Ɨ̀fàʼà 21

Pàolò a koʼò ndèrə̀ a Yèrusalèmə̀

1Pəə lə̀ làʼnə̀ a ghobə, mmyàʼtə̀ nkwuunə̀ amwuə àpaŋə̀ ntyiʼə̀ ntwuumə̀ ngə̀ nkwuunə̀ a Kosə̀. Njyə̂ ɨ̀ laanə̀ pəə ghə̀ mbyàa a Rodə̀ ntyiʼə̀ nfurə̀ ghu ngə̀ a Patarà. 2Amwuə àlaʼà zèrə zə̀ pəə lə̀ zəənə̀ àpaŋə̀ zhyə̀ nɨ a lə̀ pənə ntwuumə̀ ndèrə̀ a Fònisyà ntyiʼə̀ nkwuunə̀ amwuə ntwuumə̀ ndèrə̀.

3Pəə lə̀ tô ntyiʼə̀ mmə ndzəənə̀ a Cyprùsə̀ mbə̀ŋə̀ nshwuʼə̀ a pàa mɨ̀tùŋə kwuunə̀ a àlaʼà Siryà. Pəə lə̀ tyiʼə̀ ntô nfurə̀ a ntswùə̀ nchyə Tayə̀, alyiʼə nɨ pɨ lə̀ mənə nfuukə̀ ɨ̀pwuumə̀ nɨ lə̀ pənə amwuə àpaŋə̀ za. 4Pəə lə̀ tyiʼə̀ ndòo ngàŋə àpyiimə̀ ɨ̀tse a alyiʼə ghu pəə pɨ pobə chyə̂ aŋunə njyə̂ sàmbaa. Àzhwùə̀ Nẅùə̀ a lə̀ nèrə̀ ambo pobə, pobə tyiʼə̀ nshwəŋə̀ ambo Pàolò lo kò ze koʼò ndèrə̀ e a Yèrusalèmə̀.

5Mɨ̀njyə̂ nɨ pəə lə̀ pənə pə pəə pɨ pobə lə̀ làŋə̀, pəə tyiʼə̀ mmyàʼtə̀ a ghobə lo pìʼnə̀ a nɨ̀yìinə̀ ɨwəə. Pobə pɨ̀tsùmə̀ nɨ pə̀ngyə̌ ɨ̀pobə nɨ ɨ̀poonə̀ ɨ̀pobə lə̀ zùŋə̀ a wəə pəə pɨ pobə furə̀ a mbòmpə àlaʼà gha pobə ghə̀ nchàanə̀ a wəə. Pəə pɨ pobə lə̀ pyàa a ntswùə̀ nchyə alyiʼə nɨ pəə pɨ pobə lə̀ kẅiʼtə̀nə a ɨ̀shyə̂ nchàʼtə̀ a Nẅùə̀ ntyiʼə̀ ndàʼnə̀ mbɨ̀ŋmə̀ ɨ̀zəə. 6Pəə lə̀ tyiʼə̀ nkwuunə̀ amwuə àpaŋə̀ pobə kẅirə̀ nkwə̂ a ghobə a amwuə mɨmwuə mɨlyiʼə ɨ̀mobə.

7Pəə lə̀ furə̀ a Tayə̀ ngə̀ mbyàa a Tolemèsə̀, alyiʼə nɨ pəə lə̀ zəənə̀nə ɨ̀poonə̀ pɨ Kristù pɨ̀tse ghu ngə̀ nchàʼtə̀ a ghobə nkɨ nnwuunə̀ pəə pɨ pobə aŋunə taʼà njyə̂. 8Njyə̂ ɨ̀ lə̀ laanə̀ pəə furə̀ ndèrə̀ a Kàsaryà, nkwuunə̀ a ndâ Filibə̀ nɨ à lə̀ pənə nɨ̀fàngɨ̀rishyə̀, mbə taʼà ŋwùə̀ amwuə pànə̀ pa sàmbaa nɨ pɨ lə̀ tsoʼnə tsaʼa ngàŋə àyèmpə̀ a Yèrusalèmə̀. 9À lə̀ pə nɨ ngwàngòonə̀ tɨzoʼò nɨ̀kwàa pyə̀ nɨ pobə lə̀ mənə nchwìitə̀ ntwuumə̀ Nẅùə̀.

