Маттэ 7

ЯБЛЭНЭРЭШЪХЬ

Зыми хьыкум тешъумышӀыхь

(Лука 6:37-38, 41-42)

1– Зыми хьыкум тешъумышӀыхь, Тхьэм хьыкум къышъутыримышӀыхьаным пае. 2Сыда пӀомэ, шъо цӀыфхэм хьыкум зэратешъушӀыхьэрэм фэдэу, Тхьэм шъори хьыкум къышъутыришӀыхьащт, шъо шапхъэу зэрэшъушырэм фэдэ шапхъэкӀи Тхьэм шъо къышъуфишыжьыщт.

3– О унэ пкъэоу кӀэлъым гу лъымытэу, пхъэцалэу о пшы ынэ кӀэлъыр сыд пае плъэгъура? 4Пкъэур о унэ кӀэлъ пэтзэ, сыдэущтэу пшы епӀон плъэкӀыра: «Пхъэцалэу о унэ кӀэлъыр къыкӀэсэгъэх» пӀоу? 5О, нэпитӀу зиӀэр, ыпэ рапшӀэу пкъэоу о унэ кӀэлъыр къыкӀэхыжьи, етӀанэ пхъэцалэу пшы ынэ кӀэлъыр къызэрэкӀэпхыжьыщтыр нафэу плъэгъущт.

6– Ӏофхэу шъо шъугухэмкӀэ лъапӀэхэр хьэхэм яшъумыт. Налмэс-налкъутэхэр къохэм апашъхьэ щишъумыпхъыхь. Армырмэ, ахэмэ ахэр аулъэгунхэшъ, зыкъызэрагъэзэкӀынышъ, шъори шъузэхацунтхъэжьыщт.

Тхьэм шъуелъэӀу, шъулъыхъу, къэлапчъэм шъутеу

(Лука 11:9-13)

7– ШъуелъэӀуи, Тхьэм къышъуитыщт; шъулъыхъуи, къэжъугъотыщт; къэлапчъэми шъутеуи, Тхьэм къышъуфыӀуихыщт; 8сыда пӀомэ, хэтми Тхьэм елъэӀурэм зыкӀэлъэӀурэр иӀэ хъущт, лъыхъурэми зылъыхъурэр ыгъотыщт; къэлапчъэм теорэми Тхьэм къыфыӀуихыщт. 9Е цӀыф къышъухэта, зыкъо хьалыгъу пае къелъэӀумэ, мыжъо езытыщтыр? 10Е пцэжъые пае къелъэӀумэ, блэ езытыщтыр? 11Аущтэу шъо шъубзаджэ пэтми, шъуилъфыгъэхэм шӀу зэряшъутыщт шӀыкӀэр шъошӀэмэ, ащ нахьи нахьыбэу шъуя Тэ лъапӀэу уашъом щыӀэм ежь елъэӀухэрэм тынышӀухэр къаритыщтхэба? 12Аущтэу цӀыфхэр къыжъудэзекӀонхэу шъузэрэфаем фэдэу шъори ахэмэ сыдигъуи шъуафыщыт. Джары Тэурат хабзэм итхэми пегъымбархэм атхыгъэхэми къарыкӀырэр.

Къэлэпчъэ зэжъур

(Лука 13:24)

13– Къэлэпчъэ зэжъумкӀэ шъудахь; сыда пӀомэ, кӀодыпӀэм икъэлапчъэ шъуамбгъо, ащ кӀорэ гъогури гъогушху. А гъогум рыкӀохэри бэ мэхъух. 14Ау щыӀэныгъэм игъогу узэрытехьэрэ къэлапчъэр зэжъу, ащ кӀорэ гъогури бгъузэ. Ар къэзгъотхэри макӀэх.

