Marko 12

Etarriamai ono Ajurak Mana Fino

(Mat 21:33-46; Luk 20:9-19)

1 # Isaya 5:1-2 Attati Yesu ikiana jihosi te etarriamata jio: “Idulak nyia obo atulo amana fino, ette ikolonia inyi ta amariŋ, ette ibuahina ewure imociere afino, ette buo fe ifiatana olobele enne iciarik, ette itajurana amana ania jio omuk ajurak, ette leten jio obo afau. 2Ninyia iliaha ayafa onno odiarik aaŋer fino, ifak nyia inyi apit honyi jio ajurak hia oŋida isi obuanyani hunonyi jihonyi. 3Buo isi ette inefuna apit lia, ette ibak, ette itacahara inyi ahas ahania. 4Attati lamonye mana inyiak ifahina jihosi apit ollobo. Buo isi ette iriafuna lia ihide hou, ette ihanio jihonyi erre hunne iyaŋunie 'to ariri. 5Ifak nyia lamonye mana apit ollobo, buo isi ette ittohoro inyi, ette buo fe ihanio ihuo nyia jio apiti hullomuk arriai; abahi nyia omuk, buo ottohori omuk. 6Afitoro nyia latulo abotie jihonyi ifahiniere, lonyi honyi, ollo obuor ataji honyi bebe. Ihalu hosi 'daŋ, ette inyi ifahina lonyi honyi jihosi, ette jiaran jio, ‘Ofuoi adi yo isi ibaŋi lonyi hoŋ.’ 7Ati ikianai nyia ajurak hia isi hama jio, ‘Arutani honyi tibuo olo. Ifuanna, hattohoro inyi, oŋida erutaa honyi arai ahunohoi!’ 8Ania, ette isi inefuna inyi ette ittohoro, ette buo fe iruoŋoro ahuan honyi addi totua mana.

9“Ihan adi lamonye mana anyio? Ottu adi inyi ittohoro ajurak hulia 'daŋ, ette itajurana amana ania jio omuk aati hama.

10 # Afureta 118:22-23 Hèbiaŋata itai ihianata egierita hutto buk Hollum hunno ojiori 'to jio:

‘Amoruo ninyia ihari aduhok jiojio ara ariŋ asai,

inyiak tibuo inyi igalihina 'daŋ ta ayiji.

11Lamonye nyia ihan ihuo nyia;

ilaman tibuo inyi bebe to hoŋite hohoi!’”

12Tania, awahi nyia elettaha Yudei inefuna Yesu, nyio, omijani nyia isi jio ikiana nyia etarriamai ania tesi. Ati abaŋi nyia isi eluluŋ waati ania, ette isi ibusana inyi, ette ifuatan addi.

Eram ono Aduma Musuru

(Mat 22:15-22; Luk 20:20-26)

13Ifahini nyia omuk hulo Farisei iko omuk lejifak Erode jio Yesu, oŋida ofuoi italohuna inyi te ekenita honyi. 14Ofuonni nyia aati hulia, ette jiaran jihonyi, “Hettiyanani, emijak hohoi jio ikiana iyye erre ahode hode. Ibeŋ iyye ibaŋ obo atulo, buo fe ibeŋ igigia aati. Ati ittiyenio iyye ahode, eram anna awak Hollum. Ike eramak hohoi, aŋatani soho efahita hohoi idumari amusuru jio Hobu Roma elle ittokon kuyya obeŋ?”

15Ati omijak nyia Yesu enyobita hosi, ania ette inyi itarraŋ isi jio, “Nyio iwahata itai italohuna ani? Hadina jihoŋ arobiya, ijiara ani ami inyi.” 16Ette isi iyaŋuno obo jihonyi, buo inyi ette ifiyo isi jiojio, “Anaŋai arrijiori ana iko afure ana?” Itarraŋi isi inyi jiojio, “Huno Hobu elle ittokon.”

17Buo Yesu ette jiaran jihosi, “Odumana Hobu elle ittokon, erre Hobu elle ittokon, buo jio Hollum, erre Hollum.”

Illillihai nyia isi eram honyi bebe.

Eram ono Ebuhuna Toye

(Mat 22:23-33; Luk 20:27-40)

18 # Ehanita 23:8 Attati omuk hulo Sadusei ifuanna jio Yesu. Isi aati hullo ojiori 'to jio, obeŋ ebuhuna toye, ette ifiyo inyi jiojio, 19#Edasita 25:5“Hettiyanani, igiorok nyia Mose jihohoi efahi onno ojio 'to jio: ‘Alla aye atulo buo idiaharu ŋoruoi honyi obeŋ hito, ijiara illanyi ojuŋori aŋotte ania isihiniere aduri a hulo ayaani lia.’ 20Owoni nyia omuk ellarak hattarik. Oyemu nyia oloŋeu aŋotte, ette iye hobeŋi isiuni hito. 21Ania, ette etarrihi ijuŋori aŋotte ania, ette buo fe inyi iye hobeŋ isiuni hito. Ara nyia buo fe ihuo nyia jio etahunihi, 22iko jio hullomuk 'daŋ. Awattarik nyia isi 'daŋ hattarik aŋotte ania, ette 'daŋ iye obeŋi isiuni hito. Ihalu hosi 'daŋ, ette buo fe aŋotte ania iye. 23Ihuania, iholoŋ ono ebuhuna toye, ottu adi aŋotte ania irahan ŋoruoi ŋai? Nyio, awattarik nyia isi 'daŋ hattarik inyi.”

