Mt 5

Pwönyi Wïj Kït

(5.1–7.29)

1Kɑ lidh yi Yëso kinni ji gïïr, ɑkedhe mɑl wïj kït, kɑ pëgg-ɑ piny. Kɑ jøbɑnge ri gen cøng gen bute. 2Atuge dhøge, kɑ gï pwönye kinni,

Gyëdhh-ɑ Dyër

(Lk 6.20-23)

3“Tyëng-ɑ ngɑ̈ny wøw kinni nyingi gen cɑn kì ri wëy, ri gen dɑ gyëdh,

Pödhi Jwøk bɑ mi gen!

4 # Icɑ 61.2 Tyëng-ɑ kïïmø ri gen dɑ gyëdh,

ge ólug yi Jwøk!

5 # Wör 37.11 Tyëng-ɑ bɑ mööl ri gen dɑ gyëdh,

piny ólɑg yi gen!

6 # Icɑ 55.1-2 Tyëng-ɑ nyi tyer gøggi dyër, ri gen dɑ gyëdh,

ge óthödhi yi Jwøk kɑ pëthi gen ókwöjø!

7Tyëng-ɑ yethi gen nyi ywöngi kipe ji møøgø ri gen dɑ gyëdh,

Jwøk pyëwe ólɑ̈ɑ̈m ki gen!

8 # Wör 24.3-4 Tyëng-ɑ pëthi gen tïl, ri gen dɑ gyëdh,

Jwøk ólidh yi gen!

9Tyëng-ɑ nyi göögø kipe mër ri gen dɑ gyëdh,

ge ócwølli yi Jwøk gɑ nyige!

10 # 1 Pït 3.14 Tyëng-ɑ nyingi gen guud kipe kɑ̀ nyi gwøg gen gïn-ɑ dwɑddi yi Jwøk, ri gen dɑ gyëdh,

Pödhi Jwøk, bɑ mi gen!

11 # 1 Pït 4.14 “Ri wun dɑ gyëdh, kenyi yɑnyyi wun yi teedø, kɑ nyingi wun guud yi gen, kɑ wu kwɑ̈dhhi yi gen ki kwøbbi pyed, kipe kɑ̀ bëëd wun ɑ́ jøbɑngɑ. 12#2 Kwøb 36.16; Gwøg 7.52 Mïni pëthi wun ki mendwøng, mɑ́ köögi me dwøng omïdhø ɑ́ mi wun kì Pödhi Jwøk. Bene kër-ɑ ɑ́guud nyingi jøtöng, møg-ɑ ɑ́ying bøli wun ɑnɑn.

Omelø geki Cɑr

(Mk 9.50; Lk 14.34-35)

13“Wu pɑ̈r ki omelø, kipe kömi piny bëne. Keløg omelø ólwënyø, pɑ cuggi bëëdø ɑ́ omelø këti. Bong gïndøj kì ree këti, de ceg kɑ weddø, kɑ nyøn yi ji.

14 # Jn 8.12; 9.5 “Wu pɑ̈r ki cɑr kipe piny. Kɑɑl-ɑ ógeer wïj kït, pɑ cuggi kɑnø. 15#Mk 4.21; Lk 8.16; 11.33 Bong ngɑn cwiny lɑ̈mbɑ̈ kɑ gø kume ki ɑ́tɑy, de nyi cïb-ɑ wïj tɑrɑbedhɑ̀, o tyëng-ɑ ying ød bënn thödhe ki cɑr. 16#1 Pït 2.12 Wiy cɑɑr wun mëënye kì bøli teedø, kipe kinni, o gïg-ɑ døj møg-ɑ gøggi yi wun lidh yi teedø, o Wïyi wun ɑ ying mɑl pwøj yi gen.

Pwönyø kì ri Cigg

17“Wu ko rum kinni, yɑ ɑ́bï-ɑ be rënyi møg-ɑ kømmi yi Cigg geki pwönyi jøtöng. Yɑ nuti bëën-ɑ be rënyi gen, de yɑ ɑ́bï-ɑ be cïbi gen kɑ̈jji gen. 18#Lk 16.17 Yɑ köbb-ɑ wun kidyër kinni, kɑ̀ nud mɑl kí piny, bong gwedø ɑ́kyel wɑlɑ̀ cwinyø men-ɑ ólɑ̈ɑ̈ny kì ri Cigg, gïti keny-ɑ ópɑ̈dhi gen kɑ̈jji gen bënn. 19Kɑ̀ bëëde kinøw, ngɑn pyem nyɑ gïjø ɑ́kyel kì ri Cigg, o ji nyi pwönye kinni göög gen kinøw, ngɑn ni menɑni ócwøl ɑ́ ngɑn bong pere kì Pödhi Jwøk. De ngɑn-ɑ nyi göögø kì bɑng Cigg, kɑ ji nyi pwönye ki møgɑni, bene en ɑ ócwølli ɑ́ ngɑndwøng kì Pödhi Jwøk. 20Yɑ köbb-ɑ wun kinni, keløg døøji wun pɑ lod døøji jøpwönyi Cigg geki Jøpɑresì, wu pɑ wöl wɑ̈dhi Pödhi Jwøk.

