Lk 21

Muuny-ɑ Dyër

(Mk 12.41-44)

1Kɑ̈ng-ɑ ɑ́bëëd Yëso e nenn-ɑ ji kɑ̀ lëngi gen yij sɑnduug ngyënyy-ɑ nyi muuj kì Kengø, ɑ́lïdhi ki tyëngkɑ̈rì mø gïïr ge lëng-ɑ yij sɑndug ki ngyëny. 2Codhe, ɑlidhe ngɑndhɑjø mɑ thwöm me wɑnge cɑn, e lëng-ɑ yij sɑndug ki gïrïc ɑ́ryew. 3Kɑ okööbø kinni, “Yɑ köbb-ɑ wun kidyër kinni, thwöm-ɑ bɑ ɑbuur èn, bɑ en ɑ ɑ́muuj ki ngyëny mø ngenyø kibøli ji møgɑk bënn. 4Ge ɑ́muuj ɑ ri ngyënyy-ɑ ɑ́döngi piny kì bɑng kɑ ɑ́rum gen ki ngyew ki jɑmm-ɑ dwɑddi yi gen. Ngɑndhɑjø men wɑnge cɑn ki mendwøng, de ɑ́muuj-ɑ ngyënyy-ɑ di ngëëwe ki gïn cɑm yi en.”

Kwøbi Kwøbbi Cøøri Kengø Piny yi Yëso

(Mt 24.1-2; Mk 13.1-2)

5Kwï jøbɑng Yëso ɑ́bëëd ge okööbø kì ri Kengø, kí kër-ɑ ótɑɑgii ki kïttì mø myëër, kí ngenyi jɑmm-ɑ nyi mëggi Jwøk. De Yëso ɑ́løøg-ɑ kinni, 6“Keløg ɑ́ per gïg-ɑ nenni yi wun ek bënn, bøli keny megø obëënø; owɑ̈nhi bøli kenyɑni, bong kït ɑ́kyel men-ɑ ówiy e ócungø kì kömi men-ɑ kyeelø; kïttɑni bënn ócøør piny.”

Akørr kí Ryɑ̈g

(Mt 24.3-14; Mk 13.3-13)

7Apyëëj Yëso yi teedø kinni, “Jɑlpwönyø, ɑ́ kì wɑɑng ɑ ócwöb gïg ni møgɑni? Á ngø ɑ óbëëd ɑ́ ngïji, me nyodh kinni kej cwöbi gen ɑ́cyɑ̈ngi?”

8Alögge kinni, “Nëën wun kidøøj kipe wu ówëny. Ji mø gïïr óbï ki nyingɑ ge okööbø kinni, ‘Bene yɑn en.’ Kí kinni, ‘Bøli kenyɑni ɑ́wɑ̈nhi!’ De wu ko løg bɑng gen. 9Keny-ɑ ólïng wun ki wöddi liny geki ɑgwɑg, wu ko bwøg, mɑ́ gïgɑni di dwɑddø o ge cwöb gen, de ge pɑ wɑngi kinni thumi piny ɑ́cyɑ̈ngi.”

10Aköbbe gïn kinni, “Pödhh ónyïɑ̈ggi ki pödhh-ɑ kyeelø. Kɑ rɑ̈nhì ónyïɑ̈ggø ki rɑ̈nhh-ɑ kyeelø. 11Piny ónhɑ̈nhi kì kɑ̈jj mø gïïr, kɑ kɑ̈j ómɑ̈gø, kɑ yømø nɑ̈ɑ̈g tɑɑy-ɑ kelli ji. Gïg böggi mø gïïr ócwöb, kɑ ngïjjì mø døngø obëënø ge kɑ̈ɑ̈l-ɑ mɑl. 12De kɑ̈ng-ɑ nuti cwööb gïgɑni, wu ómɑg yi teedø, kɑ wu göggi gen ki gïgrijjø. Kɑ wu nyi gøøny gen kì sinɑgøgg, kɑ wu kïdhi gen uddi mɑg, kɑ wu kïdhi be gøønyø kì bøli rɑ̈nhì geki modïrr, kipe nyingɑ. 13De bene bøli kenyɑni ɑ óyod yi wun e døøj ki kwøbi Wöndøj. 14#Lk 12.11-12 Pëthi wun ko nyi mɑ̈ɑ̈g ki olïng kipe gïn-ɑ ókwøb yi wun. 15Wu óthödhi yi yɑn ki peli wïj men nyi kwøb wun møg pɑ cuggi løøgø yi tyëngmɑ̈ɑ̈nø, wɑlɑ̀ bong bɑ̈jjø men-ɑ óyod yi gen kì dhøggi wun. 16Cɑgg ɑ́ wëëg wun geki mëëg wun, kí nyiimï wun, kí wɑddi wun, kí mɑ̈dhhi wun bënn, ge ómɑ̈ni ki wun, kɑ kwï wun nɑ̈g yi gen. 17Wu ómɑɑn yi ji bënn kipe nyingɑ. 18De bong yëyø ɑ́kyel men-ɑ ódëëm kì wɑ̈thi wun. 19Wëyi wun óyiel yi wun kɑ mïdhi yïëyø mi wun.

