Маттэ 12
12
ЯПШӀЫКӀУТӀОНЭРЭШЪХЬ
Шэмбэт мафэм Исус игъогу рыкӀохэрэм коцышъхьэхэр къызэрэпачыгъэхэр
(Марк 2:23-28; Лука 6:1-5)
1А лъэхъаным Исус шэмбэт мафэ#12:1 шэмбэт мафэр – джуртхэм ямэфэ лъапӀ ары. А мафэм хэти Ӏоф ышӀэнэу фитэп. горэм коц хьасэхэр зэпичыхэзэ кӀощтыгъ. Игъогу рыкӀохэрэр мэлакӀэ лӀагъэхэти, коцышъхьэхэр къыпачыхэзэ ашхыхэу аублагъ. 2Фарисейхэм ар залъэгъум, Исус къыраӀуагъ:
– Еплъ, шэмбэт мафэм хабзэкӀэ пшӀэ мыхъущтыр#12:2 пшӀэ мыхъущтыр – Мусэ и Тэурат хабзэ иунашъо тетэу, шэмбэт мафэм лэжьыгъэ къэпхы хъущтыгъэп. Еплъ Пегъымбар Мусэ ятӀонэрэ тхылъэу ытхыгъэм 34:21. уигъогу рыкӀохэрэм ашӀэ.
3– Даутэрэ игъусэхэмрэ мэлакӀэ лӀэхэ зэхъум, ащ ышӀагъэм#12:3-4 ащ ышӀагъэр – еплъ Пегъымбар Самуел икъэбархэр зэрыт апэрэ тхылъым (1 Царств) 21:1-6. шъуеджагъэба? – ариӀожьыгъ Исус. 4– Ар Тхьэм иунэ ихьи, цӀыфхэм Тхьэм ыпашъхьэ ралъхьэгъэ хьалыгъур#12:4 цӀыфхэм Тхьэм ыпашъхьэ ралъхьэгъэ хьалыгъур – еплъ Пегъымбар Мусэ ящэнэрэ тхылъэу ытхыгъэм 24:5-9. ежьыри игъусэхэми ашхыгъ. А хьалыгъур дин пащэхэм анэмыкӀ хабзэкӀэ зыгорэм ышхы хъущтыгъэп, ау Даути игъусэхэми ашхыгъ. 5Е дин пащэхэр Тхьэм иунэшхо чӀэтхэу, шэмбэт мафэм лажьэхэу, а мафэр амыгъэлъапӀэми#12:5 дин пащэхэр шэмбэт мафэм лажьэхэу, а мафэр амыгъэлъапӀэми – ахэмэ Тхьэм къурмэн фашӀызэ, Ӏоф ашӀэщтыгъ. Еплъ Пегъымбар Мусэ яплӀэнэрэ тхылъэу ытхыгъэм 28:9-10., лажьэ ямыӀэу къызэрэнэрэр Мусэ и Тэурат хабзэ зэритхагъэм шъуеджагъэба? 6Ау шъосэӀо, Тхьэм иунэшхо нахьи нахь инэу зыгорэ къышъухэт. 7«КъурмэншӀыныр арэп сызыфаер, гукӀэгъур ары нахь» ыӀуи, Тхьэм къыӀогъэ гущыӀэхэм#12:7 Тхьэм къыӀогъэ гущыӀэхэр – еплъ Пегъымбар Хьошеа тхылъэу ытхыгъэм 6:6. къарыкӀырэр шъушӀэщтыгъэмэ, лажьэ зимыӀэхэрэр жъугъэмысэщтыгъэхэп; 8сыда пӀомэ, ЦӀыф Лъэпкъым ы Къо шэмбэт мафэм итхьэмат.
ЗыӀэ лъэныкъо пыгъукӀыгъэ лӀы горэ Исус зэригъэхъужьыгъэр
(Марк 3:1-6; Лука 6:6-11)
9ЕтӀанэ Исус а чӀыпӀэм ӀукӀи, ахэмэ ясинэгогу чӀэхьагъ. 10ЗыӀэ лъэныкъо пыгъукӀыгъэ лӀы горэ ащ чӀэтыгъ. Исус зэрагъэмысэн Ӏоф горэ къагъотыным пае, моущтэу къеупчӀыгъэх:
– Шэмбэт мафэм сымаджэр бгъэхъужьыныр хабзэкӀэ хъущта, мыхъущта?
