Апостолхэм ашӀэгъэ Ӏофхэр 7
7
ЯБЛЭНЭРЭШЪХЬ
Стефан Тхьэмэтэ Хэсэшхом ыпашъхьэ къызэрэщыгущыӀагъэр
1ЕтӀанэ дин пэщэшхор Стефан еупчӀыгъ:
– Мы лӀыхэм къаӀохэрэр шъыпкъэха?
2– Тшыхэри, тятэхэри, шъукъэдаӀу! – къыӀожьыгъ Стефан. – Тятэжъышхо Ибрахьимэ Хьаран къалэм дэмытӀысхьэзэ, щытхъушхо зиӀэ Тхьэр Месопотамие хэгъэгум ащ къыщыфэлъэгъуагъ. 3Тхьэм моущтэу къыриӀуагъ#7:3 Тхьэм… къыриӀуагъ – еплъ Пегъымбар Мусэ апэрэ тхылъэу ытхыгъэм (УблапӀэм) 12:1.: «О уихэгъэгуи, уиблагъэхэми ахэкӀи, сэ озгъэлъэгъущт хэгъэгум кӀо!»
4Аущтэу Ибрахьимэ Халдей хэгъэгум икӀи, Хьаран къалэм кӀуи, дэтӀысхьагъ. Ятэ зэлӀэ ужым, мы хэгъэгоу шъо шъузэрысым Тхьэм къыгъэкощи, къэкӀуагъ. 5Мыщ дэжьми Тхьэм Ибрахьимэ мылъку зи къыщыритыгъэп, лъэкъо тегъэуцуапӀэ фэдиз чӀыгум щыщи къыритыгъэп. Ау Ибрахьимэ а мафэхэм сабыий имыӀагъэми, мы хэгъэгур ежьыррэ ежь къытекӀыщтхэмрэ хэгъэгу афэхъунэу Тхьэм къыгъэгугъагъ. 6Ащ ехьылӀагъэу Тхьэм моущтэу къыӀуагъ#7:6-7 Тхьэм… къыӀуагъ – еплъ Пегъыбар Мусэ апэрэ тхылъэу ытхыгъэм (УблапӀэм) 15:13-14.: «О къыптекӀыщтхэр илъэс шъиплӀэ хымэ хэгъэгум щыпсэущтых, цӀыфхэм ахэр агъэпщылӀхэзэ, лыехэри къарахыщтых. 7Ау ахэр зыгъэпщылӀырэ лъэпкъым сэ езгъэпщыныжьыщт. Ащ ыуж о къыптекӀыщтхэр а хэгъэгум къикӀынхэшъ, мы чӀыпӀэм сыщагъэлъэпӀэщт». 8ЕтӀанэ Тхьэм ежьыррэ Ибрахьимэрэ азыфагу зэзэгъыныгъэ зэрэдилъхьагъэм итамыгъэу, Ибрахьимэ сунэтшӀыныр къыфигъэнагъ. ЕтӀанэ Ибрахьимэ Исхьакъ къыфэхъуи, яенэрэ мафэм сунэт ышӀыгъ. Ащ нэужым Исхьакъи къыщи, Якъубэ къыфэхъугъ. Якъуби тэ тятэжъышхоу пшӀыкӀутӀумэ ты афэхъугъ.
9Ау тятэжъышхохэр ежьхэм аш Юсыф ешъугъухэти, пщылӀэу Мысырым ащэнэу лӀы куп горэм ращагъ. Ау Тхьэр Юсыф игъусагъ, 10икъин пстэуми къахищыжьыгъ. Тхьэм Юсыф акъылышӀу къырити, Мысырым ипачъыхьэ, Фырхьауным ынэшӀу къыщыригъэфагъ. Фырхьауным Мысырыми ежь иунэшхуи Юсыф пащэ афишӀыгъ.
