Luɔi 4

Petero ku Jɔn në Luk nɔm

1Na wën, aŋootkï ke ke jam në kɔc, go bäny ke ka ke Nhialic ku bɛ̈ny ë rem de Luaŋdït ku Thadokai, bɛ̈n ë keyiic. 2Acïk piɔ̈ɔ̈th diu në luɔi wëët kek kɔc, ku në luɔi guïïr kek kɔc këde Yecu në jön bï kɔc röt jɔt ë kɔc cï thou yiic. 3Gokï keek dɔm, ku tɛ̈ɛ̈ukï keek ë aloocic aruu piny: në luɔi cï akɔ̈l guɔ thëi. 4Ku ade kɔc juëc cï gam kɔc wën cï jam piŋ, go kuën ë röör cï gam go ciët aguum kadhïc.

5Na wën, aruu piny, ke bäny ke Judai, ku röördït ku kɔc ee löŋ gɔ̈ɔ̈r ë ke guëër Jeruthalem. 6Ku nu Anath thïn, yen aye bɛ̈nydïït ë kake Nhialic, ku Kayapath, ku Jɔn, ku Alekandaro, ku kɔc ke dhiën ë bɛ̈nydït tueŋ kedhie. 7Na wën, aa cïk ke tääu ë keyiic cil, ke ke thiëckï an, “Ee riɛlou, ku ye rinkou ë luɔɔi wek ee kënë?”

8Go Petero thiäŋ në Wëidït ɣer, ku yöök keek an, “Week, we bäny ke kɔc, ku wek röördït ke Yithriɛl: 9të thiëëc wek wook ëköölë në luɔi piɛth cuk looi ë raanë guöp raan cï duanyë an, cï tɔ piɔl guöp adï, 10jakï kënë ŋic wedhie, ayï kɔc ke Yithriɛl, takï ke ŋic kedhie an, në rin ke Yecu Kërtho de Nadhareth, raan cäk piäät ë tim cï rïïu nɔm kɔ̈u, raan cïï Nhialic jat nhial ë kɔc cï thou yiic. 11#Diɛt 118:22. Në rin ke Yecu guöp, yen a kɛ̈ɛ̈cë raanë ee tënë ë wenïïm, ke cï guöp pial.

‘Kënë ee kuur wään cäk rɛɛc, wek kɔc yïk alooc,

ku aye tɔ ye kuur ë agukic kuur de naamde.’

12Ku kunydewëi aliu në raan däŋ: ku acïn rin kɔ̈k ë pinynɔm, rin cï gäm kɔc, rin bï wo dhil kony wëi në keek.”

13Na wën, aa cïk ŋeeny de Petero tïŋ kekë Jɔn, ku ŋickï keek nɔn ee kek röör kënë wɛ̈ɛ̈t, acïn kajuëc ŋickï agokï gäi, ku jɔkï kenïïm tak në cath ë ye kek cath në Yecu wään. 14Ku të woi kek raan wën cï dem akääc ke keek ëtök, ka cïn kë cïk yök kë bïk jɔ̈ɔ̈ny. 15Na wën, aa cïk ke yɔ̈ɔ̈k an, bïk lɔ biic ë löŋic, ke jɔkï guiir kapäc. 16Ku luelkï an, “Buk ŋö looi në kɔckë?” Acï kɔc rɛ̈ɛ̈r ë Jeruthalem ëbɛ̈n ŋic ëgɔk nɔn cï gök dït looi në keek, ku acuku ke duëër jɔ̈ɔ̈ny. 17Ku ënɔɔnë, jɔku ke waai ë wɛ̈i gök, luelku an, “Duökï raan däŋ be guiëër ë rinke, ke jam cïï bï thiëi ë kɔc yiic.” 18Gokï ke cɔɔl, ku yöökkï keek an, duökï jam be ya guiir ku duökï kɔc be ya wɛ̈ɛ̈t ëliŋliŋ në rin ke Yecu. 19Na wën, ke Petero kekë Jɔn ë ke bëër, yöökkï keek an, “Luɛlkï week, nɔn piɛth en tëde Nhialic të piŋ wok këdun awär pïŋ piŋ wok këde Nhialic. 20Ku wo cïï aguiɛɛr duëër pɔ̈l në ka cuk tïŋ ku piŋku ke.” 21Na wën acïk ke bɛ waai, ke ke pälkï, acïn kë cïk yök kë bï kek ke mac, në baŋ de kɔc, kɔc ëbɛ̈n aake ye Nhialic leec në ke cï looi. 22Run ke monyë awärkï thiërŋuan, mony wën cï gökë looi ë yeguöp, gök cï e tɔ piɔl guöp.