24Attati Yesu itarraŋ isi ojio, “Inyi tibuo enne ipalatti itai! Nyio, itimoti itai abuk Hollum kuyya agolon Hollum. 25Nyio, elle ibuhuni layaak toye, arai adi isi ihuo ajilohien huttedou. Obeŋi adi isi ayamanie. 26#Ajiŋuna 3:6Ati te eram ono ebuhuna toye, hèbiaŋata itai ihenuna to Buk Mose, jio aŋati enne ikiana 'to ta agurrumare onno owulo 'to ahima? Diya, igioroni jio ojio Hollum jio Mose, ‘Ani Hollum olo Abramo, Hollum olo Isako, buo fe Hollum olo Yakobo.’ 27Ipalata itai bebe! Obiaŋara inyi Hollum olo layaak, ati inyi Hollum olo esuok!”

Efahi anna Agalik 'to

(Mat 22:34-40; Luk 10:25-28)

28 # Luk 10:25-28 Owon nyia lobo ettiyanani ifahita diya linyia itaniŋu 'to etarisa hosi. Omijak nyia inyi jio, itarraŋ Yesu Sadusei onno oyyu ania, ette inyi ifiyo Yesu ojio, “Anani efahi anna agalik 'to 'daŋ?”

29Buo Yesu ette itarraŋ isi ojio, “Efahi anna agalihi 'to 'daŋ ana, ‘Itayiriete yo, Israele! Hollum Lamonye hohoi, inyi Lamonye hama#12:29 Hollum Lamonye hohoi, inyi Lamonye hama : kuyya Hollum Lamonye hohoi, inyi hama Lamonye.. 30#Edasita 6:4-5Itabuara ataji hoi 'daŋ jio Hollum Lamonye hoi, to oloyiri hoi 'daŋ, te egigilita hoi 'daŋ, iko ta agolon hoi 'daŋ.’ 31#Ehumak 19:18Buo enne ijifak 'to inyi ana; ‘Itabuara ataji hoi jio onyihari hoi ihuo onno obuarari inyi ahuan hoi.’ Obeŋ obo efahi anna agalik 'to huna 'daŋ.”

32 # Edasita 4:35 Attati ettiyanani ifahita alia jiaran jio Yesu, “Hettiyanani ibis iyye, ara ahode ihuo ijio iyye jio, Lamonye hama inyi Hollum, obeŋ buo fe obo arari fe inyi hama. 33#Hos 6:6 Ijiara ataji hoi obuor Hollum ta ataji hoi 'daŋ, ta ahou hoi 'daŋ, iko ta agolon hoi 'daŋ. Oŋida buo fe ataji hoi obuor onyihari hoi ihuo onno obuarari inyi ahuan hoi. Oyyu bebe ijifatiere efahita hunia, agalik aciaŋi hunno osuahini ehumita iko esiorita hunnomuk.” 34Ninyia igonyu Yesu ofioro hunyia itarraŋiere latulo alia, ette inyi jiaran jihonyi, “Ibeŋ iyye ilama to Lobie Hollum.”

Ihalu eram ania, obeŋ nyia tulo inyiak irinyana ifiyere Yesu.

Eram ono Etalahani

(Mat 22:41-46; Luk 20:41-44)

35Ninyia hettiyenio Yesu itua Haji emojit enne ittokon, ifiyo nyia inyi jio, “Aŋai ati ojiori ettiyanak ifahita jio odetuno adi Olonyimoto to woyo Dafide? 36#Afureta 110:1Nyio, ta aduaran ono Loholio Olibo, ikiana nyia Dafide ta ahuan honyi jio,

‘Ojio Lamonye jio Lamonye hoŋ:

Itoŋoi tene totto ŋati iŋet hoŋ,

many ehananiere ni amiorok hoi erriet hejek hoi’.

37Iloŋo nyia Dafide ta ahuan honyi, inyi ‘Lamonye,’ aŋai ati inyiak Olonyimoto irahan to woyo Dafide?”

Asario Yesu jio Ihumata Imijio Ettiyanak Ifahita

(Mat 23:1-36; Luk 20:45-47)

Itayirie nyia eluluŋ waati jio Yesu ta amuno. 38Ninyia hettiyenio inyi isi, ojio nyia jio, “Ihumata imijio ettiyanak ifahita. Omunoi isi eŋalata ta aboŋojin hunno ohodori, buo fe omunoi elle ifuanyai aati isi ta abaŋi itua suk. 39Onyimoi isi asegeri lettaha hutto tua hasik Imojiti iko amasik lettaha hutto masik gari. 40Imumunie isi ehidahi buo fe ohoruttai ahaŋitek hosi, buo ette itihanio ahuattek te emojiti hunno ohodori 'to. Tania, obolo adi ettigemio hosi agalik 'daŋ.”

Nesiorio ono Ehidak

(Luk 21:1-4)

41Itoŋo nyia Yesu iger senuk eddudduhi isiorita otto Haji Imojit enne ittokon, buo iŋiŋiala eluluŋ waati ninyia ibirotiai 'to arobiyaa diya. Ibirotiai nyia asamak arriai arobiyaa arriai. 42Attati obo ehidak elociaŋ ittuna, ette ibironia attarifat arrihai hullo oremehini agiris abotie. 43Attati Yesu iloŋuna lejifak honyi, ette jiaran jihosi, “Hode, eramak ni itai jio, ibirok ehidak elociaŋ ania arriai agalik aati 'daŋ hulle ibirotiai 'to itua senuk eddudduhi. 44Nyio, isiori isi allaŋo huno esamiti hosi. Ati te elociaŋ ottononyi, ibirok inyi asaŋ 'daŋ hullo owoni 'to jihonyi. Isiarak inyi erre 'daŋ hunna amanyari inyi.”

Currently Selected:

Marko 12: EA2003

Highlight

Copy