Matyù 13
13
Àshwəŋnə̀ nàanə nàanə mbə̀ʼə ngàŋə̀ ɨ̀mbyə̀ ɨ̀pwuumə̀
(Mrk 4.1-9; Luk 4.4-8)
1Tyìʼə̀ njyə̂ ghu Yěsû à lə̀ furə̀ a ndâ ndèrə̀ ngə̀ nnwuunə̀ a nɨ̀pwùnə atəŋə nchyə, 2ɨ̀pùŋə̀ pə̀ənə̀ kamnə̀ e. A tyiʼə̀ nkwuunə̀ amwuə àkànwuʼə ndèrə̀ amwuə nchyə, ɨ̀nòonə̀ pànə̀ wa tyiʼə̀ ntəəmə̀ a mbwùnə mɨ nchyə. 3A pìʼnə̀ a nɨ shwəŋə̀ mɨ̀nwùə̀ mɨ̀noʼnə ambo pobə amwuə ɨ̀shwəŋnə̀ pɨ̀nàanə nàanə, nshwəŋə̀ lo, “Ɨ̀ndyiʼə̀ ɨ̀swùumə à lə̀ furə̀ ndèrə̀ a nɨ màʼà ngẅàrə̀ ɨ̀pwuumə̀. 4Tsaʼnə à lə̀ mənə mmàʼà, mbyə ɨ̀pwuumə̀ za ɨ̀tse ɨ̀ lə̀ kẅìnə̀ amwuə àlàŋə ndwuumə̀ pɨ̀sɨ̀ŋə tsuutə̀. 5Yɨ̀tse ɨ̀ kẅìnə̀ àtwuə̀ àlàrə̀kə̀ nɨ̀ghòorə nɨ ɨ̀shyə̂ ɨ̀ lə̀ nyaʼnə mbə ghu pɨ̀mɨlyiʼə. Ɨ̀ lə̀ saʼà la ka àlàŋə a lə̀ pə e ghu nɨ mbə̀ʼə mɨŋaŋə ɨ̀me mìnə̀ a ɨ̀shyə̂. 6La nkwùə̀ nɨ nẅùumə̀ à lə̀ tânə, ɨ̀pwuumə̀ pa lə̀ zwuumə̀ tsaʼnə ka mɨŋaŋə lə mìnə̀ e a ɨ̀shyə̂ la. 7Yɨ̀tse ɨ̀ lə̀ kẅìnə̀ amwuə àpàbə ɨ̀shyə̂ nɨ àŋwàʼŋwaʼa a lə̀ pənə amwuə. Àŋwàʼŋwaʼa ghu a koʼò pobə pɨ mbyə ghu nsòpə̀ a zèrə. 8La yɨ̀tse mbyə ɨ̀ lə̀ kẅìnə̀ amwuə àpàbə ɨ̀shyə̂ yè pyə̂nə, nsaʼà ntyiʼə̀ nkẅuə̀ ndzumə̀ mɨ̀ntàamə nkɨrə, yɨ̀tse zumə̀ mɨ̀ghumə̀ ntuurə̀, yɨ̀tse zumə̀ mɨ̀ghumə̀ mɨntarə. 9Ŋònə̀ nɨ à pənə nɨ mɨtugrə â zuʼù!”
Ɨ̀sùmə nɨ Yěsû à lə̀ mənə nshwəŋnə̀ pə nɨ ɨ̀shwəŋnə̀ nàanə nàanə
(Mrk 4.10-12; Luk 8.9-10)
10Ɨ̀zùŋə̀ ndzùmə̀ ɨ̀pe lə̀ tô ambo ze mbyiitə̀ e lo, “Wə̀ wa nshwəŋnə̀ ambo pànə̀ pə amwuə ɨ̀shwəŋnə̀ pɨ̀nàanə nàanə la mbə̀ʼə àkə?”
