Mk 1

Pwönyi Jøn Jɑljwɑ̈g

(Mt 3.1-12; Lk 3.1-18; Jn 1.19-28)

1Men bene Wöndøj mi Yëso Mesiy Wɑ̈d Jwøk.#1.1 Kwï wɑ̈jji kwërø yethi gen bong Wɑ̈d Jwøk. 2#Mɑl 3.1 Ácɑ̈gi ni kɑ ógwedii kì yij wɑ̈nyi Icɑyɑ̀ jɑltöng kinni,

“Jwøk ɑ́kööb kinni, ‘Jɑlwöönɑ óörɑ bølí

o tyenye yuuí.’

3 # Icɑ 40.3 (LXX) Dɑ cwɑg mø cwöddi kì yij pɑ̈l kinni,

‘Tyenyu yöö kipe Wë,

kɑ yëthe gwøg wun gɑ óbödh.’ ”

4Jøn Jɑljwɑ̈g ɑ́cwöb kì yij pɑ̈l e jwɑ̈ɑ̈g-ɑ ji, o ópwönyø kinni yewi ji kipe lɑ̈ɑ̈nyi orøg. 5Kɑ tyëng myërri Yeudiyɑ̀ kí tyëng Yerusɑlem bënn nyi kedh-ɑ pɑ̈l yïe, kɑ gï nyi jwɑ̈ɑ̈ge kì Nɑm Urdun, ge töng-ɑ orøøg gen.

6 # 2 Rɑ̈nhì 1.8 Jøn ɑ́rug-ɑ ógødh men-ɑ ócwɑ̈jø ki yëyyi ɑmɑlø, o wëne bɑ dël, o nyi cɑm-ɑ bɑ̈nyy kí møøw kïc. 7Kɑ ji nyi köbbe kinni, “Jɑl-ɑ óbï kì bɑngɑ, pëddi döng kibølɑ. Yɑ pɑ døøj ki kuung piny kì bøle kɑ wɑrre pɑ̈ɑ̈dɑ wɑ̈g kì tyelle. 8Yɑ jwɑ̈ɑ̈g-ɑ wun ki pï, de wu ójwɑ̈ɑ̈ge kɑ Wëykwërø.”

Jwɑ̈ɑ̈gi Yëso

(Mt 3.13–4.11; Lk 3.21-22; 4.1-13)

9Kì yethi cyɑ̈nggɑni ɑ ɑ́bëën Yëso, e kɑ̈ɑ̈l-ɑ Nɑdhɑreth kì Gɑlelì, kɑ jwɑ̈ɑ̈g yi Jøn kì Nɑm Urdun. 10Kì bøli keny-ɑ ɑ́bëëne wɑ̈g kì yethi pï, kɑ mɑl lidhe ree yieeb en, o Wëy bï-ɑ piny köme e nɑ ɑkur. 11#Cɑ̈gø 22.2; Wör 2.7; Icɑ 42.1; Mt 3.17; 12.18; Mk 9.7; Lk 3.22 Kɑ cwɑg obëënø ge kɑ̈ɑ̈l-ɑ mɑl kinni, “Yï bɑ dïl Wɑ̈dɑ. Pyëwɑ med ki yïn.”

12Kɑ Yëso kïdhi pɑ̈l yi Wëykwërø. 13Kɑ obëëdø kì kunɑni ki cyɑ̈ng pyɑ̈r ɑ́ngwen, e nyii pɑ̈nyø yi Cethɑn. Ábëëd ɑ kelli lɑ̈yyi pɑ̈l, e okɑ̈llø yi wëywödd.

Cwøli Óyïnnì Ángwen Yëso

(Mt 4.12-22; Lk 4.14-15; 5.1-11)

14Keny-ɑ ɑ́rum Jøn ki kïdhi ød mɑg, ɑkedhi Yëso Gɑlelì, e pwöny-ɑ wöndøj men-ɑ kɑ̈ɑ̈l yï Jwøk. 15#Mt 3.2 Kɑ okööbø kinni, “Bøli kenyɑni ɑ́wɑ̈nhi, o Pödhi Jwøk ɑ́cyɑ̈ngi. Wiy wun orøg, kɑ Wöndøj yïëy wun.”

16Keny-ɑ ɑ́kedh Yëso e ócyɑ̈dhø kì thɑ̈ngi Tɑɑy Gɑlelì, ɑlïdhe ki óyïnnì ɑ́ryew; Sɑymøn geki Andrø ómen, ge ocögø ki bøy. 17Kɑ ge köbbi yi Yëso kinni, “Bïu bɑngɑ, o wu løgɑ jømɑy ki ji.” 18Awiy gen bøyyi gen piny, kɑ ge løg-ɑ bɑnge.

19Kɑ kɑl-ɑ kedhø, ɑcige lïdhø ki nyiimëëg ɑ́ryew møøgø; Yɑgob geki Jøn wɑ̈ddi Dhebedì. Ge ɑ́bëëd ge pyël-ɑ bøyy kì yij yɑ̈ɑ̈y gen. 20Acwøle gïn, kɑ wïyi gen Dhebedì wiy gen yij morkɑb, geki jøg-ɑ bɑ ɑkïr. Kɑ ge løg-ɑ bɑng Yëso.

Jɑl Me Ree Di Wëy Me Rɑj

(Lk 4.31-37)

21Akedhi gen kɑɑl Kɑpernɑum. Kɑ Yëso kedh-ɑ sinɑgøg kì cyɑ̈ɑ̈ng Sɑbɑth geki jøbɑnge, kɑ ócɑ̈gø ki pwönyø. 22#Mt 7.28-29 Kɑ teen-ɑ ɑ́lïngi møge ongɑ̈ngø yi pwönye, mɑ́ e pɑ pwönyi ni jøpwönyi Cigg; de ɑ́pwönyi kɑ tegø.

