Апостолхэм ашӀэгъэ Ӏофхэр 21

ЯТӀОКӀЫРЭ ЗЫНЭРЭШЪХЬ

Паул Ерусалим зэрэкӀуагъэр

1Ахэмэ тыкъызахэкӀыжьым, къухьэмкӀэ тежьи, занкӀэу Кос къалэм тыкӀуагъ. ЯтӀонэрэ мафэм Родос къалэм тыкӀуи, ащ тыщежьи, Патарэ къалэм тынэсыгъ. 2Финикие хэкум кӀорэ къухьэ горэ къэдгъоти, титӀысхьи, тежьагъ. 3Кипр хыгъэхъунэр къызэлъагъом, къухьэм исэмэгубгъукӀэ ар къэдгъанэзэ, Сирие хэкум тыкӀуи, Тир къалэм къухьэр щеуцолӀагъ, сыда пӀомэ, а къалэм къухьэр щаунэкӀын фэягъ. 4ИсускӀэ шӀошъхъуныгъэ зиӀэхэр а къалэм къыщыдгъотхи, мэфиблэ ахэмэ адэжь тыкъэнагъ. Тхьэм ы Псэ ЛъапӀэ ахэмэ зэхаригъэшӀыкӀыгъэу, Ерусалим мыкӀонэу Паул къыраӀуагъ. 5Ау а къалэм тызэрэщыӀэн фэе уахътэр зытешӀэм, ащ тыдэкӀи, тигъогу тытехьажьыгъ. ШӀошъхъуныгъэ зиӀэхэр зэкӀэ, бзылъфыгъэхэри сабыйхэри ягъусэхэу, къалэм къыддыдэкӀыгъэх. ЕтӀанэ хыӀушъом лъэгонджэмышъхьэкӀэ тыщытӀыси, Тхьэм телъэӀугъ. 6ТӀапэхэр зэрэдгъэубытыжьхи, тэ къухьэм титӀысхьажьыгъ, адрэхэми ядэжь агъэзэжьыгъ.

7ЕтӀанэ Тир къалэм тыщежьи, къухьэкӀэ тикӀон тыухи, Птолемаидэ къалэм тынэсыгъ. А чӀыпӀэм тшыхэм шӀуфэс щятхи, зы мафэ адэжь тыщыӀагъ. 8ЯтӀонэрэ мафэм ащ тыдэкӀыжьи, Кесарие къалэм тыкӀуагъ. Тхьэм игущыӀэхэр зыгъэӀурэ Филипп иунэ тихьи, ащ тыкъинагъ. Ар нэбгыриблым#21:8 нэбгыриблыр – еплъ 6:1-6. ащыщыгъ. 9Филипп дэмыкӀуагъэхэу пхъуиплӀ иӀагъ. Тхьэм игущыӀэхэр ахэмэ агухэм къарилъхьагъэхэу къаригъаӀощтыгъэх.

10Мэфэ заулэрэ ащ дэжь тыщыӀагъэу, Агаб#21:10 Агаб – еплъ 11:28. зыцӀэ пегъымбар горэ Иудей хэкум къикӀи, къэкӀуагъ. 11Тадэжь къакӀуи, Паул ибгырыпх къышти, ежь ыӀэхэри ылъакъохэри зэтырипхэхи, къыӀуагъ:

– Тхьэм ы Псэ ЛъапӀэ моущтэу къеӀо: «Джуртхэм мы бгырыпхыр зиер Ерусалим щызэкӀоцӀапхэнышъ, хымэ лъэпкъхэм#21:11 хымэ лъэпкъхэр – мыщ дэжьым ащ къикӀырэр рим цӀыфхэу тетыгъо зиӀэхэр ары. аӀэкӀалъхьащт».

12А гущыӀэхэр зызэхэтэххэм, тэри а чӀыпӀэм щыпсэурэ тшыхэри Ерусалим мыкӀонэу Паул телъэӀугъ. 13Джащыгъум Паул пэгъокӀ гущыӀэ къытыжьыгъ:

– Сыда шъушӀэрэр? Сыда шъузкӀэгъырэр? Сыда сыгу къызкӀежъугъаорэр? Си Зиусхьан Исус ыцӀэ пае Ерусалим сыщырапхыщт закъоп, ары пакъошъ сыщылӀэщтми сыфэхьазыр.

14Паул къедгъэзэгъын зытэмылъэкӀым, «Тхьэм ыӀуагъэр орэхъу» тӀуи, щыдгъэтыжьыгъ.

