Апостолхэм ашӀэгъэ Ӏофхэр 9

ЯБГЪОНЭРЭШЪХЬ

Шаул Исус игъогу зэрэтехьагъэр

(Апостол. 22:6-16; 26:12-18)

1Шаул ИсускӀэ шӀошъхъуныгъэ зиӀэхэм инэу афэгубжэу, «Исус игъогу шъутемыкӀымэ, шъутыукӀыщт» ариӀо зэпытыщтыгъ. Дин пэщэшхом дэжь кӀуи, елъэӀугъ:

2– Дамаск къалэм щыӀэ синэгогухэм тхылъхэр афэтхыхи, къысэтых. Шаул ар зыкӀишӀагъэр Исус игъогу тетхэм ащыщхэр Дамаск къыщигъотхэмэ, хъулъфыгъэхэми бзылъфыгъэхэми, игъусэ лӀыхэм ахэмэ Ӏэхъухэр атыраригъэлъхьанышъ, Ерусалим къыщэнхэр ары. 3Шаул гъогум рыкӀозэ, Дамаск игъунэгъу зэхъум, ошӀэ-дэмышӀэу нэфынэ уашъом къехи, къыуцухьагъ. 4Шаул чӀыгум тефагъэу, макъэ горэм къыриӀоу зэхихыгъ:

– Шаул, Шаул, сыд пае къин сэбгъэщэчырэ?

5– О ухэта, Зиусхьан? – къыӀуагъ Шаул.

– Исусэу къин зэбгъэщэчырэр сэры, – къыӀожьыгъ адрэ макъэм. – Цур зием ибэщ кӀыхьэ папцӀэ цур ылъакъокӀэ къызэрешъутырырэм фэдэу ошӀымэ, уиягъэ зэогъэкӀыжьы. 6Ау къэтэджи, къалэм дахь. О пшӀэн фаер ащ зыгорэм къыщыуиӀощт.

7Шаул игъусэхэм гущыӀэ горэ къамыӀоу, ащ дэжьым щытхэу къэнагъэх. Макъэр зэхахыгъ, ау цӀыф зи алъэгъугъэп. 8Шаул чӀыгум къытетэджыкӀыжьыгъ, ау ынэхэр къызызэтырехыжьхэм, зи ылъэгъужьыгъэп. Арыти, Шаул ыӀэ аӀыгъэу Дамаск дащагъ. 9Шаул мэфищым зи ымылъэгъоу къэнагъ, шхагъэп ыкӀи, ешъуагъэп ыкӀи.

10ИсускӀэ шӀошъхъуныгъэ зиӀэхэм ащыщэу Ананый Дамаск дэсыгъ. Зиусхьаныр ащ къыфэлъагъуи, къеджагъ:

– Ананый!

– Сэры, Зиусхьан, – къыӀожьыгъ Ананый.

11– Тэджи, «Урам ЗэнкӀ» зыфаӀорэ урамым тет Иудэ иунэ кӀо, – къыриӀуагъ Зиусхьаным Ананый. – Ащ дэжьым Шаул ыцӀэу Тарс къалэм щыщым кӀэупчӀ, сыда пӀомэ, ар Тхьэм елъэӀу. 12Ынэхэри къыгъэплъэжьынхэм пае, Ананый зыцӀэ лӀыр ежь дэжь къакӀоу, ыӀэхэр къытырилъхьэхэу къыфэлъэгъуагъ.

13– Зиусхьан, – къыӀожьыгъ Ананый, – мы лӀым уицӀыф лъапӀэхэу Ерусалим дэсхэм къинэу аригъэщэчыгъэхэр зыфэдизыр цӀыфыбэмэ къысаӀуагъ. 14Джы дин пэщэшхохэм фитыныгъэ къаӀихыгъэу, игъусэ лӀыхэм о къыолъэӀурэ цӀыф пстэуми Ӏэхъухэр атыраригъэлъхьанхэм пае, мыщ къэкӀуагъ.

15Ау Зиусхьаным Ананый къыриӀуагъ:

– КӀо! Хымэ лъэпкъхэми, пачъыхьэхэми, израиль цӀыфхэми сэ сцӀэ икъэбар анигъэсынэу мы лӀыр къыхэсхыгъ. 16Сэ сцӀэ пае къинэу ыщэчын фаер зыфэдизыр сэ сшъхьэкӀэ езгъэлъэгъущт.

17Аущтэу Ананый а унэм ихьагъ. ЫӀэхэр Шаул ышъхьэ тырилъхьи, къыӀуагъ:

– Шаул, сэ сшы, мыщ укъакӀо зэхъум, Зиусхьан Исусэу гъогум къыщыпфэлъэгъуагъэм сыкъыгъэкӀуагъ, о унэхэр къэплъэжьынхэм паий, Тхьэм ы Псэ ЛъапӀэ инэу угу илъ хъуным паий.

