Lukə̀ 20
20
Pɨ pyiitə̀ a Yěsû nɨ alyiʼə nɨ à lòonə ɨ̀tɨ̀ŋnə̀ e ghu
(Mat 21.23-27; Mrk 11.27-33)
1A lə̀ pə njyə̂ ɨ̀tse Yěsû nkwuunə̀ a Ndâ Mɨ̀shwàʼà Nẅùə̀ mmə nnèrə̀ mɨ̀nwùə̀ ambo pə̀ənə̀ nkɨ mə nchwìitə̀ ntwuumə̀ ghù ɨ̀shìʼnə̀, pɨ̀fò màʼà Nẅùə̀, pobə pɨ̀nèrə̀ mbòomə, nɨ pɨ̀lɨ̀ŋmə̂ lə̀ tô mbyiitə̀ e lo, 2Tiitə̀ a wəə! “À ŋâ ɨ̀wə̌ ŋŋâ o nɨ mɨ̀tɨ̀ŋnə̀ mə lo wə̀ ghɨ̀rə̀ mɨ̀nwùə̀ mə? Ɨ̀tɨ̀ŋnə̀ ẅèrə wə̀ ambo ghò la à ŋâ ɨ̀wə̌?” 3A kẅùə̀ ambo pobə lo, “Mbɨ kɨ pyiitə̀ a wɨghə nɨ àpyiitə̀ shwəŋnə̀. 4Jònə à lə̀ lòo ɨ̀tɨ̀ŋnə̀ a nɨ ŋâ àkẅiirə̀ nchyə la ambo Nẅùə̀ kə̀ ambo ŋwùə̀ mɨsoŋə?” 5Pobə tyiʼə̀ nshwəŋə̀ pobə nɨ pobə lo, “pə̀ənə̀ tə mbə lə̀ nkẅùə̀ lo, à lə lòo la ambo Nẅùə̀ yi a pyiitə̀ a wəənə̀ lo, nɨ̀ lə̀ tyiʼə̀ ka pyiimə̀ a wɨghə ànwùə̀ nɨ à lə̀ shwəŋə̀nə ntii àkə? 6La pə̀ənə̀ tə shwəŋə̀ lo, ɨ̀tɨ̀ŋnə̀ e lə furə̀ ambo ŋwùə̀ mɨsoŋə, yi pànə̀ pɨ̀tsùmə̀ a ɨ̀shyə̂ nɨ̀ghə̂ pɨ tumpə̀ a wəənə̀ nɨ mɨ̀ghòorə, ntiinə pobə pɨ̀tsùmə̀ pyiimə̀ lo Jònə à lə̀ pə ngàŋə̀ ntwuumə̀ Nẅùə̀.”
7Lenəla pobə tyiʼə̀ nkẅùə̀ lo, “Ka pəə zhyə̂ a wəə alyiʼə nɨ ɨ̀tɨ̀ŋnə̀ e ɨ lə̀ furə̀nə ghu”. 8Yěsû a tyiʼə̀ nshwəŋə̀ ambo pobə lo, “Ka mbə kɨ tiitə̀ mə̀ a wɨghə nɨ ŋònə̀ nɨ a ŋânə mə̀ nɨ ɨ̀tɨ̀ŋnə̀ lo ngɨ̀rə̀ mɨ̀nwùə̀ mə̀.”
Àshwəŋnə̀ nàanə nàanə mbə̀ʼə pànə̀ nɨ pobə pa nfàʼà amwuə mbyiinə̀ mɨ̀ntàamə mɨ mɨ̀lùʼù
(Mat 21.33-46; Mrk 12.1-12)
9Yěsû a shwəŋə̀ àshwəŋnə̀ nàanə nàanə ambo pobə lo, “Ŋònə̀ ɨ̀tse à lə pə nɨ mbyiinə̀ mɨ̀ntàamə mɨ mɨ̀lùʼù, ŋŋâ zèrə̀ ambo pànə̀ pɨ̀tse lo pobə̂ fàʼà amwuə nkɨ mmə ŋŋâ ɨ̀ze nkabə̀, nfurə̀ ndèrə̀ e a àtwuumə̀ aŋunə ntyə̌ sàa. 10Nkwùə̀ ɨ̀ lə̀ kùʼù a nɨ kabə̀ mɨ̀ntàamə mɨ mɨ̀lùʼù, a tsàa a ngàŋə̀ àfàʼà e lo â ghə̀ nkẅiirə̀ mɨ̀ntàamə mɨ mɨ̀lùʼù ma mɨ̀tse ambo pobə, la pobə kô e nkəʼə̀ e ntsàa e mbô nɨ mbô. 11A nkɨ nchi ntsàa a ngàŋə̀ àfàʼà wa ghùtse, pɨ kɨ nchi nkəʼə̀ e ntsàa e a kwə̂ tyìʼə̀ mbô nɨ mbô. 12A kɨ nchi ntsàa a ẅùə̀ nɨ à pyàanə nòmbàa pɨtarə, pɨ kô a ẅèrə wə̀ nchyâ ɨ̀lǎ aŋunə ze, mmàʼà e a àpyìinə. 13Ngàŋə̀ mbyiinə̀ wa a shwəŋə̀ lo mbɨ tyiʼə̀ ghɨ̀rə̀ lə ɨla tɨ̀tsòŋə̀? Mbɨ tsàa a moonə̀ mə̀ ghu mbyàŋnə̀ wə̀ nɨ ǹkòŋə̀nə e ka mɨ̀zùŋə lə, nkwùə̀ ɨ̀tse pɨ̀ ŋâ e nɨ àghuʼtə̀. 14La pànə̀ pa zəənə̀ e, nshwəŋə̀ pobə nɨ pobə lo, ‘Lə̌ ɨ̀ndzɨ̀ghə̀ ndâ e, pə̀ənə̀ zhwuutə̀ e mbə̀ʼə ɨ̀pwuumə̀ ɨ̀pe tyiʼə̀ ɨ̀pə̀ənə̀.’ 15Pobə lə̀ tyiʼə̀ nkô e mmàʼà a ndzùmə̀ mbyiinə̀ nzhwuutə̀.”
