Иуан 19

ЯПШӀЫКӀУБГЪОНЭРЭШЪХЬ

1Ащ нэужым Пилат дзэлӀхэм Исус аригъэубыти, къамыщкӀэ ригъэуагъэх. 2ДзэлӀхэм панэм хэшӀыкӀыгъэ пачъыхьэ тандж абли, Исус ышъхьэ тыралъхьагъ. Плъыжь чӀапцӀэу шъошэ кӀыхьи щалъагъ. 3ЕтӀанэ къыбгъодахьэхэти, аӀощтыгъ:

– Опсэу, джуртмэ япачъыхь! ЕтӀанэ енэпэшъуаощтыгъэх.

4Пилат джыри зэ преторием къычӀэкӀи, джуртмэ ариӀуагъ:

– Зэрызгъэмысэн зи зэресымыгъотылӀэрэр шъушӀэным пае, мары, къышъуфэсэщэ.

5Ащ нэуж Исус пэнэ танджыр ышъхьэ телъэу, шъошэ кӀыхьэ плъыжь чӀапцӀэр щыгъэу къычӀэкӀыгъ. Пилат цӀыфхэм ариӀуагъ:

– Мары а цӀыфыр.

6Ау дин пэщэшхохэмрэ къэрэгъулэхэмрэ Исус залъэгъум, къэзэрэгъэкуощтыгъэх:

– Къащым теӀулӀ! Къащым теӀулӀ!

– Ар шъо шъущэжьи, къащым тешъуӀулӀ, – ариӀуагъ Пилат, – сыда пӀомэ, сэ зэрызгъэмысэн зи езгъотылӀэрэп.

7– Тэ хабзэ тиӀ,#19:7 тэ хабзэ тиӀ – еплъ Пегъымбар Мусэ ящэнэрэ тхылъэу ытхыгъэм 24:16. – къыраӀожьыгъ джуртхэм. – А хабзэу тиӀэм тетэу ар лӀэн фае, сыда пӀомэ, Тхьэм ы Къо зишӀыгъэшъ ары.

8Пилат а гущыӀэхэр зызэхехым, лъэшэу къэщтагъ. 9Джыри преторием чӀэхьажьи, Исус риӀуагъ:

– Тыдэ ущыща? Исус джэуап къыритыжьыгъэп.

10– УкъыздэгущыӀэрэп, ара? – еупчӀыгъ Пилат Исус. – ПшӀэрэба шъхьафитэу устӀупщыжьынэуи, къащым утырязгъэӀулӀэнэуи тетыгъо зэрэсиӀэр.

11– Ыпшъэ щыӀэ Тхьэм къыуимытыгъэмэ, зыгорэ къысэпшӀэнэу тетыгъо уиӀэщтыгъэп, – къыриӀожьыгъ Исус. – Аущтэу зэрэщытым пае, о сыкъыпӀэкӀэзгъэхьагъэм псэкӀод нахьыбэ иӀ.

12Ащ щегъэжьагъэу Исус зэритӀупщыжьыщтым Пилат ыуж итыгъ. Ары шъхьакӀэ джуртхэр къэзэрэгъэкуощтыгъэх:

– Ар шъхьафитэу птӀупщыжьмэ, Кайсарым уриныбджэгъоп. Хэтми ежь пачъыхьэ зызышӀыжьырэр Кайсарым ипый.

13Пилат а гущыӀэхэр зызэхехым, Исус къычӀищи, хьыкум тӀысыпӀэм тетӀысхьагъ. А тӀысыпӀэр зыдэщыӀэ чӀыпӀэм ыцӀэ Литосторотон, джуртыбзэкӀи Габбэтэ ары. 14А мафэр Ӏутыжъ зыцӀэ мэфэкӀ мэфэшхом ыпэ бэрэскэшхо мэфагъ. Сыхьатыр пшӀыкӀутӀум дэжьыгъ.#19:14 сыхьатыр пшӀыкӀутӀум дэжьыгъ – зытырахыгъэ алыджыбзэм зэритыр «яхэнэрэ сыхьат». Ащ къикӀырэр щэджагъор ары.

– Мары шъуипачъыхьэ! – ариӀуагъ Пилат джуртмэ.

15– Ӏущ, Ӏущ, ар къащым теӀулӀ, – къэзэрэгъэкуощтыгъэх ахэр.

– Шъуипачъыхьэ къащым тесӀулӀэна? – ариӀожьыгъ Пилат.

– Кайсарым нэмыкӀ пачъыхьэ тиӀэп, – аӀожьыгъ дин пэщэшхохэм.

16Аущтэу къызыраӀом, Пилат Исус къащым тыраӀулӀэнэу аӀэкӀилъхьагъ.

