Лука 21

ЯТӀОКӀЫРЭ ЗЫНЭРЭШЪХЬ

Шъузабэм ахъщэу Тхьэм пае ытыгъэр

(Марк 12:41-44)

1Исус Тхьэм иунэшхо чӀэтэу зэплъэм, цӀыф байхэм Тхьэм тын фашӀэу, ахъщэхэр пхъуантэхэм адалъхьэхэу ылъэгъугъ. 2Яплъ зэхъум, шъузэбэ тхьамыкӀэ горэми гъоплъэ ахъщитӀу пхъуантэм дилъхьэу ылъэгъугъ.

3– Шъыпкъэр шъосэӀо, – къыӀуагъ Исус, – мы шъузэбэ тхьамыкӀэм адрэ пстэуми анахьи нахьыбэ дилъхьагъ; 4сыда пӀомэ, ахэмэ ахъщэу къялыжьыгъэм щыщ далъхьагъэти ары, ау а шъузабэм зэрыпсэунэу мэкӀэ тӀэкӀоу иӀэр зэкӀэ дилъхьагъ.

Тхьэм иунэшхо зэрэзэхакъутэщтыр Исус къызэриӀуагъэр

(Маттэ 24:1-2; Марк 13:1-2)

5Тхьэм иунэшхо мыжъо дахэхэмкӀи тынхэу цӀыфхэм Тхьэм фашӀыгъэхэмкӀи дахэу зэрэгъэкӀэрэкӀагъэм игугъу зашӀым, Исус къыӀуагъ:

6– Мыщ щышъулъэгъурэр мыжъуитӀу къызэтемынэжьэу, пстэури къызызэхэтэкъощт мафэхэр къэсыщтых.

7– Дин гъэсакӀу, о зыфэпӀогъэ Ӏофхэр сыдигъо къэхъущтха, ахэр къызэрэхъущтхэм янэшанэри сыд фэда? – къеупчӀыгъэх ахэр.

Нэшанэхэмрэ къиныбэ щэчынымрэ

(Маттэ 24:3-14; Марк 13:3-13)

8– ЦӀыфхэм шъукъызэрамыгъэпцӀэщтым шъуфэсакъ, – къыӀожьыгъ Исус. – Сыда пӀомэ, сэ сцӀэкӀэ зэджэжьхэу, «Сэры Христосыр» аӀоу, «Мафэр къэблэгъагъ» аӀоу, къэкӀощт цӀыфхэр бэ хъущтых. Ахэмэ ауж шъуимыхь. 9Заохэм якъэбархэмрэ пачъыхьагъухэм ягъэпсыкӀэ акъутэжьынэу цӀыфхэм зыкъызэраӀэтыхэрэм якъэбархэмрэ зызэхэшъухыкӀэ, шъукъэмыщт. А Ӏофхэр къэхъунхэ фае, ау дунаим икӀэух шӀэхэу къэсыщтэп.

10– Зы лъэпкъыр адрэ лъэпкъым, зы пачъыхьагъури адрэ пачъыхьагъум езэонэу къэтэджыщт, – етӀанэ ариӀуагъ Исус. 11– ЧӀыпӀэ-чӀыпӀэхэми чӀыгур ин дэдэу ащысысыщт, зэпахырэ узхэри гъаблэхэри къэхъущтых. Уашъоми щынэгъошхо нэшанэхэр къикӀыщтых.

12– Ау мы Ӏоф пстэури къэхъунхэм ыпэкӀэ, сцӀэ зэрэжъугъэлъапӀэрэм пае, цӀыфхэм шъуаубытыщт, къини шъуагъэщэчыщт. Синэгогухэм шъуаратыщт, хьапсхэми шъуачӀадзэщт, пачъыхьэхэмрэ Ӏэшъхьэтетхэмрэ апашъхьи шъуращэщт. 13Джащыгъум ахэмэ апашъхьэ къэбарышӀум шыхьат шъуфэхъущт. 14Ау мыр шъугухэм арыжъугъэлъ: зыжъугъэхыеу яшъуӀощтыр ыпэкӀэ жъугъэхьазырыным шъупымылъ; 15сыда пӀомэ, къышъонэкъокъухэрэр къышъупэмыуцужьышъунхэу, къышъупэмыгущыӀэжьышъунхэу гущыӀэхэри акъылышӀуи къышъостыщтых. 16Шъуянэ-шъуятэхэми, шъушыхэми, шъуиблагъэхэми, шъуиныбджэгъухэми тетыгъо зиӀэхэм шъуарагъэубытыщт, шъуащыщэу зы купи аукӀыщт. 17Шъо сцӀэ зэрэжъугъэлъапӀэрэм пае, цӀыф пстэуми шъуауджэгъущт. 18Ау зы шъхьац налъи шъо шъушъхьэхэм ахэкӀодыкӀыщтэп. 19Теубытагъэ шъуиӀэмэ, шъупсэхэр мыкӀодхэу къэжъугъэнэжьыщтых.

