Lukə̀ 18

Àshwəŋnə̀ nàanə nàanə mbə̀ʼə nkwùə mə̀ngyə̌ pobə ɨ̀fò korə̀ ɨ̀tse

1Yěsû à lə̀ shwəŋə̀ àshwəŋnə̀ nàanə nàanə ambo ɨ̀zùŋə̀ ndzùmə̀ ɨ̀pe a nɨ nèrə̀ lo pobə chyə̂ a nɨ chàʼtə̀nə Nẅùə̀ tɨ kaanə̀ 2À lə̀ shwəŋə̀ ambo pobə lo “Ɨ̀fò korə̀ ghùtse àlaʼà àtwuumə̀ àtse à lə̀ pə ghu nɨ ka à lə̀ mə mbô e Nẅùə̀ nkɨ ka mə lòo e a ŋwùə̀ tsaʼa àzwuumə̀ àtse. 3Nkwùə mə̀ngyə̌ ɨ̀tse à lə̀ kɨ mbə amwuə àlaʼà ghu, mmə ntô ambo ze ngyìi nshwəŋə̀ lo, ‘Kẅiirə̀ mə̀ ambo ngàŋə kɨpaanə ɨ̀zâ.’ 4Tsaʼnə à lə̀ mənə ntô nshwəŋə̀ la, ka ɨ̀fò korə̀ wa a lə̀ mə nzhwiʼtə̀ e ànwùə̀ nɨ mə̀ngyə̌ wa à lə̀ mənə nshwəŋə̀. La ɨ̀fò korə̀ wa a kɨ lẅùutə̀ nshwəŋə̀ ambo mbɨ̀ŋmə̀ e lo, ‘M̀batə ka pə pô mə̀ Nẅùə̀, nkɨ ka lòo mə̀ a ŋònə̀ tsaʼa àzwuumə̀ àtse la, 5mbɨ yèmpə̀ a nkwùə mə̀ngyə̌ wə̀ ntiinə à wə̀ ŋŋâ mə̀ nɨ ngəʼə̀, ǹtə ngoŋə̀ mə̀ tɨ yèmpə̀ e, yi mbɨ chwarə̀ mə̀ a ye apə̀ ntiinə ǎ kɨ tô e tônə.’”

6Ndòʼnə̀mbyə̂ a shwəŋə̀ lo, “Nɨ̀ zuʼù ànwùə̀ nɨ ɨ̀fò korə̀ tɨpô Nẅùə̀ wə̀ à shwəŋə̀. 7Mbə̀ʼə Nẅùə̀ a ka tyiʼə̀ yèmpə̀ e pə̀ənə̀ ɨ̀pe nɨ à tsoʼò mə nɨ pɨ pa ngyìi ambo ze nɨ njyə̂ pobə ɨ̀twuʼə̀? Mbə̀ʼə a tyiʼə̀ nsùŋə̀ mbɨ̀ŋmə̀ e a nɨ yèmpə̀ a ghobə lə ɨla? 8Ǹshwəŋə̀ a wɨghə lo, ǎ fàʼà yèmpə̀ a ghobə. La nkwùə̀ nɨ Moonə̀ Ŋwùə̀ à ghǎ tô, tə à ghǎ zəənə̀ pə̀ənə̀ nɨ pɨ pənə nɨ àpyiimə̀ ntɨŋmə̀ àtwuə̀ ɨ̀shyə̂ ghə̀?”

