Ɨ̀fàʼà 10
10
Pità a chwìitə̀ ntwuumə̀ ghù ɨ̀shìʼnə̀ ambo Kònelyùsə̀
1Ŋònə̀ ɨ̀tse à lə̀ pə a Kàsaryà nɨ̀linə̀ ɨ̀tse pə Kònelyùsə̀. À lə̀ pə àtwuə̀ àpùŋə̀ pɨ̀soyì pɨ̀Roman nɨ pɨ lə̀ mənə nfuŋə̀ nɨ àpùŋə̀ pɨ̀soyì Italy. 2A lə̀ pə ŋònə̀ ɨ̀shìʼnə̀ nɨ pobə pɨ ngẅàrə̀ e ntsùmə̀ lə̀ pônə a Nẅùə̀, mmə ngyèmpə̀ pɨ̀Jew pɨ̀noʼnə nɨ pɨ lə̀ pənə ngàŋə àfumə̀, nkɨ nchàʼtə̀ a Nẅùə̀ nkwùə̀ ɨ̀tsùmə̀. 3A lə̀ pə njyə̂ ɨ̀tse tsaʼa pɨ̀nẅùumə̀ pɨtarə a ndzə̀ŋə̀ nẅùumə̀, Kònelyùsə̀ a mə nchàʼtə̀ a Nẅùə̀, ànǐ a làŋə̀ a ɨ̀myə̂ ze, a zəənə̀ angèrə̀ Nẅùə̀ a fuŋə̀ e lo, “Kònelyùsə̀.”
4Kònelyùsə̀ a tyiʼə̀ nnaŋə̀ e nɨ àkẅàrə̀ yè noʼnə amwuə ntɨŋmə̀ e nshwəŋə̀ ambo ze lo, “A àkə Masàa?” Angèrə̀ wa a kẅùə̀ ambo ze lo, “Nẅùə̀ à pyiimə̀ àchàʼtə̀ Nẅùə̀ za pobə ɨ̀pwuumə̀ pa nɨ wə̀ ŋânə ambo ngàŋə àfumə̀ la, nkẅuumə̀ o. 5Tsàa ntwuumə̀ nfuŋə̀ a ŋònə̀ ɨ̀tse nɨ à pənə a Jopà nɨ̀linə̀ ɨ̀tse pə Shimùnə̀ Pità. 6A ngàŋə̀ nɨ̀ghaanə̀, mmə nchyə̂ pobə ŋònə̀ nɨ à wa ndòo ngòbə̀ ntsùŋə̀ ɨ̀pwuumə̀, nɨ̀linə̀ ɨ̀tse pə Shimùnə̀, ndâ e ɨ̀ pə a ntswùə̀ nchyə ghu nɨŋnə̀nə.”
7Angèrə̀ wa à lə̀ shwəŋə̀ a lenə la ndèrə̀, Kònelyùsə̀ a tyiʼə̀ nfuŋə̀ ngàŋə àfàʼà ɨ̀ze ɨpaa nɨ taʼà ŋwùə̀ Soyì nɨ à lə̀ pənə mbyabə̀ e nkɨ mbə nɨ àkẅàrə̀ Nẅùə̀, 8ntyiʼə̀ nshwəŋə̀ ànwùə̀ àtsùmə̀ nɨ a làŋə̀nə ambo pobə, ntsàa a ghobə a Jopà. 9Njyə̂ ɨ lə̀ làŋə̀ pobə mə ndèrə̀ ngə̀ mmə mbyàa a Jopà, Pità a koʼò ndèrə̀ àtwuə̀ ndâ a nɨ chàʼtə̀ a Nẅùə̀. 10Tsaʼnə a lə̀ koʼnə mmə nchàʼtə̀ Nẅùə̀, njyə̀ pìʼnə̀ a nɨ zaŋə̀ e a tyiʼə̀ mmə ntàʼà àzwuumə̀ a nɨ zɨghə̀. La nkwùə̀ nɨ pɨ lə̀ pirə̀nə mmə ndaamə̀ mɨ̀zɨghə̀ ma la, ànǐ a làŋə̀ a ɨ̀myə̂ ze, 11a zəənə̀ nɨ̀pwuurə̀ nɨ nyaʼkə̀ pɨ ẅìimə̀ àzwuumə̀ àtse nɨ a pənə tsaʼa àpàa atsəʼə aŋunə mɨ̀lẅuə̀ nɨ̀kwàa, nfurə̀ a nɨ̀pwuurə̀ mmə nshuʼkə̀ a ɨ̀shyə̂. 12Mbuurə̀ mɨ̀nyàamə̀ mɨ̀tsùmə̀ nɨ yɨ̀tse mbuurə̀ mɨ̀nyàamə̀ nɨ àləəmə̀ àzobə a za nfî, farə pɨ̀sɨ̀ŋə pɨ̀tsùmə̀ nɨ pèrə pa ntàarə̀ lə̀ pə amwuə. 13Ngyə̀ ɨ̀tse ɨ̀ furə̀ a nɨ̀pwuurə̀ nshwəŋə̀ ambo ze lo, “Pità lòo a ɨ̀shyə̂ nzhwuutə̀ nkwurə̀.”