Чъыгыр зыфэдэр къыпыкӀэрэмкӀэ къэпшӀэщт

(Лука 6:43-44)

15– Пегъымбар нэпцӀхэм шъуафэсакъ. Ахэмэ мэлышъо щыгъын ащыгъэу, ау агухэмкӀэ тыгъужъ цунтхъакӀохэм афэдэхэу шъуадэжь къэкӀох. 16Чъыгыр зыфэдэр къыпыкӀэрэмкӀэ зэрэпшӀэрэм фэдэу, а цӀыфхэм Ӏофхэу агъэцакӀэхэрэмкӀэ зыфэдэхэр къэшъушӀэщт. Пырэжъые куандэм сэнашъхьэ къыпача е шхъум ынджыр къыпача? 17Ащ фэдэу сыдрэ чъыгышӀум шӀу къыпэкӀэ, ау чъыг дэим дэй къыпэкӀэ. 18ЧъыгышӀум дэй къыпыкӀэн ылъэкӀыщтэп, чъыг дэими шӀу къыпыкӀэн ылъэкӀыщтэп. 19Сыдрэ чъыгэу шӀу къызыпымыкӀэрэр раупкӀынышъ, машӀом падзэщт. 20Арышъ, а цӀыфхэм Ӏофхэу агъэцакӀэхэрэмкӀэ ахэр зыфэдэхэр къэшъушӀэщтых.

ЕгъашӀэми шъусшӀэщтыгъэп

(Лука 13:25-27)

21– Хэтрэ цӀыфэу «Зиусхьан! Зиусхьан!» къысэзыӀорэр арэп Тхьэу уашъом щыӀэм и Тетыгъошхо ыӀэчӀэгъ чӀэхьащтыр, ся Тэ лъапӀэу уашъом щыӀэр зыфаер зыгъэцакӀэрэр ары нахь. 22А мафэм цӀыфыбэмэ моущтэу къысаӀощт: «Зиусхьан! Зиусхьан! Тхьэм ежь игущыӀэхэр тыгухэм къарилъхьэхэу, ахэр о пцӀэкӀэ къатӀощтыгъэхэба, джынапцӀэхэри о пцӀэкӀэ цӀыфмэ ахэтфыщтыгъэхэба, Ӏофышхо гъэшӀэгъон Ӏаджыхэри о пцӀэкӀэ тшӀэщтыгъэхэба?» 23Ау сэ ахэмэ занкӀэу ясӀощт: «ЕгъашӀэми шъо шъусшӀэщтыгъэп. СанэӀу шъуикӀ, шъо бзэджашӀэхэр».

Унэ зышӀырэ лӀы акъылышӀомрэ унэ зышӀырэ лӀы акъылынчъэмрэ

(Лука 6:47-49)

24– Арышъ, хэти сэ сигущыӀэхэр зэхэзыхэу, ахэри зыгъэцакӀэрэр зыфэдэр лӀы акъылышӀоу, зиунэ мыжъо пытэм тезышӀыхьагъэр ары. 25Ощхыр къещхыгъ, псыхэри къиугъэх, жьыбгъэхэри къепщэхэзэ, а унэм тезэрэхьагъэх, ау а унэр къызэхэуагъэп, сыда пӀомэ, мыжъом тырашӀыхьагъэти ары. 26Ау хэти сигущыӀэхэр зэхэзыхэу, ахэри зымыгъэцакӀэрэр зыфэдэр лӀы акъылынчъэу, зиунэ пшахъом тезышӀыхьагъэр ары. 27Ощхыр къещхыгъ, псыхэри къиугъэх, жьыбгъэхэри къепщэхэзэ, а унэм тезэрэхьагъэх. А унэр къызэхэуагъ, къызызэхаоми, Ӏэе дэдэу къызэхэуагъ.

28Исус мы гущыӀэхэр къызеӀохэм, цӀыф купышхохэм Тхьэм игущыӀэхэр зэраригъашӀэщтыгъэ шӀыкӀэр агъэшӀэгъуагъ, 29сыда пӀомэ, Тэурат егъэджэкӀо пащэхэмрэ фарисейхэмрэ афэмыдэу, тетыгъошхо иӀэу, цӀыфхэм Тхьэм игущыӀэхэр аригъашӀэщтыгъэхэти ары.#7:29 тетыгъошхо иӀэу, цӀыфхэм Ӏофхэр аригъашӀэщтыгъэхэти ары – Исус Тэурат егъэджэкӀо пащэхэм афэдагъэп. Ахэмэ пэсэрэ дин пэщэ еджэгъэшхохэм ягущыӀэхэмкӀэ ежьхэм къаӀуагъэхэр агъэшъыпкъэжьынхэм пылъыщтыгъэх.

Currently Selected:

Маттэ 7: AdgNT14

Highlight

Copy