11Ащ нэужым гъэблэшхорэ тхьамыкӀэгъэшхорэ зэкӀэ Мысыр хэгъэгуми Ханаан хэгъэгуми къащыхъугъ. Тятэжъышхохэми шхын агъотыщтыгъэп. 12Якъубэ Мысырым гъомлапхъэ щыӀэу зызэхехым, апэу тятэжъхэр#7:12 апэу тятэжъхэр – Якъубэ ыкъохэр ары. ащ ыгъэкӀуагъэх. 13Ахэр Мысырым ятӀонэрэу зэкӀохэм, Юсыф ышхэм зыкъаригъэшӀэжьыгъ. Фырхьаунми Юсыф иунагъо ышӀэу хъугъэ. 14ЕтӀанэ Юсыф ышхэр ыгъакӀохи, ятэу Якъубэ къэбар фаригъэхьыгъ, зэкӀэ иунэкъощхэр, нэбгырэ тӀокӀищырэ пшӀыкӀутфырэ, Мысырым къэкӀонхэу. 15Аущтэу Якъубэ Мысырым кӀуагъэ. Ащ ежьыри тятэжъхэри щылӀагъэх. 16Ахэмэ яхьадэхэр Шехэм къалэм ахьыжьхи, Ибрахьимэ тыжьын ахъщэкӀэ Эмор ыкъохэм къащищэфыгъэ къэунэм чӀалъхьажьыгъэх.
17Тхьэм Ибрахьимэ къызэригъэгугъагъэм игъэшъыпкъэжьыгъо нахь благъэ хъу къэс, тэ тлъэпкъ Мысырым нахьыбэ щыхъущтыгъ, 18нэмыкӀ лӀэу Юсыф зымышӀэщтыгъэр пачъыхьэ хъуным нэсыфэ. 19А пачъыхьэр тицӀыфхэм тхьагъэпцӀыгъэкӀэ адэзекӀощтыгъ, тицӀыфхэм ясабыйхэри ымыгъэпсэунхэм пае, чӀаригъэдзыжьхэзэ, тятэжъхэм лые арихыщтыгъ.
20А мафэхэм пегъымбар Мусэ къэхъугъ, Тхьэм дэжькӀи сабый дэхагъ. Мэзищэ ятэ иунэ щаӀыгъыгъ, етӀанэ губгъом къыранагъ. 21Губгъом къыранагъэр фырхьауным ыпхъу ыхьи, ыкъом фэдэу ыпӀугъ. 22Аущтэу мысыр цӀыфхэм акъылышӀуагъэу ахэлъ пстэури Мусэ рагъэшӀагъ, Муси игущыӀэхэмкӀи ышӀэгъэ ӀофхэмкӀи лъэкӀ зиӀэ лӀы хъугъэ.
23Мусэ ыныбжь илъэс тӀокӀитӀум зынэсым, ышхэу израиль цӀыфхэр зэригъэлъэгъунхэу рихъухьагъ. 24Мысыр лӀы горэм израиль лӀыхэм ащыщэу зыгорэм лые рихэу зелъэгъум, ӀэпыӀэгъу фэхъуи, лые къезыхырэм ышӀэгъэ Ӏофым ипэгъокӀ ригъэгъотызэ, ыукӀыгъ. 25Мусэ ышхэм зэхашӀыкӀын шӀошӀыгъ Тхьэм ежь ахэр къиным къызэрэхыригъэщыжьыщтхэр, ау ахэмэ зэхашӀыкӀыгъэп. 26ЯтӀонэрэ мафэм ышхэм ащыщхэу нэбгыритӀу зэзаохэу Мусэ зелъэгъум, зэригъэшӀужьынхэм пае ариӀуагъ: «Шъо, лӀитӀум, шъузэкъош, сыд пае лые зэшъухыра?»
