Mt 27
27
Kïdhi Yëso Bøli Pilɑtø
(Mk 15.1; Lk 23.1-2; Jn 18.28-32)
1Keny-ɑ ɑ́ru wøw, ɑcung jɑggi ókwër geki jøgdøngø ki burø kipe kwøbbi nɑ̈gi Yëso. 2Atwöj gen cingge, kɑ gø muuj gen modïr Pilɑtø.
Thøwi Yeudɑ̀
(Gwøg 1.18-19)
3 #
Gwøg 1.18-19
Keny-ɑ ɑ́yodii yi Yeudɑ̀ jɑl-ɑ ɑ́twɑ̈ɑ̈ny kinni i Yëso ókuumø ki thøø, ɑpɑ̈dde kɑ ngyëny ɑ́tegg pyɑ̈r ɑ́dɑ̈g dögge jɑggi ókwër. 4Akööbe kinni, “Yɑ ɑ́göög ki orøg, mɑ́ yɑ ɑ́twɑny-ɑ ngɑn yïe bɑ̈r kipe kinni o nɑ̈g!”
Kɑ ge ólöggø kinni, “Cwɑggi wøn ɑ́ ngø? Møgɑk bɑ møgí!”
5Kɑ ngyëny ɑ́tegg møgɑni leenge Kengø, ɑkedhe kɑ ree ngɑbe.
6Kɑ ngyënyyɑni kwɑny yi jɑggi ókwër, ɑkööb gen kinni, “Møg bɑ ngyënyyi remø, o bɑ ɑkerø yi Ciggee kinni ge pɑ kïdhi kömi ngyënyyi Kengø.” 7Codhe, ɑlwööb gen, kɑ ngyënyyɑni ngeew pwödhi bødhi lɑ̈b, ɑ́ men yije nyi koony tyëng-ɑ thøw gɑ wëll. 8Bene ɑ bɑnge cwølli pwönhɑni ɑ́ ‘Pwödhi Remø,’ pïd dicyɑ̈ngtïn.
9 #
Dhek 11.12-13
Kɑ møg-ɑ ɑ́kwøb yi Jermɑyɑ̀ jɑltöng pɑ̈dh-ɑ kɑ̈jji gen, gen ɑ møg-ɑ ɑ́kwøbe kinni, “Kɑ ngyëny ɑ́tegg pyɑ̈r ɑ́dɑ̈g kwɑny yi gen, gen ɑ ngyënyy-ɑ ɑ́cïb yi tyëng Isrɑil gɑ møg ngewii, 10kɑ ngyënyyɑni ngeew pwödhi bødhi lɑ̈b, ni kɑ ɑ́ceg yɑn yi Wë.”
Pyënyi Yëso yi Pilɑtø
(Mk 15.2-5; Lk 23.3-5; Jn 18.33-38)
11Kɑ Yëso kïdhi bøli modïr, kɑ gø pyëje kinni, “Bene yïn Rɑ̈ɑ̈dh Yeud?”
Alöggi Yëso kinni, “Møgɑni ɑ́kwøb yi yïn ceth.” 12De møg-ɑ ɑ́gøønyii yi jɑggi kwër geki jøgdøngø nuti løøg en.
13Aköbbii yi Pilɑtø kinni, “Yï pɑ lïngø ki møg-ɑ gøøny yïn yi gen bënn?”
14De Yëso nuti wöl löggø, kɑ Modïr ceg-ɑ ngɑ̈ngø ki mendwøng.
Kuumi Yëso ki Thøø
(Mk 15.6-15; Lk 23.13-25; Jn 18.39–19.16)
15Kì cyɑ̈ɑ̈ng Kwëër Ákɑɑdh, Modïr-ɑ jyɑ̈gø ki nyingi mïri Römɑ̀, ɑ́bëëd e nyi göny-ɑ wɑ̈g kì ød mɑg ki dhɑnhø ɑ́kyel men-ɑ kwøb yi teedø kinni gøny. 16Kì bøli kenyɑni ɑ́bëëd e dɑ ɑmɑg me pere ngɑ̈nyi yi teedø bëne, me nyinge cwøl ɑ́ Yëso Bɑrɑbɑ̀. 17Keny-ɑ ɑ́cugi teedø, ɑpyëëj gen yi Pilɑtø kinni, “Á men ɑ dwɑddi yi wun, o gönyɑ wun? Wu dwɑdd-ɑ Yëso Bɑrɑbɑ̀, wɑlɑ̀ Yëso jɑl-ɑ cwøl ɑ́ Mesiy?” 18Ábëëd gø ngɑ̈nyi yi en kinni, Yëso ɑ́muujii kɑ ɑter yi jɑggi Yeud.