15А мафэхэм ауж зыдгъэхьазыри, Ерусалим тыкӀуагъ. 16Кесарием щыщхэу, ИсускӀэ шӀошъхъуныгъэ зиӀэ нэбгырэ заулэ тигъусагъ. Ахэмэ Мнасон зыцӀэм иунэу тызыщыпсэущтым тащагъ. Мнасон Кипр хыгъэхъунэм щыщыгъ, ежьыри апэ дэдэу ИсускӀэ шӀошъхъуныгъэ зиӀэ хъугъэхэм ащыщыгъ.

Якъубэ дэжь Паул зэрэкӀуагъэр

17Ерусалим тызынэсым, тшыхэм ягуапэу тырагъэблэгъагъ. 18ЯтӀонэрэ мафэм Паул тигъусэу Якъубэ#21:18 Якъубэ – еплъ 12:17. дэжь тыкӀуагъ. Нахьыжъхэр зэкӀэ ащ дэжь щыӀагъэх. 19Паул ахэмэ шӀуфэс арихи, иӀофкӀэ Тхьэм хымэ лъэпкъхэм адэжь щишӀагъэхэр зырызэу афиӀотэжьыгъ.

20Паул ахэр къыӀуатэхэу зызэхахым, ахэмэ Тхьэм щытхъу фашӀыгъ. ЕтӀанэ Паул къыраӀуагъ:

– О тшы, джуртхэм ащыщхэу мин пчъагъэхэм шӀошъхъуныгъэ яӀэ зэрэхъугъэри, Мусэ и Тэурат хабзэ яшъыпкъэу зэрэпылъхэри олъэгъу. 21Ясабыйхэр сунэт амышӀынхэуи яхабзэхэм атемытынхэуи пӀоу, джуртхэу хымэ лъэпкъхэм ахэсхэри зэкӀэ пегъымбар Мусэ игъогу текӀынхэу о ябгъашӀэу аӀозэ, цӀыфхэм зэрахьэрэ къэбар пхэнджыр а шӀошъхъуныгъэ зиӀэхэм зэхахыгъ. 22Сыда тшӀэщтыр? ЦӀыфхэр къэзэрэугъоищтых; сыда пӀомэ, о укъызэрэкӀуагъэр зэхахыщт. 23Арышъ, тэ къызэрэуатӀорэм фэдэу зекӀо. ТхьарыӀо зышӀыгъэ нэбгыриплӀ тиӀ. 24Ахэр зыдащэхи, урягъусэу Тэурат хабзэм иунашъо тетэу зыгъэкъэбзэжьи, ашъхьэхэр ябгъэупсынхэм пае#21:24 ашъхьэхэр ябгъэупсынхэм пае – еплъ 18:18. ахъщэ ят. Ар залъэгъукӀэ, о къыохьылӀагъэу зэхахыгъэ къэбархэр зэрэмышъыпкъэхэри, ор-орэуи Тэурат хабзэм утетэу, ащ итхэр зэрэбгъэцакӀэхэри цӀыф пстэуми ашӀэщт. 25Ау хымэ лъэпкъхэм ащыщхэу ИсускӀэ шӀошъхъуныгъэ зиӀэ хъугъэхэм тэ зэдэтштэгъэ Ӏофыр тхылъкӀэ#21:25 тхылъкӀэ – еплъ 15:23-29. зэрядгъэшӀагъэм фэдэу, цӀыфхэм тхьэ нэпцӀхэм афашӀыгъэ къурмэным ыл, лъым, атхьалэгъэ псэушъхьэхэм ал, зинэ шӀэным защадзыен фае.

26ЯтӀонэрэ мафэм Паул а лӀыхэр зыдищэхи, ахэр игъусэу зигъэкъэбзэжьыгъ. ЕтӀанэ Тхьэм иунэшхо чӀахьи, ежьыррэ а лӀыхэмрэ зызыщагъэкъэбзэжьырэ мафэхэр заухыщтри, якъурмэн зырыз дин пащэм зырагъэшӀыщт мафэри дин пащэхэм ариӀуагъ.

Тхьэм иунэшхо джуртхэр Паул зэрэщытебэнагъэхэр

27А мэфиблыр зыщыблэкӀыным, Асие хэкум щыщ джурт заулэмэ Тхьэм иунэшхо Паул щалъэгъугъ. ЦӀыф купышхор зэкӀэ зэкӀагъэплъыхьи, Паул аубыти, 28моущтэу кууагъэх:

– Шъо, израиль лӀыхэр, шъукъыддэӀэпыӀ! Тэ тлъэпкъми, ти Тэурат хабзэми, мы чӀыпӀэ лъапӀэми къапэуцунхэу тыдэкӀи цӀыфхэм зэкӀэ щязыгъашӀэрэ лӀыр мыры. Ащ нэмыкӀэу алыджхэри Тхьэм иунэшхо чӀигъахьэхэзэ#21:28 алыджхэр Тхьэм иунэшхо чӀигъахьэхэзэ – хымэ горэ Тхьэм иунэшхо чӀэт хымэхэм ящагу блэзыщэу, Тхьэм иунэшхо ыкӀоцӀ изыщагъэр аукӀын фэягъ., мы чӀыпӀэ лъапӀэр ыуцӀэпӀыгъ.

