Luk 22
22
Kiɛɛr në Baŋ bï Yecu Nɔ̈k
(Math 26:1-5; Mak 14:1-2; Jɔn 11:45-53)
1 #
Bɛ̈n 12:1-27. Ku Dhuëëŋ de Kuïn Cïnic Luɔu acï thiɔ̈k, Dhuëëŋ cɔl Winythok. 2Go bänydït ke ka ke Nhialic ku kɔc ee löŋ gɔ̈ɔ̈r gokï kë bï kek ë nɔ̈k kɔɔr, acïk riɔ̈ɔ̈c ë kɔc.
Judath acï Gam në Luɔi bï Yen Yecu Nyiɛɛn
(Math 26:14-16; Mak 14:10-11)
3Na wën, ke Catan lɔ ë Judath piɔ̈u, rinkɛn kɔ̈k acɔlke Yithkariɔt, ku ye raan töŋ ë kɔc kathiëër ku rou yiic. 4Go lɔ le jam guiir kekë bäny ke ka ke Nhialic ku bäny ke rem de tɔŋ ke Luaŋdït, në nyiin bï en en yiɛ̈n keek. 5Gokï piɔ̈ɔ̈th miɛt, ku matkï kethook, an bïk gäm wëu. 6Go këden gam, ku jɔ kööl piɛth kɔɔr kööl duëër en en yiɛ̈n keek të liiuwë kuut ë kɔc.
Yecu Akïït Luɔi bï Yen Këcam de Winythok Cam
(Math 26:17-25; Mak 14:12-21; Jɔn 13:21-30)
7Na wën, ke akööl de Dhuëëŋ de Kuïn Cïnic Luɔu bɔ̈, kööl bï nyɔɔŋ de Winythok dhil nɔ̈k. 8Go Yecu Petero tooc kekë Jɔn an, “Lak guiëkkï wook ka ke Winythok, buk lɔ cuet.”
9Gokï thiëëc an, “Ee tënou kɔɔr ë yïpiɔ̈u të bï wok guik thïn?”
10Go ke yɔ̈ɔ̈k an, “Tiëŋkï, të cä wek lɔ pänydït, ke we bï rɔ̈m në mony ɣɛ̈ɛ̈c töny ë pïïu, jakï kuany cök ɣön bï en lɔ thïn. 11Ku we bï raan de ɣöt yɔ̈ɔ̈k an, ‘Yïn thiëëc Bɛ̈ny ee wëët an, Nu ɣön ë kamaan tënou, ɣön bï wo Winythok lɔ cuet thïn wokë kɔckiën ë piööcë?’ 12Ku abï we nyuöth ɣöndïït nu nhial ɣön de yic käŋ: jakï guik thïn.”
13Gokï lɔ, ku yökkï ke cït man cï en e lɛ̈k keek, gokï ka ke Winythok guik.
Këcam Thëën de Bɛ̈nydït
(Math 26:26-30; Mak 14:22-26; 1 Kor 11:23-25)
14Na wën, aacï thaar ee cam bɛ̈n, ke jɔ nyuc, ku nyuc tuuc kathiëër ku rou në yen ëtök. 15Go ke yɔ̈ɔ̈k an, “Aa ya cök ë kaar ɛn en ë yapiɔ̈u në luɔi bï wok Winythok cuet wokë week ëtök, të ŋuɔɔt ɛn ke ya kën käŋ guɔ guum. 16Wek yɔ̈ɔ̈k an, Yɛn cïï bï bɛ cuet ë ye ëliŋliŋ, të ŋoot en ke kën guɔ thök ë ciɛɛŋ de Nhialic.”
17Na wën, ke nöm bïny, ku leec Nhialic, ku lueel an, “Nämkï kënë, bäk tɛ̈k röt. 18Wek yɔ̈ɔ̈k an, Yɛn cïï bï bɛ dek në mïth ke enap, të ŋootë ciɛɛŋ de Nhialic ke kën bɛ̈n.”