19Kɑ Pilɑtø ödi ki wöödø yi cyëge e nudd e ying-ɑ kej gøny kinni, “Ko di gïn göggí jɑl-ɑ yïe bɑ̈r ni men, mɑ́ pyëwɑ orɑ̈mø yi møg-ɑ ɑ́lɑ̈gɑ ɑ́wɑ̈ɑ̈ kipere.”
20Kɑ wɑ̈thi ji pɑng yi jɑggi ókwër geki jøgdøngø kinni cwøl gen Bɑrɑbɑ̀ kì yï Pilɑtø, kɑ Yëso nɑ̈g. 21Kɑ teedø pyëj yi Pilɑtø kinni, “Á men kì kelli gen ryeet ɑ dwɑddi yi wun, o gönyɑ wun?”
Kɑ ge ólöggø kinni, “Bɑrɑbɑ̀!”
22Aköbbi gen yi Pilɑtø kinni, “Kɑ̀ bëëde kinøw, ɑ́ gïn ɑ göggɑ Yëso, jɑl-ɑ cwøl ɑ́ Mesiy?”
Kɑ ge ólöggø bënn kinni, “Gur wïj yɑdh ɑrïw!”
23Kɑ Pilɑtø okööbø kinni, “Á kipe ngø? Á ngø ɑ ɑ́rënye?”
Kɑ ge óryeerø ki mendwøng kinni, “Gur wïj yɑdh ɑrïw!”
24 #
Jølø 21.6-9
De kɑ ɑ́lidhii yi Pilɑtø kinni, kwøbbɑni dhɑ̈li, o ɑwøw køm-ɑ tugø, ɑkɑ̈bbe ki pï, kɑ cingge lwøge kì bøli teedø bëne, e okööbø kinni, “Yïɑ bɑ̈r ki remi jɑlɑni; bɑ ngɑn yïe bɑ̈r. Menɑni bɑ gwøøg wun.”
25Kɑ teedø bëne ólöggø kinni, “Wiy reme yinge kömi wøn, wøki nyigi wøn.”
26Codhe, ɑgönye gïn Bɑrɑbɑ̀. Kɑ Yëso mëgge teedø kɑ ɑ́rume pwödø, o gur wïj yɑdh ɑrïw.
Gɑggi Yëso yi Dej
(Mk 15.16-20; Jn 19.2-3)
27Kɑ Yëso mɑg yi jøliny Pilɑtø, kɑ gø kïdhi gen ódɑ̈r-ɑ dwøng, kɑ tyeeg dïdyërø yi kɑtïbɑ̀ bëne. 28Kɑ lɑne luny wɑ̈g yi gen, kɑ gø rug gen ki pɑrø mɑ ɑ́cwïcwïl. 29Kɑ ge okɑ̈dø ki yɑ̈ɑ̈r koodh, kɑ bødh wïje, kɑ cingi kyëje cïbi ki obej. Kɑ ri gen bøødh gen piny kì bøle, ge gɑgg-ɑ gøn kinni, “Wø mɑl-ɑ yïn, yïn ɑ Rɑ̈ɑ̈dh Yeud.” 30Kɑ köme nguddi gen ki lɑ́ɑ̀w, kɑ obej kwɑny yi gen, kɑ Yëso gøj ki wïje. 31Keny-ɑ ɑ́rum gen ki gɑggii, kɑ pɑrø luny wɑ̈g kì ree, ɑruug ge gøn ki ógudhe. Kɑ gø peej gen be gur wïj yɑdh ɑrïw.