29Аущтэу зыкӀаӀуагъэр ыпэкӀэ Ефес къалэм щыщ Трофим Паул игъусэу къалэм щалъэгъугъагъэти ары. Паул ар чӀэмыхьапхъэу Тхьэм иунэшхо чӀигъэхьагъэу ашӀошӀыгъ.

30Къалэм дэс цӀыфхэр зэкӀэ къэзэрэгъэбырсырыгъэх, зэхэлъэдагъэх. Паул аубыти, Тхьэм иунэшхо къычӀащыжьыгъ. Ардэдэми пчъэхэр агъэпытагъэх. 31Паул аукӀынэу зыпэхьэхэм, Ерусалим зэкӀэ зэрэщызэӀыхьагъэм икъэбар рим дзэ пэщэшхом нэсыгъ. 32Дзэ пэщэшхом ардэдэм дзэлӀхэри, дзэ пащэхэри зыдищэхи, цӀыфхэм ахэлъэдагъ. ЦӀыфхэм дзэ пэщэшхори дзэлӀхэри залъэгъухэм, Паул еонхэм ыуж икӀыжьыгъэх.

33Джащыгъум дзэ пэщэшхор къыӀухьи, Паул дзэлӀхэм аригъэубыти, гъучӀ ӀэхъуитӀу тыралъхьанэу унашъо афишӀыгъ. ЕтӀанэ яупчӀыгъ:

– Мыр хэта? Сыда ышӀагъэр?

34ЦӀыф купышхом хэтхэм ащыщэу зым зыр, адрэм нэмыкӀ аӀозэ зэрэгъэкуощтыгъэх. Бырсырышхом къыхэкӀыкӀэ дзэ пэщэшхом шъыпкъэр зэригъэшӀэн ылъэкӀыгъэпти, Паул пытапӀэм#21:34 пытапӀэр – Антоние зыцӀэ пытапӀэр ары. Рим дзэр ащ дэсыгъ. дзэлӀхэм аригъэщагъ. 35ДэкӀояпӀэм Паул зынэсым, цӀыф купышхор къызэрэтебэнагъэхэм пае, дзэлӀхэм ар ӀэкӀэ ахьын фаеу хъугъэ. 36ЦӀыф купышхом хэтхэу Паул къыкӀэлъыкӀощтыгъэхэр куощтыгъэх:

– УкӀы ар!

Паул цӀыф купышхом ыпашъхьэ къызэрэщыгущыӀагъэр

37ДзэлӀхэм Паул пытапӀэм ащэн фае зэхъум, дзэ пэщэшхом риӀуагъ:

– Зыгорэ къыосӀонэу фит сыкъэпшӀына?

– Алыджыбзэ ошӀа? – къыӀожьыгъ ащ. 38– Мысырым щыщэу, бэмышӀэу цӀыфхэм зыкъязгъэӀэтыгъэу, укӀэкӀо миниплӀ#21:38 хъункӀэкӀо миниплӀ – апсэ емыблэжьхэу яхэгъэгу фэлажьэхэу, а хъункӀэкӀо миниплӀым Рим къэралыгъошхом щыщхэу хэгъэгур ашӀозыубытыгъэхэм къызэратырахыжьыным ыуж итыгъэх. Джурт тхэкӀо Юсеф зэритхыгъэм фэдэу, Исус къызэхъу нэуж я 54-рэ илъэсым а цӀыфхэу яхэгъэгу фэлажьэхэрэм адрэ джуртхэм зыкъарагъэӀэтыгъ. шъоф нэкӀым изыщагъэр орыба?

39– Сэ сыджурт, – къыӀожьыгъ Паул, – Киликие хэкум щыщэу, лъытэныгъэ зиӀэ Тарс къалэм ицӀыфхэм сащыщ. ЦӀыфмэ апашъхьэ сыкъыщыгущыӀэнэу фит сыкъэшӀ, сыолъэӀу.

40Дзэ пэщэшхом фит къызешӀым, Паул дэкӀояпӀэм теуцуи, ыӀэ цӀыфхэм афиӀэтыгъ. ЗэкӀэри къызэӀасэхэм, Паул джуртыбзэкӀэ моущтэу къыӀуагъ:

Currently Selected:

Апостолхэм ашӀэгъэ Ӏофхэр 21: AdgNT14

Highlight

Copy