Ерусалим зэракъутэщтыр Исус къызэриӀуагъэр

(Маттэ 24:15-21; Марк 13:14-19)

20– Ерусалим дзэхэм къауцухьагъэу зышъулъэгъукӀэ, икъутэжьыгъо къызэрэблэгъагъэр шъушӀэщт. 21Ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых, къалэм дэсхэри дэрэкӀыжьых, губгъом итхэри къалэм дэрэмыхьажьых. 22Сыда пӀомэ, Тхьэм игущыӀэ тхыгъэхэм арыт пстэури къэшъыпкъэжьынхэм пае, цӀыфхэм ашӀагъэхэр Тхьэм зыщаригъэпщыныжьын мафэхэр мырых. 23А мафэхэм бзылъфыгъэ лъэрмыхьхэмрэ сабый быдзашъо зиӀэхэмрэ гъогу мыгъо теуцощтых. Мы хэгъэгум ицӀыфхэр къинышхо хэфэщтых, Тхьэри мы лъэпкъым лъэшэу къыфэгубжыщт. 24Ахэмэ ащыщхэр чатэкӀэ аукӀыщтых, адрэхэри гъэрэу аубытыгъэхэу лъэпкъ пстэуми адэжь ащэщтых. Хымэ лъэпкъхэм ялъэхъан аухыфэ, ахэмэ Ерусалим лъэгукӀэ аутэщт.

ЦӀыф Лъэпкъым ы Къо дунаим къызэрэкӀожьыщтыр

(Маттэ 24:29-31; Марк 13:24-27)

25– Нэшэнэ гъэшӀэгъонхэр тыгъэм, мазэм, жъуагъохэм къащылъэгъощтых. ЧӀылъэм тет цӀыф лъэпкъхэм ашӀэщтыр амышӀэу агу кӀодыщт. Хыри лъэшэу къыдэуаеу ибырсыр мэкъэшхо къэӀущт. 26Дунаим къыщыхъущтхэм паплъэхэу, цӀыфхэр щынагъом хэтхэу мэхыщтых, сыда пӀомэ, уашъом щыӀэ кӀуачӀэхэр хъыещтыхэшъ ары. 27Джащыгъум ЦӀыф Лъэпкъым ы Къо ошъуапщэм хэтэу, лъэкӀышхорэ щытхъушхорэ иӀэхэу къакӀоу цӀыфхэм алъэгъущт. 28А Ӏофхэр къэхъухэу заублэкӀэ, шъукъэтэджи, шъушъхьэхэр къэшъуӀэтых, сыда пӀомэ, Тхьэм къиным шъузщыхихыжьыщт мафэр къэблэгъагъэшъ ары.

Ынджыр чъыгым шъыпкъэу къыдгуригъаӀорэр

(Маттэ 24:32-35; Марк 13:28-31)

29ЕтӀанэ Исус гъэсэпэтхыдэ ариӀуагъ: – Ынджыр чъыгымрэ адрэ чъыг пстэумрэ шъуяплъ. 30Чъыгхэр къэтӀэмхэу зыфежьэхэкӀэ, гъэмафэр зэрэблагъэр зыми къышъуимыӀоу шъошӀэба? 31Ащ фэдэу шъори мы Ӏофхэр къэхъухэу зышъулъэгъухэкӀэ, Тхьэм и Тетыгъошхо благъэ къызэрэхъугъэр зэжъугъашӀэ.

32– Шъыпкъэр шъосэӀо, мы Ӏофхэр зэкӀэ къэхъунхэм ыпэ, мы лъэпкъыр кӀодыщтэп. 33Уашъомрэ чӀылъэмрэ кӀодыжьыщтых, ау сигущыӀэхэр кӀодыжьыщтхэп.

Сыдигъуи шъусакъ!

34– Ешхэ-ешъонымкӀи, утэшъонымкӀи, мы дунаим игугъухэмкӀи шъушъхьэхэр зэӀышъумыгъэхьанхэу шъузфэсакъыжь. Армырмэ, шъумышӀахэу а мафэр къышъутеощт. 35Сыда пӀомэ, а мафэр чӀылъэ шъхьашъом тет цӀыф пстэуми хъытыум фэдэу къафэкӀощт. 36Сыдигъуи шъусакъ, къэхъущт пстэуми шъуахэкӀыным паий, кӀуачӀэ жъугъотынышъ, ЦӀыф Лъэпкъым ы Къо ыпашъхьэ шъузэрихьащтымкӀэ Тхьэм шъуелъэӀу зэпыт.

37Мафэ къэс Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэщтыгъ, ау чэщ къэхъу къэс, къалэм дэкӀыти, Елеон зыцӀэ Ӏуашъхьэм чэщыр щырихыщтыгъ. 38Жьэу пчэдыжь къэс Исус едэӀунхэу цӀыф пстэури Тхьэм иунэшхо къакӀощтыгъэх.

Currently Selected:

Лука 21: AdgNT14

Highlight

Copy