Mt 22
22
Gɑ́ji Thyëg
(Lk 14.15-24)
1Kɑ ge cigi köbbø yi Yëso ki gɑ́j møøgø kinni, 2“Pödhi Jwøk pɑ̈r ki rɑ̈dh mɑ ɑ́göög ki thyëëg wɑ̈de. 3Kɑ rɑ̈nhɑni bɑ̈ngge öre be cwøli ji-ɑ ɑ́ryej, kɑ ge óbɑ̈nyø bëënø. 4Kɑ cig-ɑ ör ki bɑ̈ngg møøgø kinni, ‘Köbbu tyëng-ɑ ɑ́ryej kinni, yɑ ɑ́rum ki gwøg ki gïncɑm; dhögɑ, dhög-ɑ døngø geki røjj-ɑ cwɑɑdhø ɑ́rum ki ngɑlø yi yɑn, jɑmmì bënn ɑ́rum ki pyëlø. Bïu be thyëg.’ 5De kɑ̀ bëëd kwøbbɑni bong per gen kì yï gen, ɑcög ge pɑ kedh, kɑ men kedh-ɑ pwödhe, kɑ megø kedh-ɑ cuge. 6Kɑ bɑ̈ngge mɑg yi ji møøgø kì kelli gen, kɑ gï göggi gen ki gïnrɑj, kɑ ge nɑ̈g. 7Kɑ rɑ̈dh owërø, kɑ oödø ki jøliny, kɑ tyëng-ɑ ɑ́nɑ̈g bɑ̈ngge nɑ̈g, kɑ kɑɑl gen rɑ̈b. 8Codhe, ɑköbbe bɑ̈ngge kinni, ‘Jɑmmi thyëg ɑ́rum ki pyëlø, de tyëng-ɑ ɑ́ryej pɑ døøj ki thegø. 9Kedhu yethi yëëth, kɑ tyëng-ɑ óyod yi wun bënn cwööl wun kej thyëg.’ 10Kɑ bɑ̈nggɑni kedh-ɑ yethi yëëth, kɑ ji-ɑ ɑ́yod yi gen bënn cøng yi gen; tyëngrijjø kí tyëngdøj bënn, kɑ kej nywöm opɑ̈ngø yi wëll.
11“De kɑ ɑ́bëën rɑ̈dh be lidhi tyëng-ɑ ɑ́ryej, ɑlïdhe ki jɑl me pɑ rugø ki ógødh nywöm. 12Kɑ gø pyëje kinni, ‘Mɑ̈dh, yï ɑ́wɑ̈nhi keny kidï, e rií bong ógødh nywöm?’ Kɑ ojɑdø ki gïn løøge. 13#Mt 8.12; 25.30; Lk 13.28 Codhe, kɑ rɑ̈dh bɑ̈ngge köbbe kinni, ‘Twöju cinggi jɑlɑni kí tyelle, kɑ leengu wɑ̈g yij muudhø, kunɑni dɑ ywøg kí ngenyyi leg.’ ”
14Atyëg Yëso kwøbbe kinni, “Ji mø gïïr ɑ ɑ́cwøl, dɑ́ ji mø nøg ɑ ɑ́yieny.”
Pyëji Coli Gwɑ̈j
(Mk 12.13-17; Lk 20.20-26)
15Codhe, ɑkedh Jøpɑresì, kɑ dhøggi gen nywɑg gen kipe kinni o gø myen yi gen kì ri gïn-ɑ ókwøbe. 16Kɑ Jøpɑresì kí jø Ërödøs ör gen yïe. Kɑ ge okööbø kinni, “Jɑlpwönyø, ngɑ̈nyi yi wøn kinni, møgí bɑ dyër, o yuu Jwøk nyi pwönyi yi yïn kì ri kwøbb-ɑ dyër, yï pɑ nyi böggi yi ji, mɑ́ e bong ngɑn nyi yieny yi yïn. 17Köbbí wøn møg-ɑ rømmi yi yïn. Bɑ ɑyïëy yi cigg kinni, nyi cudi wɑ Kɑysɑr ki gwɑ̈j?”
18De gïn-ɑ ɑ́dwɑddi gwøgø yi gen ngɑ̈nyi yi Yëso, kɑ okööbø kinni, “Wun ɑ tyëngwëënyø, wude ɑ pɑ̈nyu yɑn? 19Nyudhu yɑn ki ngyënyi gwɑ̈j.”
Kɑ ngyënyø ɑ́kyel mëggii, 20ɑpyëje gïn kinni, “Á ngïji men kí gweddi men ek?”
21Kɑ ge ólöggø kinni, “Mø Kɑysɑr.”
Kɑ gï köbbe kinni, “Keløg ɑ́ kinøw, mëggu jɑmmi Kɑysɑr Kɑysɑr, kɑ jɑmmi Jwøk mëggu Jwøk.”
22Keny-ɑ ɑ́lïngi gen møgɑni, kɑ ge ongɑ̈ngø, ɑwiy ge gøn, kɑ ge ókedhø.
