Ɨ̀fàʼà 22

1“Pɨlyimə ɨ̀pâ pobə pɨ̀tǎ ɨ̀pâ, nɨ̀ zhwiʼtə̀ tsaʼnə mbɨ kẅiirə̀ ntàŋə mə̀ ambo pɨghə tɨ̀tsòŋə̀.” 2Tsaʼnə pobə lə̀ zuʼnə a pə nshwəŋnə̀ àshwəŋnə̀ pɨ̀Hibrù la, pobə tsùŋə̀ nchi ntə̂ nzhwiʼtə̀. A shwəŋə̀ lo, 3“Mɨ̀ŋə̌ ŋwùə̀ pɨ̀Jew, nɨtoŋə ɨ̀tsâ pə a Tasùsə̀ amwuə àlaʼà Sìlisyà. La ǹkẅuə̀ mə̀ pə amwuə àlaʼà Yèrusalèmə̀ a nɨ̀ghə̂. Ndə̀ lanə̀ àŋwàʼnə̀ ambo Gamaliel, a lòo mə̀ nkoʼò amwuə pɨ̀mbòomə pɨ tǎ ɨ̀pə̀ənə̀, la ǹtɨ̀ŋnə̀ aŋunə ànwùə̀ Nẅùə̀ tyìʼə̀ tsaʼnə pɨghə pɨ̀tsùmə̀ pə nkɨ mbə sìnə̀ wə̀. 4Ndə̀ nyàŋə̀ pə̀ənə̀ nɨ pɨ lə̀ mənə ndzùŋə̀ àlàŋə zə nzhwuutə̀ a ghobə, nkorə̀ mbyàŋnə̀ pobə pə̀ngyə̌ nchyâ a ɨ̀tsaŋə̀. 5Mbə̀ʼə àtwuə̀ pɨ̀fò màʼà Nẅùə̀ pobə pɨ̀lɨ̀ŋmə̂ amwuə Kansèrə̀ pə pɨ̀ndzəənə̀ zəənə̀nə ɨ̀pâ. Ndə̀ kẅiirə̀ àŋwàʼnə̀ ambo pobə a nɨ ghə̀ ŋŋâ ambo pɨlyimə ɨ̀pə̀ənə̀ a Dàmaskòsə̀ lo kootə̀ pànə̀ pèrə pə ghu korə̀ lòo kwə̂ a Yèrusalèmə̀ pɨ̀ chyâ ɨ̀sàʼa a àtwuə̀ pobə.

Pàolò a shwəŋə̀ tsaʼnə Nẅùə̀ à lə̀ kẅebə̀nə e

6“Ndə̀ pə ngyìinə̀ mmə ntô kwuunə̀ a Dàmaskòsə̀ tsaʼa pɨ ntɨ̀ŋnə̀ àzhwùunə, nkɨ wùutə̀ nkàʼà ghù tsìinə̀nə ɨ̀ furə̀ a nɨ̀pwuurə̀ ŋŋwàŋə̀ a ɨ̀myə̂ mɨ̀ŋə̀, 7nkunə̀ a ɨ̀shyə̂, ndzuʼù ngyə̀ ŋwùə̀ ɨ̀ shwəŋə̀ ambo mɨ̀ŋə̀ lo, ‘Saul, Saul, wə̀ nyàŋə̀ mə̀ lə ntii àkə?’ 8Nkẅùə̀ ambo ze lo, ‘A ghò ɨ̀wə̌, Ndòʼnə̀mbyə̂?’ A shwəŋə̀ ambo mɨ̀ŋə̀ lo, ‘A mɨ̀ŋə̀ Yə̌sû, ŋwùə̀ Nazarètə̀ wa nɨ wə̀ wa nnyàŋə̀ la.’ 9Pànə̀ nɨ pəə pɨ pobə lə̀ pənə ngyìinə̀ lə̀ zəənə̀ nkàʼà ghu la ka zuʼù a ghobə ngyə̀ ŋònə̀ nɨ ɨ̀ lə̀ pənə nshwəŋnə̀ ambo mɨ̀ŋə̀. 10Ǹtyiʼə̀ mbyiitə̀ e lo, ‘N̂gɨ̀rə̀ ɨla, Ndòʼnə̀mbyə̂?’ A shwəŋə̀ ambo mɨ̀ŋə̀ lo, ‘Lòo a ɨ̀shyə̂ ndèrə̀ a Dàmaskòsə̀, pɨ tiitə̀ o nɨ ànwùə̀ àtsùmə̀ nɨ Nẅùə̀ a nùŋə̀nə lo wə̀ ghɨ̀rə̀.’ 11Nkàʼà ghu ɨ̀ lə̀ ghɨ̀rə̀ ǹfə̀. Lenəla, pànə̀ nɨ pəə pɨ pobə lə̀ pənə ngyìinə̀ tyiʼə̀ ngẅìimə̀ àpô mə̀ ndòo ngə̀ nkwuunə̀ a Dàmaskòsə̀.

