Mk 2
2
Yieli Jɑl Me Dële Dwɑnyø yi Yëso
(Mt 9.1-8; Lk 5.17-26)
1Keny-ɑ ɑ́døøg Yëso Kɑpernɑum, kì bɑng cyɑ̈ng mø nøg, ɑlïngi pere yi teedø kinni, i ying-ɑ kɑl. 2Kɑ ji ócugø ge gïïr, kɑ kɑl opɑ̈ngø gïti dhøge. Kɑ gï pwönye ki kwøbbi Jwøk. 3Kɑ ji møøgø bï-ɑ yïe ge kɑ̈ll-ɑ jɑl me dële dwɑnyø, e otyëddø yi ji ɑ́ngwen. 4Keny-ɑ ɑ́dhɑɑl gen yi wɑ̈dhi buti Yëso yi ngenyi ji, ɑyedhi gen wïj óthɑɑng ød, kɑ keny-ɑ rwöm ki Yëso pɑ̈d yi gen. Codhe ɑluudh gen jɑl-ɑ dële dwɑnyø piny ki pyëne. 5Keny-ɑ ɑ́liidh yïëyi gen yi Yëso, ɑköbbe jɑl-ɑ dële dwɑnyø kinni, “Wɑ̈dɑ, lɑ́ɑ̀w ɑ́dwöög piny kipe orøgí.”
6Kɑ kwï jøpwönyi Cigg møg-ɑ bëëdø kì kenyɑni orumø ki pëthi gen kinni, 7“Ede jɑlɑni ɑ kööbe kinøw? Men bɑ bwöli nyingi Jwøk! Pɑth ki Jwøk kete ɑ cuggi dwöögi lɑ́ɑ̀w piny kipe orøg?”
8De møg-ɑ rømmi yi gen ki pëthi gen ɑ́yod yi Yëso, ɑköbbe gïn kinni, “Wude ɑ rum wun kinøw ki pëthi wun? 9Á ngø ɑ yöd? Köbbi ɑdwɑny kinni, ‘Lɑ́ɑ̀w ɑ́dwöög piny kipe orøgí,’ wɑlɑ̀ köbbe kinni, ‘Dhwöödh, kwɑny pyëní, kɑ yï kedh’? 10De wu ónyudhɑ kinni Nyɑɑr Dhɑnhø yïe dɑ tegø kì kömi piny, men dwööge lɑ́ɑ̀w piny kipe orøg.” Aköbbe ɑdwɑny kinni, 11“Yɑ köbb-ɑ yïn, dhwöödh, bɑn pyëní, kɑ yï kedhí gølí.”
12Adhwödh jɑlɑni kɑ pyëne bɑne, ɑkedhe wɑ̈g e onennø yi teedø bëne. Kɑ teedø ongɑ̈ngø ki mendwøng, kɑ Jwøk lejji gen, ɑkööb gen kinni, “Wø nuti wöl lïdhø ki gïn ni men!”
Cwøli Leebì yi Yëso
(Mt 9.9-13; Lk 5.27-32)
13Kɑ Yëso døøg-ɑ kömi Tɑɑy Gɑlelì. Kɑ ji mø gïïr ócugø kì bute, kɑ gï pwönye. 14Kɑ ɑ́dhwödhe kì kenyɑni, ɑlidhe Leebì wɑ̈d Alpɑ̀, e obëëdø kì kej gwɑ̈j. Kɑ gø köbbe kinni, “Bïí bɑngɑ.” Adhwödhe, kɑ løg-ɑ bɑnge.
15Yëso ɑ́bëëd e ocyɑ̈mø kì gøl Leebì geki jøbɑnge, kí jøgwɑ̈j geki luuy møg-ɑ ɑ́lugi kì bɑnge. 16Keny-ɑ ɑ́lidhii yi jøpwönyi Cigg møg-ɑ bɑ Jøpɑresì kinni, Yëso onywɑ̈gø geki luuy kí jøgwɑ̈j, ɑköbbi gen jøbɑnge kinni, “Ede ɑ nywɑ̈ge ki jøgwɑ̈j geki luuy?”