19Na wën, ke nöm kuïn cï pam, ku leec Nhialic, ku wɛ̈ɛ̈kic, ku yïn keek, lueel an, “Guöpdï kï, guöpdiën cï gam në baŋdun week, yak kënë looi në täŋ bä wek wenïïm aa tak në yɛn. 20#Jer 31:31-34. Ku të cï këcam thök, ke jɔ looi aya në bïny, ku lueel an, “Bïnyë ee löŋ cï piac mac në riɛmdï, riɛm bï kuëër në baŋdun week.#22:20: Këcïgäär däŋ acïnic wël ke Yecu në Kënë ee guöpdï cök në cöök 19, ku në cöök 20 ëbɛ̈n.
21 #
Diɛt 41:9. Ku tiëŋkï, ciin ë raan nyiin ɛn anu ë pam ë cäm nɔm kekë ciindï ëtök. 22Wën ë Raan alɔ, ëyic, cït man cï e kɔn lueel an, bï dhil lɔ: ku amawoou në ëraanë raan bï e nyiɛɛn!
23Ku jɔkï röt luɔp an, “Eeŋa në woyiic raan bï kënë looi?
Teer në biäk de Dït
24 #
Math 18:1; Mak 9:34; Luk 9:46. Go ater rɔt cak ë keyiic an, “Ee raanou bï tɔ dït ë woyiic. 25Go keek yɔ̈ɔ̈k an, “Meliik ke Juöör ayek kɔc cieŋ, ku bäny ee kɔc cieŋ aye ke tɔ ye adhuëŋ. 26#Math 23:11; Mak 9:35. #Math 20:25-27; Mak 10:42-44. Ku week, we cïï bï ciët keek, ku raan ë weyiic në ye ciët mɛnh koor: ku raan ë ya bɛ̈ny, ka bï ya ciët raan ë kɔc luööi. 27#Jɔn 13:12-15. Ku eeŋa dït, raan ee rëër tën ee cam, ku ye raan ë kɔc luööi? Cie raan ë rëër tën ee cam? Ku yɛn ee tɔ̈u ë weyiic cil cït raan ee kɔc luööi.
28Ku week, dï, wek ee kɔc ee cool ë tɔ̈u në yɛn ëtök ë thëmdiën cï a themic, 29ku wek yiɛ̈n ciɛɛŋ, cït manë cï e yiɛ̈n ɛn ë wäär, 30#Math 19:28. bäk aa cam ku dɛ̈kkï ë pamdï nɔm ë ciɛɛŋdï yic, ku we bï aa rëër ë thöny nïïm ku guiɛɛrkï löŋ de dhiëën ke Yithriɛl kathiëër ku rou.
Yecu Anyooth Luɔi bï Petero Ye Jai
(Math 26:31-35; Mak 14:27-31; Jɔn 13:36-38)
31“Na wën, ke lueel Bɛ̈nydït an, “Thimon, tïŋ, Catan acï we kɔɔr arëët luɔi bï en we nööm, bï we kïïc cït man ë agamɔ: 32ku yɛn cï lɔ̈ŋ në biäkdu, ke gämdu cïï bï dak: ku yïn, të cï yïn yïpiɔ̈u guɔ puk, ke yï rit mïthëkɔckun piɔ̈ɔ̈th.”
33Go lueel an, “Bɛ̈nydït, të mɛcë wo wo yïn ëtök ë alooc yic, arëk të ciɛk wok thou ëtök, ke yɛn duëër gam!”
34Go lueel an, “Yïn yɔ̈ɔ̈k, Petero an, ajïth acïï bï kɔn kiiu ee köölë, të ŋoot yïn ke yï kën a jai raandiäk, an, akuöc.”
Anyɔŋɔ ku Athep ku Abätäu
35 #
Math 10:9,10; Mak 6:8,9; Luk 9:3; 10:4. Na wën, ke ke thiëëc an, “Wään tuɔɔc ɛn week ke cïn anyɔŋɔ ë wëu, ku cïn athep ë këcam, ku cïn war, de kë cï we bɛ̈n dak?”