14La Pità a kẅùə̀ ambo ze lo, “Ndə̀ pirə̀ mə mə̀ tɨ kwurə̀ ɨ̀pwuumə̀ pɨ fînə tsaʼa pèrə pə nɨ ka laanə̀ e.”
15Ngyə̀ ghu ɨ̀ kẅirə̀ nshwəŋə̀ ambo ze lo, “Kò wə̀ lòo o àzwuumə̀ àtse nɨ Nẅùə̀ a tsùŋə̀nə a laanə̀ ndòo ngɨ̀rə̀ àzwuumə̀ nɨ ka a laanə̀ e ghu.”
16Ànwùə̀ zə̀ a lə̀ ghɨ̀rə̀ mbyàa nkwùə̀ ɨtarə, pɨ tyiʼə̀ ndòo àpàa atsəʼə ghu nkẅirə̀ nkoʼò a nɨ̀pwuurə̀.
17Pità à lə̀ pirə̀ mmə nkwàŋə̀ ànǐ zə, la nɨ pànə̀ pa nɨ Kònelyùsə̀ à lə̀ tsàanə la tàʼà mə ndâ Shimùnə̀ ntô ntyiʼə̀ a ghobə a ntswùə̀ nkaʼà. 18Pobə lə̀ kyiinə̀ nfuŋə̀ mbyiitə̀ lo, “Ngàŋə̀ nɨ̀ghaanə̀ ɨ̀tse à wə̀ nɨ̀ghə̂ nɨ nɨ̀linə̀ ɨ̀tse pənə Shimùnə̀ Pità?” 19Pità à lə̀ pirə̀ mmə nkwàŋə̀ ànwùə̀ mbə̀ʼə ànǐ zə, Àzhwùə̀ Nẅùə̀ a shwəŋə̀ ambo ze lo, “Mbyàŋnə̀ ɨ̀tse ɨtarə zə ntàʼà o. 20Lòo a ɨ̀shyə̂, kò wə̀ tsə̀ŋə̀ o nkwùə̀, shwuʼə̀ ngə̀ ntsirə̀ a ghobə ntiinə a ghobə la a tsàa mɨ̀ŋə̀.”
21Lenəla, Pità a shwuʼə̀ ngə̀ nshwəŋə̀ ambo pànə̀ pa lo, “Lə̌ mɨ̀ŋə̀ wa nɨ nɨ̀ tàʼnə la. Nɨ̀ tô la aŋunə ànwùə̀ àkə?”
22Pobə kẅùə̀ ambo ze lo, “A wəə la a twuumə̀ Kònelyùsə̀ nɨ a pənə àtwuə̀ pɨ̀soyì, mbə ŋònə̀ wa nɨ mɨ̀nwùə̀ ɨ̀me təəmə̀nə a mbyə̀ Nẅùə̀, a kɨ mmə nguʼtə̀ a Nẅùə̀, nkɨ mbə ŋònə̀ wa nɨ pɨ̀Jew pɨ̀tsùmə̀ ŋânə e nɨ àghuʼtə̀ la. Angèrə̀ Nẅùə̀ a shwəŋə̀ ambo ze lo â fuŋə̀ o lo wə̀ tô a ndâ ze ndzuʼù ànwùə̀ nɨ ǎ shwəŋə̀.” 23Pità a zùŋə̀ nfuŋə̀ a ghobə amwuə ndâ, pobə pɨ pobə lyə̂.
