Lk 3

Pwönyi Jøn Jɑljwɑ̈g

(Mt 3.1-12; Mk 1.1-8; Jn 1.19-28)

1Ábëëd ɑ́ Tiberyøs Kɑysɑr ɑ jyɑ̈gø ɑ́ rɑ̈nhdwøng, e runne bɑ pyɑ̈rø wïdɑ́bïj kì yij lɑwø. Kì bøli kenyɑni Pilɑtø jɑl Pøntøs, ɑ ɑ́bëëd ɑ́ modïr mi Yeudiyɑ̀, o Ërödøs bɑ modïr mi Gɑlelì, o Pïlïp ómï Ërödøs bɑ modïr mi Ithuriyɑ̀, o Trɑkonitì geki Lisɑniyɑ̀ bɑ gen ɑ jyɑ̈gø kì Abilenɑ̀. 2Anɑ̀ geki Kɑyɑpɑ̀ ɑ́bëëd gɑ ókwërr-ɑ døngø. Kì bøli kenyɑni ɑ ɑ́bëën wööni Jwøk yï Jøn wɑ̈d Dhekɑriyɑ̀ e ying-ɑ yij pɑ̈l. 3Acyɑ̈dhe kì yethi myërri kömi Nɑm Urdun e cïj-ɑ ji kinni yewi gen, o ge jwɑ̈ɑ̈g, o lɑ́ɑ̀w ódwöög piny kipe orøøg gen.

4 # Icɑ 40.3-5 (LXX) Ni kɑ ógwedii kì yij wɑ̈nyi Icɑyɑ̀ jɑltöng kinni,

“Dɑ cwɑg møg cwöddi kì yij pɑ̈l kinni,

Gwiru yuu Wë.

Gwøgu yöö ɑ́ óbödh kipere.

5Thør kɑ̈jj-ɑ bɑ mɑ̈dd bënn.

Kɑ kïttì geki ótøng bënn wɑ̈thi gen pɑ̈ɑ̈r ki piny.

Tyeeny yëth-ɑ bɑ ɑ́dud.

Kɑ yëth-ɑ bɑ gøngì gwøg ge lïw.

6O dhɑnhø bëne lïdhe ki yïën-ɑ kɑ̈ɑ̈l yï Jwøk.”

7 # Mt 12.34; 23.33 Kɑ ji mø gïïr møg-ɑ ɑ́bï yïe be jwɑ̈ɑ̈gø, köbbe kinni, “Wu bɑ thöllì! Á men ɑ ɑ́töddi wun kinni, rengi wun yi rɑ̈ji pyëw Jwøk? 8#Jn 8.33 Göög wun ki gïg nyodh kinni wu ɑ́yewi. Kɑ wu ko kööb ki pëthi wun kinni, ‘Abrɑhɑm bɑ kweyi wøn.’ Yɑ köbb-ɑ wun kinni, Jwøk ócuggø kɑ̈ni wɑ̈g kì ri kïttì møg ki kwɑrri Abrɑhɑm. 9#Mt 7.19 Dørø ying-ɑ ri tyeli yɑdh ɑnɑn, yɑnh-ɑ pɑ kɑ̈ni ki nywøl mø døøj, ceg kɑ ngøl piny kɑ leeng mɑc.”

10Kɑ Jøn pyëj yi teedø kinni, “Gwøg wøn ngø?”

11Alöggi Jøn kinni, “Ke di ngɑn yïe di ógudh ɑ́ryew, nënge ngɑn-ɑ yïe bong ógødh. Ke di ngɑn yïe di gïncɑm, nywɑɑg gïncɑmɑni thyew.”

12 # Lk 7.29 Cɑgg ɑ́ jøgwɑ̈j, ge ɑ́bï yï Jøn thyew be jwɑ̈ɑ̈gø. Kɑ Jøn pyëj yi gen kinni, “Jɑlpwönyø! Gwøg wøn ngø?”

13Aköbbi gen yi Jøn kinni, “Wu ko nyi kɑ̈bbi ki gwɑ̈j mø gïïr kibøli men-ɑ ɑ́köbbi wun.”

14Kɑ pyëj yi ɑlɑthkerr kinni, “O wøn ø, gwøg wøn ngø?”

Aköbbi gen yi Jøn kinni, “Ji ko nyi cir wun, o wu thödhi yi gen ki ngyëny, kɑ wu ko nyi mënni kömi gen ki kwøb. Nyi cöög wun ri ngyënyy-ɑ nyi culi wun kipe gwøøg wun.”

15Mɑ́ teedø ɑ́bëëd ge yïd-ɑ bëëni Mesiy, ge ɑ́cɑ̈gi ki pyënyi ri gen mɑ løge’ Jøn ɑ bɑ Mesiy. 16Aløøg kwøbbi teedø yi Jøn kinni, “Yɑ jwɑ̈ɑ̈g-ɑ wun ki pï. De dɑ ngɑn megø me bï, me teg kibølɑ, yɑ pɑ døøj ki gønyi wɑrre kì tyelle. Wu ójwɑ̈ɑ̈g yi en kɑ mɑc geki Wëykwërø. 17Óbï e kɑ̈ll-ɑ ólɑng me kwööde ki byelle; byell-ɑ døj ókïdhe yethi thebbe, de cong órɑ̈b yi en ki mɑc me pɑ thøw.”

