Mt 19

Pwönyi Yëso kì ri Tɑ̈ng

(Mk 10.1-12)

1Keny-ɑ ɑ́rum Yëso ki kwøbi møgɑni, ɑdhwödhe kì myërri Gɑlelì, kɑ wɑ̈dh-ɑ myërri Yeudiyɑ̀, kì løøg Nɑm Urdun. 2Kɑ ji mø gïïr løg-ɑ bɑnge, kɑ gï yiele ki gïg-ɑ ri gen kì kunɑni.

3Kɑ Jøpɑresì bï-ɑ yïe, kɑ gø pyëj gen, ge pɑ̈ny-ɑ gøn ki kwøb kinni, “Bɑ ɑyïëy yi Ciggee kinni, jɑlø ócuggø tɑ̈ngi cyëge kipe göj?”

4 # Cɑ̈gø 1.27; 5.2 Kɑ ólöggø kinni, “Nuti rɑɑng wun cøn kinni, Ngɑn-ɑ ɑ́cwɑ̈j dhɑnhø kì tyeli mɑl, ɑ́cwɑ̈j-ɑ jɑlø kí dhɑjø? 5#Cɑ̈gø 2.24 Kɑ Jwøk okööbø kinni, ‘Bene ɑ bɑnge nyi wiy dhɑnhø wïye geki meye, kɑ ómɑ̈gø kì ri cyëge, kɑ ge ogöögø ki ɑ́kyel.’ 6De ge pɑth ki ji ɑ́ryew këti, de ge bɑ dhɑnhø ɑ́kyel. Gïn-ɑ ɑ́reb yi Jwøk, pɑ cuggi dɑ̈ngø yi dhɑnhø.”

7 # Jølø 24.1-4; Mt 5.31 Kɑ pyëj yi Jøpɑresì kinni, “Dɑ́ kipe ngø ɑ ɑ́cïg Mosɑ̀ kinni, jɑlø nënge cyëge ki wɑ̈nyi tɑ̈ng, kɑ gø ryeme?”

8Kɑ gï köbbe kinni, “Mosɑ̀ ɑ́yïëy kinni, nyi tɑ̈ng wun mɑ̈nni wun, mɑ́ wu ɑ́ceg-ɑ dhɑ̈lø ki pwönyø. De nuti bëëd ɑ nøw kì ri cwɑ̈ji lɑ̈bø. 9#Mt 5.32; 1 Kör 7.10-11 De yɑ köbb-ɑ wun kinni, ngɑn tɑ̈ng cyëge, e nuti røngø ki jɑlø megø, kɑ ónyömø, jɑlɑni ɑ́røngi. O ngɑn-ɑ ɑ́tɑ̈ng yi en, ɑ́gwøøge ngetorøg.”

10Aköbbii yi jøbɑnge kinni, “Keløg møgɑni bëëd ɑ nøw kì kɑɑm dhɑnhø geki cyëge, lɑ̈w cögi dhɑnhø e pɑ nyömi.”

11Kɑ gï köbbe kinni, “Møgɑni pɑ cuggi lïngø yi teedø bëne den-ɑ́ tyëng-ɑ ɑ́mëggi møgɑni keti gen. 12Gïg-ɑ per gen pɑ nyi nyömi ji bɑ̈nni; mɑ́ e dɑ ji mɑ ɑ́nywøl kinøw, o møøgø ɑ́gwøg-ɑ yi ji, o møøgø ri gen ɑ́gwøg gen kinøw kipe Pödhi Jwøk. Ngɑn cuggi yïëyi møgɑni wiy yïëye.”

Kwëngi Othønhø yi Yëso

(Mk 10.13-16; Lk 18.15-17)

13Kɑ ji møøgø kɑ̈n-ɑ yï Yëso ki othønhø kipe kinni o cingge thɑɑnye kömi gïn, o gï kwënge. Kɑ tyëngɑni cyɑ̈r yi jøbɑnge. 14Kɑ Yëso okööbø kinni, “Wiy othønhø bï gen yïɑ; ge ko mɑ̈ɑ̈n wun, mɑ́ Pödhi Jwøk bɑ mi gen.”

15Athɑɑnye cingge kömi gïn, kɑ odhwödhø kì kenyɑni.