Guri Yëso Wïj Yɑdh Arïw
(Mk 15.21-32; Lk 23.26-43; Jn 19.17-27)
32Keny-ɑ ɑ́kedhi gen wɑ̈g kì kɑɑl, ɑrøøm gen ki jɑl megø, mɑ jɑl Serin me cwøl ɑ́ Sɑymøn. Kɑ jɑlɑni cir yi gen kinni byele yɑdh ɑrïw Yëso. 33Kɑ ɑ́wɑ̈dhi gen keny-ɑ nyi cwøl ɑ́ Gölgöthɑ̀, men-ɑ wɑngi kinni, “Kej Cu Wïj.” 34#Wör 69.21 Kɑ gø nëngi gen ki møgi oløg men-ɑ ótolø ki gïjø me keej, de gø ɑ́wɑ̈dhe belø; gø nuti mɑɑdh en.
35 #
Wör 22.18
Keny-ɑ ɑ́rume gur wïj yɑdh ɑrïw, kɑ lɑ̈ne pɑ̈ngi yi gen, ge leng kɑ wél. 36Kɑ ge obëëdø kì kenyɑni, ge kor-ɑ gøn. 37Kɑ gøny-ɑ́ pere ɑ́kuumii gweed mɑl kinni, “Men bene Yëso Rɑ̈ɑ̈dh Yeud.” 38Codhe, ɑguddi gen wɑ̈thi yenh ɑrïw ki ɑ́muddi ji ɑ́ryew, kì bute; ɑ́kyel kì wïj kyëje kí ɑ́kyel kì wïj cɑɑme.
39 #
Wör 22.7; 109.25 Kɑ nyi gɑg yi ji-ɑ nyi kɑ̈l bute kì yöö, ge lëgg-ɑ wɑ̈thi gen, 40#Mt 26.61; Jn 2.19 kinni, “Yïn ɑ ngɑn-ɑ di dhur Kengø piny, kɑ cigí gerø ki cyɑ̈ng ɑ́dɑ̈g; yiel rií, keløg yï bɑ Wɑ̈d Jwøk, kɑ yï bïí piny kì wïj yɑdh ɑrïw.”
41Kɑ gɑg yi jɑggi ókwër kí jøpwönyi Cigg geki jøgdøngø ni menɑni thyew, kɑ ge okööbø kinni, 42“Ji møøgø ɑ́yiele, de dhɑ̈li yieli ree. Keløg e bɑ Rɑ̈ɑ̈dh Isrɑil, wiy bëe piny kì wïj yɑdh ɑrïw, o yïëy yi wɑ. 43#Wör 22.8 Jwøk nyii ngɑ̈dhø yi en, wiy gø yiele ɑnɑn, keløg e dwɑdd-ɑ yielii, mɑ́ e ɑ́kööb cem ɑ́ Wɑ̈d Jwøk!”
44Kɑ gwɑddi yi ɑ́muddi ji ni menɑni thyew, gen ɑ jøg-ɑ ɑ́gur wɑ̈thi yenh ɑrïw kyeel ki en.
Thøwi Yëso
(Mk 15.33-41; Lk 23.44-49; Jn 19.28-30)
45Kɑ piny ree løge muudhø, cɑg kì sɑɑ̀ pyɑ̈rø wïdɑ́ryew kì dicɑ̈ng gïti sɑɑ̀ ɑ́dɑ̈g kì böörø. 46#Wör 22.1 Keny-ɑ ɑ́wɑ̈nhi sɑɑ̀ ɑ́dɑ̈g kì böörø, ɑcwöddi Yëso, e óryeerø kinni, “Elì, Elì, lɑmɑ̀ sɑbɑktɑnì.” Møgɑni wɑng-ɑ kinni, “Jwøgɑ, Jwøgɑ, yïde ɑ wiy yɑn piny?”
47Keny-ɑ ɑ́lïng ji-ɑ cungi kì kenyɑni ɑkööb gen kinni, “Jɑlɑni cwøll-ɑ Eliyɑ̀.” 48#Wör 69.21 Kɑ jɑl ɑ́kyel kì kelli gen órengø, kɑ ókɑ̈bbø ki ispwøny, ɑjwɑ̈ɑ̈ge gøn yij møgi oløg me wɑj, kɑ gø gɑ̈ɑ̈ne wïj obej. Kɑ gø tïnge mɑl kinni o cwij yi Yëso.
49Kɑ ji møøgø okööbø kinni, “Nëën wɑ, men-ɑ óbëën Eliyɑ̀ be yielii.”
50Kɑ Yëso cig-ɑ ryeerø, ɑmije wɑnge.