Pyëj kì ri Dhwödhø kì Yij Thøø
(Mk 12.18-27; Lk 20.27-40)
23 #
Gwøg 23.8
Kɑ kì cyɑ̈ngɑni ceth, ɑbëën Jøsɑduk yïe, gen ɑ tyëng-ɑ nyi kööbø kinni, i bong dhwödhø kì yij thøø. Kɑ gø pyëj gen kinni, 24#Jølø 25.5 “Jɑlpwönyø, Mosɑ̀ ɑ́kööb kinni, ‘Keløg dhɑnhø othøø de yïe bong wɑ̈de, lɑɑg cyëge yi ómen o nywøle wïj ómen.’ 25De ɑ́dɑ nyiimëëg ɑ́bïryew. Kɑ nyel-ɑ dwøng ónyömø, kɑ othøø e bong wïje, kɑ cyëge lɑg yi nyel-ɑ bɑnge. 26Kɑ othøø ni menɑni, kí dɑ̈ɑ̈g gen thyew, gïti ri bïryeew gen. 27Athøw ngɑnɑni kì cyɑ̈ɑ̈n gen bënn. 28Ngɑnɑni óbëëd ɑ́ cï men, keny-ɑ ódhwödh ji kì yij thøø, mɑ́ e ɑ́bëëd ɑ́ cï gen bënn?”
29Kɑ mø gen løøg yi Yëso kinni, “Wu ɑ́bɑ̈jji, mɑ́ wɑ̈nyi kwërø kwïj yi wun geki tegi Jwøk. 30Keny-ɑ ódhwödh ji kì yij thøø, bong ngɑn-ɑ ónyömi wɑlɑ̀ bong ngɑn-ɑ ónywøm, de ji óbëëd ge nɑ wëywödd kì mɑl. 31De keløg ɑ́ per dhwödhø kì yij thøø, møg-ɑ ɑ́köbbi wun yi Jwøk nuti rɑɑng wun kinni, 32#Kedhø 3.6 ‘Yɑ bɑ Jwøøg Abrɑhɑm, o yɑ bɑ Jwøøg Isɑɑk, o yɑ bɑ Jwøøg Yɑgob.’ Jwøk pɑth ki Jwøøg tyëngthøø, de bɑ Jwøøg tyëngnëënø.”
33Keny-ɑ ɑ́lïngi møgɑni yi teedø, kɑ ge ongɑ̈ngø yi pwönye.
Cigg-ɑ Døngø
(Mk 12.28-34; Lk 10.25-28)
34Keny-ɑ ɑ́lïng Jøpɑresì kinni, dhøggi Jøsɑduk nɑ̈ɑ̈g en, ɑcugi gen kì kej ɑ́kyel. 35#Lk 10.25-28 Kɑ Yëso pyëj yi jɑl ɑ́kyel kì kelli jøpwönyi Cigg, e pɑ̈ny-ɑ gøn, kinni, 36“Jɑlpwönyø, cigg-ɑ døngø kì kelli cigg bënn, bɑ cigg ɑ́?”
37 #
Jølø 6.5
Alöggi Yëso kinni, “ ‘Mɑɑr Wöw Jwøgí, ki pyëwí bëne, kí wëyí bëne, kí rummí bënn.’ 38Bene cigg-ɑ mɑl; ɑ døngø kibøli cigg bënn. 39#Kwɑrr 19.18 O ryeew gen nɑ en kinni, ‘Mɑɑr ngɑn-ɑ butí ni kɑ̀ mɑɑr rií.’ 40Ciggɑni ryeet ɑ bɑ byerri cigg geki pwönyi jøtöng bënn.”
Pyëj kì ri Kwɑɑr Debïd
(Mk 12.35-37; Lk 20.41-44)
41Kɑ̈ng-ɑ ɑ́bëëd Jøpɑresì ying-ɑ kej ɑ́kyel, ɑpyëëj gen yi Yëso kinni, 42“Wu rum ɑ dï kì ri Mesiy? Bɑ kwɑɑr men?”
Alöggi gen kinni, “Bɑ kwɑɑr Debïd.”
43Kɑ gï köbbe kinni, “Dɑ́ kipe ngø ɑ cwøllii yi Debïd ɑ́ Wɑ̈n, kì bɑng pwönyi Wëy? Kɑ ɑ́kööbe kinni,
44 #
Wör 110.1
‘Wɑ̈ɑ ɑ́köbbi yi Jwøng-ɑ Ácwɑ̈ɑ̈j kinni,
‘Bëëd kì wïj kyëjɑ
gïti keny-ɑ ócïbɑ tyëng-ɑ mɑɑn yïn thɑ́ tyellí.’
45Keløg e cwølli yi Debïd ɑ́ Wɑ̈n, Mesiy óløg kwɑre kidï?”
46De bong ngɑn mɑ ɑ́cuggi løøgi kwøbbe, kɑ teedø bëne obwøgø, kɑ gø wiy gen ki pyënyø.
Currently Selected:
Mt 22: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