10Pəə lə̀ pə ghu aŋunə mɨ̀njyə̂ mɨ̀tse ngàŋə̀ ntwuumə̀ ɨ̀tse nɨ pɨ lə̀ mənə nfuŋə̀ e nɨ Agabùsə̀ a furə̀ a Judyà nshwuʼə̀ ntsirə̀ a wəə. 11À lə̀ kɨ tô ndòo ɨ̀kòbə̀ Pàolò nkorə̀ mɨ̀kwùə̀ ɨ̀me ghu ghobə mbô ɨ̀me nshwəŋə̀ lo, “Àzhwùə̀ Nẅùə̀ a shwəŋə̀ lo, ‘lə̌ ndwuumə̀ nɨ pɨ̀Jew pyə̀ nɨ pɨ pənə a Yèrusalèmə̀ ghǎ korə̀ a ngàŋə̀ ɨ̀kòbə̀ wə̀ tyiʼə̀ ŋâ e ambo pànə̀ nɨ ka pobə pə ghobə pɨ̀Jew.’” 12Pəə lə̀ zuʼù la, pəə pɨ pànə̀ nɨ pɨ lə̀ pənə pəə pɨ pobə tyiʼə̀ mbuʼù mbô ambo Pàolò lo kò a koʼò ndèrə̀ e a Yèrusalèmə̀. 13La Pàolò a kẅùə̀ ambo pobə lo, “Nɨ̀ yìi lə àkə, ngɨ̀rə̀ mbɨ̀ŋmə̀ mə̀ ɨ̀ chəpə̀? Ka ǹchwuʼtə̀ mə̀ mbɨ̀ŋmə̀ mə̀ ndàʼà pə a nɨ kwuunə̀ a ndâ ɨ̀tsaŋə̀. Ǹchwuʼtə̀ mbɨ̀ŋmə̀ mə̀ a nɨ kwɨghə̀ a Yèrusalèmə̀ ntii ànwùə̀ nɨ̀linə̀ nɨ Ndòʼnə̀mbyə̂.” 14Tsaʼnə pəə lə̀ làʼnə̀nə wəə a ye kɨkaŋə la, pəə lə̀ myàʼtə̀ ntyiʼə̀ nshwəŋə̀ lo, “Ndòʼnə̀mbyə̂ ghɨ̀rə̀ ànwùə̀ za zhyə̀ nɨ wə̀ tàʼnə la.”

15Mɨ̀njyə̂ mèrə mə lə̀ làŋə̀ pəə tyiʼə̀ nshwatə̀ ɨ̀pwuumə̀ ɨ̀pəə nkoʼò ndèrə̀ a Yèrusalèmə̀. 16Ɨ̀zùŋə̀ ndzùmə̀ Yěsû pɨ̀tse lə̀ furə̀ a Kàsaryà nkoʼò pəə pɨ pobə, ndòo a wəə pəə pɨ pobə ghə̀ nkwuunə̀ a ndâ Mnason ŋwùə̀ Cyprùsə̀ nɨ à lə̀ pənə taʼà àzùŋə̀ ndzùmə̀ Yěsû yè ntsàambyə̀, ntyiʼə̀ nnwuunə̀ pəə pɨ pobə. 17Pəə lə̀ koʼò nkwuunə̀ a Yèrusalèmə̀, ɨ̀poonə̀ pɨ Kristù nɨ pɨ pənə ghu kẅiirə̀ a wəə tyìʼə̀ nɨ nɨ̀ghaʼà. 18Njyə̂ ɨ̀ lə̀ laanə̀ pəə pɨ Pàolò lèrə̀ a nɨ zəənə̀ a Jemə̀, ntsirə̀ ɨ̀twuə̀ àshwatə̀ ɨ̀poonə̀ pɨ Kristù ɨ̀tsùmə̀ ghu.