Yěsû a tyiʼə̀ mbyiitə̀ a ghobə lo, “Nɨ ndwuumə̀ wə̀ nɨ̀ kwàŋə̀ lo ngàŋə̀ mbyiinə̀ wə̀ ǎ ghɨ̀rə̀ ɨla nɨ pobə? 16À ghǎ zhwuutə̀ pànə̀ pə̀ ŋâ mbyiinə̀ e ambo pànə̀ pɨ̀nyaanə.” Nkwùə̀ nɨ pànə̀ pa lə̀ zuʼnə a lenə la, pobə lə̀ tyiʼə̀ nshwəŋə̀ lo, “Mbə̀ʼə Nẅùə̀ a pyiimə̀ e apə̀.” 17Yěsû a naŋə̀ a ghobə mbyiitə̀ lo, “Àshwəŋnə̀ zə̀ a nèrə̀ lə lo àkə? ‘Nɨ̀ghòorə tsa nɨ pɨ̀mboomə̀ mɨ̀ndâ lə̀ twuunə̀nə la, nɨ pə̀ŋə̀ mə ntyiʼə̀ nɨ̀ghòorə nɨ̀lẅuə̀ nɨ ndâ.’ 18Ŋwùə̀ wa ntsùmə̀ nɨ ǎ kunə̀ aŋunə nɨ̀ghòorə tsə̀ à pɨ piʼtə̀; la nɨ tə nkunə̀ aŋunə ŋwùə̀, nɨ nẅàrə̀kə̀ e.”
Àpyiitə̀ mbə̀ʼə nɨ̀twuə̀ pɨ̀taghə̀
(Mat 22.15-22; Mrk 12.13-17)
19Pɨ̀nèrə̀ mbòomə pobə pɨ̀fò màʼà Nẅùə̀ lə̀ tàʼà àlàŋə a nɨ kô e nkwùə̀ ghu, la mbô ɨ̀myə̂ mɨ pə̀ənə̀. Pobə lə̀ zhyə̂ lo, à shwəŋə̀ àshwəŋnə̀ nàanə nàanə zə̀ lə̀ aŋunə pobə. 20Pobə lə̀ tyiʼə̀ mmə ntàʼà ɨ̀sàanə̀ a nɨ kô e, ntàʼà pànə̀ ntsàa a ndzùmə̀ ze lo pobə̂ nyaʼa nnyoorə̀ mɨ̀nwùə̀ ambo ze mbə̀ʼə a shwəŋə̀ ànwùə̀ àtse pobə̂ furə̀ aŋunə nkô e ŋŋâ ambo ŋònə̀ ngẅùunə àlaʼà Romə̀ nɨ à pənə nɨ ɨ̀tɨ̀ŋnə̀ àtwuə̀ pobə. 21Pànə̀ pa lə̀ tyiʼə̀ mbyiitə̀ e lo, “Ɨ̀nèrə̀ ɨ̀nwùə̀ pəə zhyə̂ lo, ànwùə̀ nɨ wə̀ wa nshwəŋə̀ nkɨ mmə nnèrə̀ a kùʼnə̀, nkɨ nzhyə̂ lo ka wə̀ nèrə̀ o a tə̀chwìi a tɨ̀tɨ̀rə̀ pə̀ənə̀, nkɨ mmə nnèrə̀ o pə ndàʼà àlàŋə za nɨ Nẅùə̀ à tàʼnə lo pànə̀ chyə̂ aŋunə la. 22A kùʼnə̀ amwuə mbòomə ɨ̀wə̀ənə̀ lo pɨ̀ twuə̀ pɨ̀taghə̀ ambo Kaasà kə̀ ngaŋə?”