18Ар къызеӀом, пцэжъые шъомпӀэ цӀыкӀухэм афэдэхэу Шаул ынэхэм зыгорэхэр къакӀэтэкъухи, ынэхэри къэплъэжьыгъэх. ЕтӀанэ Шаул къэтэджи, Ананый ар ыумэхъыгъ. 19Ащ нэужым Шаул шхагъэ, ыкӀуачӀи къыгъотыжьыгъ.

Шаул КъэбарышӀур Дамаск къалэм зэрэщигъэӀущтыгъэр

ЕтӀанэ ИсускӀэ шӀошъхъуныгъэ зиӀэхэу Дамаск къалэм дэсхэм адэжь Шаул мафэ заулэрэ щыӀагъ. 20Исус Тхьэм зэры Къор синэгогухэм ардэдэм ащигъэӀоу ыублагъ. 21Ар зэхэзыхыгъэ цӀыфхэм зэкӀэм агъэшӀагъоу къаӀощтыгъ:

– Мы лӀыр арыба Исус елъэӀурэ цӀыфхэм Ерусалим къин щязгъэщэчыщтыгъэр? ИлӀыхэу Исус елъэӀухэрэм Ӏэхъухэр атыраригъэлъхьанхэшъ, дин пэщэшхохэм адэжь ыщэнхэу мыщ къэкӀуагъэба?

22Ау Шаул нахь лъэкӀ иӀэ хъугъэ. Исус зэрэ Христосыр къыгъэшъыпкъэжьызэ, Дамаск дэс джуртхэм ежь къыраӀожьыщтыр амышӀэу къыгъэнагъэх.

Шаул джуртхэм зэраӀэпыкӀыгъэр

23Мэфэ пчъагъэ зытешӀэ ужым, Шаул аукӀынэу джуртхэм гухэлъ ашӀыгъ, 24ау ахэмэ ягухэлъ Шаул къышӀагъ. Ар аукӀынэу чэщи мафи къэлапчъэмэ аӀутхэу паплъэщтыгъэх. 25Ау шӀошъхъуныгъэ зиӀэхэм чэщым Шаул зыдащи, къэлэ дэпкъым хэт гъуанэ горэмкӀэ мэтэшхом исэу дэпкъым ратӀупщэхыгъ.

ИсускӀэ шӀошъхъуныгъэ зиӀэхэу Ерусалим дэсхэм адэжь Шаул зэрэкӀуагъэр

26Шаул Ерусалим зынэсым, ИсускӀэ шӀошъхъуныгъэ зиӀэхэм ахэхьаным пылъыгъ, ау ащ ИсускӀэ шӀошъхъуныгъэ иӀэ зэрэхъугъэр ашӀошъ мыхъоу щыщынэщтыгъэх. 27Ау Бар-Наббэ#9:27 Бар-Наббэ – еплъ 4:36-37. Шаул зыдищи, апостолхэм адэжь кӀуагъэ. Шаул гъогум Зиусхьаныр зэрэщилъэгъугъэри, Зиусхьаныр Шаул къызэрэдэгущыӀагъэри, Шаул етӀанэ Исус ыцӀэкӀэ къэбарышӀур гушхокӀэ Дамаск зэрэщигъэӀущтыгъэри Бар-Наббэ ахэмэ ариӀотэжьыгъ. 28Аущтэу зэхъум, Шаул ИсускӀэ шӀошъхъуныгъэ зиӀэхэм ахахьэмэ-ахэкӀыжьызэ, ахэмэ адэжь къани, Ерусалим щыӀагъ, Зиусхьаным ыцӀэкӀи цӀыфмэ къэбарышӀур гушхокӀэ аригъэӀущтыгъ. 29АлыджыбзэкӀэ гущыӀэрэ джуртхэм#9:29 АлыджыбзэкӀэ гущыӀэрэ джуртхэр – еплъ 6:1. адэгущыӀэщтыгъ ыкӀи янэкъокъущтыгъ, ау ар къаукӀыным ахэр пылъыгъэх. 30Зэшыхэм ар къызашӀэм, Шаул Кесарие къалэм ращэхи, Тарс къалэм#9:30 Тарс къалэр – Паул а къалэм щыщыгъ. А къалэр Рим къэралыгъошхом щыщэу, Киликие хэкум икъэлэшхуагъ. агъэкӀуагъ.

