Tuk 4

Këën kɛnɛ E-bɛl

1Täämɛ, mëë ci A-dam te kɛɛl kɛ ciekdɛ, cuɛ ruët, kä cuɛ gat dhöl dap, kä cuɛ jɛ cɔl i̱ Këën kɛ ɣöö ɛ jɛn i̱ cɛ gat mi dho̱o̱l dap kɛ luäk kä Kuoth Nhial. 2Kɛ kɔrɛ cua däman ni E-bɛl lɛni dap. Cu E-bɛl piith ala yiëën deet, kä cu Këën a puur bɛɛl. 3Mëë cɛ lɛ te nɔ, cu Këën Kuoth Nhial nöŋ luur kä kuay bɛɛl kakä. 4Kä E-bɛl bä, cuɛ liny ni dɛl in cuay ni jɛn rɛy ke̱yni deetkɛ, kä cuɛ thio̱o̱lkɛ thöp Kuoth. Kä cu Kuoth Nhial E-bɛl liɛc kɛnɛ luurɛ. 5Kä /kenɛ Këën kɛnɛ luurɛ me̱t liɛc. Ɛ jɛ nɔ, cuɛ Këën lɔcdɛ cu waŋ ɛlɔ̱ŋ kä cuɛ nhiamdɛ ri̱t kɛ ŋɛ̈ɛ̈ny. 6Inɔ cu Kuoth Nhial Këën ku thi̱ec i̱, “Ɛŋu ŋɛ̈ɛ̈nyi inɔ mɔ, kä ɛŋu cɛ nhiamdu ri̱t inɔ mɔ? 7Mi lätdi ni cuɔ̱ɔ̱ŋ, /ca la̱tdu dëë nhɔk? Kä min /ci lät ni cuɔ̱ɔ̱ŋ, duer a bi̱mä thok duëël a liipɛ ni ji̱, kä nɛn ɛ, ɛ wi̱cdu ɛn ɣöö bi jɛ puɔ̱t.”

8Kɛ cäŋ kɛl cu Këën däman ni E-bɛl ku jiök i̱, “Wanɛ rɛy ka̱a̱kni.” Kä guäth ëë tekɛ rɛy ka̱a̱kni, cuɛ Këën lɔcdɛ wa̱ŋ däman ni E-bɛl, kä cuɛ jɛ näk. 9Kɛ kɔr kä mi tɔt cu Kuoth Nhial Këën ku thi̱ec i̱, “Dämuɔɔr ni E-bɛl a ni?” Cu Këën ɛ loc i̱, “Kuecä gua̱a̱thdɛ, ɛ kua̱ la yi̱een dämaar?” 10Kä cuɛ Këën jiök i̱, “Ɛŋu ɛ nɛ ci lɛl ɛ? Jɔw riɛm dämuɔɔr ro̱lɛ ɣä ni pinyi. 11Kä täämɛ ca ji̱ bi̱et pi̱eth muɔ̱ɔ̱n, jɛn mun in ci riɛm dämuɔɔr wuɔ̱th piny thi̱n kɛ tetdu math. 12Cäŋ bi jɛ pur, thilɛ bɛl ti com ti bi nyɔk kɛ jek thi̱n. Bi pi̱r dɔɔr, bi ji̱n a jääl ɣɔaa.” 13Cu Këën jɛ ku jiök i̱, “Duäcdu kɛ ɣä cɛ di̱t ɛlɔ̱ŋ a tiaamɛ ɣä. 14Guic ɛ, ɛn walɛ ci ɣä tuk pur, kä bä cu bath nhiamdu, kä bä cu pi̱r dɔɔr a ba̱a̱ ni jääl ɣɔaa. Kä ram mi wä ɣä jek bɛ ɣä näk.” 15Kä cuɛ Këën ku jiök i̱, “/Ciɛ jɛn. Mi wëë wa tekɛ ram mi näk ji̱, bi cut duäcädu pɛn wi̱i̱dɛ ni kä bärɔw.” Kä cuɛ puɔ̱ny Këën moc kɛ biɛl mi nyooth jɛ ɛn ɣöö mi bɛ tekɛ ram mi ro̱m kɛ Këën, /cɛ jɛ bi lɛ näk. 16Kä cu Këën cu jiɛn nhiam Kuɔth Nhial kä cuɛ wä cieŋ ro̱o̱l mi cɔal i̱ Nɔd kä käny ca̱ŋ E-dɛn.

Gaat këën

17Ɛ jɛn, cu Këën te kɛɛl kɛ ciekdɛ, kä cuɛ ruët kä cuɛ dap kɛ gatdɛ, kä cuɛ jɛ cɔl i̱ Ä-nɔk. Kä cu Këën wec cu la̱t, kä cuɛ ciötdɛ cɔl kɛ ciöt gatdɛ ni Ä-nɔk. 18Cu Ä-nɔk I-rad di̱eth, kä cu I-rad a gua̱n Mɛ-ɣu-yɛl, kä cu Mɛ-ɣu-yɛl a gua̱n Mɛ-thu-cɛl, kä cu Mɛ-thu-cɛl a gua̱n Lɛ-mɛk, 19kä cu Lɛ-mɛk kuɛɛn kɛ män da̱ŋ rɛw. Cɔal ciekdɛ kɛl i̱ Adha, kä ciöt kä min dɔ̱diɛn cɔalɛ Dhila. 20Cu Adha Ya-bal dap. Ya-bal cuɛ a gua̱n nɛɛni tin ciaŋkɛ ni duël kɛmɛni, kä kɛ ji̱ ɣɔ̱ɔ̱k. 21Cɔal däman i̱ Yu-bal, cuɛ a gua̱n nɛɛni diaal tin tɔ̱ pua̱a̱t thuɔmni kɛnɛ kuɔ̱th kaŋni. 22Cu Dhila Tu-bal-keen dap, kä cuɛ la tääth yio̱o̱ni diaal, tin ya̱ni kɛnɛ ladiitni. Kä nyiman Tu-bal-keen cɔalɛ Naamaa.

23Lɛ-mɛk cuɛ mänkɛ jiök i̱,

“Liŋ ruacdä ji̱n Adha

yɛnɛ Dhila,

liɛŋɛ min bä la̱r yɛ,

lö mänkä.

Ɣän cä wut mi ŋuɛ̈t mi ci ɣä

yɔ̱t näk.

24Mi dëë Këën col ni kä bärɔw,

ɛpuc, ɛpuc, ba Lɛ-mɛk col

ni kä jiɛn bärɔw

wi̱cdɛ bärɔw.”

Thɛth kɛnɛ I-nɔc

25Nɛ̈nɛ jɛ, cu A-dam rɔ nyɔk kɛ ta̱a̱ kɛɛl kɛ ciekdɛ, kä cu ciekdɛ dap kɛ dho̱o̱l kä cuɛ ciötdɛ cɔl i̱ Thɛth, kɛ ɣöö ɛ jɛn i̱, “Ci Kuoth ɣä jäk kä gat mi bi gua̱a̱th E-bɛl ben guäl, kɛ ɣöö ci Këën ɛ näk.” 26Cua Thɛth lɛni dap gat kä cuɛ ciötdɛ cɔl i̱ I-nɔc. Ɛ jɛn gua̱a̱th ëë cu naath ɛ tok ni ɣöö bikɛ pal kɛ ciöt Kuɔth Nhial.

Currently Selected:

Tuk 4: nusNHB

Highlight

Copy