12“Ŋònə̀ ɨ̀tse nɨ nɨ̀linə̀ ɨ̀tse lə̀ pənə Ananias à lə̀ pə ghu, ntô a nɨ zəənə̀ mə̀. À lə̀ pə ŋwùə̀ ntə̂ àtwuə̀ a nɨ ghuʼtə̀ a Nẅùə̀, ndzùŋə̀ a mbòomə pɨ̀Jew. Pɨ̀Jew pɨ̀tsùmə̀ a Dàmaskòsə̀ lə̀ kɨ mmə nguʼtə̀ e tyìʼə̀ ɨ̀shìʼnə̀. 13À lə̀ tô ntəəmə̀ a nɨ̀pwùnə mɨ̀ŋə̀ nshwəŋə̀ lo, ‘Ndyimə mə̀ Saul, kẅirə̀ ndzəənə̀ ɨlyiʼə!’ Ndzùŋə̀ nkẅirə̀ ndzəənə̀ ɨlyiʼə, ndzəənə̀ e. 14A shwəŋə̀ lo, ‘Nẅùə̀ pɨ tǎ pə̀ənə̀ à tsoʼò mə o lo wə̀ zhyə̂ ànwùə̀ nɨ a tàʼnə, ndzəənə̀ a ẅùə̀ wa nɨ mɨ̀nwùə̀ ɨ̀me təəmə̀nə, nkɨ ndzuʼù àshwəŋnə̀ nɨ a furə̀nə a ntswùə̀ ze, 15ntiinə wə̀ ghǎ pə ndzəənə̀ zəənə̀nə e a nɨ tiitə̀ a ŋwùə̀ ntsùmə̀ nɨ ànwùə̀ nɨ wə̀ zəənə̀nə nkɨ ndzuʼù. 16Wə̀ kùmə̀ nchi mbyabə̀ àkə tɨ̀tsòŋə̀? Lòo a ɨ̀shyə̂ nkẅiirə̀ nchyə, mbə̀ʼə Nẅùə̀ a sùu a tɨ̀pòŋə̀ o amwuə ndwuumə̀ nɨ wə̌ fuŋə̀ nɨ̀linə̀ ɨ̀tse.’

Nẅùə̀ a tsàa a Pàolò lo â chwìitə̀ ntwuumə̀ e ambo pànə̀ nɨ ka pobə pə ghobə pɨ̀Jew

17“Nkwùə̀ nɨ ndə̀ pənə nchàʼtə̀ a Nẅùə̀ amwuə Ndâ Mɨ̀shwàʼà Nẅùə̀ a Yèrusalèmə̀, ndzə̀əmə̀ ɨ̀ lə̀ làŋə̀ a ɨ̀myə̂ mɨ̀ŋə̀, 18ǹdzəənə̀ a Ndòʼnə̀mbyə̂ a shwəŋə̀ ambo mɨ̀ŋə̀ lo, ‘Faʼa nfurə̀ a Yèrusalèmə̀ nɨ mɨ̀tɨ̀ŋnə̀, ntiinə ka pànə̀ pə̀ a nɨ̀ghə̂ pə pyiimə̀ a ghobə ànwùə̀ nɨ wə̀ wa nshwəŋə̀ mbə̀ʼə mə̀.’ 19Ǹkẅùə̀ lo, ‘Ndòʼnə̀mbyə̂, pobə zhyə̂ tyìʼə̀ ɨ̀shìʼnə̀ lo ndə̀ karə̀ amwuə mɨ̀ndâ mɨ àshwatə̀ mɨ pɨ̀Jew nkootə̀ pànə̀ nɨ pɨ nùŋə̀nə mɨ̀ntɨŋmə̀ ɨ̀mobə aŋunə ghò nchyâ a ndâ ɨ̀tsaŋə̀ nkəʼə̀. 20Ndə̀ kɨ mbə alyiʼə nɨ pɨ lə̀ mənə nzhwuutə̀ a Stifə̀nə̀ ngàŋə̀ ntwuumə̀ o mbyiimə̀ lo pɨ zhwuutə̀ e, ntyiʼə̀ ntəəmə̀ mmə mbyabə̀ ɨtsəʼə pànə̀ nɨ pɨ lə̀ mənə nzhwuutə̀ e.’ 21Ndòʼnə̀mbyə̂ a tyiʼə̀ nshwəŋə̀ ambo mɨ̀ŋə̀ lo, ‘Lèrə̀, ntiinə mbɨ twuumə̀ o a ndyə̌ sàa ambo pànə̀ nɨ ka pobə pə ghobə pɨ̀Jew.’”