18Kɑ obëëdø e pwöny-ɑ Wöndøj, kɑ gï nyi cïje ki kwøb møøgø mø gïïr. 19#Mt 14.3-4; Mk 6.17-18 De Jøn Ërödøs ɑ́cɑye kinni, “Yïde ɑ ɑ́kwɑɑny Ërödiyɑ̀ cï ómyëw? O yïde ɑ nyi göög ki jɑmmì mø rijjø?” 20De Ërödøs ɑ́yöd e ceg-ɑ gwøg ki gïjø me pëddi rɑ̈jø; Jøn ɑ́kïdhe ød mɑg.

Jwɑ̈ngi Yëso

(Mt 3.13-17; Mk 1.9-11)

21Keny-ɑ ɑ́rum ji ki jwɑ̈ɑ̈gø bënn yi Jøn, ɑjwɑ̈ɑ̈g Yëso thyew. Kɑ̈ng-ɑ ɑ́bëëd Yëso e ókwɑ̈jjø, ɑyieb mɑl ree. 22#Cɑ̈gø 22.2; Wör 2.7; Icɑ 42.1; Mt 3.17; Mk 1.11; Lk 9.35 Kɑ Wëykwërø bï-ɑ köme e nɑ ɑkur. Kɑ cwɑg obëënø ge kɑ̈ɑ̈l-ɑ mɑl kinni, “Yï bɑ dïl wɑ̈dɑ; yï mɑɑr yi yɑn ki mendwøng, pyëwɑ med ki yïn.”

Kweyyi Yëso

(Mt 1.1-17)

23Yëso runne ɑ́bëëd gɑ pyɑ̈r ɑ́dɑ̈g keny-ɑ ɑ́cɑ̈ge ki gwøge. Teedø ɑ́rum i Yëso bɑ wɑ̈d Yosep. Yosep wɑ̈d Elì. 24Elì wɑ̈d Mɑthɑt, Mɑthɑt wɑ̈d Leebì. Leebì wɑ̈d Melkì. Melkì wɑ̈d Yɑnɑy, Yɑnɑy wɑ̈d Yosep. 25Yosep wɑ̈d Mɑtɑthiyɑ̀. Mɑtɑthiyɑ̀ wɑ̈d Amos. Amos wɑ̈d Nɑum. Nɑum wɑ̈d Eslì. Eslì wɑ̈d Nɑgɑy. 26Nɑgɑy wɑ̈d Mɑɑth. Mɑɑth wɑ̈d Mɑtɑthiyɑ̀, Mɑtɑthiyɑ̀ wɑ̈d Semein. Semein wɑ̈d Yosek. Yosek wɑ̈d Yodɑ̀. 27Yodɑ̀ wɑ̈d Yöɑnɑn. Yöɑnɑn wɑ̈d Reesɑ̀. Reesɑ̀ wɑ̈d Dherubɑbïl. Dherubɑbïl wɑ̈d Ceɑltiel. Ceɑltiel wɑ̈d Nerì. 28Nerì wɑ̈d Melkì. Melkì wɑ̈d Adì. Adì wɑ̈d Kösɑm. Kösɑm wɑ̈d Elmɑdɑm. Elmɑdɑm wɑ̈d Er. 29Er wɑ̈d Jöcwø. Jöcwø wɑ̈d Eliedher. Eliedher wɑ̈d Yörïm. Yörïm wɑ̈d Mɑthɑt. Mɑthɑt wɑ̈d Leebì. 30Leebì wɑ̈d Simeon. Simeon wɑ̈d Yeudɑ̀. Yeudɑ̀ wɑ̈d Yosep. Yosep wɑ̈d Yönɑm. Yönɑm wɑ̈d Eliɑkim. 31Eliɑkim wɑ̈d Meleɑ̀. Meleɑ̀ wɑ̈d Menɑ̀. Menɑ̀ wɑ̈d Mɑtɑthiyɑ̀. Mɑtɑthiyɑ̀ wɑ̈d Nɑthɑn. Nɑthɑn wɑ̈d Debïd. 32Debïd wɑ̈d Yesì. Yesì wɑ̈d Obed. Obed wɑ̈d Boɑdh. Boɑdh wɑ̈d Sɑlmön. Sɑlmön wɑ̈d Nɑɑ̈cön. 33Nɑɑ̈cön wɑ̈d Aminɑdɑb. Aminɑdɑb wɑ̈d Admïn. Admïn wɑ̈d Arnì. Arnì wɑ̈d Ëdhrön. Ëdhrön wɑ̈d Peredh. Peredh wɑ̈d Yeudɑ̀. 34Yeudɑ̀ wɑ̈d Yɑgob. Yɑgob wɑ̈d Isɑɑk. Isɑɑk wɑ̈d Abrɑhɑm. Abrɑhɑm wɑ̈d Terɑ̀. Terɑ̀ wɑ̈d Nɑor. 35Nɑor wɑ̈d Serug. Serug wɑ̈d Reu. Reu wɑ̈d Peleg. Peleg wɑ̈d Eber. Eber wɑ̈d Celɑ̀. 36Celɑ̀ wɑ̈d Kenɑn. Kenɑn wɑ̈d Arpɑkɑd. Arpɑkɑd wɑ̈d Sɑm. Sɑm wɑ̈d Nöö. Nöö wɑ̈d Lɑmɑk. 37Lɑmɑk wɑ̈d Mɑtucɑlè. Mɑtucɑlè wɑ̈d Enök. Enök wɑ̈d Yɑred. Yɑred wɑ̈d Mɑɑ̈lɑlel. Mɑɑ̈lɑlel wɑ̈d Kenɑn. 38Kenɑn wɑ̈d Enök. Enök wɑ̈d Ceeth. Ceeth wɑ̈d Adɑm. Adɑm wɑ̈d Jwøk.

Currently Selected:

Lk 3: shkDCB

Highlight

Copy