11– Хэта шъуащыщэу мэл закъоу иӀэр шэмбэт мафэм машэм зифэкӀэ, къизымыхыжьыщтыр? – ариӀуагъ Исус ахэмэ. 12– ЦӀыфыр мэлым нахьи бэкӀэ нахь лъапӀэба? Арышъ, шэмбэт мафэм шӀу пшӀэныр хабзэкӀэ хъущт.
13ЕтӀанэ Исус а лӀым риӀуагъ:
– О пӀэ къэщэй. ЛӀым ыӀэ къыщэий, адрэ Ӏэм фэдэ хъужьыгъэ. 14Джащыгъум фарисейхэр синэгогум чӀэкӀыжьхи, Исус агъэкӀодынэу гухэлъ ашӀызэ, зэрагъэкӀодыщт шӀыкӀэмкӀэ зэупчӀыжьыгъэх.
Тхьэм ежь зыфигъэлэжьэнэу къыхихыгъэр
Ау Исус ахэмэ ягухэлъ къызешӀэм, а чӀыпӀэм ӀукӀыжьыгъ. 15ЦӀыфыбэхэр ыуж итхэу кӀуагъэх, ахэмэ ахэт сымаджэхэри зэкӀэ ыгъэхъужьыгъ. 16Ау Исус ахэмэ унэшъо пытэ афишӀыгъ ежь игугъу цӀыфмэ афамышӀынэу. 17Аущтэу зыкӀэхъугъэр пегъымбар Ешайа итхылъ итхэу, Тхьэм мы гущыӀэхэу#12:17-21 Тхьэм мы гущыӀэхэу – еплъ Пегъымбар Ешайа тхылъэу ытхыгъэм 42:1-4. Христос ехьылӀагъэу къыӀуагъэхэр къэшъыпкъэжьынхэр ары:
18«Мыры къысфэлэжьэнэу къыхэсхыгъэр. Ар шӀу слъэгъоу, сикӀасэу сыгу зэӀурэр ары. Сэ спсэ ащ ыгу ислъхьанышъ, ащ шъыпкъагъэр хымэ лъэпкъхэм аригъэӀущт.
19Ащ бырсыр макъэ къыӀэтыщтэп, куощтэп. Ащ ымакъэ урамхэми хэти ащызэхихыщтэп.
20Къамыл ныкъо зэпыкӀ зэпикӀыжьыщтэп, макӀэу блэрэ шъагъэри#12:20 Къамыл ныкъо зэпыкӀ… макӀэу блэрэ шъагъэр – заухъумэжьын зымылъэкӀэу, лъэкӀ зимыӀэ цӀыфхэр ары. ыгъэкӀосэщтэп, шъыпкъагъэр тыригъэкӀоным нэсыфэ.
21ЦӀыф лъэпкъхэр зыщыгугъыщтхэр ежьыр ары».
Исусрэ джынапцӀэхэм япащэу БаӀал-Зэбулрэ
(Марк 3:20-30; Лука 11:14-23; 12:10)
22Ащ дэжьым нэшъоу, бзакоу джынапцӀэ зыхэс лӀы горэ цӀыфхэм Исус дэжь къащагъ. Исус лӀы бзакор гущыӀэшъоу, ылъэгъушъоу ыгъэхъужьыгъ. 23ЗэкӀэ цӀыфхэм лъэшэу агъэшӀагъоу аӀощтыгъ:
– Мыр Даутэ ы Къоу Христос ара?
24Ау фарисейхэм ар зызэхахым, моущтэу аӀуагъ:
– БаӀал-Зэбулэу джынапцӀэмэ япащэ илъэкӀ ары джынапцӀэхэр цӀыфхэм зэрахифырэр.
