Mk 8

Cɑɑmi Ji Gɑ Álïp Ángwen yi Yëso

(Mt 15.32-39)

1Kì yethi cyɑ̈nggɑni, keny-ɑ ɑ́døøg ji mø ngenyø ki cugø, kɑ ge ójɑ̈ddø ki gïn cɑm yi gen, ɑcwøle jøbɑnge yïe, kɑ gï köbbe kinni, 2“Nyingi tyëngɑni ocɑnø kì yïɑ; ge lug-ɑ́ɑ̀ bɑngɑ ki cyɑ̈ng ɑ́dɑ̈g ɑnɑn, e bong gïn cɑm yi gen. 3De keløg ge örɑ’ myërri gen ki kɑ̈j, ge bɑ møg dhɑ̈ɑ̈r kì kö yöö, mɑ́ kwï gen kɑ̈ɑ̈l-ɑ kun lɑ̈wi.”

4Kɑ møge løøg yi jøbɑnge kinni, “Tyëngɑni ócuggi thödhø ki gïncɑm kidï kì yij pɑ̈l ni men?”

5Kɑ gï pyëje kinni, “Á ópùn ɑ́dï ɑ yï wun?”

Alöggi gen kinni, “Ópùn ɑ́bïryew?”

6Kɑ teenɑni köbbe kinni pëggi gen piny. Kɑ ópùnɑni gɑ ɑ́bïryew kwɑnye. Keny-ɑ ɑ́rume pwøji Jwøk, ɑpødde gïn, kɑ gï mëgge jøbɑnge, o gï pɑ̈ngi gen kì bøli teedø, kɑ gï pɑ̈ngi gen. 7O yï gen ɑ́dɑ nywøli rij mø nøg thyew. Kɑ ge kwëng yi Yëso thyew, ɑköbbe jøbɑnge kinni pɑ̈ngi ge gïn kì kelli teedø thyew. 8Acyɑ̈ɑ̈m teedø, kɑ ge oyɑ̈ngø. Kɑ nyingi gïncɑm møg-ɑ ɑ́döng gwen, kɑ ge kedh-ɑ yethi dhöng ɑ́bïryew. 9Teedø ɑ́cyɑ̈ɑ̈m kɑ ge oyɑ̈ngø. Kwɑnni tyëng-ɑ ɑ́cyɑ̈ɑ̈m bɑ ɑ́lïp ɑ́ngwen. 10Kɑ gï köbbe kinni kedh gen. Kɑ kɑdh-ɑ yij morkɑb kì bøli kenyɑni ceth, geki jøbɑnge, kɑ ge kedh-ɑ myërri Dɑlmɑnuthɑ̀.

Cwöddi Jøpɑresì ki Ngïji

(Mt 12.38-42; 16.1-4)

11 # Mt 12.38; Lk 11.16 Kwï Jøpɑresì ɑ́bï, ɑcɑ̈gi gen ki pëmø ki en, ge yɑb-ɑ ngïji kì yïe me nyodh kinni kɑ̈ɑ̈l-ɑ yï Jwøk, ge rɑng-ɑ gøn. 12#Mt 12.39; Lk 11.29 Agɑ̈y Yëso, kɑ okööbø kinni, “Ede rïny, ɑ yɑ̈ɑ̈be ki ngïji? Yɑ köbb-ɑ wun kidyër kinni, bong ngïji me mëggi rïny!”

13Awiye gïn, kɑ kɑdh-ɑ yij morkɑb, ɑdøøge løøgø.

Kɑmïrɑ̀ Mi Jøpɑresì kí Kɑmïrɑ̀ Mi Ërödøs

(Mt 16.5-12)

14Jøbɑng Yëso wɑ̈thi gen wïlø ki ópùn, dɑ́ ópun ɑ́kyel kete ɑ yï gen kì yij morkɑb. 15#Lk 12.1 Kɑ nyingi gïn ceme kinni, “Nëën wun, kɑ ri wun kor wun kipe kɑmïrɑ̀ mi Jøpɑresì kí kɑmïrɑ̀ mi Ërödøs.”

16Kɑ ri gen pyënyi gen kinni, “Bɑ kɑ̀ bëëd e bong ópùn kì yïee ɑ pere kööbe kinøw?”

17Kɑ møg-ɑ kømmi yi gen yod yi Yëso, ɑpyëje gïn kinni, “Wude ɑ kømmi wun kwøbbi bëëdi ópùn ge bogïn kì yï wun? Wu nudd wu pɑ ngïji, wɑlɑ̀ wu pɑ lïngø kidøøj? Yethi wun teeg kinnï? 18#Jer 5.21; Idhki 12.2; Mk 4.12 Yï wun dɑ nying, de wude ɑ pɑ nëën wun? O yï wun dɑ yïthh, de wude ɑ pɑ lïng wun? Wɑ̈thi wun pɑ nyi pɑ̈ddi? 19Keny-ɑ ɑ́pøddɑ ópùn ɑ́bïj, ge mëggɑ’ ji ɑ́lïp ɑ́bïj, ɑ́ dhöng ɑ́dï ɑ ɑ́gwen yi wun?”

Kɑ ge ólöggø kinni, “Pyɑ̈rø wïdɑ́ryew.”