23La Yěsû à lə̀ zhyə̂ a mɨnaŋə ɨghobə, nshwəŋə̀ ambo pobə lo, 24“Nɨ̀ nèrə̀ mə̀ nɨ nkabə̀ silbà n̂dzəənə̀.” A pyiitə̀ ghobə lo, “Lə̌ àtwuə̀ ɨ̀wə̌ nɨ nɨ̀linə̀ ɨ̀wə̌ aŋunə nkabə̀ zə̀?”
Pobə kẅùə̀ lo, “A yè Kaasà.”
25Lenəla, a shwəŋə̀ ambo pobə lo, “Njiilo lo nɨ̀ ŋâ ɨ̀pwuumə̀ pyə̀ nɨ pənə pɨ Kaasà ambo Kaasà, nkɨ ŋâ a pyə̀ nɨ pənə pɨ Nẅùə̀ ambo Nẅùə̀.” 26Ka pobə lə̀ zəənə̀ ghobə ndwuumə̀ nɨ mbə̀ʼə pobə làŋə̀ ghu nkô e a ɨ̀myə̂ pə̀ənə̀ ntiinə ànwùə̀ nɨ à lə̀ shwəŋə̀nə la a lə̀ tsàarə̀ a ghobə.
Àpyiitə̀ mbə̀ʼə nɨ̀zhwuumə̀ a nɨ̀wɨghə̀
(Mat 22.23-33; Mrk 12.18-27)
27Pɨ̀Sadducee pɨ̀tse pyə̀ nɨ pobə pa nshwəŋə̀ lo mbə̀ʼə ka ŋwùə̀ a zhwuumə̀ e a nɨ̀wɨghə̀ 28lə̀ tô mbyiitə̀ a Yěsû lo, “Ɨ̀nèrə̀ ɨ̀nwùə̀, Mǔsî à lə̀ ŋâ ntə̌ ambo pə̀ənə̀ lo, ndwuumə̀ ŋwùə̀ à tə nkwɨghə̀ tə moonə̀, momaa e a lòo a ngẅùə e mbyə̂ ɨ̀poonə̀ ŋŋâ ambo ndyimə e wa. 29Ɨ̀poonə̀ pɨ mǎ ɨ̀tse lə̀ pə ghu sàmbaa, ghù ntsàambyə̀ a zoʼò mə̀ngyə̌ nkwɨghə̀ tɨ pyə̂ a moonə̀, 30àpaatə̀ a chi ndòo a mə̀ngyə̌ wa, nkɨ nkwɨghə̀ àze tɨ pyə̂ a moonə̀. 31Ẅùə̀ nɨ à pənə nòmbàa pɨtarə, a kɨ ndòo mə̀ngyə̌ wa; pobə pa pɨ̀tsùmə̀ sàmbaa lə̀ zoʼò a mə̀ngyə̌ wa nkɨ nkwɨghə̀ a ghobə pɨ̀tsùmə̀ tɨ pyə̂ a moonə̀. 32Mə̀ngyə̌ wa à lə̀ kɨ ndẅùutə̀ nkwɨghə̀ àze. 33Tsaʼnə a pənə lə, nkwùə̀ nɨ pɨ ghǎ zhwuumə̀ a nɨ̀wɨghə̀, mə̀ngyə̌ wə̀ à ghǎ tyiʼə̀ pə ngẅùə ɨ̀wə̌? Tsaʼnə pobə pa pɨ̀tsùmə̀ sàmbaa lə̀ zoʼnə e la?” 34Yěsû a kẅùə̀ ambo pobə lo, “Pànə̀ pɨ nguʼu wə̀ pa ndzoʼò nkɨ ŋŋâ ɨ̀pôpə̀ngyə̌ a ndâ nɨ̀zoʼò, 35la pànə̀ nɨ pɨ ghǎ kùʼnə̀ a nɨ zhwuumə̀ a nɨ̀wɨghə̀ amwuə nguʼu mbyə̂ ghù shwuə̀ ghu, ka pɨ pə ghǎ zoʼò a ghobə kɨ ŋâ a ghobə pə̀ngyə̌ a ndâ nɨ̀zoʼò apə̀. 36Pobə ghǎ pə la tsaʼa pəngèrə̀, kwɨkə̀ ghobə apə̀. Pobə Ɨ̀poonə̀ pɨ Nẅùə̀ ntiinə pobə zhwuumə̀ a nɨ̀wɨghə̀. 37La ngə̀ aŋunə nɨ̀zhwuumə̀ a nɨ̀wɨghə̀, Mǔsî à lə̀ nèrə̀ lo pɨ̀kwuə̀ pa nzhwuumə̀ a nɨ̀wɨghə̀, ntii ànwùə̀ nɨ à lə̀ nèrə̀nə a ghobə nɨ alyiʼə àŋwàʼnə̀ za nɨ a shwəŋə̀nə mbə̀ʼə mbyiinə̀ za nɨ ɨ̀mǔ lə̀ pənə nkɨrə̀ amwuə. Mbə̀ʼnə à lə̀ fuŋə̀nə a Ndòʼnə̀mbyə̂ alyiʼə ghu nɨ Nẅùə̀ Abràhamə̀, Nẅùə̀ Isàkə̀, pobə Yàkobə̀. 38Tɨ̀tsòŋə̀ wə̀ ka a pə̀ e Nẅùə̀ pɨ̀kwuə̀, a Nẅùə̀ pànə̀ pɨ̀tɨ̀ŋnə̀. Ntiinə ŋwùə̀ ntsùmə̀ a chyə̂ ghù ntɨ̀ŋnə̀ la ambo ze.”
