Иуан 3

ЯЩЭНЭРЭШЪХЬ

ИкӀэрыкӀэу шъукъалъфыжьын фае

1Никодим ыцӀэу, фарисейхэм ащыщэу лӀы горэ щыӀагъ. Ар джурт тхьэматэхэм ащыщыгъ. 2Ар Исус дэжь чэщым къакӀуи, къыриӀуагъ:

– Рабби#3:2 Рабби – дин гъэсакӀор ары., о Тхьэм дэжь къикӀыгъэ дин гъэсакӀоу узэрэщытыр тэшӀэ; сыда пӀомэ, Тхьэр уимыгъусэмэ, нэшэнэ гъэшӀэгъонхэу о къэбгъэлъагъохэрэр зыми къыгъэлъэгъон ылъэкӀыщтэп.

3– Шъыпкъэ дэдэр осэӀо, цӀыф горэ икӀэрыкӀэу къамылъфыжьмэ, Тхьэм и Тетыгъошхо ылъэгъун ылъэкӀыщтэп, – риӀожьыгъ Исус.

4– ЦӀыфыр жъы хъумэ, сыдэущтэу къалъфыжьыщта? – къыриӀожьыгъ Никодим. – Ежь янэ ыныбэ ихьажьынышъ, икӀэрыкӀэу къалъфыжьыщта?

5– Шъыпкъэ дэдэр осэӀо, – пэгъокӀ ытыжьыгъ Исус, – псымрэ Тхьэм ы Псэ ЛъапӀэрэ къахэкӀэу цӀыфыр икӀэрыкӀэу къамылъфыжьмэ, Тхьэм и Тетыгъошхо ыӀэчӀэгъ чӀэхьан ылъэкӀыщтэп. 6ЦӀыфым къыфэхъурэр цӀыфы, ау цӀыфэу Тхьэм ы Псэ ЛъапӀэ къыхэкӀырэр Тхьэм ы Псэ ЛъапӀэ зыгу илъ цӀыфыр ары. 7«ИкӀэрыкӀэу шъукъалъфыжьын фае» къызэрэосӀуагъэр умыгъэшӀагъо. 8Жьыбгъэр ежь зыфаемкӀэ щепщэ. Ымакъэ зэхэохы, ары шъхьакӀэ къыздикӀырэри зыдакӀорэри пшӀэрэп. Джары хэтрэ цӀыфэу Тхьэм ы Псэ ЛъапӀэ къыхэкӀыгъэм иӀоф зытетыр.

9– Ар сыдэущтэу хъура? – къеупчӀыгъ Никодим Исус.

10– О израиль дин гъэсакӀохэм уащыщ, ар умышӀэу ара? – пэгъокӀ ритыжьыгъ Исус. 11– Шъыпкъэ дэдэр осэӀо, тэ тшӀэрэр ары тызэрыгущыӀэрэр, тлъэгъугъэри ары шыхьат тызфэхъурэр, ау етӀани тэ шыхьатэу тызтеуцорэр шъо шъудэрэп. 12Мы дунаим иӀофхэм ягугъу къышъуфэсшӀыгъ, ау шъо шъушӀошъ хъугъэп. Уашъом иӀофхэм ягугъу къышъуфэсшӀымэ, сыдэущтэу шъушӀошъ хъуна? 13Зы цӀыфи уашъом дэкӀоягъэп, ау ЦӀыф Лъэпкъым ы Къоу зиунэ уашъом щыӀэр уашъом къехыгъ. 14Пегъымбар Мусэ#3:14 Пегъымбар Мусэ – еплъ Пегъымбар Мусэ яплӀэнэрэ тхылъэу ытхыгъэм 21:4-9. шъоф нэкӀым блэр зэрэщиӀэтыгъагъэм фэдэу, ЦӀыф Лъэпкъым ы Къуи цӀыфхэм аӀэтын фае,#3:14 ЦӀыф Лъэпкъым ы Къуи цӀыфхэм аӀэтын фае – а гущыӀэхэм Исус къыригъэкӀыгъэр ежь къащым зэрэтыраӀулӀэщтри Тхьэм дэжь зэрэдэкӀоежьыщтри ары. ЦӀыф Лъэпкъым ы Къо Исус ары. Еплъ 1:51. 15ЕжьыркӀэ шӀошъхъуныгъэ зиӀэ пстэуми мыкӀодыжьын щыӀэныгъэ яӀэ хъуным пае.

16– Сыда пӀомэ, Тхьэм дунаим ицӀыфхэр ащ фэдизэу шӀу зэрилъэгъугъэхэм къыхэкӀэу, ежь ы Къо закъо ытыгъ, хэти Тхьэм ы КъокӀэ шӀошъхъуныгъэ зиӀэр мыкӀодэу къэнэжьыным, мыкӀодыжьын щыӀэныгъэ иӀэ хъуным пае.