Pɨ zhyə̂ a Pàolò tsaʼa ŋwùə̀ Romə̀

22Pànə̀ pɨ̀ghu lə̀ pə nzhwiʼtə̀ ànwùə̀ nɨ Pàolò à lə̀ mənə nshwəŋə̀ tyìʼə̀ ɨ̀shìʼnə̀. La nkwùə̀ nɨ à lə̀ shwəŋə̀nə a zə̀ ànwùə̀, pobə lə̀ ŋaŋə̀ mɨ̀ngyə̀ ɨ̀mobə nkyiinə̀ nshwəŋə̀ lo, “Nɨ̀ furə̀ nɨ ze, nzhwuutə̀ e ntiinə ka a pə e ŋònə̀ nɨ mbə̀ʼə a chyə̂.” 23Tsaʼnə pobə lə̀ mənə nkyiinə̀ la, pobə lə̀ sòtə̀ ɨtsəʼə ɨ̀pobə mmyə̀ a àtɨ̀ghə, mmə nchwaʼà àpùbə mmàʼà a àtɨ̀ghə. 24Àtwuə̀ pɨ̀soyì pɨ̀Roman a lə̀ shwəŋə̀ ambo pɨ̀soyì ɨ̀pe lo pobə̂ lòo a Pàolò ndèrə̀ a nkaʼà pobə, nkəʼə̀ e, mbyiitə̀ e nɨ ɨ̀sùmə nɨ pɨ pə nkyiinə̀ àtwuə̀ ze nɨ ndwuumə̀ wə̀. 25La nkwùə̀ nɨ pobə lə̀ korə̀nə e lo kəʼə̀, à lə̀ pyiitə̀ ambo àtwuə̀ pɨ̀soyì yè kɨ̂ àtse nɨ a lə̀ təəmə̀nə a alyiʼə ghu lo, “Mbòomə a pyiimə̀ lo mbə̀ʼə pɨ kəʼə̀ a ŋwùə̀ Romə̀ tɨghu pɨ naŋə̀ ɨ̀sàʼa e ndzəənə̀ àwɨ̀ghə̀ ànwùə̀ e?”

26Nkwùə̀ nɨ àtwuə̀ pɨ̀soyì yè kɨ̂ za a lə̀ zuʼnə ànwùə̀ zə la, a lə̀ lèrə̀ ngə̀ ntiitə̀ àtwuə̀ pɨ̀soyì yè ẅùunə lo, “Wə̌ ghɨ̀rə̀ lə ɨla? Ŋònə̀ wa la ŋwùə̀ Romə̀.”

27Lenəla, àtwuə̀ pɨ̀soyì yè ẅùunə za a lèrə̀ ghə̀ mbyiitə̀ Pàolò lo, “Tiitə̀ mə̀, ghò la ŋwùə̀ Romə̀?”

Pàolò a kẅùə̀ lo, “Ee.”

28Àtwuə̀ pɨ̀soyì yè ẅùunə za a kẅùə̀ ambo ze lo, “ndə̀ twuə̀ nkabə̀ noʼnə zaʼà mbòŋə̀ pə ŋwùə̀ Romə̀.”

La Pàolò a kẅùə̀ lo, “Mɨ̀ŋə̀ a ŋwùə̀ Romə̀ ntiinə mǎ mə̀ pobə tǎ ɨwəə a pɨ̀Roman.”

29Lenəla, pànə̀ nɨ pɨ laʼa mmə ntàʼà pyiitə̀ e nɨ mɨ̀nwùə̀ lə̀ zùŋə̀ mìntə̀ a ghobə a nɨ̀pwùnə ze. Àtwuə̀ pɨ̀soyì yè ẅùunə za a lə̀ pìʼnə̀ a nɨ pô ntiinə à lə̀ zəənə̀nə lo Pàolò a ŋwùə̀ Romə̀ nɨ à korə̀nə e nɨ mɨ̀tsaŋə̀.

Pàolò a mbyə̀ Kansèrə̀

30Àtwuə̀ pɨ̀soyì yè ẅùunə za a lə̀ mə ntàʼà zhyə̂ ànwùə̀ nɨ a ghɨ̀rə̀nə lo pɨ̀Jew fuŋə̀ a Pàolò nɨ ŋònə̀ tɨ̀pòŋə̀. Njyə̂ lə̀ laanə̀, a kyàatə̀ mɨ̀tsaŋə̀ ma aŋunə Pàolò, nfuŋə̀ pɨ̀fò màʼà Nẅùə̀ pobə pɨ̀ Kansèrə̀ ntsùmə̀ lo pobə pòmpə̀. A tyiʼə̀ ndòo a Pàolò ntô ntə̂ a mbyə̀ pobə.

Currently Selected:

Ɨ̀fàʼà 22: pny

Highlight

Copy