19Nkwùə̀ nɨ pəə pɨ pobə lə̀ chàʼtə̀nə, a kɨ ntyiʼə̀ nshankə̀ mɨ̀nwùə̀ a nkàŋə̀ nkàŋə̀ tsaʼnə Nẅùə̀ à lə̀ làŋə̀nə aŋunə ɨ̀fàʼà ɨ̀pe ngɨ̀rə̀ ambo pànə̀ nɨ ka pobə pə ghobə pɨ̀Jew. 20Nkwùə̀ nɨ pobə lə̀ zuʼnə a lenə la, pobə lə̀ ghuʼtə̀ a Nẅùə̀ nchi nshwəŋə̀ ambo ze lo, “Ndyimə ɨwəə Pàolò, wə̀ zəənə̀ tsaʼnə pɨ̀Jew nkaamə̀ nkaamə̀ nùŋə̀nə ntɨŋmə̀ ɨ̀ghobə aŋunə Kristù nkɨ ndzəənə̀ tsaʼnə pobə tə̂nə àtwuə̀ a nɨ nùŋə̀ pɨ̀mbòomə la. 21Pɨ shwəŋə̀ mə ambo pobə lo wə̀ lə̀ nèrə̀ ambo pɨ̀Jew pyə̀ nɨ pɨ pənə amwuə pànə̀ nɨ ka pobə pə ghobə pɨ̀Jew la lo pobə̂ myàʼtə̀ pɨ̀mbòomə pɨ Mǔsî, kò pobə nùŋə̀ a ghobə a pèrə. Nshwəŋə̀ ambo pobə lo kò pobə zə̀ərə̀ a ghobə ɨ̀poonə̀ ɨ̀pobə, kò pobə kɨ nchi ndzùŋə̀ a ghobə pɨ̀mbòomə pɨ̀Jew. 22Pə̀ənə̀ ghɨ̀rə̀ lə ɨla ghu tɨ̀tsòŋə̀? Tɨ̀tsòŋə̀ pobə zuʼù mə lo wə̀ tô mə. 23Nɨ ndwuumə̀ wə̀, wə̌ ghɨ̀rə̀ ànwùə̀ nɨ pəə̌ shwəŋə̀ ambo ghò. Pànə̀ pɨ̀tse pə a nɨ̀ghə̂ nɨ̀kwàa nɨ pobə lə̀ tsə̀əmə̀nə ambo Nẅùə̀. 24Ghə̀ ndòo a ghobə pɨghə pɨ pobə sùu mbɨ̀ŋmə̀ ɨ̀zɨghə ɨ̂ laanə̀ a mbyə̀ Nẅùə̀, wə̀ kɨ ntwuə̀ àzwuumə̀ zhyə̀ nɨ pobə pənə twuə̀. Lenəla pobə̂ koomə̀ ɨ̀twuə̀ ɨ̀pobə. Wə̀ tə ngɨ̀rə̀ a lenə yi pànə̀ pɨ̀tsùmə̌ zhyə̂ lo mɨ̀nwùə̀ ma mɨ̀tsùmə̀ nɨ pɨ pa nshwəŋnə̀ mbə̀ʼə ghò la pɨ̀chwìrə̀, la wə̀ mə nnùŋə̀ pɨ̀mbòomə aŋunə àkwùə̀ nɨ̀yìinə̀ o. 25La ngə̀ aŋunə pànə̀ nɨ ka pobə pə ghobə pɨ̀Jew la mbyiimə̀ a Kristù, pəə tsàa mə àŋwàʼnə̀ nshwəŋə̀ ambo pobə lo pobə twuunə̀ mɨ̀zɨghə̀ mɨ̀tsùmə̀ nɨ pɨ màʼnə a nẅùə̀ ghu, kò pobə nô a ghobə àləəmə̀, kò pobə kɨ nkwurə̀ mbòbə̀ nyàamə̀ nɨ ka pɨ kyiimə̀ e a ẅèrə, nkɨ ntwuunə̀ ɨ̀nwùə̀ məghàbə̀.”