Kwøbbi Yëso kì ri Rënyi Yerusɑlem

(Mt 24.15-21; Mk 13.14-19)

20“Keny-ɑ ólidhu Yerusɑlem e ótyegø yi yɑy me dwøng, kɑ wu ngɑ̈nyu wøw kinni kej cøøre piny ɑ́cyɑ̈ngi. 21Kì bøli kenyɑni, rengi tyëng Yeudiyɑ̀ kelli kïttì. Kɑ tyëng Yerusɑlem rengi gen wɑ̈g kì kɑɑl, kɑ tyëng-ɑ buti kɑɑl ko kedhi yije. 22#Odhe 9.7 Mɑ́ cyɑ̈nggɑni óbëëd gɑ ‘Cyɑ̈nggi Cɑ́y’ møg-ɑ bɑ ɑgwed kì yethi wɑ̈jji kwërø. 23Tyëng-ɑ mɑ̈nn møg-ɑ óbëëd gɑ ɑ́yɑjj geki møg-ɑ mïdhi ki othønhø kì bøli kenyɑni, ri gen dɑ cyën! Orɑng me dwøng ópɑ̈dhi kömi piny men, Jwøk pyëwe órënyi ki ji møg. 24Kwï gen ónɑ̈g, kɑ kwï gen kïdhi pödhh møøgø gɑ ɑmɑgg. Yerusɑlem ócøør piny yi ji mø pɑth ki Yeud, o óbëëd e onyønø yi jurrɑni gïti keny-ɑ óthumi kej gen.

Bëëni Nyɑɑr Dhɑnhø

(Mt 24.29-31; Mk 13.24-27)

25 # Icɑ 13.10; Idhki 32.7; Yöiil 2.31; Nyudhø 6.12-13 “Dɑ ngïjjì møg-ɑ ócwöb kì ri cɑ̈ng kí dwɑ̈y, kí kyell. Pödhh bënn óbëëd ge óböggø wɑ̈thi gen cungø kì kömi piny keny, ge bögg-ɑ ruuri nɑɑm omelø kí ngwölli ɑpɑgø. 26Ji ónɑ̈g yi wɑ̈ɑ̈rø; wɑ̈thi gen ócungi yi gïn-ɑ ópɑ̈dhi kömi piny e nɑ menɑni, mɑ́ jɑmm-ɑ teg kì mɑl ceg kɑ rungø kì kɑ̈jji gen. 27#Dɑn 7.13; Nyudhø 1.7 Codhe, o Nyɑɑr Dhɑnhø lidh yi ji e kɑ̈ɑ̈l-ɑ mɑl kì yij pøølø, ki tegø me dwøng geki mɑ̈r me dwøng. 28Keny-ɑ ócɑ̈gi gïgɑni ki cwöbø, lïïdhu mɑl kɑ wɑ̈thi wun tïng wun, mɑ́ bøli keny-ɑ óyieel wun ɑ́cyɑ̈ngi!”

Pwönyø kì ri Ólɑm

(Mt 24.32-35; Mk 13.28-31)

29Codhe, ɑwɑɑj gɑ́j møg yi Yëso kinni, “Lidh wun ólɑm geki yenh-ɑ kyeelø. 30Kenyi nyog gen, kɑ yod yi wun kinni cwir ɑ́cyɑ̈ngi. 31Ki yuu-ɑ ni menɑni ceth, keny-ɑ ólidh wun gïgɑni ge ocwöbø, óyod yi wun kinni Pödhi Jwøk ɑ́cyɑ̈ngi.

32“Yɑ köbb-ɑ wun kidyër kinni, gïgɑni ócwöb bënn, ji møg-ɑ nud ɑnɑn nudd ge onëënø. 33Mɑl kí piny ólɑ̈ɑ̈ny, de kwøbbɑ pɑ lɑ̈ɑ̈ny.

Bëëd Wun Wu Onëënø

34“Koru ri wun, wu ko nyi tyëg piny wu ceg-ɑ cɑm, o wu ceg-ɑ mɑdh, wɑlɑ̀ wu ceg-ɑ tɑg kì ri jɑmmi kömi piny. Keløg wu ógöögø kinøw, wu pɑ̈ɑ̈y-ɑ piny yi cyɑ̈ngɑni kɑ wu mɑge, 35ni kenyi mɑ̈gi ɑ́kɑ̈llì. Gïgɑni ópɑ̈dhi kömi ji bënn kì kömi piny. 36De nëën wun kì yethi cyɑ̈ng bënn. Kɑ wu nyi kwɑ̈jji wun ceth, o wu óbodh wun keny-ɑ ócwöb gïgɑni bënn, o wu ócuggi wun ki cung kì bøli Nyɑɑr Dhɑnhø.”

37 # Lk 19.47 Kɑ Yëso nyii rïïjø e pwöny-ɑ ji kì yij Kengø, kɑ nyi kedh-ɑ wɑ̈g kì kɑɑl kì wɑ̈r, kɑ nyi nïnn-ɑ wïj Kïti Dhetun. 38Kɑ ji nyi møøl-ɑ yij Kengø kì mwøl yethi cyɑ̈ng bënn, be lïngø ki kwøbbi Yëso.

Currently Selected:

Lk 21: shkDCB

Highlight

Copy