27Ау ыш лые езыхырэр Мусэ еӀункӀи, риӀуагъ: «Хэта о тхьэматэ укъытфэхъунэуи хьыкум къыттепшӀыхьанэуи укъэзгъэлъэгъуагъэр? 28Тыгъуасэ мысыр лӀыр зэрэуукӀыгъэм фэдэу сыуукӀынэу уфая?» 29А гущыӀэхэр Мусэ зызэхехым, хэхьажьи, Мадиам хэгъэгум кӀуи, итӀысхьагъ. Ащ къуитӀу къыщыфэхъугъ.
30Илъэс тӀокӀитӀу зытешӀэм, Синай къушъхьэм дэжь шъоф нэкӀым пэнэ куандэу машӀо зыхэнагъэм#7:30-34 пэнэ куандэу машӀо зыхэнагъэр – еплъ Пегъымбар Мусэ ятӀонэрэ тхылъэу ытхыгъэм 3:1-10. хэтэу, мэлэӀич горэ Мусэ къыщыфэлъэгъуагъ. 31Мусэ ар зелъэгъум, ыгъэшӀэгъуагъ. Нахь тэрэзэу еплъынэу зекӀуалӀэм, Зиусхьаным ымакъэ къэӀугъ: 32«Уятэжъышхохэм я Тхьэу, Ибрахьимэ, Исхьакъ, Якъубэ я Тхьэр сэры». Мусэ къэкӀэзэзи, Ӏуплъэнэу тегушхуагъэп.
33ЕтӀанэ Зиусхьаным къыриӀуагъ: «О уицуакъэхэр зыщых, сыда пӀомэ, уздэщытыр чӀыпӀэ лъапӀэшъ ары. 34Сэ слъэпкъ гузэжъогъу Мысырым зэрэщыхэтыр слъэгъугъэ, ящэӀу макъэхэри зэхэсхыгъэ. Ахэр къиным къыхэсщыжьынхэу сыкъехыгъ. КӀо, о Мысырым узгъэкӀожьыщт».
35(ЕтӀанэ Стефан ипсалъэ джыри къыпидзэжьыгъ:) – Ахэмэ амыдэу, «хэта о тхьэматэ укъытфэхъунэуи хьыкум къыттепшӀыхьанэуи укъэзгъэлъэгъуагъэр?» зыфаӀогъэгъэ Мусэр ары. А Мусэ дэдэр ары ахэмэ тхьэматэ афэхъунэуи шъхьафит ышӀынхэуи Тхьэм къыгъэкӀуагъэр, мэлэӀичэу пэнэ куандэм хэтэу къыфэлъэгъуагъэм иӀэпыӀэгъукӀэ. 36Муси ары израиль цӀыфхэр Мысырым къизыщыжьыгъэр, Мысырыми, Хы Плъыжьми, илъэс тӀокӀитӀо шъоф нэкӀыми Ӏофышхо гъэшӀэгъонхэр ащызышӀагъэр, нэшэнэ гъэшӀэгъонхэри къащызгъэлъэгъуагъэр. 37А Мусэр ары израиль цӀыфхэм языӀуагъэри: «Шъушыхэм ащыщэу сэ сфэдэу пегъымбар Зиусхьанэу Тхьэм къышъуфигъэкӀощт». 38Мусэр ары тятэжъхэу шъоф нэкӀым щызэрэугъоигъэхэм ахэтыгъэр. Мусэ мэлэӀичэу Синай къушъхьэм къыщыдэгущыӀагъэм игъусагъ, мыкӀодыжьын гущыӀэхэри тэ къытфигъэнэжьынхэу къыӀэкӀэхьагъэх.
