Lukə̀ 2

Tsaʼnə pɨ lə̀ pyə̂nə a Yěsû

1Amwuə nkwùə̀ nɨ pɨ lə̀ pyə̂nə a Jònə, Kaasà Ògostùsə̀ nɨ à lə̀ pənə ɨ̀fò ghù ngẅùunə amwuə àlaʼà Romə̀, à lə̀ tsàa ntwuumə̀ lo pɨ̀ shaŋə̀ a ŋwùə̀ ntsùmə̀ amwuə àlaʼà Romə̀ àtsùmə̀. 2Lə lə̀ pə ntsàambyə̀ nkwùə̀ a nɨ shaŋə̀ pə̀ənə̀ tsaʼnə Kẅìrìnùsə̀ à lə̀ pənə ɨ̀fò pàa àlaʼà Romə̀ nɨ pɨ lə̀ mənə nfuŋə̀ nɨ Siryà. 3Lenəla, ŋwùə̀ ntsùmə̀ à lə̀ lèrə̀ amwuə pàa àlaʼà ɨghobə a nɨ ŋwàʼnə̀ nɨ̀linə̀ ɨ̀tse. 4Jòsebə̀ a furə̀ a Nazarètə̀ nɨ à pənə amwuə Galìlyə̂ nkoʼò ndèrə̀ a Judyà. À lə̀ kwuunə̀ a Bethlehem nɨ à pənə mbòmpə àlaʼà Dàfirə̀ ntiinə à lə̀ pənə ŋwùə̀ ngẅàrə̀ ndâ Dàfirə̀. 5À lə̀ lèrə̀ pobə ngẅùə e Màriyà e nɨ à tsoʼò mə mɨ̀lùʼù àtwuə̀ ze a nɨ ghə̀ ŋŋwàʼnə̀ mɨ̀linə̀ ɨ̀mobə. Màriyà à lə̀ pə nɨ moonə̀. 6Tsaʼnə pobə lə̀ pənə ghu, nkwùə̀ ɨ̀ lə̀ kùʼù ambo ze a nɨ pyə̂ a moonə̀ ghu. 7Lenəla, à lə̀ pyə̂ a ntsàambyə̀ moonə̀ e a pə mômbyàŋnə̀, a lyibə̀ e amwuə ɨ̀pàa ɨtsəʼə nnùŋə̀ amwuə nɨ̀kwùʼə̀ nɨ mɨ̀nyàamə̀, ntiinə ka alyiʼə a lə̀ pə e ghu ambo pobə a nɨ lyə̂ amwuə ndâ pɨ̀ghɨ̀ɨnə̀.

Pəngèrə̀ chwìitə̀ ntwuumə̀ ambo pɨ̀mbyabə̀ mɨ̀mbyə̂ mɨ̀ndzìrə̀

8Pɨ̀mbyabə̀ mɨ̀mbyə̂ mɨ ndzìrə̀ pɨ̀tse lə̀ pə amwuə pàa àlaʼà ghu mmə mbyabə̀ mɨ̀mbyə̂ ɨ̀mobə a kòŋə̀ nɨ ɨ̀twuʼə̀. 9Angèrə̀ Ndòʼnə̀mbyə̂ à lə̀ furə̀ a mbyə̀ pobə, nkàʼà Nẅùə̀ ɨ̀ tsìinə̀ aŋunə pobə, àkẅàrə̀ a zùŋə̀ ngẅìimə̀ a ghobə. 10La angèrə̀ wa à lə̀ shwəŋə̀ ambo pobə lo, “Kò nɨ̀ pô, nɨ̀ zhwiʼtə̀! Ǹtô la nɨ ntwuumə̀ ghù ɨ̀shìʼnə̀ ẅùə̀ nɨ ɨ ŋâ a nɨ̀ghaʼà ghu noʼnə ambo pànə̀ pɨ̀tsùmə̀. 11Pɨ̌ pyə̂ a ngàŋə̀ nchwarə̀ pə̀ənə̀ ambo pɨghə amwuə mbòmpə àlaʼà Dàfirə̀ sìnə̀ wə̀ a pə Kristù Ndòʼnə̀mbyə̂. 12Àzwuumə̀ zhyə̀ nɨ a pənə tsaʼa àlènə̀ ambo pɨghə a chyə̂ lo nɨ̌ zəənə̀ a moonə̀ nɨ pɨ lyibə̀nə amwuə ɨ̀pàa ɨtsəʼə nnùŋə̀ amwuə nɨ̀kwùʼə̀ nɨ mɨ̀mbyə̂.”