Gokï an, “Acïn këdäŋ.”
36Go ke yɔ̈ɔ̈k an, “Ku ënɔɔnë, raan de anyɔŋɔ ë wëu, ke nööm, ku nöm athep ë këcam aya: ku raan cïn nɔm abätäu, ke ɣɔɔc lupɔde, ɣöc en rɔt abätäu. 37#Yith 53:12. Wek yɔ̈ɔ̈k an, cöökë, cöök cï gɔ̈ɔ̈r në këdï, aŋoot ke bï dhil thök ë yaguöp, cöök cï lueel an, ‘Acï mat kekë kɔc ee löŋ dhɔ̈ŋic ëtök,’ kakï yɛn adekï thökden aya, thök bï kek thök.”
38Gokï lueel an, “Bɛ̈nydït, tïŋ, Abätɛ̈ɛ̈u kï, kaarou.”
Go lueel an,#22:38: Ë loi; nɔn Kënë ë loi. “Ë loi.”
Yecu Aläŋ në Kuur de Olip Nɔm
(Math 26:36-46; Mak 14:32-42)
39Na wën, ke lɔ biic, le kuur ë Olip, cït man ee yen cool ë lɔ, ku kuɛny kɔckɛn ë piööcë cök aya. 40Ku të cï en ɣet ëtɛ̈ɛ̈n, ke ke jɔ yɔ̈ɔ̈k an, “Läŋkï, ke we cïï bï lɔ ë thëmic.”
41Ago rɔt mɛ̈ɛ̈c ke keek të duëër raan cuööp të dɛɛny en kɔɔi, go emiɔl tuk, ku lɛ̈ŋ, 42An, “Wäär na nu ë yïpiɔ̈u, ke yï nöm bïnyë tëde yɛn, ku acie këde piɔ̈ndï tei, tɔ loi ee këde piɔ̈ndu.” 43Go tunynhial tuöl tëde yen, ke bɔ̈ nhial, bï ye bɛ̈n riit piɔ̈u. 44Na wën, aacï piɔ̈u jiɛth arëët, ke jɔ lɔ̈ŋ arëët awär man awën: arëk abï tunyde aa thuat cït man ë rim dït kɔ̈ɔ̈th ke ke lööny piny.
45Na wën, aacï rɔt jɔt tëdɛn ë lɛ̈ŋ en, ke jɔ bɛ̈n tëde kɔcpiööcë, ku yök keek anin në jiɛth wën cï kek piɔ̈ɔ̈th jiɛth. 46Go ke yɔ̈ɔ̈k an, “Eeŋö niënkï? Jatkï röt, läŋkï, ke we cïï bï them.”
Döm de Yecu
(Math 26:47-56; Mak 14:43-50; Jɔn 18:3-11)
47Ku të ŋoot en ke jam, dï, ke kut ë kɔc ë ke bɔ̈, awɛt raan cɔl Judath keek, ee raan töŋ de kɔc kathiëër ku rou, ku jɔ ɣet të nu Yecu le ciim. 48Go Yecu thiëëc an, “Judath, nyiɛɛnë Wën ë Raan në ciëm?”
49Na wën, aacï kɔc nu ë yelɔ̈ɔ̈m kë bï lɔ̈ɔ̈k tïc tïŋ, ke jɔkï thiëëc an, “Bɛ̈nydït, buk kip ë abätäu?” 50Go raan tök ë keek go lïm de bɛ̈nydïït ë kake Nhialic kiɛp yïc wei, yïny cuëc.
51Go Yecu bɛ̈ɛ̈r an, “Jakï pɔ̈l ë pëk aya!” Na wën, ke jiɛk yïc, tɔ dem.