39Ау тятэжъхэр Мусэ едэӀунхэу фаещтыгъэхэп. Мусэ зэрамыпэсэу агухэмкӀэ Мысырым зыфагъэзагъ. 40Ахэмэ Хьарунэ раӀуагъ#7:40 ахэмэ… раӀуагъ – еплъ Пегъымбар Мусэ ятӀонэрэ тхылъэу ытхыгъэм 32:1,23.: «Тапэ итхэу ахьынхэу тхьэ сурэтхэр тфэшӀых! Мысырым тыкъизыщыжьыгъэ Мусэ къехъулӀагъэр тшӀэрэп». 41А мафэхэм шкӀэ теплъэ иӀэу тхьэ нэпцӀ ашӀи, къурмэн ащ фашӀыгъ. Ахэмэ ежьхэм аӀэкӀэ ашӀыгъэ тхьэ нэпцӀым щыгушӀукӀхэу, ешхэ-ешъошхо ашӀыгъ. 42Ау Тхьэм ыкӀыб ахэмэ къафигъази, ахэмэ уашъом ипкъыгъохэм тхьэ пӀалъэу ялъэӀунхэу къыгъэнагъэх, пегъымбархэм ятхылъ зэритым фэдэу#7:42-43 пегъымбархэм ятхылъ зэритым фэдэу – еплъ Пегъымбар Амос тхылъэу ытхыгъэм 5:25-27.: «Шъо, израиль цӀыфхэр, илъэс тӀокӀитӀо шъоф нэкӀым шъузетым, къурмэныпхъэу шӀошъубзыщтыгъэр сэра къызфэшъушӀыщтыгъэр?
43Хьау, къурмэн зыфэшъушӀыщтыгъэр сэрэп, ау къэшъухьыщтыгъэр шъуитхьэ нэпцӀэу Молох#7:43 Молох – Аммон лъэпкъым итхьэ нэпцӀ арыгъэ. Аммон лъэпкъыр Иордан псыхъом итыгъэ къокӀыпӀэ лъэныкъомкӀэ щыпсэущтыгъэ. зыцӀэм итхьэлъэӀупӀэ щэтыр, шъуитхьэ нэпцӀэу Ремфан#7:43 Ремфан – пэсэрэ тхьэ нэпцӀхэм ащыщэу, ошъо пкъыгъоу Сатурн зыцӀэм итхьэу алъытэщтыгъэр ары. ижъуагъу, сурэтхэри ары. Мыхэр арых шъуялъэӀунхэу тхьэ нэпцӀхэу шъушӀыгъэхэр. Арышъ, къэлэшхоу Бабилэн нахьи нахь чыжьэу шъуипыйхэм шъуязгъэщэщт».
44– Тятэжъхэм шыхьатныгъэм итхьэлъэӀупӀэу чэтэнгъэӀагъэр#7:44 шыхьатныгъэм итхьэлъэӀупӀэу чэтэнгъэӀагъэр – израиль цӀыфхэм шъоф нэкӀым къыщакӀухьэ зэхъум, Тхьэм иунэ фэдэу зы чэтэнгъэӀагъэ зыдахьыщтыгъ. А чэтэнгъэӀагъэр Тхьэр зэрягъусэмкӀэ шыхьат къафэхъущтыгъ. Еплъ Пегъымбар Мусэ ятӀонэрэ тхылъэу ытхыгъэм 36:8-38. шъоф нэкӀым щыряӀагъ. А чэтэнгъэӀагъэр Тхьэм Мусэ унашъо къызэрэфишӀыгъагъэм фэдэу ашӀыгъагъ, чэтэнгъэӀагъэм ишапхъэу Мусэ ылъэгъугъагъэм тетэу. 45Ащ ыужым тэ тятэжъхэм а чэтэнгъэӀагъэр къакӀэныгъэу, къыздахьыгъ. Тхьэм ахэмэ апашъхьэ хымэ лъэпкъхэр къырифыхэзэ, Нун ыкъо Ехьошуа тятэжъхэм япащэу а лъэпкъхэм яхэгъэгу къызатырахым, а чэтэнгъэӀагъэр къыздахьыгъ. ЕтӀанэ пачъыхьэ Даутэ имафэхэм анэсыфэ, чэтэнгъэӀагъэр а хэгъэгум къинагъ. 46Тхьэм ынэшӀу къызщифэгъэ Даутэ Тхьэм елъэӀугъ: «О Якъубэ ури Тхь, унэшхо къыпфэсшӀынэу фит сыкъэшӀ». 47Ау пачъыхьэ Сэлмэн ары Тхьэм унэшхор фэзышӀыгъэр.