17Тхьэм дунаим ицӀыфхэр ыгъэмысэнхэр арэп ежь ы Къо дунаим къызфигъэкӀуагъэр, ау ы Къо дунаим ицӀыфхэр мыкӀодхэу къыригъэгъэнэжьынхэр ары нахь. 18Тхьэм ежь ы КъокӀэ хэти шӀошъхъуныгъэ зиӀэр ыгъэмысэщтэп, ау хэти шӀошъхъуныгъэ зимыӀэр Тхьэм ыгъэмысэгъах, ы Къо закъокӀэ шӀошъхъуныгъэ иӀэ зэрэмыхъугъэм пае. 19Тхьэм цӀыфхэр зыкӀигъэмысэхэрэр мары: нэфынэр дунаим къытехьагъ, ау цӀыфхэм нэфынэм нахьи шӀункӀыр нахьышӀу алъэгъугъ, сыда пӀомэ, Ӏофхэу ашӀагъэхэр бзаджэхэшъ ары. 20Хэти бзэджагъэр зышӀэрэм нэфынэр еуджэгъу, Ӏофхэу ышӀагъэхэри нафэ къэмыхъунхэм пае, нэфынэм екӀуалӀэрэп. 21Ау хэтми шъыпкъэр зыгъэцакӀэрэр нэфынэм екӀуалӀэ, Ӏофхэу ышӀагъэхэр Тхьэр ыгу зэрилъым пае, зэригъэцэкӀагъэхэр нафэ къэхъуным пае.

УмэхъэкӀо Иуан Исус зэрэтегущыӀагъэр

22Ащ нэужым Исусрэ игъогу рыкӀохэрэмрэ Иудей хэкум#3:22 Иудей хэкур – Израиль хэгъэгум ихэкухэм ащыщыгъ. кӀуагъэх. Ахэмэ ягъусэу Исус а чӀыпӀэм къэнагъэу, цӀыфхэр щиумэхъыщтыгъ. 23Къуаджэу Салим пэгъунэгъу Енон зыцӀэ чӀыпӀэу псыр зыщыбагъэм Иуани цӀыфхэр щиумэхъыщтыгъ. Ахэр Иуан дэжь къакӀохэти, зырагъэумэхъыщтыгъ. 24А лъэхъаным Иуан хьапсым джыри чӀадзэгъагъэгоп#3:24 хьапсым джыри чӀадзэгъагъэгоп – еплъ Марк 6:17-18.. 25Иуан игъогу рыкӀохэрэм ащыщхэмрэ джурт горэмрэ диным тетэу зызэрэбгъэкъэбзэжьыщт ӀофымкӀэ зэнэкъокъухэу фежьагъэх. 26Игъогу рыкӀохэрэр Иуан дэжь къакӀохи, къыраӀуагъ:

– Рабби, еплъ Иордан псыхъом иадрабгъу о узигъусэгъэ лӀэу шыхьат узыфэхъугъэм цӀыфхэр еумэхъых, цӀыфхэри зэкӀэ ащ дэжь къэкӀох.

27– Тхьэм римыгъэлъэкӀымэ, зыми зи ышӀэн ылъэкӀыщтэп, – къыӀожьыгъ Иуан. 28– «Христосыр сэрэп, ау Христос ыпэ Тхьэм сыкъыгъэкӀуагъ» зэрэсӀуагъэмкӀэ шъо шъусишыхьат. 29Нысэр зиер шъаор ары. Ау шъаом игъусэу ащ дэжьым щытэу, шъаом ымакъэ зэхэзыхырэр щэгушӀукӀы. А гушӀуагъоу гъунэ зимыӀэр сэ сигушӀуагъоуи хъугъэ. 30Ежь нахь ин хъун фае, сэри нахь цӀыкӀу сыхъун фае.

Уашъом къехырэр

31ЫпшъэкӀэ къехырэр зэкӀэмэ апшъэ щыӀ. Ау чӀылъэм щыщыр чӀылъэм ий, чӀылъэм щыщхэр зэрэгущыӀэхэрэм фэдэу мэгущыӀэ. Уашъом къехырэр зэкӀэмэ апшъэ щыӀ. 32Ащ Ӏофхэу ылъэгъугъэхэмрэ зэхихыгъэхэмрэ къеушыхьатыжьы, ау ащ ишыхьатныгъэ зыми ыдэрэп. 33Ау ащ ишыхьатныгъэ зыдагъэм Тхьэр зэрэшъыпкъэр ыдагъэу мэхъу. 34Сыда пӀомэ, Тхьэм къыгъэкӀуагъэм Тхьэм игущыӀэхэр ары къыӀохэрэр. А цӀыфым ыгу Тхьэм ежь ы Псэ ЛъапӀэ гъунэ имыӀэу къырелъхьэ. 35Ты лъапӀэм ежь ы Къо шӀу елъэгъу, зэпстэури ыӀэ къырилъхьагъ. 36Тхьэм ы КъокӀэ шӀошъхъуныгъэ зиӀэм мыкӀодыжьын щыӀэныгъэ иӀэ хъугъэ, ау ы Къо емыдэӀурэм мыкӀодыжьын щыӀэныгъэ ылъэгъущтэп, Тхьэм игубж телъыщт нахь.

Currently Selected:

Иуан 3: AdgNT14

Highlight

Copy