52Go Yecu bänydït ke ka ke Nhialic thiëëc ku thiëëc bäny ke Luaŋdït, ku röördït, kɔc wën bïï tɔŋ tëde yen an, “Cäk bɛ̈n biic cït man ë ka yïn tɔŋ cuɛ̈ɛ̈r, ke we muk abätɛ̈ɛ̈u ku thieec? 53#Luk 19:47; 21:37. Wään aa yɛn cool ë rëër wokë week Luaŋdïtic, wek ë kën a dɔm: apiɛth, kööldun kï ee kënë, ku ye riɛl ë cuɔlëpiny.”
Petero Ajiɛi Yecu
(Math 26:57-58,69-75; Mak 14:53-54,66-72; Jɔn 18:12-18,25-27)
54Na wën, ke dɔmkï, ku thelkï, leerkï ɣön ë bɛ̈nydïït ë kake Nhialic. Go Petero lɔ̈ɔ̈k kuany cök ke mec. 55Na wën, ke kɔc ë ke koth mac ë gɔ̈ɔ̈lic cil, ku jɔkï nyuc ëtök, go Petero lɔ nyuc ë keyiic. 56Na wën, ke tïŋ nyan lïm tök ke cï yenɔm kum go jɔ toom guöp arëët, go lueel an, “Raanë aa ye cath ke yen aya!”
57Go jai an, “Tik, ee raan kuöc!”
58Na wën, ee tëthiinë, ke tïŋ raan däŋ, go lueel an, “Yïn ee raan töŋden aya!”
Go Petero jai an, “Mɔny, yɛn cie raanden!”
59Na wën, të cït thaar tök, ke ŋɛk ë raan däŋ an, “Ee yic, raanë aaye cath ke yen, ë luɔi ee yen raan ë Galili!”
60Go Petero lueel an, “Mɔny, yɛn kuc kë lueel!”
Na wën, aŋoot ke jam, ke ajïth jɔ guɔ kiiu ënɔnthiinë. 61Go Bɛ̈nydït rɔt puk, woi Petero. Go Petero yenɔm tak ë wël ke Bɛ̈nydït, në lëk cï en e lɛ̈k en an, “Të ŋootë ajïth ke kën kiiu ee köölë, ke yïn bï a jai raandiäk.” 62Go lɔ biic, le dhiau ë dhiën kec.
Yecu Adɔl Guöp ku Dui
(Math 26:67-68; Mak 14:65)
63Na wën, ke kɔc muk Yecu ke getkï guöp, ku duikï. 64Agokï kum nyin, ku jɔkï yup nyin, ku thiëckï an, “Luel! Eeŋa raan ë yup yïn?” 65Ku lɛ̈ɛ̈tkï arac në wël juëc kɔ̈k wël rac.
Yecu acï bɛ̈ɛ̈i ë Luk Nɔm
(Math 26:59-66; Mak 14:55-64; Jɔn 18:19-24)
66Na wën, aacï piny guɔ ruu, ke amatnɔm ë röördït jɔ guëër, kekë bänydït ke ka ke Nhialic ayï kɔc ee löŋ gɔ̈ɔ̈r, gokï thel leerkï ë löŋdenic, ku luelkï an, 67“Tën ee yïn Kërtho, ke lɛ̈kë wook.”
Go lueel an, “Ciɛk an, lɛ̈k week, ka cäkï bï gam, 68ku të thiɛ̈ɛ̈c ɛn week, ka cäkï bï bɛ̈ɛ̈r, ku cäkï ya päl. 69Gɔl ënɔɔnë, ke Wën ë Raan abï rëër ë biäk cuëny de riɛldïït ë Nhialic.”
70Gokï thiëëc kedhie an, “Ka yïn jɔ ya Wën ë Nhialic?”
Go ke yɔ̈ɔ̈k an, “Ye ka, kë cäk lueelë.”
71Gokï lueel an, “Eeŋö däŋ kɔɔr wok cäätɔ däŋ? Wogup acuk piŋ ë yethok!”
Currently Selected:
Luk 22: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