13Pobə lə̀ kɨ wùutə̀ àpùŋə̀ pəngèrə̀ a pwuutə̀ a ẅùə̀, pobə tyiʼə̀ mmə ngyetə̀ a Nẅùə̀ nshwəŋə̀ lo, 14“Àghuʼtə̀ yè noʼnə a chyə̂ ambo Nẅùə̀koʼò a nɨ̀pwuurə̀. Àporə̀porə̀ â pə àtwuə̀ ɨ̀shyə̂ ghə̀ ambo pànə̀ nɨ à pənə nɨ nɨ̀ghaʼà aŋunə pobə.”

15Nkwùə̀ nɨ pəngèrə̀ pa lə̀ myàʼtə̀nə a ghobə ndèrə̀ a nɨ̀pwuurə̀, pɨ̀mbyabə̀ mɨ̀mbyə̂ pa lə̀ shwəŋnə̀ pobə nɨ pobə lo; “Nɨ̀ ghɨ̀rə̀ pə̀ənə̀ twuumə̀ ndèrə̀ a Bethlehem ndzəənə̀ ànwùə̀ nɨ a zə ndòo alyiʼə ghu, nɨ Ndòʼnə̀mbyə̂ à ghɨ̀rə̀nə pə̀ənə̀ zhyə̂ la.” 16Lenəla, pobə lə̀ yìinə̀ nɨ ɨ̀tɨ̀ŋnə̀ ngə̀ ntsirə̀ a Màriyà pobə Jòsebə̀ nɨ moonə̀ wə̀ nɨ à lə̀ nwùunə̀nə amwuə nɨ̀kwùʼə̀ nɨ mɨ̀mbyə̂. 17Tsaʼnə pobə lə̀ zəənə̀nə a moonə̀ ẅèrə wə̀ la, pobə lə̀ tiitə̀ ànwùə̀ nɨ pəngèrə̀ lə̀ tiitə̀nə a ghobə mbə̀ʼə moonə̀ wə̀. 18Ànwùə̀ nɨ pɨ̀mbyabə̀ mɨ̀mbyə̂ pèrə pə lə̀ shwəŋə̀nə a lə̀ pə ànwùə̀ yerə̀nə yerə̀nə ambo ŋwùə̀ ntsùmə̀ nɨ à lə̀ zuʼnə. 19Màriyà à lə̀ shwatə̀ mɨ̀nwùə̀ mə mɨ̀tsùmə̀ ntyiʼə̀ mbə nɨ àkwàŋə̀ yè noʼnə a ntɨŋmə̀ ze. 20Pɨ̀mbyabə̀ mɨ̀mbyə̂ pèrə pə lə̀ kẅirə̀ ndèrə̀, mmə ndzòbə̀ mɨnchyə nguʼtə̀ a Nẅùə̀ aŋunə mɨ̀nwùə̀ nɨ pobə zuʼnə nkɨ ndzəənə̀ a pwùumə̀ ambo pobə tyìʼə̀ tsaʼnə pɨ lə̀ shwəŋə̀nə a ghobə.

21Njyə̂ nɨ̀fàamə̂ lə̀ làŋə̀, pɨ zə̀ərə̀ a moonə̀ wə̀ nchwùə̀ nɨ̀linə̀ ɨ̀tse nɨ Yěsû. Lə lə̀ pə nɨ̀linə̀ tsa nɨ angèrə̀ wa à lə̀ ŋânə pɨ pòŋə̀ sùŋə̀ e la.

