomə à pyiimə̀ lo mbə̀ʼə ŋwùə̀ a fuukə̀ a ngẅùə e ntii ànwùə̀ àtse nɨ à ghɨ̀rə̀nə?”
4A pyiitə̀ a ghobə lo, “Nɨ̀ pirə̀ a wɨghə tɨ fuŋə̀ ànwùə̀ Nẅùə̀ za lo Nẅùə̀ nɨ à lə̀ tsùŋə̀nə pə̀ənə̀ a nɨ̀pìʼnə̀nə à lə̀ tsùŋə̀ la ŋònə̀ mbyàŋnə̀ pobə mə̀ngyə̌? 5Ntyiʼə̀ nshwəŋə̀ lo, ‘Tsaʼnə a pənə lə la, ŋònə̀ mbyàŋnə̀ à ghǎ myàʼtə̀ a tǎ ɨghobə pobə mǎ e, tô pwuutə̀ pobə ngẅùə e, pobə ze tyiʼə̀ taʼà mbòbə̀ mbɨ̀ŋmə̀.’ 6Lenəla pobə tyiʼə̀ taʼà ŋwùə̀ nchi mbə a ghobə pànə̀ pɨpaa apə̀. Àzwuumə̀ àtsùmə̀ nɨ Nẅùə̀ à pwuutə̀nə, kò ŋwùə̀ mɨsoŋə a ghàbə̀ e a zèrə.”
7Pobə pyiitə̀ e lo, “Mǔsî à kùmə̀ lə̀ shwəŋə̀ amwuə mbòomə lo mbə̀ʼə ŋwùə̀ a ŋâ àŋwàʼnə̀ nɨ̀sìimə̀ a nɨ̀zoʼò ambo ngẅùə e nfuukə̀ e a lèrə̀ la ntii àkə?”
8A kẅùə̀ ambo pobə lo, “Mǔsî à lə̀ pyiimə̀ lo mbə̀ʼə ŋwùə̀ a fuukə̀ a ngẅùə e ntiinə mɨ̀ntɨŋmə̀ ɨ̀mɨghə tɨ̀ŋnə̀ a nɨ zhyə̂ ànwùə̀. La ka a lə̀ pə e a lenə tsaʼnə àtwuə̀ ɨ̀shyə̂ a lə̀ pìʼnə̀nə. 9Ǹshwəŋə̀ ambo pɨghə lo ŋwùə̀ à tə nfuukə̀ a ngẅùə e a ndâ ze, ka fuukə̀ e pə ntii àfànə̀, ndzoʼò a ghù nyàanə yi à ghɨ̀rə̀ la àfànə̀.”
10Ɨ̀zùŋə̀ ndzùmə̀ ɨ̀pe shwəŋə̀ ambo ze lo, “A tə mbə la lə a tɨ̀tɨ̀rə̀ ŋònə̀ mbyàŋnə̀ pobə ngẅùə e, yi a pòŋə̀ pə lo ŋònə̀ mbyàŋnə̀ â nwuunə̀ e tɨ zoʼò.”
11La Yěsû a kẅùə̀ ambo pobə lo, “Ànwùə̀ zə̀ nɨ ngwə̀ nnèrə̀ lə ka a yìinə̀ e ambo ŋwùə̀ ntsùmə̀ a lenə. Mbə̀ʼə a yìinə̀ tyìʼə̀ ambo pyə̀ nɨ Nẅùə̀ à tsoʼò mə ŋŋâ ambo pobə; 12ntiinə pànə̀ pa nɨ ɨ̀sùmə chwìi chwìi a nɨ ghoŋə̀ tɨ zoʼò. Pɨ̀tse ghoŋə̀ ntiinə pɨ lə̀ pyə̂nə a ghobə a lenə, pɨ̀tse pə ntiinə pɨ səərə̀nə a ghobə, pɨ̀tse ghɨ̀rə̀ ɨ̀pɨ̀ŋmə̀ ghobə a lenə ntii ànwùə̀ Nɨ̀fò nɨ̀pwuurə̀. Ŋònə̀ nɨ mbə̀ʼə a pyiimə̀, â pyiimə̀.”