11Yěsû a kẅùə̀ ambo pobə lo, “Nẅùə̀ à ŋâ a wɨghə nɨ àzhìʼtə̀ lo nɨ̀ zhyə̂ mɨ̀nwùə̀ mɨ lə̀əmə̀nə mbə̀ʼə ànwùə̀ Nɨ̀fò nɨ̀pwuurə̀, la ka ŋâ e ambo pobə. 12Ntiinə Ŋònə̀ nɨ à pənə nɨ àzhìʼtə̀ la, pɨ̌ kẅìʼnə̀ a pə nɨ ɨ̀zhìʼtə̀ pɨ̀noʼnə. La ŋònə̀ nɨ ka à pə e nɨ àzhìʼtə̀, pɨ̌ kẅirə̀ kẅiirə̀ a mɨlyiʼə nɨ à pənə nɨ zèrə. 13La ɨ̀sùmə nɨ ngwa nshwəŋnə̀ ambo pobə pə amwuə àshwəŋnə̀ nàanə nàanə la, mbə̀ʼə pobə tsùŋə̀ nnaŋə̀ la ndzəənə̀ a ghobə apə̀. Ntsùŋə̀ ndzuʼù la nzhyə̂ a ghobə apə̀, 14mbə̀ʼə lẅenə̀ ànwùə̀ nɨ Ìsayà ngàŋə̀ ntwuumə̀ Nẅùə̀ à lə̀ shwəŋə̀nə lo,
‘Nɨ̀ ghǎ zuʼù la zhyə̂ a wɨghə apə̀,
tsùŋə̀ naŋə̀ la ɨ̀myə̂ ɨ̀mɨghə zəənə̀ e apə̀.
15Ntiinə mɨ̀ntɨŋmə̀ mɨ pànə̀ lẅenə̀ nɨ àkɨ̀ghə̀,
pɨ puʼkə̀ mɨtugrə ɨ̀mobə ka pobə chi mmə ndzuʼù a ghobə ànwùə̀ àtse, nkɨ nnàanə̀ ɨ̀myə̂ ɨ̀mobə.
Ndàŋə̀ e a lenə, yi pobə̌ zəənə̀ nɨ ɨ̀myə̂ ɨ̀mobə,
zuʼù nɨ mɨtugrə ɨ̀mobə,
zhyə̂ amwuə mɨ̀ntɨŋmə̀ ɨ̀mobə mèrə laanə̀ amwuə,
m̂bə̀ŋə̀ a ghobə ntô ambo mɨ̀ŋə̀ mbarə̀ a ghobə.’
16“Mborə̀ ɨ̀ chyə̂ ambo pɨghə, ntiinə ɨ̀myə̂ ɨ̀mɨghə mə ndzəənə̀ ɨlyiʼə, mɨtugrə ɨ̀mɨghə kɨ mmə ndzuʼù ɨ̀nwùə̀. 17Nɨ̀ zhyə̂ lo, ngàŋə ntwuumə̀ Nẅùə̀ yi noʼnə pobə pɨ pànə̀ nɨ mɨ̀nwùə̀ ɨ̀mobə təəmə̀nə lə̀ mə ngyìi a nɨ zəənə̀ ànwùə̀ nɨ nɨ̀ wə̀ ndzəənə̀ la ka zəənə̀ a ghobə, mmə ngyìi a nɨ zuʼù ànwùə̀ nɨ nɨ̀ wə̀ ndzuʼù lə la ka zuʼù a ghobə.”