Pwönyø kì ri Wëërø

(Lk 12.57-59)

21 # Kedhø 20.13; Jølø 5.17 “Møg-ɑ ɑ́köbbi tyëng-ɑ ócyɑ̈ɑ̈ngi ɑ́lïngi yi wun kinni, ‘Yï ko nɑ̈gi ki dhɑnhø, o ngɑn nɑ̈gi ki dhɑnhø ceg kɑ kïdhi burø be gøny.’ 22De yɑ köbb-ɑ wun kinni, ngɑn wër ki wɑɑd gen ceg kɑ kïdhi burø, o ngɑn yɑny wɑɑd gen kïdh-ɑ burø. Ngɑn köbbi wɑɑd gen kinni, ‘Yï bɑ dhëg’ óleeng yij mɑc. 23Kɑ̀ bëëde kinøw, keløg yï køm-ɑ thödhi Jwøk kì wïj këli lɑm ki gëëdhi, kɑ yï ópɑ̈dø kì kenyɑni kinni, kɑɑm wun dɑ kwøb wuki wɑɑd wun, 24wiy gïn-ɑ muuj yi yïn kì bøli këli lɑm, kɑ yï kedh, kɑ wu rëbi wun, wuki wɑɑd wun, codhe o yï bïí, o gënhɑni muuj yi yïn cyee.

25“Jwɑnu rëbø ki ngɑn-ɑ gøøny yïn kɑ̈ng-ɑ nuti wɑ̈dhi wun burø, kipe yï ómuuj jɑgø yi ngɑnɑni, kɑ yï mëggi bölidh yi jɑgø, kɑ yï leeng ød mɑg. 26Yɑ köbb-ɑ yïn kidyër kinni, yï pɑ bï wɑ̈g kì kenyɑni gïti keny-ɑ órum kwör-ɑ kömí ki colø bëne.

Niini Ji Mø Nuti Nywøøm Ri Gen

27 # Kedhø 20.14; Jølø 5.18 “Møg-ɑ ɑ́kømmi cøn ɑ́rum ki lïngø yi wun kinni, ‘Ngɑn nuti nywøøm wun ri wun ko niin yi yïn.’ 28De yɑ köbb-ɑ wun kinni, ngɑn nenni ri ngɑndhɑjø, kɑ ómwönyø ki lɑ́ɑ̀w, ɑ́rum ki orøg ki gøn kì pyëwe. 29#Mt 18.9; Mk 9.47 Keløg wɑɑng kyëjí yï peeje’ be gwøg ki gïnrɑj, gööl wɑ̈g kɑ weddí, mɑ́ lɑ̈w keløg ɑ́ gïjø ɑ́kyel ɑ lɑ̈ɑ̈ny kì ri dëlí, kibøli ke di leeng dëlí bëne yij mɑc. 30#Mt 18.8; Mk 9.43 O keløg cingi kyëjí yï peeje’ be gwøg ki gïnrɑj, ngul wɑ̈g kɑ weddí, mɑ́ lɑ̈w ke lɑ̈ɑ̈ny gïjø ɑ́kyel kì ri dëlí, kibøli ke di kedhi dëlí bëne yij mɑc.

Pwönyø kì ri Tɑ̈ng

(Mt 19.9; Mk 10.11-12; Lk 16.18)

31 # Jølø 24.1-4; Mt 19.7; Mk 10.4 “Ákwøb cøn kinni, ‘Ngɑn tɑ̈ng cyëge, nënge gøn ki wɑ̈nyi tɑ̈ng.’ 32#Mt 19.9; Mk 10.11-12; Lk 16.18; 1 Kör 7.10-11 De yɑ köbb-ɑ wun kinni, ngɑn tɑ̈ng cyëge, e nuti niin yi jɑlø megø, ngɑnɑni ɑ́løge ngɑn niin ki köögi, o ngɑn nywøm ɑtɑ̈ng, ɑ́røngi thyew.