20Apëjje kinni, “O keny-ɑ ɑ́pøddɑ ópùn ɑ́bïryew, ge mëggɑ’ ji ɑ́lïp ɑ́ngwen, ɑ́ dhöng ɑ́dï ɑ ɑ́gwen yi wun?”

Kɑ ge ólöggø kinni, “Dhöng ɑ́bïryew.”

21Kɑ gï pyëje kinni, “Møgɑni nuti gɑmø yi wɑ̈thi wun?”

Yieli Jɑl Mɑ́ Cwør yi Yëso kì Betsɑidɑ̀

22Kɑ ge wɑ̈dh-ɑ Betsɑidɑ̀. Kɑ jɑl mɑ cwør kɑ̈ɑ̈l yïe yi ji møøgø. Kɑ Yëso kwɑjji gen kinni nywɑle gøn. 23Kɑ jɑl-ɑ bɑ cwør mɑge kì cinge, kɑ gø peeje ngɑ̈ɑ̈j pɑc. Kɑ ngudd-ɑ nyinge ki lɑ́ɑ̀w, ɑthɑɑnye cingge kömi jɑlɑni, kɑ gø pyëje kinni, “Dɑ gïjø me nenni yi yïn?”

24Kɑ jɑlɑni lïïdh-ɑ mɑl, ɑkööbe kinni, “Ji nennɑ ge nɑ yenh kɑ̀ cyɑ̈dhi gen.”

25Acige cingge thɑɑny kömi nyinge. Kɑ jɑlɑni nyinge gwiire piny, kɑ jɑmmì bënn yïëy-ɑ nennø yi en kidøøj. 26Kɑ gø köbbe kinni, “Kedh kɑ yï pödhí gølí, yï ko töngi dïpɑc, kɑ ko di ngɑn köbbi yi yïn.”

Møg-ɑ Ákwøb yi Pïtør kì ri Yëso

(Mt 16.13-20; Lk 9.18-21)

27Kɑ Yëso pödh-ɑ myërri Kɑysɑriyɑ̀ Pïlïpì geki jøbɑnge. Kɑ jøbɑnge pyëje kì kö yöö kinni, “Ji okööbø i yɑ bɑ men?”

28 # Mk 6.14-15; Lk 9.7-8 Kɑ ge ólöggø kinni, “Kwï ji okööbø i yï bɑ Jøn Jɑljwɑ̈g. O ji møøgø okööbø i yï bɑ Eliyɑ̀. O ji møøgø okööbø i yï bɑ ɑ́kyel kì kelli jøtöng.”

29 # Jn 6.68-69 Kɑ gï pyëje kinni, “O wun ø, wu okööbø kinni yɑ bɑ men?”

Kɑ møge løøg yi Pïtør kinni, “Yï bɑ Mesiy.”

30Kɑ ge kyëddi yi Yëso kinni, ko di ngɑn köbbi yi gen pere.

Kwøbbi Yëso kì ri Orɑnge kí Thøwe

(Mt 16.21-28; Lk 9.22-27)

31Kɑ ócɑ̈gø pwönyi gen kinni, “Nyɑɑr Dhɑnhø órɑngi yi gïg ngenyø. O óbɑny yi jøgdøngø, kí jɑggi ókwër, kí jøpwönyi Cigg, o ónɑ̈g. De ódhwödh kì yij thøø kì bɑng cyɑ̈ng ɑ́dɑ̈g.” 32De møgɑni ɑ́kømmi yi en gɑ dyër. Apeej Yëso wɑ̈ye yi Pïtør, kɑ ócɑ̈gø kyëddii. 33Kɑ Yëso ree løge, kɑ nenn-ɑ yï jøbɑnge, ɑcyɑ̈re Pïtør kinni, “Døøg ngɑ̈jɑ, yïn ɑ Cethɑn! Yï rømm-ɑ rummi dhɑnhø, de pɑth ki rummi Jwøk.”

34 # Mt 10.38; Lk 14.27 Kɑ teedø cwøøle yïe bënn kí jøbɑnge. Kɑ gï köbbe kinni, “Ke di ngɑn dwɑddi bëën bɑngɑ, wedde pyëwe, kɑ yɑdh ɑrïwe byele, kɑ luge bɑngɑ. 35#Mt 10.39; Lk 17.33; Jn 12.25 Mɑ́ ngɑn dwɑddi kori wëye, wëye ólɑ̈ɑ̈nye. O ngɑn-ɑ ólɑ̈ɑ̈ny wëye kiperɑ geki per wöndøj, wëye óyiele. 36Á ngø ɑ óyod yi dhɑnhø e døj kipere, keløg piny bëne oyodø yi en, kɑ wëye lɑ̈ɑ̈nye? 37Dhɑnhø wëye ócuggø gøømø yi en ki ngø? 38Mɑ́ ngɑn wïje ólɑ̈ɑ̈y ki yɑn, kɑ wïje ólɑ̈ɑ̈yø ki kwøbbɑ kì kelli rïny-ɑ rɑj, ɑ kwïj Jwøk èn, Nyɑɑr Dhɑnhø wïje ólɑ̈ɑ̈y ki en thyew, keny-ɑ óbëëne ki dhwɑ̈ɑ̈ng Wïye geki wëywödd-ɑ tir.”

Currently Selected:

Mk 8: shkDCB

Highlight

Copy