Àshwəŋnə̀ nàanə nàanə mbə̀ʼə ŋwùə̀ Farìsî pobə ɨ̀nkẅiirə̀ pɨ̀taghə̀

9Yěsû a chi nshwəŋə̀ àshwəŋnə̀ nàanə nàanə zə ambo pànə̀ nɨ pobə pənə amwuə mɨ̀ntɨŋmə̀ ɨ̀mobə mmə nshwəŋə̀ lo pobə chyə̂ mbə pànə̀ nɨ mɨ̀nwùə̀ ɨ̀mobə təəmə̀nə ntsàarə̀ a pɨ̀tse lo, 10“Pànə̀ pɨ̀tse pɨpaa lə̀ ghə̀ a Ndâ Mɨ̀shwàʼà Nẅùə̀ a nɨ chàʼtə̀ Nẅùə̀, taʼà a pə ŋwùə̀ Farìsî, ẅùə̀ a pə ɨ̀nkẅiirə̀ pɨ̀taghə̀. 11Tsaʼnə pobə lə̀ lèrə̀nə la, ŋwùə̀ Farìsî wa a naŋə̀ alyiʼə ɨ̀shìʼnə̀ ntəəmə̀ ghu, nchàʼtə̀ a Nẅùə̀ nshwəŋə̀ lo, ‘Nẅùə̀, ŋ̀ŋâ a mɨyàa ambo ghò ntiinə ka mbə mə̀ tsaʼa pɨ̀tse pə̀ənə̀ nɨ pɨ pa nfɨ̀ghə̀ pə̀ənə̀ nkẅiirə̀ ɨ̀pwuumə̀ ɨ̀pobə, ka mə shwəŋə̀ a ghobə a nkǔŋə nkuŋə, ngɨ̀rə̀ ɨ̀nwùə̀ ɨ̀fànə̀ kə̀ tsaʼa ɨ̀nkẅiirə̀ pɨ̀taghə̀ ẅùə̀ nɨ à təəmə̀nə lyə̀. 12Ngwa nwuunə̀ tɨ zɨghə̀ aŋunə njyə̂ ɨpaa amwuə ngàbə̀, nkɨ ngàpə̀ ɨ̀pwuumə̀ pa ɨlyiʼə nɨ̀ghumə̀ ŋŋâ a taʼà alyiʼə ambo ghò.’

13“La nkẅiirə̀ pɨ̀taghə̀ wa à lə̀ təəmə̀ a ndyə̌ sàa mbə ka pə̀ʼkə̀ e ɨ̀myə̂ ɨ̀me naŋə̀ nɨ̀pwuurə̀, la nnùŋə̀ àpô e a ntɨŋmə̀ ze nshwəŋə̀ lo, ‘Nẅùə̀, koorə̀ mɨ̀lɨŋə̀ ɨ̀mâ, mɨ̀ŋə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀.’”

14Yěsû a tyiʼə̀ nshwəŋə̀ lo, “Ǹshwəŋə̀ ambo pɨghə lo, Nẅùə̀ à lə̀ lòo a wə̀ ŋwùə̀ tsaʼa ŋònə̀ nɨ mɨ̀nwùə̀ ɨ̀me təəmə̀nə ntsàarə̀ a ghù ntsàambyə̀ wa. Ntiinə ŋònə̀ wa nɨ à ŋankə̀nə mbɨ̀ŋmə̀ e la, pɨ̌ shwuʼkə̀ e a ɨ̀shyə̂, ŋònə̀ nɨ à shwuʼkə̀nə mbɨ̀ŋmə̀ e a ɨ̀shyə̂, pɨ̌ ŋaŋə̀ e a àtɨ̀ghə.”

Yěsû a chyâ mborə̀ aŋunə àghòbə

15Pànə̀ pɨ̀tse lə̀ tô nɨ kɨyii àghòbə lo Yěsû a nùŋə̀ mbô ɨ̀me àtwuə̀ pobə, ɨ̀zùŋə̀ ndzùmə̀ ɨ̀pe zəənə̀, nsaʼà ghobə. 16La Yěsû a fuŋə̀ a ghobə lo pobə̂ tô nɨ ɨ̀poonə̀ pa ambo ze, nshwəŋə̀ lo, “Nɨ̀ myàʼtə̀ ɨ̀poonə̀ pa pobə̂ tô ambo mɨ̀ŋə̀, kò nɨ̀ nàanə a ghobə, ntiinə ànwùə̀ Nɨ̀fò Nẅùə̀ a chyə̂ la ambo pànə̀ tsaʼa pobə. 17Ǹshwəŋə̀ tyìʼə̀ nkǔŋə nkuŋə ambo pɨghə lo, ŋònə̀ nɨ ka à kẅiirə̀ e ànwùə̀ Nɨ̀fò Nẅùə̀ tsaʼa mɨnkɨ̂, ka à pə ghǎ kwuunə̀ ghu.”

Ànwùə̀ nɨ ngàŋə̀ nkabə̀ à lə̀ pyiitə̀nə Yěsû

(Mat 19.16-30; Mrk 10.13-15)

18Àtwuə̀ pɨ̀Jew àtse a pyiitə̀ a Yěsû lo, “Ɨ̀nèrə̀ ɨ̀nwùə̀ ghù ɨ̀shìʼnə̀, mbə̀ʼə ǹgɨ̀rə̀ lə ɨla mbòŋə̀ gha zɨghə̀ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ la?”