39Pɨ̀nèrə̀ mbòomə pa pɨ̀tse lə̀ tyiʼə̀ nshwəŋə̀ lo, “Ɨ̀nèrə̀ ɨ̀nwùə̀, wə̀ kẅùə̀ ɨ̀shìʼnə̀!” 40Ka ŋònə̀ ɨ̀tse a lə̀ chi mbyiitə̀ e a ye nɨ ànwùə̀ àtse.
Àpyiitə̀ mbə̀ʼə Ghù Ndzoʼnə wa
(Mat 22.41-46; Mrk 12.38-40)
41Yěsû a pyiitə̀ ghobə lo, “Pɨ shwəŋə̀ lo Ghù Ndzoʼnə wa a moonə̀ Dàfirə̀ lə ɨla? 42Mbə̀ʼnə Dàfirə̀ àtwuə̀ ɨ̀pɨ̀ŋmə̀ e, à shwəŋə̀ amwuə àŋwàʼnə̀ Psalms lo, ‘Ndòʼnə̀mbyə̂ à shwəŋə̀ ambo Ndòʼnə̀mbyə̂ mə̀ lo: Nwuunə̀ a pàa àpô mɨ̀ŋə̀ yè zɨghə̀nə, 43mbyàa nkwùə̀ nɨ ngǎ ghɨ̀rə̀ ngàŋə kɨpaanə ɨ̀zô pə a ɨ̀sùmə mɨ̀kwùə̀ ɨ̀mô.’ 44Nɨ ndwuumə̀ wə̀, Dàfirə̀ a tyiʼə̀ nfuŋə̀ e nɨ ‘Ndòʼnə̀mbyə̂’, a chyə̂ ntyiʼə̀ mbə moonə̀ e lə ɨla?”
Yěsû a kwàtə̀ pə̀ənə̀ mbə̀ʼə pɨ̀nèrə̀ mbòomə
(Mat 23.1-36; Mrk 12.38-40)
45Tsaʼnə pànə̀ pɨ̀tsùmə̀ lə̀ pənə nzhwiʼtə̀ ànwùə̀ nɨ a lə̀ mənə nshwəŋə̀ la, Yěsû shwəŋə̀ ambo ɨ̀zùŋə̀ ndzùmə̀ ɨ̀pe lo, 46“Nɨ̀ zhìʼtə̀ a wɨghə mbə̀ʼə pɨ̀nèrə̀ mbòomə nɨ pobə pa nkòŋə̀ a nɨ ẅî ɨtsəʼə pɨ̀sàa nkarə̀ nɨ pèrə, nkɨ nkòŋə̀ lo pɨ chàʼtə̀ a ghobə nɨ àghuʼtə̀ alyiʼə mɨ̀tàanə, nkòŋə̀ a nɨ nwuunə̀ aŋunə ɨləŋə pɨ̀shìʼnə̀ amwuə mɨ̀ndâ mɨ àshwatə̀ pɨ̀Jew, nkɨ nkòŋə̀ a nɨ nwuunə̀ amwuə ɨlyiʼə pɨ̀shìʼnə̀ alyiʼə nɨ̀ghaʼà; 47Pobə zhiʼə̀ pɨ̀kwùə pə̀ngyə̌, nkẅiirə̀ ɨ̀pwuumə̀ ɨ̀pobə nɨ mɨ̀ndâ ɨ̀mobə, mmə nfɨ̀kə̀ a ghobə nɨ ɨ̀chàʼtə̀ Nẅùə̀ pɨ̀sàa! Ngəʼə̀ nɨ ɨ̀ ghǎ tsirə̀ mbuurə̀ pànə̀ zə̀ ɨ̀ ghǎ tsàarə̀ mbô.”
Currently Selected:
Lukə̀ 20: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