Yěsû a tiitə̀ ɨ̀sùmə àshwəŋnə̀ nàanə nàanə zə
(Mrk 4.13-20; Luk 8.11-15)
18“Nɨ̀ tsùŋə̀ nzhwiʼtə̀ la, n̂tiitə̀ ànwùə̀ nɨ àshwəŋnə̀ nàanə nàanə mbə̀ʼə ngàŋə̀ mbyə ɨ̀pwuumə̀ wə̀ a pənə zèrə: 19Pànə̀ nɨ pobə pa ndzuʼù àshwəŋnə̀ mbə̀ʼə ànwùə̀ Nɨ̀fò Nẅùə̀ ka a mə ndaanə̀ e àtwuə̀ pobə chyə̂ la tsaʼa ngẅàrə̀ ɨ̀pwuumə̀ za nɨ ɨ̀ lə̀ kẅìnə̀nə a àlàŋə ndwuumə̀ pɨ̀sɨ̀ŋə tô ntsuutə̀ la. 20Mbyə ɨ̀pwuumə̀ za nɨ ɨ̀ lə̀ kẅìnə̀nə àtwuə̀ àlàrə̀kə̀ nɨ̀ghòorə ɨ̀ chyə̂ la tsaʼa pànə̀ pa nɨ pobə pa ndzuʼù ànwùə̀ Nẅùə̀ nkẅiirə̀ nɨ nɨ̀ghaʼà. 21La ka zèrə a tẅəŋə̀ e mɨŋaŋə ɨ̀me amwuə pobə, pobə tyiʼə̀ ngẅìimə̀ aŋunə mətùmə nkwùə̀. Nkwùə̀ nɨ ngəʼə̀ kə̀ ntòmnə̀ mə ntô mbə̀ʼə àshwəŋnə̀ Nẅùə̀ ghu, pobə zùŋə̀ mmyàʼtə̀ nkɨ̀ɨrə̀ a ghobə. 22Mbyə ɨ̀pwuumə̀ za nɨ ɨ̀ lə̀ kẅìnə̀nə amwuə àpàbə ɨ̀shyə̂ àŋwàʼŋwaʼa za ɨ̀ təəmə̀ la àtwuə̀ nɨ pànə̀ nɨ pobə pa ndzuʼù ntwuumə̀ ghù ɨ̀shìʼnə̀ wə̀, la ntòmnə̀ mbə̀ʼə nɨ̀chyə̂mbyə̂ pobə ntoŋə nkabə̀ tô nsòpə̀ ntwuumə̀ ghù ɨ̀shìʼnə̀ wə̀, ka pobə tyiʼə̀ mmə ndzumə̀ a ghobə mɨ̀ntàamə. 23Mbyə ɨ̀pwuumə̀ za nɨ ɨ̀ lə̀ kẅìnə̀nə amwuə àpàbə ɨ̀shyə̂ yè ɨ̀shìʼnə̀ za ɨ̀ təəmə̀ la àtwuə̀ nɨ pànə̀ pa nɨ pobə pa ndzuʼù ntwuumə̀ ghù ɨ̀shìʼnə̀ wa ẅèrə laanə̀ àtwuə̀ pobə, pobə tyiʼə̀ ndzumə̀ mɨ̀ntàamə, pɨ̀tse zumə̀ nkɨrə, pɨ̀tse zumə̀ mɨ̀ghumə̀ ntuurə̀, pɨ̀tse zumə̀ mɨ̀ghumə̀ mɨntarə.”
Àshwəŋnə̀ nàanə nàanə mbə̀ʼə ngunə̀
24Yěsû à lə̀ chi nkẅìʼnə̀ nshwəŋə̀ àshwəŋnə̀ nàanə nàanə ambo pobə nshwəŋə̀ lo, “Ànwùə̀ nɨ̀fò nɨ̀pwuurə̀ a chyə̂ la tsaʼa ŋònə̀ ɨ̀tse nɨ à lə̀ lyiʼnə ɨ̀swùumə e mbyə̀ mbyə ɨ̀pwuumə̀ ɨ̀shìʼnə̀ amwuə ɨ̀swùumə e ghu. 25A pə nɨ ɨ̀twuʼə̀, nkwùə̀ nɨ pɨ mənə ndyə̂, ngàŋə̀ kɨpaanə e a nyaʼtə̀ ntô mmàʼà ngunə̀ amwuə ndèrə̀ e. 26Nkwùə̀ nɨ mbyə ɨ̀pwuumə̀ za ɨ̀ lə̀ kẅuə̀nə ntyiʼə̀ mmə ndzumə̀, ngunə̀ za ɨ̀ lə̀ pìʼnə̀ a nɨ koʼò.
27“Ngàŋə àfàʼà ŋònə̀ wa lə̀ tô mbyiitə̀ e lo, ‘Tǎ, yi wə̀ lə̀ pyə̀ la mbyə ɨ̀pwuumə̀ ɨ̀shìʼnə̀ amwuə ɨ̀swùumə o wə̀? Ngunə̀ ɨ̀ kùmə̀ ntyiʼə̀ nfurə̀ lə ɨghə amwuə?’
28“A kẅùə̀ ambo pobə lo, ‘A zèrə zə ànwùə̀ lə à ghɨ̀rə̀ ngàŋə̀ kɨpaanə.’
“Pobə pyiitə̀ lo, ‘Pəə ghə̀ ndwùnə̀ ngunə̀ ghu?’