25Ау ахэмэ ягухэлъхэр Исус ышӀэзэ, ариӀуагъ:
– Сыдрэ пачъыхьагъум лъэныкъуитӀоу зигощымэ, зэхэтэкъощт. Ащ фэдэуи сыдрэ къали, сыдрэ уни лъэныкъуитӀоу гощыгъэ хъумэ, щыӀэжьын ылъэкӀыжьыщтэп. 26Шэйтаными зы цӀыф горэм шэйтаныр хифымэ, ащыгъум ежь ышъхьэкӀэ лъэныкъуитӀоу гощыгъэ мэхъу. Сыдэущтэу етӀанэ ащ итетыгъо щыӀэжьын ылъэкӀын? 27Адэ БаӀал-Зэбул илъэкӀыкӀэ сэ джынапцӀэхэр цӀыфхэм ахэсэфыхэмэ, шъо шъуицӀыфхэм джынапцӀэхэр зэрахафырэр хэт илъэкӀ хъура? Арышъ, ахэр шъо хьыкумэшӀы къышъуфэхъущтых. 28Ау сэ джынапцӀэхэр цӀыфхэм зэрахэсфырэр Тхьэм ы Псэ ЛъапӀ арышъ, Тхьэм и Тетыгъошхо къызэрэшъухэхьагъэр ары ащ къикӀырэр.
29– Ащ фэдэу, кӀуачӀэ зиӀэ лӀы горэм иунэ ихьэу, ащ ихьапщыпхэр къытыгъун хэта зылъэкӀыщтыр, ыпэ рапшӀэу а лӀэу кӀуачӀэ зиӀэр зэкӀоцӀимыпхэмэ? Ау а лӀыр зэкӀоцӀипхэмэ, иунэ къыхъункӀэн ылъэкӀыщт.
30– Сэ симыгъусэр къыспэуцу, сэ къыздэзымыугъоирэми ретэкъухьэ. 31Арышъ, шъосэӀо, цӀыфхэм сыдрэ псэкӀодэу ашӀагъэри, сыд фэдэу Тхьэр агъэпцӀыгъэми афэгъущтых, ау хэтми Тхьэм ы Псэ ЛъапӀэ зыгъэпцӀырэм фэгъущтэп. 32Хэтми ЦӀыф Лъэпкъым ы Къо гущыӀэ Ӏае фэзыӀорэм фэгъущт, ау Тхьэм ы Псэ ЛъапӀэ гущыӀэ Ӏае фэзыӀорэм мы дунаими адрэ дунаими къащыфэгъущтэп.
Чъыгыр зыфэдэр къыпыкӀэрэмкӀэ къэпшӀэщт
(Лука 6:43-45)
33– Чъыгыр шӀумэ, къыпыкӀэри шӀу; чъыгыр дэймэ, къыпыкӀэри дэи; сыда пӀомэ, чъыгыр зыфэдэр къыпыкӀэрэмкӀэ къэпшӀэщт. 34Шъо, блэщылъфыхэр, шъуибзэджагъэкӀэ сыдэущтэу шӀу къэшъуӀон шъулъэкӀына? Сыда пӀомэ, жэм къыдэкӀырэр гум илъыр ары. 35ЦӀыфышӀум ыгу илъ шӀугъэм шӀугъэ къыхехы, цӀыф бзаджэми ыгу илъ бзэджагъэм бзэджагъэ къыхехы. 36Сэ шъосэӀо, цӀыфхэм сыдрэ гущыӀэу, пкӀэ зимыӀэу къаӀорэм пае ахърэт мафэм Тхьэм джэуап ратыжьын фаеу хъущт; 37сыда пӀомэ, уигущыӀэхэм ялъытыгъэу Тхьэм уигъэхыещт, уигущыӀэхэм ялъытыгъэуи уигъэмысэщт.
Нэшэнэ гъэшӀэгъон горэ уашъом къафыригъэхынэу фарисейхэр Исус къызэрелъэӀугъэхэр
(Марк 8:11-12; Лука 11:29-32)
38Ащ дэжьым Тэурат егъэджэкӀо пащэхэмрэ фарисейхэмрэ ащыщхэм Исус къыраӀуагъ:
– Дин гъэсакӀу, нэшэнэ гъэшӀэгъон горэ тэбгъэлъэгъунэу тыфай.