Lɔ̈ŋ në Biäk de Ŋeeny

23Na wën, aacï ke pɔ̈l, ke ke lɔ tëde remden, lek ku guïïrkï keek jam ëbɛ̈n jam cïï bänydït ke ka ke Nhialic lɛ̈k keek ayï röördït. 24#Bɛ̈n 20:11; Neɣe 9:6; Diɛt 146:6. Na wën, aa cïk jam piŋ, ke ke jɔt keröt lamkï Nhialic në piɔ̈n tök, luelkï an, “Bɛ̈nydït, Yïn Nhialic, Yïn Aciëŋ ë cak paannhial ku piny ku wɛ̈ɛ̈r, ku ka nu ë keyiic kedhie! 25#Diɛt 2:1,2 (LXX). Yïn acï lueel ɣɔn në thoŋ de Debid awunde në jam de Wëidït ɣer an,

‘Eeŋö ë göthë juöör,

ku eeŋö ë tɛkë kɔc ɣɔ̈ric ë kepiɔ̈ɔ̈th?

26Meliik ke piny acïk röt jɔt,

Ku guëër bäny ceŋ kɔc,

Bïk tɔŋ yiɛ̈n Bɛ̈nydït kekë Kërthode.’

27 # Luk 23:7-11; Math 27:1,2; Mak 15:1; Luk 23:1; Jɔn 18:28,29. Kɔc acïk guëër në yic, kɔc de ater në Yecu Wënduön ɣeric, Wënduön cï tɔc, yï Ɣerod ayï Pontio Pilato, kekë Juöör ku kɔc ke Yithriɛl, aake guëër tëtöŋë, 28bïk käŋ bɛ̈n looi ëbɛ̈n, ka cïï riɛldu ku löŋdu kɔn guiir ɣɔn thɛɛr an, bï ke dhil looi. 29Ku ënɔɔnë, Bɛ̈nydït, piŋ wɛ̈i ee kek wo waai, ku gämë lïïmku riɛl, bïk jamdu aa guiir ke ke ye ŋeeny, 30ku riny yïcin ke kɔc ë ke bï dem, ku tɔ göök loi ku ka ye kɔc ke gäi në rin ke Yecu Wënduön ɣeric” 31Na wën, aa cïk lam, ke piny nieŋ rɔt të wën cï kek guëër thïn, agokï thiäŋ në Wëidït ɣer kedhie, ku jɔkï jam ë Nhialic guiir në ŋeeny.

Kɔc cï Gam Arɔmkï Kaken

32 # Luɔi 2:44,45. Ku tɔ̈u kut ë kɔc cï gam në piɔ̈n tök ku në jam tök: ku acïn raan ee ye lueel në ka cath ë yen an, ee kake yenguöp, ayek rɔm ëtök në käŋ kedhie. 33Ku tuuc ayek jamden lueel në riɛldït, jam ee kek cäätɔɔ ke jön cï Bɛ̈nydït Yecu rɔt jɔt: ku tɔ̈u dhuëëŋ dït tëde keek kedhie. 34Ku acïn raan në keyiic raan dɛk ë käŋ, kɔc ëbɛ̈n kɔc de nïïm duum ayï ɣööt ke ke ɣɔɔckï, ku jɔkï wëu ke ka cï ɣaac bɛ̈ɛ̈i, 35gokï ke tääu piny ë tuuc nïïm: na wën, ke wëu ë ke tëkë kɔc, ku miɔc raan ëbɛ̈n në këde dak dɛkë kake.

36Ku ade mony cɔl Jothep, mony cï tuuc cäk rinke an, Baranaba (yen aye wën ë Muŋdepiɔ̈u, të pukë yen ë thoŋda), ku ye raan ë Lebi, paanden ee Thaiperuth, 37monyë ade nɔm dom, go ɣaac, ku bïï wëu, tɛ̈ɛ̈u keek ë tuuc cök.

Currently Selected:

Luɔi 4: dip-JPB

Highlight

Copy