Yěsû a chyâ mborə̀ aŋunə kɨyii àghòbə
(Mrk 10.13-16; Luk 18.15-17)
13Pànə̀ pɨ̀tse lə̀ lòo kɨyii àghòbə ntô lo â nùŋə̀ mbô ɨ̀me àtwuə̀ pobə nchàʼtə̀ a Nẅùə̀. Ɨ̀zùŋə̀ ndzùmə̀ ɨ̀pe saʼà pànə̀ pa. 14La Yěsû a shwəŋə̀ ambo pobə lo, “Nɨ̀ myàʼtə̀ ɨ̀poonə̀ pa pobə̂ tô ambo mɨ̀ŋə̀. Kò nɨ̀ zòŋə̀ a ghobə, ntiinə ànwùə̀ Nɨ̀fò nɨ̀pwuurə̀ a chyə̂ la ambo pànə̀ tsaʼa pobə.”
15Tsaʼnə à lə̀ shwəŋə̀nə la, à lə̀ tyiʼə̀ nnùŋə̀ mbô ɨ̀me àtwuə̀ pobə, ndèrə̀ e.
Ànwùə̀ mbə̀ʼə môngwàswùumə̀ nɨ à pənə ngàŋə̀ nkabə̀
(Mrk 10.17-31; Luk 18.18-30)
16A lə̀ pə nkwùə̀ ɨ̀tse, ŋònə̀ ɨ̀tse a tô ambo Yěsû mbyiitə̀ e lo, “Ɨ̀nèrə̀, ànwùə̀ ɨ̀shìʼnə̀ nɨ mbə̀ʼə ǹgɨ̀rə̀ nkwuunə̀ amwuə nɨ̀chyə̂mbyə̂ wa nɨ à ghoŋə̀nə nɨ nkuŋə̀ la àkə?”
17Yěsû a pyiitə̀ ambo ze lo, “À ghɨ̀rə̀ àkə wə̀ pyiitə̀ mə̀ mbə̀ʼə ànwùə̀ ɨ̀shìʼnə̀? Ŋònə̀ nɨ à pənə ŋònə̀ ɨ̀shìʼnə̀, a tyìʼə̀ Taʼà ŋwùə̀. Wə̀ tə mmə nkòŋə̀ a nɨ kwuunə̀ amwuə nɨ̀chyə̂mbyə̂, wə̀ nùŋə̀ mɨ̀ntə̌ mɨ Nẅùə̀ ma.”
18A pyiitə̀ a Yěsû lo, “Mèrə mɨ̀ntə̌?”
Yěsû a kẅùə̀ ambo ze lo, “Kò wə̀ zhwuutə̀; kò wə̀ ghɨ̀rə̀ ànwùə̀ fànə̀; kò wə̀ zə̀ərə̀; kò wə̀ nyìi a chwìrə̀;#19.18 Ex 20.12-16; Dt 5.1-10 19mmə ndzuʼnə̀ a tǎ ɨwɨghə pobə mǎ o; nkɨ mmə nkòŋə̀ a ndyimə o tsaʼa mbɨ̀ŋmə̀ o.”
20Môngwàswùumə̀ wa a kẅùə̀ ambo Yěsû lo, “Ǹnùŋə̀ mə mɨ̀ntə̌ mèrə mə tyìʼə̀ mɨ̀tsùmə̀. Nchi mbə a nɨ ghɨ̀rə̀ la ànwùə̀ àkə àtse?”
21A kẅùə̀ ambo ze lo, “Wə̀ tə nkòŋə̀ a nɨ pòŋə̀ mmyàanə̀, wə̀ ghə̀ nshwùunə̀ ɨ̀pwuumə̀ ɨ̀pô ɨ̀tsùmə̀ ŋŋâ nkabə̀ ghu ambo ngàŋə̀ àfumə̀ yi wə̌ pə nɨ àfùʼù a nɨ̀pwuurə̀, ntyiʼə̀ ntô ndzùŋə̀ a mə̀.”