Njyə̂ ɨ̀ lə̀ laanə̀, Pità a lèrə̀ pobə pɨ pobə farə pɨlyimə pɨ̀tse nɨ pɨ furə̀nə a Jopà. 24Njyə̂ ɨ̀ lə̀ kẅirə̀ ndaanə̀, pobə ghə̀ mbyàa a Kàsaryà. Kònelyùsə̀ a shwatə̀ ngẅàrə̀ e pobə pɨ̀swùə ɨ̀pe pɨ̀shìʼnə̀ pobə pɨ pobə nwuunə̀ mmə mbyabə̀ a ghobə. 25Nkwùə̀ nɨ Pità à lə̀ pənə ntô kwuunə̀ a ndâ, Kònelyùsə̀ à lə̀ tô mbwùumə̀ e, ŋŋuʼnə̀ a mbyə̀ ze a nɨ ŋâ e nɨ àghuʼtə̀. 26La Pità a ẅìimə̀ àpô e mbə̀ʼkə̀ e nshwəŋə̀ ambo ze lo, “Lòo a ɨ̀shyə̂. Ǹkɨ mbə àzâ la ŋònə̀ tsaʼa ghò.” 27Tsaʼnə pobə ze lə̀ mənə nshwəŋnə̀ nkwuunə̀ amwuə ndâ, Pità à lə̀ zəənə̀ pànə̀ pɨ̀noʼnə nɨ pɨ shwatə̀nə amwuə ndâ, 28nshwəŋə̀ ambo pobə lo, “Nɨ̀ kɨ nzhyə̂ tsaʼnə ka mbòomə ɨ̀wəənə̀ a pyiimə̀ e lo ŋwùə̀ pɨ̀Jew a pwuutə̀ pobə ŋònə̀ nɨ ka à pə e ŋwùə̀ pɨ̀Jew, kə̀ mbwuutə̀ pobə ze a nɨ ghɨ̀rə̀ ànwùə̀ àtse. La Nẅùə̀ à kùmə̀ nnèrə̀ ambo mɨ̀ŋə̀ lo, kò ǹfuŋə̀ mə̀ a ŋònə̀ ɨ̀tse nɨ àfǐfǐ ŋwùə̀. 29Ka ndə̀ twuunə̀ mə̀ a nɨ tô tsaʼnə pànə̀ pə̀ lə̀ fuŋə̀nə mə̀ la. Ǹkùmə̀ mmə mbyiitə̀ a wɨghə tɨ̀tsòŋə̀ wə̀ lo nɨ̀ tiitə̀ mə̀ nɨ ànwùə̀ nɨ nɨ̀ tàʼnə lo n̂gɨ̀rə̀.”