23Kɑ jɑl me ree di wëy me rɑj kedh-ɑ sinɑgøg, ɑcɑ̈ge ryeerø kinni, 24“Yëso jɑl Nɑdhɑreth, yïde ki wøn? Yï ɑ́bï-ɑ be nɑ̈gi wøn? Yï ngɑ̈nyi yi yɑn; yï bɑ Ngeti Kwërø men-ɑ ɑ́ör yi Jwøk!”

25Kɑ wëyɑni köbbi yi Yëso kinni, “Kud, kɑ yï bïí wɑ̈g kì ree!”

26Kɑ jɑlɑni tyelli yi wëyɑni, ɑryeere kɑ bï-ɑ wɑ̈g kì ree. 27Kɑ teedø ongɑ̈ngø bënn, ɑpyënyi gen ri gen kinni, “Men bɑ ngø? Ceg bëëdø ɑ́ pwönyø me nyɑ̈n! Jɑɑl yïe dɑ tegø men köbbe wëyrijjø, kɑ dhøge lïngi yi gen!”

28Kɑ per Yëso jwɑn-ɑ tɑɑy yethi myërri modïri Gɑlelì bënn.

Yieli Ji Mø Gïïr yi Yëso

(Mt 8.14-17; Lk 4.38-41)

29Adhwödh Yëso kì sinɑgøg geki jøbɑnge; Yɑgob kí Jøn, kɑ ge kedh-ɑ gøl yɑɑ Sɑymøn geki Andrø. 30Øri Sɑymøn, meyi cyëge, ɑ́bëëd e buud-ɑ piny yi rɑ̈ɑ̈m dële, o dële lëëdh. Kɑ pere köbbi Yëso. 31Akedhi Yëso yïe, kɑ cinge mɑge, ɑkønye gøn ki dhwödhi mɑl. Akwööj dëël ngɑnɑni, kɑ kedh-ɑ be kɑ̈lli gen.

32Kì thyënhø cɑ̈ng rum buddø, kɑ tyëng-ɑ dëlli gen rɑ̈mø geki møg-ɑ wɑ̈thi gen di ɑ́nɑ̈gø muuj Yëso bënn. 33Kɑ tyëng kɑɑlɑni bënn ócugø kì dhø gølɑni. 34Kɑ ji mø gïïr, mø dëlli gen rɑ̈mø yi gïg mø bɑ̈nni yiele. Kɑ wëyrijjø mø ngenyø ryëëme wɑ̈g. Kɑ wëyrijjø møgɑni kyëdde kinni, ge ko kööb, mɑ́ e ngɑ̈nyi yi gen.

Pwönyi Yëso kì Gɑlelì

(Lk 4.42-44)

35Kɑ Yëso odhwödhø kì kɑɑl dhuki kì mwøl, e cɑ̈ng nuti tuulø. Kɑ kedh-ɑ kun mɑlle Jwøk e kete. 36Kɑ Sɑymøn geki jøg-ɑ ɑ́cyɑ̈dhi gen kedh-ɑ be yɑbii. 37Ayod ge gøn, kɑ gø köbbi gen kinni, “Dhɑnhø bëne yɑb-ɑ yïn.”

38Kɑ gï köbbe kinni, “Kedhi wɑ yethi myërr-ɑ bølee, o yɑ pwönyɑ kì kɑ̈jjɑni thyew, mɑ́ bene per møgɑni ɑ ɑ́bëënɑ.”

39 # Mt 4.23; 9.35 Kɑ myërri Gɑlelì tyëge bënn, e ópwönyø kì sinɑgøgg. Kɑ wëyrijjø nyi ryeeme wɑ̈g kì ri ji.

Yieli Jɑl Megø yi Yëso

(Mt 8.1-4; Lk 5.12-16)

40Kɑ jɑl me ree di lɑ̈y bï-ɑ yï Yëso, ɑbøødhe ree piny kì bøle, kɑ gø kwɑjje kinni, “Ke dwɑddií, yɑ ócuggø gwøgø yi yïn o yɑ dhïwɑ.”#1.40 wiy yɑ dhïwɑ: Ngɑn ree di lɑ̈y nyi cwølli e ywëdhø, pɑ nyi kedhi kej kwër.

41Kɑ Yëso yije óywöngø kipe jɑlɑni, ɑrïje cinge, kɑ gø nywɑle, codhe ɑköbbe gøn kinni, “Di dwɑddø yi yɑn, wiy dëlí dönye.” 42Kɑ lɑ̈y ólɑ̈ɑ̈nyø kì ree, kɑ dële ódönyø. 43Acem wɑɑng jɑlɑni ki mendwøng yi Yëso, kɑ gø jwɑne ki ör yöö; 44#Kwɑrr 14.1-32 kɑ ɑ́rume köbbii kinni, “Ko di ngɑn köbbi yi yïn, de kedh, kɑ rií nyudhí ókwërø. Kɑ yï muuj ki gëëdhi kipe kɑ ɑ́dönyi dëlí ni møg-ɑ ɑ́ceg yi Mosɑ̀, ɑ́ nyuudhi kì bøli teedø.”

45De jɑlɑni ɑ́kedh e kømm-ɑ kwøbbɑni kì kɑ̈jj bënn. Kɑ Yëso ódhɑ̈lø cyɑ̈dhø kì yethi myërr, de ɑ́bëëd ɑ pɑ̈l. Kɑ ji bënn nyi kedh-ɑ yïe, ge kɑ̈ɑ̈l-ɑ kɑ̈jj mø gïïr.

Currently Selected:

Mk 1: shkDCB

Highlight

Copy