22Nkwùə̀ ɨ̀ lə̀ kùʼù lo Jòsebə̀ pobə Màriyà ghɨ̀rə̀ a mbòomə nsùu mbɨ̀ŋmə̀ ɨ̀zobə ndaanə̀ a nɨ zùŋə̀ a mbòomə Mǔsî. Lenəla pobə lə̀ lòo a Yěsû nkoʼò ndèrə̀ a Yèrusalèmə̀ a nɨ ghə̀ nnèrə̀ ambo Ndòʼnə̀mbyə̂, 23a nɨ zùŋə̀ tsaʼnə pɨ lə̀ ŋwàʼnə̀nə amwuə mbòomə Ndòʼnə̀mbyə̂ lo, “Pɨ ghǎ nùŋə̀ a ntsàambyə̀ moonə̀ mə̀ngyə̌ nɨ à pənə mômbyàŋnə̀ tsaʼa moonə̀ Ndòʼnə̀mbyə̂.” 24Pobə lə̀ kɨ ndèrə̀ a nɨ ghə̀ mmàʼà a Nẅùə̀ nɨ ɨ̀lwuʼə̀ ɨpaa kə̀ nɨ ɨ̀poonə̀ pɨ ɨ̀lwuʼə̀ mɨ̀karə pɨpaa, a nɨ zùŋə̀ ànwùə̀ nɨ mbòomə Nẅùə̀ à lə̀ nèrə̀nə.

25Ŋònə̀ ɨ̀tse à lə̀ pə a Yèrusalèmə̀ nkwùə̀ ghu pɨ mə nfuŋə̀ e nɨ Simyònə̀. À lə̀ pə ŋònə̀ nɨ mɨ̀nwùə̀ ɨ̀me lə̀ təəmə̀nə, a kɨ mbə nɨ àkẅàrə̀ Nẅùə̀. Àzhwùə̀ Nẅùə̀ a lə̀ pə aŋunə ze mmə mbyabə̀ nkwùə̀ nɨ Nẅùə̀ à ghǎ zə̀ə nchyə ɨ̀myə̂ pànə̀ pɨ Israel la. 26La, Àzhwùə̀ Nẅùə̀ a lə̀ nèrə̀ mə lo à ghǎ zəənə̀ a ẅùə̀ nɨ Ndòʼnə̀mbyə̂ à lə̀ tsoʼnə la â pòŋə̀ kwɨghə̀ 27Àzhwùə̀ Nẅùə̀ a lə̀ ghɨ̀rə̀ lo â tô a Ndâ Mɨ̀shwàʼà Nẅùə̀ njyə̂ nɨ mǎ pɨ Yěsû pobə tǎ ɨghobə lə̀ lòonə e ntô lo nèrə̀ e a nɨ lẅenə̀ tsaʼnə mbòomə à lə̀ nèrə̀nə. 28Simyònə̀ à lə̀ kẅiirə̀ a moonə̀ wə̀ nkẅaʼà, ŋŋâ a mɨyàa ambo Nẅùə̀, nshwəŋə̀ lo, 29“Tɨ̀tsòŋə̀ wə̀, Ndòʼnə̀mbyə̂, wə̀ nùŋə̀ mə mɨ̀nkàʼnə ɨ̀mô, myàʼtə̀ a ngàŋə̀ àfàʼà o â lèrə̀ nɨ àporə̀porə̀ tsaʼnə wə̀ lə̀ shwəŋə̀nə. 30Mbə̀ʼnə ǹdzəənə̀ mə nɨ̀chwarə̀ o wa nɨ ɨ̀myə̂ ɨ̀mâ, 31ẅùə̀ wa nɨ wə̀ lə̀ chwuʼtə̀nə a mbyə̀ ŋwùə̀ ntsùmə̀ la. 32À ghǎ pə nkàʼà nɨ ɨ̀ ghǎ kyàʼà ɨ̀làŋə ɨ̀pô ambo pànə̀ nɨ ka pobə pə ghobə pɨ̀Jew, kɨ tô nɨ nɨ̀ghaʼà ambo pə̀ənə̀ ɨ̀pô, pànə̀ pɨ Israel.” 33Tǎ pɨ moonə̀ wə̀ nɨ mǎ e lə̀ yerə̀ ànwùə̀ nɨ pɨ lə̀ shwəŋə̀nə mbə̀ʼə e la. 34Simyònə̀ a tyiʼə̀ nchyâ mborə̀ aŋunə pobə nshwəŋə̀ ambo Màriyà, mǎ e lo, “Zəənə̀! Moonə̀ wə̀ à ghǎ ŋaŋə̀ pànə̀ pɨ̀noʼnə, kɨ shwuʼkə̀ pànə̀ pɨ̀noʼnə amwuə àlaʼà Israel. À ghǎ pə àlènə̀ nɨ pànə̀ ghǎ shwəŋnə̀ mbə̀ʼə e, 35à ghǎ ghɨ̀rə̀ mɨ̀nwùə̀ nɨ pànə̀ pə ghǎ mə kwàŋə̀ amwuə mɨ̀ntɨŋmə̀ ɨ̀mobə furə̀ a sàŋə̀, mɨnẅuə ntsòo â sòbə̀ ntɨŋmə̀ o.”