30Kònelyùsə̀ a kẅùə̀ lo, “Tɨ̀tsòŋə̀ wə̀ a njyə̂ nɨ̀kwàa tsaʼnə ndə̀ mənə nchàʼtə̀ a Nẅùə̀ aŋunə pɨ̀nẅùumə̀ pɨtarə a ndâ mɨ̀ŋə̀, nkɨ wùutə̀ ndzəənə̀ a ŋònə̀ ɨ̀tse a təəmə̀ a mbyə̀ mɨ̀ŋə̀ amwuə ɨtsəʼə pɨ tsèntə̀nə, 31nshwəŋə̀ ambo mɨ̀ŋə̀ lo, ‘Kònelyùsə̀! Nẅùə̀ à zuʼù àchàʼtə̀ Nẅùə̀ o, nkɨ mmə nkẅuumə̀ o aŋunə ɨ̀pwuumə̀ nɨ wə̀ wa ŋŋâ a nɨ yèmpə̀ ngàŋə àfumə̀. 32Njiilo, twuumə̀ a ŋwùə̀ â ghə̀ a Jopà nfuŋə̀ a Shimùnə̀ nɨ pɨ pa nfuŋə̀ e nɨ Pità. À ẅùə̀ nchyə̂ a ndâ ŋònə̀ ɨ̀tse nɨ à wa ntsùŋə̀ ɨ̀pwuumə̀ nɨ ngòbə̀ pɨ mə nfuŋə̀ e nɨ Shimùnə̀, mmə nchyə̂ a nɨ̀pwùnə nɨ nchyə ghu nɨŋnə̀nə.’ 33La ɨ̀sùmə nɨ ǹtwuumə̀nə pànə̀ lo pɨ̀ tô nfuŋə̀ o, wə̀ kɨ ngɨ̀rə̀ ɨ̀shìʼnə̀ a nɨ zùŋə̀ ntô. Pəə pɨ̀tsùmə̀ kùmə̀ nshwatə̀ a nɨ̀ghə̂ a mbyə̀ Nẅùə̀ a nɨ zuʼù ànwùə̀ nɨ Ndòʼnə̀mbyə̂ a twuumə̀nə o aŋunə.”
Àshwəŋnə̀ Pità
34Pità a ŋaŋə̀ ntswùə̀ e nshwəŋə̀ lo, “Nzhyə̂ tyiʼə̀ nkǔŋə nkuŋə lo ka Nẅùə̀ a ghɨ̀rə̀ e ànwùə̀ nnèrə̀ nɨ̀lyə̂, 35La ŋwùə̀ a tə mbəla nfurə̀ pə amwuə zèrə ngẅàrə̀ mmə mbô e nkɨ mmə ghɨ̀rə̀ mɨ̀nwùə̀ nɨ mɨ təəmə̀nə, yi a kɨ mbyiimə̀ e. 36Nɨ̀ zhyə̂ àshwəŋnə̀ nɨ Nẅùə̀ à lə̀ tsàanə ambo pànə̀ pɨ Israel, mbə ntwuumə̀ ghù ɨ̀shìʼnə̀ mbə̀ʼə Yěsû Kristù nɨ a pənə tǎ pɨ ŋwùə̀ ntsùmə̀ mmə ngɨ̀rə̀ pànə̀ nwuunə̀ ɨ̀shìʼnə̀, 37nkɨ nchi nzhyə̂ ànwùə̀ ẅùunə nɨ a lə̀ ghɨ̀rə̀nə amwuə àlaʼà Judyà àtsùmə̀ mbìʼnə̀ a Galìlyə̂ amwuə nkwùə̀ za nɨ Jònə à lə̀ mənə nchwìitə̀ lo pànə̀ pə̀ŋə̀ mɨ̀ntɨŋmə̀ ɨ̀mobə nkẅiirə̀ nchyə. 38Nɨ̀ zhyə̂ ànwùə̀ mbə̀ʼə Yěsû ŋwùə̀ Nazarètə̀ nɨ Nẅùə̀ a lə̀ zoʼnə e ŋŋâ e nɨ Àzhwùə̀ e ghobə ɨ̀tɨ̀ŋnə̀ a tyiʼə̀ nkarə̀ ngɨ̀rə̀ mɨ̀nwùə̀ mɨ ɨ̀shìʼnə̀ nkɨ mbarə̀ pɨghoonə pyə̀ nɨ pɨ lə̀ pənə ɨ̀pùʼù a ɨ̀sùmə ɨ̀zhwùə̀ tɨ̀pòŋə̀ ntiinə Nẅùə̀ a lə̀ pənə pobə ze. 39Pəə lə̀ pə pɨ̀ndzəənə̀ zəənə̀nə aŋunə mɨ̀nwùə̀ mɨ̀tsùmə̀ nɨ a lə̀ ghɨ̀rə̀nə amwuə àlaʼà pɨ̀Jew farə a Yèrusalèmə̀. Pobə lə̀ kẅùumə̀ e aŋunə àtɨ̀ghə pànkə̀nə nzhwuutə̀. 