22Nkwùə̀ nɨ môngwàswùumə̀ wa à lə̀ zuʼnə ànwùə̀ ghu, à lə̀ lòo ndèrə̀ e nɨ àsòmnə̀, ntiinə à lə̀ pə nɨ ɨ̀pwuumə̀ pɨ̀noʼnə.
23Yěsû a tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Ǹshwəŋə̀ tyìʼə̀ nkǔŋə nkuŋə lo a kə̀ʼnə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò nɨ̀pwuurə̀. 24Ǹchi nkẅìʼnə̀ nshwəŋə̀ tyìʼə̀ nkǔŋə nkuŋə ambo pɨghə lo a zàŋə̀ ambo ləəmə nkunə a nɨ tswurə̀ amwuə ngwɨgrə̀ lyàmnə̀ ntsàarə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.”
25Nkwùə̀ nɨ ɨ̀zùŋə̀ ndzùmə̀ ɨ̀pe pa lə̀ zuʼnə a zèrə zə̀ ànwùə̀, a lə̀ tsàarə̀ a ghobə ka mɨ̀zùŋə. Pobə tyiʼə̀ mbyiitə̀ e lo, “Ŋònə̀ nɨ mbə̀ʼə a tyiʼə̀ nchwarə̀ lə a ɨ̀wə̌?”
26Yěsû a naŋə̀ mɨ̀sɨghə̀ ɨ̀mobə nshwəŋə̀ ambo pobə lo, “Ànwùə̀ zə̀ a tsàarə̀ a ŋwùə̀ mɨsoŋə, la ambo Nẅùə̀ mbə̀ʼə a ghɨ̀rə̀ ànwùə̀ àtsùmə̀.”
27Pità a tyiʼə̀ nkẅùə̀ nshwəŋə̀ lo, “Pəə nɨ pəə myàʼtə̀nə ɨ̀pwuumə̀ ɨ̀tsùmə̀ ndzùŋə̀ o lə pəə ghǎ tyiʼə̀ lanə pə àzəə la nɨ àkə?”
28Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo nkwùə̀ nɨ Moonə̀ Ŋwùə̀ à ghǎ nwuunə̀ aŋunə aləŋə nɨ̀fò e amwuə nguʼu mbyə̂ yɨ̀ shwuə̀, pɨghə pa ntsòbə̀ ɨpaa nɨ nɨ̀ lə̀ zùŋə̀nə mə̀ la, nɨ̀ ghǎ kɨ nwuunə̀ aŋunə aləŋə nɨ̀fò tyiʼə̀ saʼà mɨ̀ngẅàrə̀ mɨ pànə̀ pɨ Israel ma ntsòbə̀ ɨpaa. 29Ŋwùə̀ wa ntsùmə̀ nɨ à myàʼtə̀nə mɨ̀ndâ ɨ̀me, kə̀ pɨ̀momaa ɨ̀pe pɨ̀mbyàŋnə̀ pobə pɨ pə̀ngyə̌, kə̀ tǎ ɨghobə, kə̀ mǎ e, kə̀ ɨ̀poonə̀ ɨ̀pe, kə̀ ɨ̀pàbə ɨ̀shyə̂ ɨ̀pe mbə̀ʼə nɨ̀linə̀ ɨ̀tsâ, à ghǎ chi pə nɨ ɨ̀pwuumə̀ pɨ̀ghu nkwùə̀ nkɨrə, kɨ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. 30La pànə̀ pɨ̀noʼnə nɨ pɨ pənə pɨ̀tsàa pɨ̀mbyə̀ tɨ̀tsòŋə̀, pobə ghǎ tyiʼə̀ pə la pɨ̀lẅùə̀ pɨ̀ndzùmə̀; pɨ̀lẅùə̀ pɨ̀ndzùmə̀ tyiʼə̀ mbə pɨ̀tsàa pɨ̀mbyə̀.”
Currently Selected:
Matyù 19: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