19Yěsû a pyiitə̀ ambo ze lo, “Wə̀ fuŋə̀ mə̀ nɨ ŋònə̀ ɨ̀shìʼnə̀ ntii àkə? Ka ŋònə̀ ɨ̀shìʼnə̀ ɨ̀tse a pə e ghu ndàŋə̀ e Nẅùə̀ ze nɨ ze. 20Wə̀ zhyə̂ mɨ̀ntə̌ ma lo: ‘Kò wə̀ kɨ ngɨ̀rə̀ àfànə̀, kò wə̀ zhwuutə̀, kò wə̀ zə̀ərə̀, kò wə̀ zɨghə̀ a mɨnaŋə àtwuə̀ ŋwùə̀, zuʼnə a tǎ ɨwɨghə pobə mǎ ɨwɨghə.’” 21A shwəŋə̀ ambo Yěsû lo, “Ndə̀ pìʼnə̀ a nɨ nùŋə̀ mɨ̀ntə̌ mə nkwùə̀ nɨ m̀birə̀nə mɨnkɨ̂.” 22Yěsû a zuʼù a lenə la, ntyiʼə̀ nshwəŋə̀ ambo ze lo, “Taʼà ànwùə̀ à puŋə̀ ambo ghò. Shwùunə̀ ɨ̀pwuumə̀ ɨ̀tsùmə̀ nɨ wə̀ pənə nɨ pèrə, ngàpə̀ nkabə̀ ghu ambo ngàŋə̀ àfumə̀, yi wə̌ tyiʼə̀ pə nɨ àfùʼù a nɨ̀pwuurə̀. Tô, ndzùŋə̀ mə̀.” 23A zuʼù a lenə mbɨ̀ŋmə̀ e ɨ̀ pɨ̂ ntiinə à lə̀ pənə ngàŋə̀ nkabə̀ ngẅùunə.

24Yěsû a naŋə̀ e ndzəənə̀ lo à wə̀ nsòmnə̀, nshwəŋə̀ lo, “A tɨ̀ŋnə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀! 25La ndzàŋə̀ ambo ləəmə a nɨ tswurə̀ amwuə ngwɨgrə̀ lyàmnə̀ ntsàarə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.” 26Pànə̀ nɨ pɨ lə̀ zuʼnə ànwùə̀ zèrə̀ zə̀ lə̀ tyiʼə̀ mbyiitə̀ lo, “Ŋònə̀ nɨ mbə̀ʼə a chwarə̀ lə a ɨ̀wə̌?” 27A shwəŋə̀ ambo pobə lo, “Ànwùə̀ nɨ a za ntsàarə̀ pànə̀ pɨ mɨsoŋə, ka a tsàarə̀ e a Nẅùə̀.” 28Pità a shwəŋə̀ ambo ze lo, “Zəənə̀, pəə myàʼtə̀ la mɨmwuə mɨlyiʼə ɨ̀məə ndzùŋə̀ o.” 29Yěsû kẅùə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ŋwùə̀ ntsùmə̀ nɨ à myàʼtə̀nə ɨmwuə alyiʼə e, kə̀ a ngẅùə e, kə̀ pɨ̀momaa ɨ̀pe, nɨ tǎ ɨghobə pobə mǎ e, nɨ ɨ̀poonə̀ ɨ̀pe ntii ànwùə̀ Nɨ̀fò Nẅùə̀ la, 30à ghǎ kẅiirə̀ ɨ̀pwuumə̀ pèrə pə pɨ̀noʼnə pɨ̀noʼnə tsàarə̀ ndùnə̀ nɨ à myàʼtə̀nə la tɨ̀tsòŋə̀, kɨ chi pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ la.”