26Pàolò à lə̀ ghə̀ ndòo pànə̀ pa, njyə̂ ɨ̀ laanə̀ pobə pɨ pobə ghə̀ nsùu mbɨ̀ŋmə̀ ɨ̀zobə a mbyə̀ Nẅùə̀. À lə̀ tyiʼə̀ ngə̀ nkwuunə̀ a Ndâ Mɨ̀shwàʼà Nẅùə̀ a Yèrusalèmə̀, ntiitə̀ njyə̂ nɨ pobə ghǎ myàanə̀ sùu mbɨ̀ŋmə̀ ɨ̀zobə laanə̀ tyiʼə̀ ghɨ̀rə̀ mɨ̀shwàʼà ɨ̀mobə àtwuə̀ àtwuə̀.

Pɨ kô a Pàolò amwuə Ndâ Mɨ̀shwàʼà Nẅùə̀ a Yèrusalèmə̀

27Nkwùə̀ nɨ njyə̂ za sàmbaa lə̀ tyiʼnə mmə ntô myə̀, pɨ̀Jew nɨ pɨ furə̀nə a Asia nɨ pɨ lə̀ zəənə̀nə e amwuə Ndâ Mɨ̀shwàʼà Nẅùə̀ a Yèrusalèmə̀ ghontə̀ àpùŋə̀ pə̀ənə̀ pɨ kô e, 28ntyiʼə̀ nkyiinə̀ nshwəŋə̀ lo, “Pànə̀ pɨ Israel, nɨ̀ tô ngyèmpə̀ a wəə! Lə̌ ŋònə̀ nɨ à yìinə̀nə ɨlyiʼə ɨ̀tsùmə̀ nnèrə̀ pə̀ənə̀ ɨ̀pəənə̀ lo pobə̂ pàanə̀ pànə̀ pɨ Israel, ntwuunə̀ pɨ̀mbòomə, nkɨ ntwuunə̀ alyiʼə zə. À chi ndòo farə pànə̀ nɨ ka pobə pə ghobə pɨ̀Jew nkwuunə̀ amwuə Ndâ Mɨ̀shwàʼà Nẅùə̀ ntsə̀ŋə̀ a zèrə.” 29Pobə lə̀ shwəŋə̀ a lenə ntiinə pobə lə̀ zəənə̀nə a ghobə Trofimùsə̀, ŋwùə̀ Efesòsə̀ a mbòmpə àlaʼà ngẅùunə, pobə ze pə ngyìinə̀, pobə tyiʼə̀ nkwàŋə̀ lo a lə̀ lòo e nkwuunə̀ a Ndâ Mɨ̀shwàʼà Nẅùə̀.

30Mbòmpə àlaʼà ghu ntsùmə̀ ɨ̀ lə̀ zhwàʼnə̀, ŋwùə̀ ntsùmə̀ a kɨ̀ɨrə̀ ntô nshwatə̀ nkô a Pàolò nsùŋə̀ e nfurə̀ a ndâ mɨ̀shwàʼà ndzùŋə̀ ngwùʼnə̀ ntswùə̀ àpùʼù nfɨ̀ŋnə̀.

