Иуан 2

ЯТӀОНЭРЭШЪХЬ

Канэ нысащэу щыӀагъэр

1Ящэнэрэ мафэм Галилей хэкум ит къуаджэу Канэ#2:1 къуаджэу Канэ – Назарет километрихкӀэ пэчыжьэу, итемыр лъэныкъомкӀэ ит. нысащэ дэтыгъ. Исус янэ а нысащэм щыӀагъ. 2Исуси игъогу рыкӀохэрэри а нысащэм рагъэблэгъэгъагъэх.

3Сэнэпсыр заухым, янэ Исус риӀуагъ:

– Сэнэпс яӀэжьэп.

4– О бзылъфыгъ, сыда сэ сиӀофэу ащ хэлъыр? Сэ сигъо къэсыгъэгоп, – къыриӀожьыгъ Исус янэ.

5– Исус сыд къышъуиӀоми, жъугъэцакӀэ, – ариӀуагъ Исус янэ унэӀутхэм.

6А чӀыпӀэм мыжъом хэшӀыкӀыгъэ къошыних Ӏутыгъ, джуртхэм ядин хабзэ тетэу загъэкъэбзэжьыным пае. Къошын пэпчъ литрэ тӀокӀиплӀ-шъэрэ тӀокӀырэ фэдиз ифэщтыгъ.

7– Къошынхэм псы арызэу арыжъугъахъу, – ариӀуагъ Исус унэӀутхэм. Аущтэу ахэмэ къошынхэм арызыбзэу рагъэхъуагъ. 8Исус етӀанэ ариӀуагъ:

– Къошынхэм тӀэкӀу-тӀэкӀу къахэшъухи, хьатыякӀом фэшъухь. Аущтэуи ашӀыгъ. 9ХьатыякӀор псэу сэнэпс хъугъэм ехъумпӀыгъ. Сэнэпсыр къыздикӀыгъэр ышӀагъэп, ау унэӀутхэу а псыр къошынхэм къахэзыхыгъэхэм ашӀэщтыгъ. ХьатыякӀор шъаом къеджи, 10риӀуагъ:

– Ыпэ рапшӀэу сэнэпс дэгъур Ӏанэм къытырагъэуцо. ХьакӀэхэр бэу зешъохэ ужым, сэнэпс нахь пыутыр Ӏанэм къытырагъэуцожьы, ау о сэнэпс дэгъур джы нэс щыбгъэтыгъ.

11Исус инэшэнэ гъэшӀэгъонхэм ащыщхэм апэрэр мырыгъэ. А нэшэнэ гъэшӀэгъоныр Галилей хэкум ит къуаджэу Канэ щигъэлъэгъуагъ. Аущтэу ищытхъушхо къыгъэнэфагъ, игъогу рыкӀохэрэм ежьыркӀэ шӀошъхъуныгъэу яӀэри нахь пытэ хъугъэ.

12Ащ нэуж яни, ышхэри, игъогу рыкӀохэри игъусэхэу Исус Капернаум къалэмкӀэ къехыгъ. Ащ мэфэ заулэрэ щыӀагъэх.

Исус щэн-щэфакӀохэр Тхьэм иунэшхо къызэрэчӀифыгъэхэр

(Маттэ 21:12-13; Марк 11:15-17; Лука 19:45-46)

13Джуртхэм ямэфэкӀ мэфэшхоу Ӏутыжъ зыцӀэр къэблэгъагъ, Исуси ЕрусалимкӀэ дэкӀоягъ. 14Тхьэм иунэшхо чӀэхьагъ. ЗычӀахьэм, цухэр, мэлхэр, тхьаркъохэр зыщэхэрэри#2:14 цухэр, мэлхэр, тхьаркъохэр зыщэхэрэр – ахэмэ къурмэныпхъэ былымхэр Тхьэм иунэшхо ищагу щащэщтыгъэх. Ӏанэхэм апэсхэу ахъщэр зыхъожьхэрэри#2:14 ахъщэ зыхъожьхэрэр – Тхьэм иунэшхо пае хьакъулахь ахъщэр зытырэхэми къурмэныпхъэ былымхэр къэзыщэфыхэрэми апае ахэмэ хымэ ахъщэхэр ахъожьыщтыгъэх. ащ чӀилъэгъуагъ. 15Джащыгъум кӀапсэм къамыщ хишӀыкӀи, яозэ, Тхьэм иунэшхо чӀэт пстэури, цухэри мэлхэри ягъусэхэу, къычӀифыгъ. Ахъщэ зыхъожьхэрэми яӀанэхэр зэпыригъэзагъ, яахъщэхэри ритэкъухьагъ.

16– Мыхэр Ӏушъухых, ся Тэ иунэ бэдзэр шъумышӀы, – ариӀуагъ Исус тхьаркъохэр зыщэхэрэм.

17Аущтэу зэхъум, «О уиунэ сызэрэфэгумэкӀырэм сигъэлӀэщт» зыфиӀорэ гущыӀэхэу Тхьэм игущыӀэ тхыгъэхэм зэрарытхэр#2:17 Тхьэм игущыӀэ тхыгъэхэм зэрарытхэр – яплъ Орэд ЛъапӀэхэм 68:10. Исус игъогу рыкӀохэрэм агу къэкӀыжьыгъ.

18Джащыгъум джуртхэм Исус къыраӀожьыгъ:

– Мыр пшӀэнэу фитыныгъэ зэрэуиӀэмкӀэ сыд фэдэ нэшэнэ гъэшӀэгъон тэбгъэлъэгъуна?

19– Мы тхьэунэр зэхэшъукъути, сэ мэфищкӀэ зэтезгъэуцожьыщт, – пэгъокӀ аритыжьыгъ Исус ахэмэ.

20– Мы тхьэунэр илъэс тӀокӀитӀурэ хырэкӀэ зэтырагъэуцуагъ, – къаӀуагъ джуртхэм. – О мэфищкӀэ зэтебгъэуцожьышъущта?

21Ау Исус тхьэунэу зыфиӀуагъэр ежь ыпкъ арыгъэ. 22Исус лӀагъэхэм къызахэтэджыкӀыжьым ыуж, игъогу рыкӀохэрэм а гущыӀэхэу къыӀогъагъэхэр агу къэкӀыжьхи, Тхьэм игущыӀэ тхыгъэхэмкӀи Исус гущыӀэхэу къыӀуагъэхэмкӀи шӀошъхъуныгъэ яӀэ хъугъэ.

ЦӀыф пстэуми агухэм арылъыр Исус ешӀэ

23Ӏутыжъ мэфэкӀ мэфэшхом Ерусалим Исус щыӀэзэ, нэшэнэ гъэшӀэгъонхэу къыгъэлъэгъуагъэхэр алъэгъугъэхэти, цӀыфыбэмэ ежьыркӀэ шӀошъхъуныгъэ яӀэ хъугъэ. 24Ау Исус цӀыфхэм цыхьэ афишӀыгъэп, сыда пӀомэ, ахэр зэкӀэ ышӀэщтыгъэхэти ары. 25Зыгорэ цӀыфхэм яхьылӀагъэу шыхьат къыфэхъунэу Исус ищыкӀэгъагъэп, сыда пӀомэ, цӀыфхэм агухэм арылъыр ышӀэщтыгъэти ары.

Currently Selected:

Иуан 2: AdgNT14

Highlight

Copy