Исус къащым зэрэтыраӀулӀагъэр

(Маттэ 27:32-44; Марк 15:21-32; Лука 23:26-43)

ЕтӀанэ Исус зыдащи, ӀукӀыжьыгъэх. 17Исус икъащ ыхьэу, къалэм дэкӀи, чӀыпӀэу «Шъхьапкъ ЧӀыпӀэ» зыфаӀорэм ащагъ. А чӀыпӀэр джуртыбзэкӀэ Голгофэ зыцӀэр ары. 18А чӀыпӀэм Исус къащым щытыраӀулӀагъ. НэбгыритӀу игъусэуи, зыр зы бгъумкӀэ адрэр адырабгъукӀэ, Исус азыфагу дэтэу къащхэм атыраӀулӀагъэх.

19Пилат пхъэмбгъу горэм «Назарет щыщ Исусэу джуртмэ я Пачъыхь» ыӀоу, идзэлӀхэм тыраригъатхи, къащым тыраригъэгъэуцуагъ. Ар джуртыбзэкӀи, латинабзэкӀи, алыджыбзэкӀи тетхэгъагъ. 20Исус къащым зыщытраӀулӀэгъэ чӀыпӀэр къалэм игъунэгъути, джуртхэм ащыщхэу ащ еджагъэр бэ. 21Ау джуртхэм ядин пэщэшхохэм Пилат раӀуагъ:

– «Джуртмэ я Пачъыхь» пӀоу темытх, ау «Сэ джуртхэм сыря Пачъыхь мы лӀым ыӀуи» зэриӀощтыгъэр тетх.

22– Сэ тестхагъэр тестхэгъах, – къыӀожьыгъ Пилат.

23ДзэлӀхэм Исус къащым зытыраӀулӀэм, ищыгъынхэр аштэхи, хэтрэ дзэлӀым Ӏахь фашӀэу, ӀахьиплӀэу агощыгъ. Джанэри аштагъ, ары шъхьакӀэ джанэр мыдыгъэу, ыпшъэ щегъэжьагъэу ылъапэ нэс шъагъэу, зы шэкӀышхуагъ.

24– Мыр зэготэшъумыгъэтхъэу, пхъэдз итэжъугъадзи, зытефэрэм еттыщт, – зэраӀожьыгъ ахэмэ. Аущтэу зыкӀэхъугъэр мы гущыӀэхэу Исус ехьылӀагъэу Тхьэм игущыӀэ тхыгъэхэр#19:24 Тхьэм игущыӀэ тхыгъэхэр – яплъ Орэд ЛъапӀэхэм 21:19. къэшъыпкъэжьынхэр ары:

– Сэ сищыгъынхэр зэфагощыгъэх, сиджанэ пае пхъэдз радзагъ. А гущыӀэу тхыгъэхэм атетэу дзэлӀмэ ашӀагъ.

25Исус икъащ дэжь яни, янэ ышыпхъуи, Клеопэ зыцӀэм ишъхьэгъусэ Мерэми, къуаджэу Магдэлэ щыщ Мерэми щытыгъэх. 26Исус янэрэ игъогу рыкӀохэрэм ащыщэу ежь анахь шӀу ылъэгъурэмрэ ащ дэжьым щытхэу зелъэгъухэм, янэ риӀуагъ:

– О бзылъфыгъ, джы мары о пкъо!

27ЕтӀанэ а нэбгырэу игъогу рыкӀорэм риӀуагъ:

– Джы мары уянэ! А сыхьатым къыщегъэжьагъэу а лӀэу Исус игъогу рыкӀорэм ежь иунэ Исус янэ щигъэпсэунэу ыщагъ.

Исус зэрэлӀагъэр

(Маттэ 27:45-56; Марк 15:33-41; Лука 23:44-49)

28Ащ нэужым иӀоф зэриухыгъэр Исус ешӀэти, Тхьэм игущыӀэ тхыгъэхэр къэшъыпкъэжьынхэм пае къыӀуагъ:

– ПсыфалӀэ сэлӀэ.

29Ащ дэжьым сэнэпс шӀоӀугъэ изэу апс горэ щытыгъ. КӀышъор зэраӀотырэ горэ сэнэпс шӀоӀугъэм хагъауи, хьисоп зыцӀэ къамыл бэщым палъхьи, Исус ыӀупэ рахьылӀагъ. 30Исус сэнэпс шӀоӀугъэм зыкӀэшъу ужым, ыӀуагъ:

– СиӀоф ухыгъэ. ЕтӀанэ ышъхьэ къыуфи, ыпсэ ытыгъ.

