Dhek 14
14
Jeruthalem kekë Juöör
1Kööl bï Bɛ̈nydït nyuc ë thööc nɔm ë thiɔ̈k. Ëtɛ̈ɛ̈n Jeruthalem abïï yakic, ku ka cï yak abïï keek tek ë wenyïïn. 2Bɛ̈nydït abï juöör bɛ̈ɛ̈i tëtök bïk tɔŋ bɛ̈n luöi Jeruthalem, pänydït abïï nööm, ɣööt abï keek yak yiic, ku diäär abïï keek wiëët, ku biäk töŋ de kɔc abïï keek peec, ku kɔc kɔ̈kkë abïk döŋ ë pänydïtic acïï keek bïï jɔt. 3Ku ëtɛ̈ɛ̈n Bɛ̈nydït abï lɔ biic, ku lee thɔ̈ɔ̈r kekë juöörkë, cït man cï en kɔn thɔ̈ɔ̈r në akööl ɣɔn cï wan. 4Në ë köölë abï kɔ̈ɔ̈c ë kuur de olip nɔm në Jeruthalem të lɔ aköl amiäk, ku ëtɛ̈ɛ̈n kuur de olip abï e yic tek ë rou gɔl ë aköl amiäk lee aköl athɛ̈i në gökdït ë wak. Biäk de kuur abï lɔ të lɔ rut ku biäk tök abï lɔ të lɔ wöuwic. 5Ku wek bï ban ee wakë yic, wak cï kuur tekic ë rou,#14:5: Këcïgɔ̈ɔ̈r Yïn bï ban...në rou; Acie yökic në Ɣeberuu. wek bï kat ë kat ë kuarkun, ɣɔn cïï piny rɔt nieeŋ në run ke melik Yudhia ë Juda. Bɛ̈nydït Nhialicdï abï bɛ̈n, abï bɛ̈n kekë tuucnhialkɛn ɣeriic kedhie. 6Të le aköölkë bɛ̈n, abï ciën të lir ayï të tuc,#14:6: Këcïgɔ̈ɔ̈r të lir ayï të tuc; Acie yökic në Ɣeberuu. 7ayï mɔ̈ɔ̈th. Abï dɛ ɣɛɛr aköölnyïïn, ayï wakɔ̈u. Kööl bïï ee kënë rɔt looi ee Bɛ̈nydït Yen ŋic yen Yetök. 8#Edh 47:1; Jɔn 7:38; Nyu 22:1. Kööl bïï ë kënë rɔt looi pïïu piɛth abïk wɛ̈t bei ë Jeruthalem, biäk tök abï wɛt ë Wɛ̈ɛ̈r de Amilɔ yic ku biäk däŋë abï wɛt në Abäpdit yic. Abï wat ë ruöön thok ëbɛ̈n, abï wat mɔ̈i ku abï wat rut. 9Ëtɛ̈ɛ̈n Bɛ̈nydït abï ya Melik de pinynɔm ëbɛ̈n. Abïï ë raan ëbɛ̈n lam ke ye Nhialic ku abïk ŋic në ee rin manë. 10Yen ee pinyë ëbɛ̈n, abïï raai nɔm piny, gɔl ë Geba të lɔ rut aɣët cï Rimon të le wöuwic. Jeruthalem abï woi nhial në wuöt thiääk ë yen, pänydït abï ɣet gɔl ë kal ë Benjamin thok leer ë kal aguk thok, të wään kɔn ë kal tueŋë thok tɔ̈u. Ku gɔl në aloocdïït bäär de Ɣananel leer të ye mɔ̈n ë melik dhiim. 11#Nyu 22:3. Kɔc abïk rɛ̈ɛ̈r ëtɛ̈ɛ̈n ë mät, acïn riɔ̈ɔ̈c bïï kek bɛ riɔ̈ɔ̈c ë riääk.
12Bɛ̈nydït abï jɔŋ tuc thok yiɛ̈n juöör bï tɔŋ lɛɛr Jeruthalem. Abïk gup ŋuäc ke ke ŋoot ke ke pïïr. Ku nyïïnken kekë liëpken abïk ŋuäc aya.
13Në ee köölë abï Bɛ̈nydït keek tɔ mum nïïm ku tɔ keek riɔ̈c, ka raan abï raan thiääk ke yen aa dɔm ku mɛk. 14Röör ke Juda abï thɔ̈ɔ̈r ke ke kony Jeruthalem. Abïk kuɛth ë juöör ëbɛ̈n peec, ku jɔtkï adhääp, ku ateek, ku lupɔɔ juëc aläl. 15Jɔɔk tuc thook abïk bɛ̈n ë jöŋgöör gup aya, ayï mul, ayï thɔ̈rɔ̈ɔ̈l, ayï mul cek, ku läi ëbɛ̈n läi nu ë pɛɛny ke kɔc ke ater yiic ëbɛ̈n.
16 #
Leb 23:39-43. Ëtɛ̈ɛ̈n juöör cï dɔ̈ŋ ke ke pïïr ëbɛ̈n, në juöör wään cï Jeruthalem mak, abïk aa lɔ ëtɛ̈ɛ̈n ë run nyïïn ëbɛ̈n bïk Bɛ̈nydït de rɛm lɔ lam ke ee Melik, ku abïk dhuëëŋ de kɛ̈ɛ̈t lɔ looi. 17Na de jur lɔ jaai në luɔi bïï yen Bɛ̈nydït de rɛm lam ke ee Melik, ka acïn deŋ bï tueny pinyden. 18Na lɔ baai de Rip jaai, në luɔi bï kek dhuëëŋ de kɛ̈ɛ̈t looi, ka abïï keek lɔ̈ny ë jɔŋ tuc thok, jɔŋ bïï Bɛ̈nydït tuöc juöör cï jaai luɔi bï en lɔ. 19Kënë ee këtuc bï luöi Rip, kekë juöör kɔ̈k ëbɛ̈n, të le kek lɔ jaai an cïkï dhuëëŋ de kɛ̈ɛ̈t bï looi. 20Në ee köölë cakaa töör de lööth ke jöŋgöör abï keek aa gäär kɔ̈ɔ̈th wëlkë an, “Kë cï gäm Bɛ̈nydït. Tööny ye thät Luaŋdït abï yic ɣɛɛr cï guöl nu ë yïk nɔm. 21Töny ke thät ëbɛ̈n, töny nu ë Jeruthalem ku töny ë Juda abïï keek tɔ̈ɔ̈u pei, bï ke aa luui në läm de Bɛ̈nydït de rɛm, abïï kɔc ee miɔ̈c cï nɔ̈k gam aa luui në keek, thɛɛl kek rïŋ de miɔ̈c cï nɔ̈k. Të le ee köölë bɛ̈n abï ciën raan ee käŋ ɣaac bï bɛ nu Luaŋdït de Bɛ̈nydït de rɛm yic.
Currently Selected:
Dhek 14: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