36Ngàŋə̀ ntwuumə̀ Nẅùə̀ ghu mə̀ngyə̌ ɨ̀tse à lə̀ pə ghu nɨ̀linə̀ ɨ̀tse pə Anà, mbə moonə̀ Fanùèlə̀ nɨ à lə̀ furə̀nə amwuə ngẅàrə̀ Ashà. À lə̀ kɨ pə amwuə zèrə̀ zə̀ nkwùə̀ la ntyiʼə̀ ndwùnə̀ mə̀ngyə̌, ndə̀ zoʼò nchyə̂ nguʼu sàmbaa ndwuumə̀ e a kwɨghə̀. 37A kɨ pə nkwùə̀ ghu mbə nguʼu mɨ̀ghumə̀ nɨ̀fàamə̂ ntsòbə̀ nɨ̀kwàa. Ka à lə̀ mə myàʼtə̀ e Ndâ Mɨ̀shwàʼà Nẅùə̀; à lə̀ mə nsəəkə̀ a Nẅùə̀, mmə nchyə̂ tɨ zɨghə̀ amwuə àchàʼtə̀ Nẅùə̀ nɨ ɨ̀twuʼə̀ pobə njyə̂. 38À lə̀ kɨ ntô tyìʼə̀ nkwùə̀ ghu, ŋŋâ a mɨyàa ambo Nẅùə̀, nshwəŋnə̀ mbə̀ʼə moonə̀ wa ambo pànə̀ pɨ̀tsùmə̀ nɨ pɨ lə̀ mənə mbyabə̀ lo Nẅùə̀ â fuukə̀ pànə̀ pɨ Yèrusalèmə̀ amwuə ngəʼə̀.

Jòsebə̀ pobə Màriyà lòo a Yěsû nkẅirə̀ nkwə̂ a Nazarètə̀

39Nkwùə̀ nɨ Jòsebə̀ pobə Màriyà lə̀ myàanə̀nə ɨ̀nwùə̀ ɨ̀tsùmə̀ nɨ mbòomə Ndòʼnə̀mbyə̂ à lə̀ tàʼnə la, pobə lə̀ kẅirə̀ nkwə̂ a Galìlyə̂, ndèrə̀ a nɨ̀kwurə̀ pobə a Nazarètə̀. 40Moonə̀ wa à lə̀ tyiʼə̀ nkẅuə̀ mbə nɨ ɨ̀tɨ̀ŋnə̀ nkɨ ndẅenə̀ nɨ àzhìʼtə̀, àpòŋə̀ ntɨŋmə̀ Nẅùə̀ a kɨ mbə aŋunə ze.

