Luɔi 6

Kɔc ee Kɔc Kuɔny Kadhorou

1Na ɣɔn ë aköölkë, të cï kuën ë kɔcpiööcë rɔt ŋuak ke Judai ë bɔ̈ paan ë Girikii ke ke cak dhiëëu në kɔc ke Ɣeberuu an, cï diëërken nyɔ̈ŋ diëër cïn nïïm röör, të tekë wëu ë aköölnyïïn kedhie. 2Na wën, ke kɔc kathiëër ku rou ke ke cɔl kut ë kɔc cï gam, ku luelkï an, “Acïï piɛth ë luɔi bï wo jam ë Nhialic pɔ̈l, ku yok kacam tɛ̈k kɔc. 3Na ënɔɔnë, wek mïthëkɔckuɔ, jakï röör kadhorou kɔɔr ë weyiic, röör cath ë rin piɛth ë kɔc yiic, ku cïk thiäŋ ë Wëidït ku pɛlënɔm, kɔc buk tääu ë luɔiyë nɔm. 4Ku wook, wo bï ya ceŋ ë wo läŋ, ku guiirku jam.”

5Ku löŋë acï kut ë kɔc tɔ mit piɔ̈ɔ̈th kedhie, agokï Thepano lɔc, raan ë gam arëët, ku cï thiäŋ ke Wëidït ɣer, ku Pilip, ku Porokoro, ku Nikanor, ku Thimon, ku Parmena, ku Nikola raan ë bɔ̈ Antiokia ku cï rɔt tɔ ye Judai. 6Gokï ke tääu ë tuuc nïïm: na wën aa cïk lɔ̈ŋ, ke ke thɛny kecin ë kegup.

7Go jam ë Nhialic piny kiët nɔm: go kuën ë kɔc piööcë go e nyin ŋuak aläl ë Jeruthalem, ayï rem dïït ë bäny ke ka ke Nhialic acïk gäm döt.

Döm de Thepano

8Ku Thepano ee raan ee piɔ̈u adhuɛ̈ŋ arëët, ku ciɛth ke riɛldït, ku acï göök looi ë kɔc yiic ayï ka ye kɔc ke gäi. 9Na wën, ke kɔc kɔ̈k ë ke jɔt röt, kɔc ke luaŋ ee kɔc guëër thïn luaŋ ë kɔc cɔl Libertinoi, ayï kɔc ke Kurene, ku kɔc ke Alekandaria, kekë kɔc ke Kilikia, ku Athia, ke ke jɔt röt, akɔɔrkï teer në Thepano. 10Ku acï teer ke dhal, në pɛl pel en nɔm, ku në Wëi cath në yen, të jiɛɛm en. 11Agokï röör kɔ̈k riɔp, kɔc bï e lueel, an, “Raanë acuk piŋ ke lat Mothe, ayï Nhialic!” 12Agokï kɔc riir aläl ayï röördït, ayï kɔc ee löŋ gɔ̈ɔ̈r, agokï bäk, dɔmkï, ku thelkï leerkï ë löŋ nɔm. 13Agokï cäätɔɔ aluɛth tɔ kääc nhial, kɔc bï e lueel an, “Raanë acïï jam ee pɔ̈l jam de lɛ̈ɛ̈t ee yen tëɣericë läät, ayï löŋ: 14acuk piŋ ke lueel an, Yecu de Nadhareth, yen abï wunë riɔ̈ɔ̈k, ago ciɛɛŋ puk, ciɛɛŋ cï Mothe yiɛ̈n wook!” 15Na wën, ke kɔc kedhie kɔc rɛ̈ɛ̈r ë löŋic, ke ke tom Thepano guöp, gokï tïŋ nyin, acït nyin tunynhial.

Currently Selected:

Luɔi 6: dip-JPB

Highlight

Copy