40La Nẅùə̀ a lə̀ zhwuumə̀ e aŋunə nɨ̀wɨghə̀ aŋunə njyə̂ ɨtarə ngɨ̀rə̀ pànə̀ zəənə̀ e. 41La ka a lə̀ zəənə̀ e ŋwùə̀ ntsùmə̀ ndzəənə̀ e. A lə̀ kɨ ndzəənə̀ e pə pəə pɨ̀ndzəənə̀ zəənə̀nə nɨ Nẅùə̀ a lə̀ tsoʼnə a wəə nkɨ mbə pəə pa pyə̀ nɨ pəə lə̀ zɨghə̀nə pəə pɨ pobə nkɨ nnô nkwùə̀ nɨ a lə̀ zhwuumə̀nə a nɨ̀wɨghə̀. 42A lə̀ shwəŋə̀ ambo pəə nchwìitə̀ ntwuumə̀ e ambo pə̀ənə̀ a sàŋə̀ sàŋə̀ lo a ndàʼà e nɨ Nẅùə̀ a lə̀ tsoʼnə nnùŋə̀ lo a pə nsaʼà mɨ̀sàʼa ambo pànə̀ pɨ̀tɨ̀ŋnə̀ pobə pɨ̀kwuə̀. 43Ngàŋə ntwuumə̀ Nẅùə̀ lə̀ shwəŋə̀ a sàŋə̀ sàŋə̀ mbə̀ʼə e lo ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə ze, Nẅùə̀ à ghǎ lə̀ənə̀ a tɨ̀pòŋə̀ e a nɨ làŋə̀ aŋunə ɨ̀tɨ̀ŋnə̀ wa nɨ ɨ pənə aŋunə nɨ̀linə̀ ɨ̀tse.”
Pànə̀ nɨ ka pobə pə ghobə pɨ̀Jew kẅiirə̀ Àzhwùə̀ Nẅùə̀
44Tyìʼə̀ nkwùə̀ ghu nɨ Pità à lə̀ pirə̀nə mmə nshwəŋnə̀ la, Àzhwùə̀ Nẅùə̀ a lə̀ shwuʼə̀ aŋunə ŋwùə̀ ntsùmə̀ nɨ à lə̀ pənə alyiʼə ghu mmə nzhwiʼtə̀ ntwuumə̀ nɨ pɨ lə̀ pənə nshwəŋə̀. 45A lə̀ pə ànwùə̀ yerə̀nə yerə̀nə ambo pɨ̀Jew pa nɨ pɨ lə̀ nùŋə̀nə ntɨŋmə̀ ɨ̀ghobə aŋunə Yěsû, nfurə̀ a àlaʼà Jopà ndzùŋə̀ Pità a nɨ zəənə̀ lo Nẅùə̀ à kɨ ŋŋâ mɨntyaŋnə mɨ Àzhwùə̀ e ambo pànə̀ nɨ ka pobə pə ghobə pɨ̀Jew. 46Mbə̀ʼnə pobə lə̀ zuʼnə pobə tyiʼə̀ nshwəŋnə̀ pə amwuə ɨ̀shwəŋnə̀ pɨ̀nyaanə nguʼtə̀ a Nẅùə̀. Pità a tyiʼə̀ nshwəŋə̀ lo, 47“Ŋònə̀ ɨ̀tse à wə̀ ghu nɨ mbə̀ʼə a làʼnə̀ lo kò pɨ ŋâ e àkẅiirə̀ nchyə ambo pànə̀ pə̀, ntiinə pobə kẅiirə̀ mə Àzhwùə̀ Nẅùə̀ tsaʼnə pə̀ənə̀ lə̀ kɨnə nkẅiirə̀ àzəənə̀?” 48Lenəla, a tyiʼə̀ ngɨ̀rə̀ pɨ tyiʼə̀ ŋŋâ a ghobə nɨ àkẅiirə̀ nchyə aŋunə nɨ̀linə̀ Yěsû. Àkẅiirə̀ nchyə za a làŋə̀, pobə tyiʼə̀ mbuʼù mbô lo Pità a ghoŋə̀ pobə pɨ pobə aŋunə mɨ̀njyə̂ mɨ̀tse.
Currently Selected:
Ɨ̀fàʼà 10: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