Yěsû a chi nshwəŋə̀ a nòmbàa nkwùə̀ ɨtarə mbə̀ʼə nɨ̀wɨghə̀ e

(Mat 20.17-19; Mrk 10.32-34)

31Yěsû a lòo ɨ̀zùŋə̀ ɨ̀pe pa ntsòbə̀ ɨpaa pobə pɨ pobə mìntə̀, a shwəŋə̀ ambo pobə lo, “Nɨ̀ zhwiʼtə̀! Pə̀ənə̀ pə nkoʼò ndèrə̀ a Yèrusalèmə̀, ɨ̀nwùə̀ ɨ̀tsùmə̀ nɨ ngàŋə ntwuumə̀ Nẅùə̀ lə̀ ŋwàʼnə̀nə mbə̀ʼə Moonə̀ Ŋwùə̀ la furə̀ pwùumə̀. 32Mbə̀ʼnə pɨ̌ kô e ŋŋâ ambo pànə̀ nɨ ka pobə pə ghobə pɨ̀Jew pɨ tyiʼə̀ ngẅìi e nchyâ ɨ̀sɨŋnə̀ àtwuə̀ ze, ntẅùə̀ mɨ̀tẅuə̀ aŋunə ze. 33Pɨ̌ kəʼə̀ e, zhwuutə̀ e, la njyə̂ kɨ làŋə̀ ɨtarə â zhwuumə̀ a nɨ̀wɨghə̀.” 34Ɨ̀zùŋə̀ ndzùmə̀ ɨ̀pe lə̀ zuʼù mɨ̀nwùə̀ mèrə mə ka mèrə tsùŋə̀ ndaanə̀ e àtwuə̀ pobə. Pɨ lə̀ lə̀əmə̀ ɨ̀sùmə ɨ̀shwəŋnə̀ pèrə pə̀ ambo pobə, ka pobə zhyə̂ a ghobə ànwùə̀ nɨ Yěsû à lə̀ mənə nshwəŋə̀.

Yěsû a parə̀ a ɨ̀fə̀ ɨ̀myə̂ nɨ à lə̀ mənə ndoonə̀ ɨ̀pwuumə̀

(Mat 20.29-34; Mrk 10.46-52)

35Yěsû à lə̀ tô ntyiʼə̀ mmə nkwuunə̀ a Jèrikò, ɨ̀fə̀ ɨ̀myə̂ ɨ̀tse a nwuunə̀ a nɨ̀pwùnə àlàŋə mmə ndoonə̀ ɨ̀pwuumə̀. 36Nkwùə̀ nɨ à lə̀ zuʼnə àpùŋə̀ pə̀ənə̀ a mə ndzòrə̀ ndàŋə̀ la, a pyiitə̀ lo, “A ànwùə̀ àkə?” 37Pɨ shwəŋə̀ ambo ze lo, “Yěsû ŋwùə̀ Nazarètə̀ à wə̀ ndàŋə̀.” 38A kyiinə̀ nshwəŋə̀ lo, “Yěsû, moonə̀ Dàfirə̀, koorə̀ mɨ̀lɨŋə̀ ɨ̀mâ!” 39Pànə̀ nɨ pɨ lə̀ pənə alyiʼə ghu, pɨ saʼà e nshwəŋə̀ lo â kẅupə̀ ntswùə̀ e. La a chi nkyiinə̀ ndèrə̀ nɨ mbyə̀ nshwəŋə̀ lo, “Moonə̀ Dàfirə̀ koorə̀ mɨ̀lɨŋə̀ ɨ̀mâ!” 40Yěsû a tyiʼə̀ ntəəmə̀, nshwəŋə̀ lo pɨ̀ lòo a ɨ̀fə̀ ɨ̀myə̂ wa ntô. Pɨ tô nɨ ze à pyiitə̀ lo, 41“Wə̀ tàʼà lo n̂gɨ̀rə̀ la ɨla ambo ghò?” A kẅùə̀ lo, “Ndòʼnə̀mbyə̂, ǹtàʼà chi zəənə̀ ɨlyiʼə.” 42Yěsû a shwəŋə̀ ambo ze lo, “Zəənə̀ ɨlyiʼə! Àpyiimə̀ ntɨŋmə̀ o a ghɨ̀rə̀ wə̀ tɨ̀ŋnə̀.” 43A kɨ ndzùŋə̀ ndzəənə̀ ɨlyiʼə, ntyiʼə̀ ndzùŋə̀ a Yěsû, ngyetə̀ Nẅùə̀. Pànə̀ pɨ̀tsùmə̀ nɨ pɨ lə̀ zəənə̀nə e la, lə̀ ghuʼtə̀ Nẅùə̀.

Currently Selected:

Lukə̀ 18: pny

Highlight

Copy