LUKA 24

Kuruka kwa Jesu

(Mat. 28.1-10; Mk. 16.1-8; Joh. 20.1-10)

1Ituku ja Njumwa kokio, waja waka wikaghenda kaburinyi wikidwa ghaja marumba wereghiboisireghe. 2Wikajikua igho jabingilishwa kufuma momunyi ghwa kaburi. 3Ela iji werengirieghe andenyi ndewereghuwonieghe mumbi ghwa Bwana Jesu anduangi. 4Hata iji werekaieghe kimusi wikishinikia ilagho ijo, wikafutukilwa ni wandu wawi, wiko na nguwo ring'ala-ng'ala, wikakaia kimusi kaavui nawo. 5Nao iji werekoghe wikiobua na kughusha mawushu ghawo andonyi, waja wandu wikawizera, “Kwaki mumlolagha kwa wafu uo uko moyo? 6Ndeuko aha anduangi, wameria kuruka. Kumbukenyi seji oremghorieghe iji orekoghe Galilaya;#Mat. 16.21; 17.22-23; 20.18-19; Mk. 8.31; 9.31; 10.33-34; Lk. 9.22; 18.31-33 7angu ‘Suti Mwana wa Mdamu ufunyo mikonunyi kwa wandu wa kaung'a, usulubisho, na ituku ja kadadu urukisho sena.’”

8Nao awo waka wikaghikumbuka malagho ghake, 9wikawuya kufuma kaburinyi wikawighoria awo wanughi ikumi na umweri agho malagho na wazima wori. 10Awo werewighorieghe wadumi maza iri werekoghe Maria Magdaleni, na Joana, na Maria mae Jakobo, andwamweri na waka wamu wazima. 11Ela malagho agho ghikawoneka kwa wadumi sa ghiseko ghewada, hata ndewerewirumirieghe anduangi. 12[Ela Petro ukafuma na kughenda na iseghe cha kaburinyi, nao iji oresungieghe andenyi ukawona rija nguwo ra kurika riekeri, ukawuya nyumbenyi ukishinikia ghaja gherebonyekieghe.]

Charo cheghenda Emau

(Mk. 16.12-13)

13Ituku jija jeni, wandu wawi wa wanughi wa Jesu werekoghe wikighenda muzi ghuwangwagha Emau sa wukula ghwa kilometa ikumi na imweri kufuma Jerusalemu. 14Wikakaia wikija malagho gha rija maza rerebonyekieghe. 15Hata iji werekoghe wikija agho malagho, Jesu moni ukasughuda kaavui na kughendanya nawo. 16Wikammbona, ela ndeweremmanyireghe anduangi. 17Nao Jesu ukawizera, “Ni malaghoki agha mwawuyaja mkighenda?”

Wikakaia kimusi wikizighana na mawushu gha wasi. 18Umu wawo uwangwagha Kleopa ukamkotia, “Wele oho kooka mghenyi kuekeri Jerusalemu, kuseichi malagho ghibonyekie aho agha matuku?” 19Ukawikotia, “Malaghoki?” Wikatumbulia, “Malagho ghimpatire Jesu wa Nazareti. Mundu uhu orekoghe mlodi m'baa uko na kudima kwa kubonya na kufundisha imbiri ya Mlungu na imbiri ya wandu wose; 20na seji wakohani wabaa wedu weremtanyireghe kufwa, wikamsulubisha. 21Ela isi derekoghe dikimsuwiria, angu nuo moni uchaawikombua Israeli. Chiaimweri na agho, idime ni ituku ja kadadu kufuma agho malagho ghabonyeka. 22Na waka wamu wa mzedu wadishinua, wighendieghe kaburinyi kokesho kio, 23ela wikaghusowa mumbi ghwake, wikawuya wikighora wei wawonie weke malaika wawizera kedi oko moyo! 24Na wandu wamu wedu waghendieghe kaburinyi kuzighana wikawona wokoni sa iji awo waka wighorieghe, ela uo moni ndewimmbonie anduangi.”