Yěsû a lèrə̀ amwuə Ndâ Mɨ̀shwàʼà Nẅùə̀

41Tǎ pɨ Yěsû pobə mǎ e lə̀ pə nkoʼò ndèrə̀ a Yèrusalèmə̀ nguʼu ɨ̀tsùmə̀ aŋunə Nɨ̀ghaʼà Àlàŋə̀ Mmyàʼtə̀. 42Nkwùə̀ nɨ à lə̀ pənə nguʼu ntsòbə̀ ɨpaa, pobə pɨ pobə lə̀ lèrə̀ tsaʼnə pobə lə̀ mənə ngɨ̀rə̀. 43Nkwùə̀ nɨ pobə lə̀ myàanə̀nə a nɨ̀ghaʼà wə̀ ntyiʼə̀ mmə nkwə̂, Yěsû à lə̀ ghoŋə̀ e a ndzùmə̀ a Yèrusalèmə̀, la ka tǎ ɨghobə pobə mǎ e zhyə̂ a ghobə. 44Pobə lə̀ mə nkwàŋə̀ lo à wə̀ a tɨ̀tɨ̀rə̀ pànə̀ nɨ pobə pɨ pobə lə̀ mənə ngyìinə̀. Lenəla, pobə lə̀ yìinə̀ a nɨ̀yìinə̀ aŋunə taʼà njyə̂ ntyiʼə̀ mbìʼnə̀ a nɨ tàʼà e amwuə ɨlyiʼə pɨ̀swùə ɨ̀pe pobə ngẅàrə̀ ɨzobə. 45Pobə lə̀ tàʼà e la ka zəənə̀ a ghobə a ye, nkẅirə̀ ndèrə̀ a Yèrusalèmə̀ a nɨ ghə̀ ntàʼà e ghu. 46Njyə̂ ɨtarə lə̀ làŋə̀ pobə zəənə̀ e amwuə Ndâ Mɨ̀shwàʼà Nẅùə̀ a tɨ̀tɨ̀rə̀ pɨ̀nèrə̀ mbòomə, a nwuunə̀ mmə nzhwiʼtə̀ ànwùə̀ nɨ pobə mənə nshwəŋə̀ nkɨ mmə mbyiitə̀ a ghobə nɨ ɨ̀pyiitə̀ ɨ̀shwəŋnə̀. 47Pànə̀ pɨ̀tsùmə̀ nɨ pobə lə̀ zuʼnə ɨ̀kẅùə̀ ɨ̀shwəŋnə̀ ɨ̀pe lə̀ yerə̀ ntii àzhìʼtə̀ nɨ à lə̀ pənə nɨ zèrə. 48A lə̀ kə̀ʼnə̀ tǎ ɨghobə pobə mǎ e nkwùə̀ nɨ pobə lə̀ zəənə̀nə e. Mǎ e a tyiʼə̀ mbyiitə̀ ambo ze lo, “Moonə̀ mə̀, à tyiʼə̀ ngɨ̀rə̀ àkə wə̀ tsàŋnə̀ a wəə tyìʼə̀ lə? Pəə tǎ ɨwɨghə tàʼà mə o ka mɨ̀zùŋə.”

49Yěsû a pyiitə̀ ambo pobə lo, “Nɨ̀ mə ntàʼà mə̀ lo àkə? Ka nɨ̀ zhyə̂ a wɨghə lo ǹtô mbyə̀ mbə a nɨ pə a ndâ Tǎ ɨwəə?” 50La ka pobə lə̀ tsùŋə̀ nzhyə̂ a ghobə ànwùə̀ nɨ à lə̀ mənə nshwəŋə̀ ambo pobə.

51Lenəla, Yěsû à lə̀ lòo a ɨ̀shyə̂ ndzùŋə̀ a ghobə pobə pɨ pobə shwuʼə̀ ndèrə̀ a Nazarètə̀, a tyiʼə̀ mmə ndzuʼnə̀ a ghobə. Mǎ e à lə̀ nùŋə̀ mɨ̀nwùə̀ mèrə mə mɨ̀tsùmə̀ a ntɨŋmə̀ ze. 52Yěsû à lə̀ tyiʼə̀ nkẅuə̀ nɨ àzhìʼtə̀ pobə mbɨ̀ŋmə̀ e ntsùmə̀, Nẅùə̀ pobə pànə̀ tyiʼə̀ nkòŋə̀ e.

Currently Selected:

Lukə̀ 2: pny

Highlight

Copy