29“A kẅùə̀ ambo pobə lo, ‘Ngaŋə! Kò nɨ̀ ghə̀, ntiinə nɨ̀ tə mə ndwùnə̀, nɨ̀ sòʼò mɨ̀kwuunə̀ ma mɨ̀tsùmə̀. 30Nɨ̀ myàʼtə̀ mɨ̀kwuunə̀ ma ghobə ngunə̀ kẅuə̀ mbyàa nkwùə̀ nɨ̀fùʼù. Mbɨ shwəŋə̀ ambo ngàŋə àfàʼà za lo pobə pyə̀ ndwùnə̀ ngunə̀ za nkorə̀ a mbyiŋə̀ mbyiŋə̀ ntòonə̀, ntyiʼə̀ nsòʼò mɨ̀kwuunə̀ nchyâ amwuə àzuŋə̀ mə̀.’”
Àshwəŋnə̀ nàanə nàanə mbə̀ʼə mbyə àloonə̀
(Mrk 4.30-32; Luk 13.18-19)
31Yěsû à lə̀ chi nshwəŋə̀ àshwəŋnə̀ nàanə nàanə ambo pobə lo, “Ànwùə̀ nɨ̀fò nɨ̀pwuurə̀ a chyə̂ tsaʼa mbyə̀ àloonə̀ nɨ ŋwùə̀ à lòonə mbyə̀ amwuə ɨ̀swùumə e. 32Mbyə̀ àloonə̀ la mbyə za nɨ ɨ̀ kɨ̂nə ntsàarə̀ mbyə ntsùmə̀, la nkwùə̀ nɨ ɨ̀ saʼnə ɨ̀ za nfaŋə̀ ntsàarə̀ àtɨ̀ghə àtsùmə̀, pɨ̀sɨ̀ŋə tyiʼə̀ ntô nkorə̀ mɨ̀nkàanə̀ ɨ̀mobə aŋunə.”
Àshwəŋnə̀ nàanə nàanə mbə̀ʼə mbyə̌ àpaanə̀
(Luk 13.20-21)
33Yěsû a chi shwəŋə̀ àshwəŋnə̀ nàanə nàanə yètse ambo pobə lo, “Ànwùə̀ nɨ̀fò nɨ̀pwuurə̀ a chyə̂ la tsaʼa mbyə̌ àpaanə̀ nɨ mə̀ngyə̌ à lòonə nchyâ amwuə ngònderə̀ àpaanə̀ a tyiʼə̀ nkoʼò ndẅenə̀ ɨlyiʼə.”
Ɨ̀sùmə nɨ Yěsû à lə̀ mənə nshwəŋnə̀ pə nɨ ɨ̀shwəŋnə̀ pɨ̀nàanə nàanə
(Mrk 4.33-34)
34Yěsû à lə̀ lòo la ɨ̀shwəŋnə̀ pɨ̀nàanə nàanə pə̀ nnèrə̀ mɨ̀nwùə̀ ambo àpùŋə̀ pə̀ənə̀ zə; ka à lə̀ mə nnèrə̀ e ànwùə̀ àtse tɨghu à shwəŋə̀ pə amwuə àshwəŋnə̀ nàanə̀ nàanə. 35Zèrə zə a lə̀ pə la a nɨ lẅenə̀ ànwùə̀ nɨ ngàŋə̀ ntwuumə̀ Nẅùə̀ à lə̀ shwəŋə̀nə lo,
“Mbɨ shwəŋnə̀ ambo pobə amwuə ɨ̀shwəŋnə̀ pɨ̀nàanə nàanə.
Mbɨ tiitə̀ a ghobə nɨ mɨ̀nwùə̀ nɨ mɨ lə̀ pənə mɨ lə̀əmə̀nə a nɨ̀pìʼnə̀ nkwùə̀ nɨ pɨ lə̀ tsùŋə̀nə àtwuə̀ ɨ̀shyə̂.”