39– Джырэ цӀыф бзаджэхэу Тхьэр зымышӀэхэрэр нэшэнэ гъэшӀэгъон фаех, – ариӀожьыгъ Исус ахэмэ, – ау пегъымбар Юныс инэшанэ нэмыкӀ Тхьэм ахэмэ къаритыщтэп; 40сыда пӀомэ, Юныс#12:40 Юныс – еплъ Пегъымбар Юныс икъэбар зэрыт тхылъым 1:17. пцэшхо иным ыныбэ мэфищырэ чэщищырэ зэрилъыгъэм фэдэу, ЦӀыф Лъэпкъым ы Къо мэфищырэ чэщищырэ чӀылъэм икуупӀэ чӀэлъыщт. 41Къалэу Нинэвие дэсыгъэ цӀыфхэр ахърэт мафэм къэтэджынхэшъ, джырэ цӀыфхэм къядэощтых, къагъэмысэщтых, сыда пӀомэ, ахэмэ Тхьэм игущыӀэхэр Юныс аригъэӀухэу зызэхаххэм, япсэкӀодшӀагъэхэм афыкӀэгъожьыгъэх. Мары, пегъымбар Юныс нахьи нахь инэу зыгорэ къышъухэт. 42Джащ фэдэу къыблэ хэгъэгум щыщэу бзылъфыгъэ пачъыхьэр#12:42 бзылъфыгъэ пачъыхьэр – еплъ Пачъыхьэхэм якъэбархэр зэрыт апэрэ тхылъым (3 Царств) 10:1-10. ахърэт мафэм къэтэджынышъ, джырэ цӀыфхэм къядэощт, къыгъэмысэщтых, сыда пӀомэ, а бзылъфыгъэ пачъыхьэр пачъыхьэ Сэлмэн иакъылышӀуагъэ едэӀунэу чӀылъэм икъуапэ къикӀи, къэкӀуагъ. Мары, пачъыхьэ Сэлмэн нахьи нахь инэу зыгорэ къышъухэт.
ДжынэпцӀэ Ӏаем къызэригъэзэжьырэр
(Лука 11:24-26)
43– ДжынэпцӀэ Ӏае горэ цӀыф горэм зыхэкӀыкӀэ, зыгъэпсэфыпӀэ лъыхъоу, псы зэрымыт шъоф нэкӀым къыщекӀухьэ, ау ыгъотырэп. 44Джащыгъум еӀо: «Сызхэсыгъэ цӀыфэу сиунагъэм дэжь згъэзэжьыщт». Ащ дэжь къегъэзэжьышъ, унэр нэкӀэу, пхъэнкӀыгъэу, зэлъыӀухыгъэу къегъотыжьы. 45Джащыгъум макӀо, джынэпцӀибл ежь нахьи нахь бзаджэхэу къыздещэхэшъ, унэм етӀысхьэх. ЫкӀэ ыкӀэжьым а цӀыфым иӀоф ыпэрэм нахьи нахь дэи мэхъу. Джары джырэ цӀыфхэм къяхъулӀэщтыр.
Исус янэрэ ышхэмрэ
(Марк 3:31-35; Лука 8:19-21)
46Исус а гущыӀэхэр цӀыф купышхохэм ариӀо зэхъум, ежь янэрэ ышхэмрэ къэкӀуагъэхэу, къыдэгущыӀэхэмэ ашӀоигъоу щагум дэтыгъэх. 47Зыгорэм Исус къыриӀуагъ:
– КъэдаӀолъ, о уянэрэ пшыхэмрэ къэкӀуагъэхэу, къыбдэгущыӀэхэмэ ашӀоигъоу щагум дэтых.
48– Хэта сянэри, хэта сшыхэри? – риӀожьыгъ Исус къезыӀуагъэм. 49ЕтӀанэ игъогу рыкӀохэрэм Ӏапэ афишӀи, къыӀуагъ:
– Мыхэр ары сэ сянэри сшыхэри; 50сыда пӀомэ, хэти сэ ся Тэу уашъом щыӀэр зыфаер зыгъэцакӀэрэр ары сшыри, сшыпхъури, сянэри.
Currently Selected:
Маттэ 12: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