25Nao Jesu ukawizera, “Kwaki mkelie huwu, muko na ngolo rilemere rerumiria malagho ghose ghighorelo ni walodi? 26Welee, ndeeremfwanieghe Kristo kutirirwa maza iri na kungia kwa wubaa ghwake?” 27Niko ukawitambuya maza rose riandikilo kwa wundu ghwake ukizoya na vuo va Musa na va walodi wose.

28Wikavika kaavui na muzi werekoghe wikighughendia, Jesu ukakubonya sa kukunda kuida; 29ela awo wikamshingira wikighamba, “Kaia andwamweri nesi angu ndoe yaswa na kira chaawuyasea.” Nao ukangia kukaia andwamweri nawo. 30Hata iji wasea kidombo uje vindo andwamweri nawo, ukawada mkate, ukaghurasimia, ukaghuchikanya ukawineka. 31Nao meso ghawo ghikatambuka wikammanya, ela uo ukalaghaya. 32Wikazerana weni na weni, “Ado siko koni ngolo redu rikoghe rikiaka andenyi kodu iji ukoghe ukiditambuya Maandiko?”

33Wikawuka saa ija cheni, wikawuya Jerusalemu; wikawikua waja wadumi ikumi na umweri wakwanyika chiaimweri na awo werekwanyeghe; 34wikighamba, “Loli Bwana waruka, nao wamfutukia Simoni.”

35Nao waja wanughi wawi wikawighoria agho gherebonyekieghe chienyi, na seji weremmanyireghe nyuma ya uo kughuchikanya mkate.

Jesu kuwifutukia wanughi wake

(Mat. 28.16-20; Mk. 16.14-18; Joh. 20.19-23; Mab. 1.6-8)

36Nao iji werekoghe wikighora malagho agho, Jesu moni ukakaia kimusi aghadi kwawo ukawizera, “Sere ndeikaie konyu.” 37Ela wikaturukia na kuobua wikiririkanya angu uo wimmbonagha ni kisuka. 38Nao ukawizera, “Kwaki mwakambwa ni chongo, na kukaia na maghesho mengi ngolonyi konyu? 39Nizighanenyi mikonu yapo, na maghu ghapo, mmbone angu ni ini moni; niwadenyi mmanye, angu kisuka ndechiwadie mumbi na maindi seji muniwonagha niko navo anduangi.”

40Nyuma ya kughora agho, ukawiwonyera mikonu na maghu ghake. 41Nao iji werekoghe wiserumiriagha wikiboilwa na kushinika, ukawikotia, “Moko na kindo chingi cheja aha?” 42Nao wikamneka kibelele cha samaki iochelo. 43Ukachiwada ukachija imbiri kwawo. 44Niko ukawizera, “Agha nigho malagho neremghorieghe iji nerekwanyeghe andwamweri nenyo, kukaia agho ghose ghereandikiloghe aighu yapo andenyi ya Sharia ra Musa, Maandiko gha walodi na Zaburi, suti ghikatisho.”

45Nao ukawifungua akili rawo wipate kutambukilwa ni Maandiko. 46Ukawizera, “Huwo niko iandikilo kukaia yamfwana Kristo utiriro, na ituku ja kadadu uruke kufuma kwa wafu. 47Mbari rose ripate kuchililwa kuhea na kulekwa kaung'a rawo kwa irina jake kuzoya Jerusalemu. 48Inyo moko mashahidi wa maza iri. 49Nani olenyi niamdumia aighu konyu uo orelaghiriloghe ni Aba. Ela kaienyi mzinyi, hata mneko rija ndighi rifumagha aighu.”#Mab. 1.4

Jesu kujoka mlungunyi

(Mk. 16.19-20; Mab. 1.9-11)

50Niko ukawifunya shighadi ya muzi hata Bethania, ukaiwusira mikonu yake ukawirasimia.#Mab. 1.9-11 51Nao iji orekoghe ukiwirasimia, ukatana nawo, ukadwalwa noko aighu mlungunyi. 52Nawo wikamtasa na kuwuya Jerusalemu, kwa kuboilwa kubaa. 53Wikakaia Hekalunyi ngelo rose wikimkasa Mlungu.

Currently Selected:

LUKA 24: TAITA

Highlight

Copy