48АрышъхьэкӀэ Анахь Лъагэр цӀыфхэм аӀэкӀэ ашӀыгъэ унэхэм арысэп. Зиусхьаным къызэриӀорэр пегъымбарым итхылъ зэритым фэд#7:48-50 пегъымбарым итхылъ зэритым фэд – еплъ Пегъымбар Ешайа тхылъэу ытхыгъэм 66:1-2.:
49«Уашъор ары сипачъыхьэ тӀысыпӀэ,
чӀылъэри ары силъэгукӀэтыныр.
Сыд фэдэ уна къысфэшъушӀыщтыр?
Тыдэ щыӀа зызщызгъэпсэфыщт чӀыпӀэр?
50Мыхэр зэкӀэ къэзгъэшӀыгъэр сэрыба?»
51– Шъо, цӀыф къаигъэхэр! ШъугухэмкӀи шъутхьакӀумэхэмкӀи Тхьэр зымышӀэрэ цӀыфхэм шъуафэд. Шъо шъуятэжъхэм шъуафэдэу, Тхьэм ы Псэ ЛъапӀэ шъупэуцу зэпыт. 52Шъуятэжъхэм къин зэрамыгъэщэчыгъэ пегъымбар горэ щыӀагъа? Шъыпкъагъэ ЗиӀэр дунаим къызэрэтехьащтымкӀэ макъэ къэзгъэӀугъэхэри аукӀыгъэх. Шъори тетыгъо зиӀэхэм ар аӀэкӀэжъугъахьи, яжъугъэукӀыгъ. 53МэлэӀичхэм Тэурат хабзэр къызыӀэкӀалъхьагъэр шъоры, ау щытми Тэурат хабзэм итхэр жъугъэцакӀэхэрэп.
Стефан мыжъокӀэ еохэзэ зэраукӀыгъэр
54Тхьэмэтэ Хэсэшхом хэтхэм Стефан къыӀорэр зызэхахым, къызэкӀэплъыхьагъэхэу, ацэхэр зэрагъэшхыщтыгъэх. 55Ау Тхьэм ы Псэ ЛъапӀэ Стефан ыгу инэу илъ хъуи, уашъом дэплъыий, Тхьэм ищытхъушхуи Исус Тхьэм иджабгъукӀэ готэуи ылъэгъугъ.
56– Шъуеплъ, – къыӀуагъ Стефан, – уашъохэр зэӀухыгъэхэу, ЦӀыф Лъэпкъым ы Къо Тхьэм иджабгъукӀэ готэу сэлъэгъу.
57Джащыгъум ахэмэ атхьакӀумэхэр акудэхи, мэкъэшхокӀэ куохэзэ тезэрэгъэбэнагъэх. 58ЕтӀанэ Стефан къалэм далъэшъуи, мыжъокӀэ еохэзэ, аукӀэу аублагъ. Шыхьатхэм ящыгъынхэр Шаул#7:58 Шаул – апостол Паул ыцӀэ джуртыбзэкӀэ Шаул аӀо. зыцӀэу кӀалэ горэм ылъакъохэм адэжь щагъэтӀылъыгъэх.
59АукӀынэу мыжъохэмкӀэ еохэ зэхъум, Стефан лъэӀуагъэ:
– Зиусхьан Исус, спсэ хэх!
60ЕтӀанэ лъэгонджэмышъхьэкӀэ тӀыси, лъэшэу мэкъэшхокӀэ къэкууи, къыӀуагъ:
– Зиусхьан, мы псэкӀодыр мы цӀыфхэм апшъэ имылъхь! Ар къыӀуи, ыпсэ хэкӀыгъ.
Currently Selected:
Апостолхэм ашӀэгъэ Ӏофхэр 7: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