31Бэрэскэшхо мэфагъ. Ащ къыкӀэлъыкӀорэ шэмбэтыр мэфэшхуагъ. Шэмбэт мафэм хьадэхэр къащхэм апамыгъэлъынхэм пае, джуртхэр Пилат елъэӀугъэх:

– Унашъо шӀы. Къащхэм атыраӀулӀагъэхэм алъэкӀэнхэр зэпарэутхи#19:31 алъэкӀэнхэр зэпарэутхи – къащхэм атыраӀулӀагъэхэм алъэкӀэнхэр зыкӀызэпаутыщтыгъэхэр нахь псынкӀэу лӀэнхэр ары., хьадэхэр къащхэм къапарэхыжьых.

32ДзэлӀхэр къакӀохи, апэрэм ылъэкӀэнхэр зэпаутыгъ. ЕтӀанэ адрэ нэбгырэу адрэ къащым тыраӀулӀагъэм ылъэкӀэнхэр зэпаутыгъ. 33Ары шъхьакӀэ, ящэнэрэ къащым, Исус дэжь, Ӏухьэхи, зэрэлӀагъэр залъэгъум, ащ ылъэкӀапӀэхэр зэпаутыгъэхэп. 34Ау дзэлӀмэ ащыщэу зыгорэ Исус ычапэ пчыкӀэ хэпыджагъ. Зэрэхэпыджэу, лъи пси къикӀыгъ. 35Хъугъэр зылъэгъугъэм ар къыушыхьатыгъ, къыушыхьатыгъэри шъыпкъэ. Ар зэрэшъыпкъэр ащ ешӀэ. Шъо шӀошъхъуныгъэ шъуиӀэныр ары ащ къызкӀиушыхьатырэр. 36Мы Ӏофхэр зэкӀэ аущтэу зыкӀэхъугъэхэр Тхьэм мы игущыӀэ тхыгъэхэр#19:36 Тхьэм игущыӀэ тхыгъэхэр – еплъ Пегъымбар Мусэ яплӀэнэрэ тхылъэу ытхыгъэм 9:12; Орэд ЛъапӀэхэм 33:21. къэшъыпкъэжьынхэр ары:

– Ащ ыкъупшъхьэхэм ащыщэу зи зэпыутыщтэп.

37Ащ нэмыкӀэуи Тхьэм игущыӀэ тхыгъэхэм моущтэу арыт#19:37 Тхьэм игущыӀэ тхыгъэхэм арыт – еплъ Пегъымбар Зэчрей тхылъэу ытхыгъэм 12:10.:

– Зыхэпыджагъэхэм еплъыщтых.

Исус ихьадэ къэунэм зэрэчӀалъхьажьыгъэр

(Маттэ 27:57-61; Марк 15:42-47; Лука 23:50-56)

38Юсыф ыцӀэу, къуаджэу Ариматей#19:38 къуаджэу Ариматей – Ерусалим километрэ 35-кӀэ пэчыжьэу, итемыр тыгъэ къохьэпӀэ лъэныкъомкӀэ итыгъ. щыщэу, лӀы горэ щыӀагъ. Ар Исус игъогу рыкӀохэрэм шъэфэу ащыщыгъ, сыда пӀомэ, джуртмэ ащыщынэщтыгъэти ары. Ар Пилат дэжь кӀуи, елъэӀугъ:

– Исус ихьадэ къащым къыпысхыжьынэу фит сышӀ. Пилат фит зешӀым, Юсыф кӀуи, Исус ихьадэ къащым къыпихыжьыгъ.

39Юсыф игъусэу Никодими къэкӀуагъ. А Никодимыр ары Исус дэжь чэщым къэкӀогъагъэр. Ащ литришъэ фэдиз зэхэгъэкӀухьагъэу, мэ ӀэшӀу зыпихырэ уцхэу смирнэрэ алоерэ къыздихьыгъ. 40ЕтӀанэ а нэбгыритӀумэ Исус ихьадэ къащым къыпахыжьи, джуртмэ хьадэр зэрэчӀалъхьажьырэ хабзэм тетэу, мэӀэшӀу зыпихырэ уцхэр хэкӀагъэхэу чэфынхэр хьадэм ращэкӀыгъэх. 41Исус къащым зыщытыраӀулӀэгъэ чӀыпӀэм хатэ горэ Ӏулъыгъ. А хатэм къэунакӀэу егъашӀэми зы хьадэ зычӀамылъхьажьыгъэр дэтыгъ. 42Джуртмэ шэмбэт мафэм пае зызыщагъэхьазырырэ мафэти, а къэунэри гъунэгъугъэти, Исус ихьадэ ащ чӀалъхьажьыгъ.

Currently Selected:

Иуан 19: AdgNT14

Highlight

Copy