31Аущтэу зэкӀэ Иудей хэкум, зэкӀэ Галилей хэкум, зэкӀэ Самарие хэкум арыт чылыс зэӀукӀэхэм мамыр яӀэ хъугъэ. ШӀошъхъуныгъэ зиӀэхэм гурэ псэрэкӀэ нахь лъэкӀ агъотызэ, Зиусхьаным шӀолӀыкӀ фыряӀэу, Тхьэм ы Псэ ЛъапӀэ ыгъэгушхохэу, нахьыбэ хъугъэх.

Петрэ Эней зэригъэхъужьыгъэр

32Петрэ хэкур къыкӀухьэ зэхъум, Тхьэм ицӀыф лъапӀэхэу Лиддэ къалэм#9:32 Лиддэ къалэр – Ерусалим километрэ 32-кӀэ пэчыжьэу, итемыр тыгъэ къохьэпӀэ лъэныкъокӀэ ит. Иоппие къалэми километрэ 15-кӀэ пэчыжь. Непэ а къалэм ыцӀэ Лод. дэсхэм адэжь кӀуагъэ. 33Ащ Эней ыцӀэу лӀы горэм щыӀукӀагъ. Илъэсий хъугъэу, ыӀэпкъ-лъэпкъ узым зэкӀиубытагъэу ар пӀэм хэлъыгъ.

34– Эней, – риӀуагъ Петрэ, – Исус Христос уегъэхъужьы. Къэтэджи, уипӀэ Ӏухыжь! Ардэдэм Эней къэтэджыжьыгъ. 35Лиддэ къалэм зэкӀэ дэсхэми Шарон зыцӀэ шъоф зэшъхьэ-зашъом#9:35 Шарон зыцӀэ шъоф зэшъхьэ-зэшъор – Кесарие къалэм щегъэжьагъэу Иоппие къалэм нэс хыӀушъом Ӏутэу зыщеушъомбгъу. ИкӀыхьагъэ километрэ 48-рэ мэхъу. зэкӀэ тесхэми Эней залъэгъум, Зиусхьаным игъогу техьагъэх.

Петрэ Табитэ лӀагъэхэм къызэрахигъэтэджыкӀыжьыгъэр

36Иоппие къалэм#9:36 Иоппие къалэр – Лиддэ къалэм километрэ 15-кӀэ пэчыжьэу, хыӀушъом Ӏут. Непэ «Яфэ» раӀо. Яфэ къалэр Тель-Авив щыщ. ИсускӀэ шӀошъхъуныгъэ зиӀэ бзылъфыгъэ горэ Табитэ ыцӀэу дэсыгъ. Табитэм къикӀырэр Мэз Пчэн. ШӀубэ ышӀэу, сэдакъэхэр ыт зэпытыщтыгъ. 37А мафэхэм ар сымаджэ хъуи, лӀагъэ. Ар агъэпскӀыжьи, унэ зэтетым ишъхьагърэ къатым дахьыий, унэм ралъхьагъ. 38Лиддэ къалэр Иоппие къалэм игъунэгъути, Петрэ ащ зэрэщыӀэр ИсускӀэ шӀошъхъуныгъэ зиӀэхэм зызэхахым, «Зымыгъэгужъоу, тадэжь къакӀо!» Петрэ раӀонэу лӀыкӀуитӀу лъагъэкӀуагъ.

39Петрэ къэтэджи, къадэкӀуагъ. Иоппие къалэм зынэсым, унэ зытетым ишъхьагърэ къатым ращагъ. Шъузабэхэм зэкӀэ Петрэ къауцухьи, Табитэ ягъусэ зэхъум, джанэхэуи щыгъынхэуи ышӀыгъагъэхэр, гъыхэзэ къырагъэлъэгъугъэх.

40Петрэ цӀыфхэр зэкӀэ унэм ригъэкӀыхи, лъэгонджэмышъхьэкӀэ тӀыси, Тхьэм елъэӀугъ. ЕтӀанэ хьадэм зыфигъази, къыӀуагъ:

– Табитэ, къэтэдж! Табитэ ынапӀэхэр къызэтырихи, Петрэ зелъэгъум, къызэшӀотӀысхьагъ. 41Петрэ ащ ыӀэ ыубыти, къыгъэтэджыгъ. ЕтӀанэ Тхьэм ицӀыф лъапӀэхэмрэ шъузабэхэмрэ къяджи, Табитэ псаоу аритыжьыгъ. 42А къэбарыр Иоппие къалэм дэсхэм зэкӀэмэ зэлъашӀэ хъугъэ, цӀыфыбэхэми ЗиусхьанымкӀэ шӀошъхъуныгъэ яӀэ хъугъэ. 43ЕтӀанэ Симон ыцӀэу, шъошӀэ горэм ихьакӀэу Петрэ мэфэ пчъагъэрэ Иоппие къалэм къыдэнагъ.

Currently Selected:

Апостолхэм ашӀэгъэ Ӏофхэр 9: AdgNT14

Highlight

Copy