Yěsû a tiitə̀ ɨ̀sùmə àshwəŋnə̀ nàanə nàanə mbə̀ʼə ngunə̀
36Nkwùə̀ nɨ Yěsû à lə̀ myàʼtə̀nə àpùŋə̀ pə̀ənə̀ za nkwuunə̀ amwuə ndâ, ɨ̀zùŋə̀ ndzùmə̀ ɨ̀pe lə̀ tô ambo ze nshwəŋə̀ lo, “Tiitə̀ a wəə nɨ ɨ̀sùmə àshwəŋnə̀ nàanə nàanə mbə̀ʼə ngunə̀ amwuə ɨ̀swùumə.”
37Yěsû a kẅùə̀ ambo pobə lo, “Ŋònə̀ nɨ à lə̀ màʼnə ngẅàrə̀ ɨ̀shìʼnə̀ la Moonə̀ Ŋwùə̀; 38ɨ̀swùumə ɨ pə àtwuə̀ ɨ̀shyə̂; ngẅàrə̀ ɨ̀shìʼnə̀ ɨ̀ pə pànə̀ nɨ pobə pənə amwuə ànwùə̀ nɨ̀fò; ngunə̀ ɨ̀ pə pànə̀ pɨ ŋònə̀ tɨ̀pòŋə̀; 39lenəla ngàŋə̀ kɨpaanə nɨ à màʼnə ngẅàrə̀ zə a pə Àzhwùə̀ tɨ̀pòŋə̀. Nkwùə̀ nɨ̀fùʼù pə ndẅùutə àtwuə̀ ɨ̀shyə̂, lenəla pɨ̀fùʼù pə pəngèrə̀.
40“Tsaʼnə pɨ pa nshwatə̀ ngunə̀ ntòonə̀ amwuə ɨ̀mǔ la, a tsaʼnə a ghǎ pə a ndẅùutə àtwuə̀ ɨ̀shyə̂. 41Moonə̀ Ŋwùə̀ à ghǎ twuumə̀ pəngèrə̀ ɨ̀pe pobə̂ fuukə̀ pànə̀ nɨ pobə pa ngɨ̀rə̀ pànə̀ fànə̀ pobə pyə̀ nɨ pobə pa ngɨ̀rə̀ a tɨ̀pòŋə̀ amwuə ànwùə̀ nɨ̀fò e. 42Lenəla, mmàʼà a ghobə amwuə àkɨɨnə̀ ɨ̀mǔ alyiʼə nɨ pobə̌ tyiʼə̀ kwurə̀ mɨsoŋə ɨ̀mobə. 43Lenəla, pànə̀ pɨ Nẅùə̀ tyiʼə̀ ntâ tsaʼa nẅùumə̀ amwuə nɨ̀fò nɨ tǎ ɨghobə. Ŋònə̀ nɨ à pənə nɨ mɨtugrə â zuʼù.
Àshwəŋnə̀ nàanə̀ nàanə mbə̀ʼə ɨ̀pwuumə̀ pɨ lə̀əmə̀nə
44“Ànwùə̀ nɨ̀fò nɨ̀pwuurə̀ a chyə̂ tsaʼa àzwuumə̀ nɨ a lə̀əmə̀nə amwuə ɨ̀shyə̂. Nkwùə̀ nɨ ŋwùə̀ à zəənə̀nə a zèrə, a chi ntsùŋə̀ ndə̀əmə̀ a zèrə, ntyiʼə̀ mbə nɨ nɨ̀ghaʼà ngə̀ nshwùunə̀ ɨ̀pwuumə̀ ɨ̀pe ɨ̀tsùmə̀ lo ghə̀ zwuunə̀ alyiʼə a ɨ̀shyə̂ yè ghu.
45“Ànwùə̀ nɨ̀fò nɨ̀pwuurə̀ a chyə̂ mbə tsaʼa ngàŋə̀ mɨ̀tàanə à tàʼà ɨ̀pwuumə̀ pɨ tsèntə̀nə pɨ̀shìʼnə̀. 46Nkwùə̀ nɨ à zəənə̀nə a zhyə̀ nɨ a pòŋə̀nə e ɨ̀shìʼnə̀, a lèrə̀ ngə̀ nshwùunə̀ àzwuumə̀ àtsùmə̀ nɨ à twuʼtə̀nə, ndzwuunə̀ a yè ghu.”