31Tsaʼnə pobə lə̀ mənə ntàʼà zhwuutə̀ a Pàolò la, ntwuumə̀ ɨ lə̀ ghə̀ mbyàa ambo àtwuə̀ pɨ̀soyì a Romə̀ lo Yèrusalèmə̀ à wə̀ nnə̀ʼnə̀. 32Àtwuə̀ pɨ̀soyì za a lə̀ zùŋə̀ ndòo pɨ̀soyì nɨ pɨ̀tse ɨ̀twuə̀ pɨ̀soyì pobə pɨ pobə kɨ̀ɨrə̀ nshwuʼə̀ ntsirə̀ a ghobə. Nkwùə̀ nɨ pɨ lə̀ zəənə̀nə pobə pə ntô, pobə lə̀ zùŋə̀ mmyàʼtə̀ a nɨ chi nkəʼə̀ a Pàolò. 33Àtwuə̀ pɨ̀soyì ghu a ghə̀ nkô a Pàolò nshwəŋə̀ lo pɨ̀ korə̀ e nɨ mɨnkɨrə mɨmbaa, ntyiʼə̀ mbyiitə̀ lo, “Ŋònə̀ wə̀ a ɨ̀wə̌, nkɨ ngɨ̀rə̀ ɨla ghu?”

34Pànə̀ pɨ̀tse amwuə àpùŋə̀ pànə̀ za a mə nkyiinə̀ a taʼà ànwùə̀, pɨ̀tse mə nkyiinə̀ a zhyə̀ ànwùə̀. Tsaʼnə ka a lə̀ pə zuʼù e ànwùə̀ nɨ pɨ lə̀ pənə nshwəŋə̀ ntii àzhwàʼnə̀ la, à lə̀ tyiʼə̀ nshwəŋə̀ lo pɨ̀ lòo ndòo ndèrə̀ a nkaʼà pɨ̀soyì. 35Tsaʼnə pobə lə̀ tônə mbyàa aŋunə mɨ̀koʼò a nɨ koʼò nkwuunə̀ a ndâ, pɨ̀soyì lə̀ tyiʼə̀ mbìʼì e pìʼnə ntiinə àpùŋə̀ pànə̀ za lə̀ tyiʼə̀ mmə ndzuŋə̀ aŋunə ze. 36Àpùŋə̀ pànə̀ za a tyiʼə̀ ndzùŋə̀ nkyiinə̀ nshwəŋə̀ lo, “Pɨ̀ myàanə̀ e!”

Pàolò a shwəŋnə̀ ambo àpùŋə̀ pə̀ənə̀ za

37Tsaʼnə pobə lə̀ tyiʼnə mmə ntô kwuunə̀ a ntswùə̀ nkaʼà pɨ̀soyì, Pàolò à lə̀ pyiitə̀ ambo àtwuə̀ pɨ̀soyì za lo, “Mbə̀ʼə ǹshwəŋə̀ ànwùə̀ àtse ambo ghò?”

A kẅùə̀ ambo ze lo, “Wə̀ wa la nkɨ nzhyə̂ shwəŋnə̀ àshwəŋnə̀ pɨ̀Greek? 38Ka wə̀ pə o la ŋwùə̀ Egypt wa nɨ à lə̀ kùmə̀nə ndumə, nchyâ àzhwàʼnə̀ amwuə àlaʼà, nshwatə̀ pɨ̀màkìzâ nkaamə̀ nɨ̀kwàa ndòo ndèrə̀ amwuə alyiʼə waakə?”

39Pàolò a kẅùə̀ lo, “Mɨ̀ŋə̌ ŋwùə̀ pɨ̀Jew, pɨ pyə̂ mə̀ a Tasùsə̀ nɨ à pənə mbòmpə àlaʼà ntɨ̀ŋnə̀ amwuə ɨ̀laʼà Sìlisyà. M̀buʼù mbô ambo ghò lo wə̀ tyiʼə̀ n̂shwəŋnə̀ ambo pànə̀ pə.”

40Àtwuə̀ pɨ̀soyì za a lə̀ pyiimə̀. Pàolò a tyiʼə̀ ntəəmə̀ aŋunə alyiʼə ŋaŋnə̀nə za nnèrə̀ lo pobə̂ zhwemnə̀. Ɨlyiʼə zhwemnə̀ nɨ fetə. A tyiʼə̀ nshwəŋnə̀ ambo pobə amwuə àshwəŋnə̀ pɨ̀Hibrù lo,

Currently Selected:

Ɨ̀fàʼà 21: pny

Highlight

Copy