Wøm-ɑ Kɑ̈rø

(Mk 10.17-31; Lk 18.18-30)

16Kɑ wøb megø bï-ɑ yï Yëso, ɑkööbe kinni, “Jɑlpwönyø, gwøgɑ ngø ɑ døj, o yɑ yïddɑ ki nënn-ɑ ɑtheer?”

17Kɑ gø köbbe kinni, “Á kipe ngø ɑ pëjji yɑn gïn-ɑ døj? Bɑ nget ɑ́kyel kete ɑ døj. De keløg yï dwɑdd-ɑ yïddø ki nënnì, mïdhí Cigg.”

18 # Kedhø 20.13-16; Jølø 5.17-20 Kɑ okööbø kinni, “Á cigg ɑ́?”

Akööb Yëso kinni, “Yï ko nɑ̈gi ki dhɑnhø; yï ko niin ki ngɑn nuti nywøøm wun ri wun; yï ko kwɑ̈ɑ̈d; wɑɑd wun ko gøøny ki kwøbbi pyed. 19#Kedhø 20.12; Jølø 5.16; Kwɑrr 19.18 Wør wïyí kí meyí, kɑ ngɑn-ɑ butí mɑɑr ni kɑ̀ mɑɑr rií.”

20Alöggi nyelɑni kinni, “Møgɑni di mïdhø yi yɑn bënn. Dɑ́ gïn këti ɑ dwɑddi, o gwøgɑ?”

21Aköbbii yi Yëso kinni, “Keløg yï dwɑdd-ɑ bëëdø yï tir, kedh, kɑ jɑmmí ngeew wɑ̈g, kɑ ngyënyy-ɑ óngeew gen pɑ̈ngí kì kelli tyëng-ɑ ɑbuur, o yï óyïddi ki kɑ̈r kì Pödhi Jwøk, kɑ yï lug bɑngɑ.”

22De kɑ ɑ́lïngi møgɑni yi nyelɑni ɑkedhe, yije bɑɑrø, mɑ́ e ɑ́bëëd yïe dɑ jɑmmì mø gïïr cɑrø.

23Kɑ Yëso jøbɑnge köbbe kinni, “Yɑ köbb-ɑ wun kidyër kinni, kedhi Pödhi Jwøk teeg kipe ngɑn yïe di jɑmmì mø gïïr. 24De yɑ köbb-ɑ wun këti kinni, kɑ̈li ɑmɑlø wɑɑng ɑlïbrøw, yööd kibøli kedhi ngetikɑ̈r yij Pödhi Jwøk.”

25Keny-ɑ ɑ́lïngi møgɑni yi jøbɑnge, ɑmuum wɑ̈thi gen ki mendwøng, kɑ ge okööbø kinni, “Kɑ̀ bëëde kinøw, dɑ ngɑn cuggi yielø?”

26Aköbbi gen yi Yëso kinni, “Møgɑni pɑ cuggi lwɑ̈ngø yi dhɑnhø, de bong gïn nyi dhɑl Jwøk.”

27Alöggi Pïtør kinni, “Jɑmmi wøn bënn ɑ́wiy wøn piny, kɑ wø bï-ɑ bɑngí, ɑ́ gïn ɑ óyod yi wøn?”

28 # Mt 25.31; Lk 22.30 Aköbbi gen yi Yëso kinni, “Yɑ köbb-ɑ wun kidyër kinni, kì piny-ɑ nyɑ̈n, keny-ɑ ópëggi Nyɑɑr Dhɑnhø wïj kwøm kì yij dhwɑ̈nge, wu ópëggi wɑ̈thi kwømm pyɑ̈rø wïdɑ́ryew, wun ɑ tyëng-ɑ ɑ́cyɑ̈dhi kì bɑngɑ, wu jɑɑg-ɑ kɑ̈lli Isrɑil gɑ pyɑ̈rø wïdɑ́ryew. 29Ngɑn-ɑ ɑ́wiy ud, kí nyiimëëg-ɑ cwøw kí mɑ̈nn, kí wïye, kí meye, kí nyige geki pwödhe kipe nyingɑ, óyïddi ki møg lod gen ki tyel miyø, kɑ thödhi ki nënn-ɑ ɑtheer. 30#Mt 20.16; Lk 13.30 Ji mø ngenyø møg-ɑ ying mɑl ɑnɑn ódøøg cyɑ̈n, o møg-ɑ cyɑ̈n óying mɑl.

Currently Selected:

Mt 19: shkDCB

Highlight

Copy