Àshwəŋnə̀ nàanə̀ nàanə mbə̀ʼə àlàʼà
47“Ànwùə̀ nɨ̀fò nɨ̀pwuurə̀ a kɨ nchi mbə la tsaʼa àlàʼà nɨ pɨ màʼnə amwuə atəŋə nkô mbuurə̀ ɨ̀swuə̀ ɨ̀tsùmə̀. 48Nkwùə̀ nɨ a lẅenə̀nə pɨ̀nkô ɨ̀swuə̀ sùŋə̀ furə̀ a ɨsɨghə, nnwuunə̀ a ɨ̀shyə̂ a nɨ̀pwùnə nɨ nchyə, ntyiitə̀ a yɨ̀ ɨ̀shìʼnə̀ nchyâ amwuə mɨnkaamə, ngwaʼà a yɨ̀ tɨ̀pòŋə̀. 49Lə̀ tsaʼnə a ghǎ pə a ndẅùutə àtwuə̀ ɨ̀shyə̂. Pəngèrə̀ ghǎ tô fuukə̀ pànə̀ pɨ̀tɨ̀pòŋə̀ amwuə pɨ̀shìʼnə̀, 50màʼà a ghobə amwuə àkɨɨnə̀ ɨ̀mǔ alyiʼə nɨ pobə̌ tyiʼə̀ yìi kwurə̀ mɨsoŋə ɨ̀mobə.”
51Yěsû a pyiitə̀ ghobə lo, “Nɨ̀ zhyə̂ mɨ̀nwùə̀ mə mɨ̀tsùmə̀?”
Pobə kẅùə̀ lo, “Ee”.
52A shwəŋə̀ ambo pobə lo, “Ɨ̀nèrə̀ mbòomə ntsùmə̀ nɨ pɨ tiitə̀ mə e mbə̀ʼə ànwùə̀ Nɨ̀fò nɨ̀pwuurə̀ à chyə̂ tsaʼa ngàŋə̀ ndâ nɨ à fuukə̀nə ɨ̀pwuumə̀ pɨ̀lwùnə̀ pobə pɨ̀shwuə̀ amwuə ntaŋə e ntsàa a àpyìinə.”
Pɨ twuunə̀ a Yěsû a Nazarètə̀
(Mrk 6.1-6; Luk 4.16-30)
53Nkwùə̀ nɨ Yěsû à lə̀ myàanə̀nə ɨ̀shwəŋnə̀ pɨ̀nàanə nàanə pə, à lə̀ myàʼtə̀ alyiʼə ghu 54nkẅirə̀ ndèrə̀ amwuə àlaʼà pobə. À lə̀ nèrə̀ mɨ̀nwùə̀ amwuə ndâ àshwatə̀ pɨ̀Jew ɨzobə. Pànə̀ nɨ pɨ lə̀ zuʼnə e lə̀ yerə̀, ntyiʼə̀ mbyiitə̀ lo, “Ŋònə̀ wə̀ à lòo a zə àzhìʼtə̀ ɨghə nɨ mɨ̀nwùə̀ mɨ̀yerə̀nə yerə̀nə mə? 55Ka à pə e lə moonə̀ kapɨndà? Ka Màriyà a pə e mǎ e, Jemə̀ nɨ Jòsebə̀ nɨ Shimùnə̀ nɨ Yudà ka pə e pɨlyimə ɨ̀pe pɨ̀mbyàŋnə̀? 56Ka pɨlyimə ɨ̀pe pɨ pə̀ngyə̌ pə e pə̀ənə̀ ɨ̀pobə? À tyiʼə̀ ndòo mɨ̀nwùə̀ mə mɨ̀tsùmə̀ ɨghə?” 57Lenəla pobə lə̀ tyiʼə̀ ntwuunə̀ e.
La Yěsû a shwəŋə̀ ambo pobə lo, “Ngàŋə̀ ntwuumə̀ Nẅùə̀ a chyə̂ lo pɨ̀ ghuʼtə̀ e alyiʼə àtsùmə̀, ndàŋə̀ e amwuə àlaʼà àzobə nɨ ngẅàrə̀ e.”
58Ka à lə̀ chi ngɨ̀rə̀ e mɨ̀nwùə̀ mɨ̀yerə̀nə mɨ̀noʼnə ntiinə pobə lə̀ puŋə̀nə àpyiimə̀.
Currently Selected:
Matyù 13: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