17Keny-ɑ ɑ́lïngi møgɑni yi Yëso, ɑköbbe gïn kinni, “Tyëng-ɑ dëlli gen yööd bong ɑkïm me nyi dwɑddi yi gen, dɑ́ tyëng-ɑ dëlli gen rɑ̈mø ɑ nyi dwɑddi ɑkïm. Yɑ nuti bëën-ɑ be cwøli tyëngdøj den-ɑ́ tyëngorøg.”
Pyëj kì ri Thuumø
(Mt 9.14-17; Lk 5.33-39)
18Jøbɑng Jøn geki Jøpɑresì ɑ́bëëd ge othuumø. Kɑ ji møøgø bï-ɑ yï Yëso, kɑ gø pyëj gen kinni, “Gede jøbɑng Jøn geki Jøpɑresì ɑ nyi thuum gen, o jøbɑngí pɑ nyi thuumø?”
19Kɑ mø gen løøg yi Yëso kinni, “Jønywöm pɑ nyi thuumø e jɑlnywöm nud kì kelli gen. Ge pɑ cuggi thuumø. 20De cyɑ̈ng megø óbï; eni cyɑ̈ng-ɑ ókɑ̈ɑ̈l jɑlnywöm kì kelli gen, codhe o ge óthuum gen cyee.
21“Bong ngɑn nyi buul ógødh me bɑ kwɑ̈ɑ̈l ki ógødh me nyɑ̈n, kipe ógønh-ɑ nyɑ̈n ree óruude wɑ̈g kì ri kwɑ̈ɑ̈lɑni kɑ keny-ɑ ɑ́buul ópëddø lɑ̈nyyø. 22O bong ngɑn nyi kïdhi møgi oløg me nyɑ̈n yethi ɑthebb mø kɑ̈gi gen dööng, kipe ɑthebbɑni ópyëëd, kɑ møngɑni ogɑ̈gø geki ɑthebbɑni. De møng-ɑ nyɑ̈n nyi kïdh-ɑ yethi ɑthebb mø nyɑ̈n.”
Pyëj kì ri Cyɑ̈ɑ̈ng Sɑbɑth
(Mt 12.1-8; Lk 6.1-5)
23 #
Jølø 23.25
Kɑ Yëso cør-ɑ yethi pwödh geki jøbɑnge, kì cyɑ̈ɑ̈ng Sɑbɑth. Kɑ jøbɑnge omödø ki byel, ge kedh ge ócyɑ̈dhø. 24Kɑ Yëso köbbi yi Jøpɑresì kinni, “Lidh jøbɑngí! Gede ɑ göög gen ki gïn-ɑ bɑ ɑkerø gwøgø kì cyɑ̈ɑ̈ng Sɑbɑth?”
25 #
1 Sɑm 21.1-6
Kɑ ge köbbi yi Yëso kinni, “Wu nuti pɑ̈nyi rɑng ki gïn-ɑ ɑ́gwøg yi Debïd kɑ ɑ́jɑde ki gïn cɑ̈mme kɑ̈j geki jøg-ɑ ɑ́cyɑ̈dhi ki en? 26#Kwɑrr 24.9 Kí kɑ ɑ́kedhe ød Jwøk, kɑ ópùn-ɑ bɑ gëëdhi cɑm gen, e nyi cɑm-ɑ yi ókwër keti gen? Møgɑni nuti cwöbø ɑ́ Abiyɑthɑr ɑ bɑ Ókwër-ɑ Dwøng?”
27Kɑ gï köbbe kinni, “Cyɑ̈ɑ̈ng Sɑbɑth ɑ́gwøg kɑ per dhɑnhø, de dhɑnhø nuti cwɑ̈jø kɑ per Sɑbɑth. 28Kɑ ɑ́rum bëëde kinøw, Nyɑɑr Dhɑnhø bɑ Wïi Sɑbɑth.”
Currently Selected:
Mk 2: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
