Matteyo 20

Egiamak Hutto Mana Fino

1“Ara Olobie ettedou ihua ana; iwany nyia obo latulo ijuruniere omuk egiamak igiamari imana fino honyi. 2Ninyia iruk inyi idumari isi ababo oloŋ abotie arobiya abotie, ette inyi ifahina isi igiamari imana fino honyi. 3Ninyia ara saa hottoŋuan, inyiak inyi leten isuk, ette igonyuna omuk aati awajatie diya obeŋi igiamai. 4Ania, ette inyi iramana isi jiojio, ‘Ifuatta buo fe itai igiamati itua mana fino hoŋ aduma adi ni itai onno oyyu.’ 5Ania ette isi ifuatan. Ninyia ara akil fanni iko asaa hunihoi otto otoriai, inyiak inyi ihan ihuo nyia. 6Buo ninyia iliaha saa miyet otto kekai, inyiak inyi leten isuk ette igonyuna omuk aati hullo owajatie diya, ette jiaran jihosi, ‘Nyio ituhoto itai oloŋ obojiai ta awajatio obeŋ egiama?’ 7Buo isi ette itarraŋ ojio, ‘Obeŋ bu tulo hohoi ojuraru igiama.’ Attati inyi iramana isi jiojio, ‘Ifuatta buo fe itai igiamati imana fino hoŋ.’

8 # Ehumak 19:13; Edasita 24:15 “Ninyia ara akekai, ette lamonye mana iramana elettok hegiamak hulia jio, ‘Iloŋu egiamak hulia, itte iharana isi arobiyaa hosi. Itterie jio hoduo hetek ijuruno many ifunyari iyye jio hoduo ejuruno tetteri.’ 9Ninyia afuonni hinyia ojurunie ta saa miyet otto kekai, ette inyi iharana isi 'daŋ ababo arobiya abotie abotie. 10Ninyia afuonni hunyia ojurunie tetteri, igigiloi nyia isi jiojio ofuoi adi iharana jihosi arobiyaa hunna agalihini huno hullomuk. Ati aharani nyia buo fe jihosi 'daŋ ababo arobiya abotie abotie. 11Ninyia ahoruni isi, ette isi itterio eŋuŋunita jio lamonye mana, 12ette jiaran jihonyi, ‘Igemuni aati hoduo iloŋuno iyye ehalu, asaa abotie ijiai, buo hohoi edik anahan holoŋ afanni 'daŋ. Ati itarriamahi iyye arobiyaa hosi iko hunohoi!’

13“Buo lamonye mana ette itarraŋ obo olosi ojio, ‘Itaniŋie, illa. Abeŋ ni enyob iyye. Ibeŋ duo soho iyye iruhok jihoŋ igiamari oloŋ abotie ta arobiya abotie? 14Hibe edumit hoi, ilo haŋ. Awak ni isiarana jio latulo olo oduo eloŋu ni ehalu, ihuo enne esiaraniere ni jihoi. 15Obeŋ soho obis jihoŋ ihaniere ihuo awak ni ta ariŋ ottonoŋ? Kuyya ihayin ti iyye emorot hoŋ?’ ”

16 # Mat 19:30; Mar 10:31; Luk 13:30 Attati Yesu itisidonia ekiana honyi ette jiaran, “Tania, aati hulla arai 'to ihuania ecuŋita, arai adi isi etterita. Buo hulla arai 'to ihuania etterita, ette adi irahan ecuŋita.”

Ikiana Yesu Enyiahi Etahunihi Ta Aye Honyi

(Mar 10:32-34; Luk 18:31-34)

17To ninyia alari Yesu many Yerusalem, ojio ihiji ikoi, ette inyi iloŋuna lejifak honyi hula 'tomon harrihai aŋati honyi, ette jiaran jihosi, 18“Itayiriete, efuo ihuania Yerusalem, buo diya isiori adi Lonyi Tulo jio ehumak elettaha iko ettiyanak ifahita, buo isi ette iŋotonia aye jihonyi. 19Isiori adi inyi jio Alufajak. Osuhotierek adi isi inyi, abahie adi isi inyi, ette isihonia inyi likruce. Ati ihalu oŋitek hunihoi itubuhuni adi inyi.”

Efiyo ono Nonye

(Mar 10:35-45)

20Attati ŋoruoi Sebedeyo iko lonyirok honyi ifuanna jio Yesu, ette irigoŋi ihosiere honyi, ette imojo jihonyi obo ariŋ.

21Attati Yesu jiaran jihonyi, “Iwak iyye anyio?”

Buo inyi ette itarraŋ ojio, “Ocorok jihoŋ jio ofuoi adi lonyirok hoŋ hula arrihai hulo itoŋo, abotie totto hani iŋet hoi, buo abotie totto ihorroŋ, elle ittu iyye irahan ahobu.”

22Ati itarraŋ nyia Yesu ojio, “Itimoti itai anyio enne ifiyete itai. Iremehina adi itai idihuna ematit ono ettigemio anna alo ni irumana?”

23Itarraŋi nyia isi jio, “Eremik hohoi.” Buo Yesu ette jiaran jihosi, “Hode, iremehina adi itai idihuna ettigemita hunna alo ni irumana. Ati abeŋ ni aremik inyimuna ŋai adi olo itoŋo totto hani iŋet kuyya totto ihorroŋ hoŋ. Nyio, arai amasik hunia ahuno hia hinyia ihuhumak Monyoŋ jihosi.”

24Ninyia itaniŋuni lejifak honyi hula 'tomon eram ana, ette isi iloŋojita jio ellarak hula arrihai hulia. 25#Luk 22:25-26Ania, ette Yesu iloŋuna isi 'daŋ arabotie, ette jiaran, “Imijana itai jio ilohittohi oobuok hulo Alufajak jio aati hosi, buo fe elettaha ihumi ilohittok jio aati hosi. 26#Mat 23:11; Mar 9:35; Luk 22:26Ati obeŋ adi inyi ara ihuo nyia jihatai. Alla awak obo alatai igalihina hullomuk, ijiara inyi luŋa ara ahegiamani jio hullomuk. 27Buo alla awak obo alatai igalihina hullomuk, ijiara inyi hétera apit hatai; 28ihuo Lonyi Tulo, linyia obeŋ 'to ottu jio oŋida aati igiamai jihonyi, ati igiamari buo fe isiaraniere esu honyi italahuniere aati arriai jio eyyata.”

Itaŋida Yesu Laŋodok Arrihai

(Mar 10:46-52; Luk 18:35-43)

29Ninyia itterie bo Yesu iko lejifak honyi afuatan addi to Yeriko, ette eluluŋ enne ittok ijifaru isi. 30Owoni nyia omuk laŋodok arrihai hinyia itoŋoi iger hikoi. Ninyia itaniŋuni isi jio Yesu ollo ottu tolia, ette isi iwuwoŋita jiojio, “Lettok, lonyi Dafide, omehinie jihohoi!” 31Iŋerejanio nyia eluluŋ waati jihosi, ette iramana isi hotoduahinie. Ati ihumi nyiati buo isi ifudana ewuwoŋita bebe jiojio, “Lettok, Lonyi Dafide, omehinie jihohoi!”

32Ania, ette Yesu iwotia, ette iloŋuna isi, ette jiaran, “Iwahata itai ani ehan anyio jihatai?”

33Itarraŋi nyia isi jiojio, “Lettok ijiara oŋite hohoi omijie!”

34Attati Yesu imehino jihosi, ette ittir oŋite hosi. Teya teya, ette isi imijio, ette ijifaru inyi.

Currently Selected:

Matteyo 20: EA2003

Highlight

Copy