Pwönyø kì ri Köngø

33 # Kwɑrr 19.12; Kwɑn 30.2; Jølø 23.21 “Wu ɑ́lïng thyew, i ji óköbbø kɑ̈ge dööng kinni, ‘Yï ko nyi köngi ki pyed, de nyi gwøg møg-ɑ ɑ́kwöng yi yïn kì bøli Wë.’ 34#Yɑg 5.12; Icɑ 66.1; Mt 23.22 De yɑ köbb-ɑ wun kinni, wu ko nyi köngi kinni tek. Mɑl ko nyi kwöng, mɑ́ e bɑ kwøøm Jwøk, 35#Icɑ 66.1; Wör 48.2 wɑlɑ̀ piny ko nyi kwöng, mɑ́ e bɑ thɑ̈nhi tyelle, wɑlɑ̀ Yerusɑlem ko nyi kwöng, mɑ́ e bɑ kɑɑl rɑ̈nh-ɑ dwøng. 36Kɑ wïjí ko nyi kwööng, mɑ́ yëyø ɑ́kyel dhɑ̈li gwøgø yi yïn e tɑr wɑlɑ̀ looj. 37De nyi kwøb wun kinni, ‘Yɑ ɑ́yïëy’ wɑlɑ̀ kinni, ‘Yɑ ɑ́kyëëd,’ keti gen. Keløg wu ókɑ̈nø ki kwøb møøgø, ge kɑ̈ɑ̈l-ɑ yï Ngɑnrɑj.

Pwönyø kì ri Coli Gøølø

(Lk 6.29-30)

38 # Kedhø 21.24; Kwɑrr 24.20; Jølø 19.21 “Møg-ɑ ɑ́kømmi cøn ɑ́lïngi yi wun kinni, ‘Wɑng col kɑ wɑng, o lëjø col kɑ lëjø.’ 39De yɑ köbb-ɑ wun kinni, keløg yï ogöggø ki gïnrɑj yi ngɑn megø, kejí ko cool. Ngɑn gøj yïn kì thɑ̈ngi kyëjí, lugí thɑ̈ng-ɑ kyeelø o gø gøje thyew. 40O keløg e dɑ ngɑn pir yïn e dwɑdd-ɑ kwɑnyi ɑ́ywödhí, ɑ́ywönhthinh, mëggí ɑ́ywönhdwøng en thyew. 41Keløg yï ocirø yi deny-ɑ ɑ́mɑg pödhee, kinni kɑ̈l jɑmme ki kïlomïtïr ɑ́kyel, lwøøg ki kïlomïtïr ɑ́ryew. 42Thödhí ngɑn kwɑ̈jji kì yïí, kɑ ngɑn dwɑddi wïdhø kì yïí ko mɑ̈ɑ̈n.

Mɑɑri Tyëngmɑ̈ɑ̈nø

(Lk 6.27-28, 32-36)

43 # Kwɑrr 19.18 “Wu ɑ́lïng i ókwøbø kinni, ‘Mɑɑr wɑddi wun, kɑ tyëngmɑ̈ɑ̈nø mɑɑn.’ 44De yɑ köbb-ɑ wun kinni, mɑɑru tyëng-ɑ mɑɑn wun, kɑ wu kwɑ̈jji wun kiper tyëng-ɑ guud nyingi wun, 45mɑ́ kɑ̀ göög wun kinøw, bene keny-ɑ óbëëd wun, wun-ɑ́ nyigi Wïyi wun ɑ ying mɑl. Mɑ́ cɑ̈nge nyi wëgge’ yeer kömi tyëngdøj geki tyëngrijjø, kɑ kødh nyi mëgge tyëngtir geki tyëngorøg bënn. 46Keløg wu nyi mɑɑr-ɑ tyëng-ɑ mɑɑr wun, bong köögi men-ɑ óyod yi wun kì yï Jwøk, cɑgg ɑ́ tyëng gwɑ̈j, ge pɑ nyi göög ɑ nøw? 47O keløg wu nyi mɑ̈dh-ɑ wɑddi wun keti gen, bong gïndøj mɑ ɑ́gwøg yi wun, me lod wun tyëng-ɑ kyeelø. Cɑgg ɑ́ tyëng pödhh-ɑ kyeelø, ge nyi göög ɑ nøw thyew! 48#Kwɑrr 19.2; Jølø 18.13 Bëëd wun wu tir, ni Wïyi wun ɑ ying mɑl.

Currently Selected:

Mt 5: shkDCB

Highlight

Copy