51 #
Kedhø 26.31-33
Kɑ sitɑrɑ̀ men-ɑ bɑ gëng kì yij Kengø ópyëdø kì dïdyëre, cɑg kì wïje mɑl gïti tyele piny. Kɑ piny onhɑ̈nhø kɑ tuggi kïttì ópyëdø. 52Kɑ rörri ji ri gen yieb gen, kɑ jii Jwøk mø gïïr tug kì yij thøø, 53kɑ ge bï-ɑ wɑ̈g kì yethi rörr; kɑ ge lidh yi ji mø gïïr kì kɑɑldwøng, kì bɑng kɑ ɑ́rum Yëso ki dhwödhø kì yij thøø.
54Keny-ɑ ɑ́liidh gïn-ɑ ɑ́cwöb kí kër-ɑ ɑ́kïïr piny yi dhɑbïdh geki deny-ɑ kor Yëso, ɑbwøg gen ki mendwøng, kɑ ge okööbø kinni, “Jɑlɑni ce ying-ɑ Wɑ̈d Jwøk kidyër!”
55 #
Lk 8.2-3
Ádɑ tyëng-ɑ mɑ̈nn mø gïïr, mɑ ɑ́bëëd ge onëënø ge lɑ̈wi kì kenyɑni; tyëngɑni ɑ́lug ɑ bɑng Yëso, ge kɑ̈ɑ̈l ɑ Gɑlelì, o ɑ́bëëd ɑ́ gen ɑ kɑ̈llii. 56Meerì Mɑgdɑliyɑ̀ kí Meerì meyi Yɑgob geki Yosep, kí meyi wɑ̈ddi Dhebedì, ge ɑ́ying-ɑ kelli gen.
Konyi Yëso
(Mk 15.42-47; Lk 23.50-56; Jn 19.38-42)
57Keny-ɑ ɑ́göög piny ki wɑɑng thyënhø, ɑbëën jɑl mɑ jɑlkɑ̈r kì Arimɑthiyɑ̀, me cwøl ɑ́ Yosep, o ɑ́bëëd ɑ́ jɑlbɑng Yëso thyew. 58Kɑ jɑlɑni kedh-ɑ yï Pilɑtø be kwɑjji dëël Yëso. Kɑ Pilɑtø ocïgø kinni mëggii. 59Kɑ Dhɑnhø kwɑny yi Yosep, kɑ gø kode ki ógødh kor-ɑ yöm. 60Kɑ gø cïbe yij bur me nyɑ̈n, men-ɑ ówödø kì yij kït, kɑ kït me dwøng ngyeele dhø burɑni, kɑ ókedhø. 61De Meerì Mɑgdɑliyɑ̀ kí Meerì men-ɑ kyeelø, ge ɑ́bëëd ɑ piny ge rwöm ki rörɑni.
Kori Rörø
62Kɑ jɑggi ókwër geki Jøpɑresì kedh-ɑ be yïddø ki Pilɑtø, dhuki kì cyɑ̈ɑ̈ng Sɑbɑth. 63#Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33 Kɑ ge okööbø kinni, “Jɑldwøng, møg-ɑ ɑ́kwøb yi jɑlɑni keny-ɑ ɑ́bëëde e onëënø ɑ́pɑr yi wøn; ɑ́kööb kinni, ‘Yɑ ódhwödh kì yij thøø kì bɑng cyɑ̈ng ɑ́dɑ̈g.’ 64De muuj ki cigg kinni koor röre kidøøj gïti keny-ɑ óthumi cyɑ̈ng ɑ́dɑ̈g, kipe jøbɑnge óbï kɑ dële kwɑl yi gen, kɑ teedø köbbi gen kinni, ‘Ádwöög wɑ̈g kì yij thøø.’ Kɑ møg-ɑ ɑ́bɑ̈ɑ̈n kì tyeli mɑl, lod yi møg-ɑ óbï kì cyɑ̈n.”
65Aköbbi gen yi Pilɑtø kinni, “Kɑ̈bbi wun ki jøg mø kurø, kɑ kenyɑni kor kidøøj.”
66Akedh gen, kɑ dhø rörø mul kidøøj, ɑwïy gen ki jøg korii.
Currently Selected:
Mt 27: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
