JOHANE 3

Jesu na Nikodemo

1Korekoghe na mndumu m'baa wa Wayahudi, Mfarisayo uwangwagha Nikodemo. 2Ukamghendia Jesu nakio ukamzera, “Rabi, dakumanya angu ko mwalimu udumilo kufuma kwa Mlungu, angu ndekuwadie mndungi udimagha kubonya weke mwakilimbiti awa kuwibonyagha, isaakaia Mlungu oko andwamweri nao.”

3Jesu ukamtumbulia, “Nakughoria loli, ngera mundu usevalo kawi ndedimagha kughuwona wuzuri ghwa Mlungu anduangi.” 4Nikodemo ukamzera, “Idimika wada mundu uko mghosi kuvalwa sena? Wadima kungia kifunyi kwa mae na kuvalwa indo ja kawi?” 5Jesu ukamtumbulia, “Nakughoria loli, ngera mundu usevalo kwa machi na Roho, ndedimagha kungia kwa wuzuri ghwa Mlungu anduangi. 6Mundu wadavalwa kimumbi ni wavi wa kimumbi, ela wadavalwa kiroho kwa Roho. 7Kusakeshinika wei nakuzera, ‘Suti kuvalo kawi.’ 8Mbeo yadaweta seji ikundagha, lwaka lwaro kwalusikira, ela ndekuimanyagha andu ifumagha hata andu ighendagha anduangi. Niko koni kwa mundu uo ose uvalwagha kwa Roho.” 9Nikodemo ukamkotia, “Maza iri ridimika wada?” 10Jesu ukamtumbulia, “Wele oho ko Mwalimu wa Israeli, sena ndekutambukilwagha ni maza iri? 11Nakughoria loli, isi dadeda agho dighiichi, na kushuhudia agho dighiwonie, ela inyo ndemghurumiriagha wushuhuda ghodu anduangi. 12Ikakaia namghoria maza ra ndoenyi, nenyo ndemrumiriagha, mcharumiria wada ngamghoria maza ra mlungunyi? 13Ndekuwadie mndungi ujokie mlungunyi, ela Mwana wa Mdamu uo userie kufuma mlungunyi.

14“Sena sa iji koni Musa oreijosereghe ija choka ya shaba kireti, ni huwo koni Mwana wa Mdamu suti ujoso;#Mit. 21.9 15uo ose urumiriagha kwake, ukaieghe na irangi ja kala na kala. 16Angu Mlungu oreghukundieghe wurumwengu, hata ukamfunya Mwana wake uvalwagha wa ititi, uo ose urumiriagha kwake usetote anduangi, ela ukaieghe na irangi ja kala na kala. 17Angu Mlungu nderemdumieghe Mwana wake ughutanye wurumwengu anduangi, ela ughukire wurumwengu.

18“Uo umrumiriagha Mwana ndetanywagha anduangi; ela uo userumiriagha wameria kutanywa, kwa kukaia ndeurumirie kwa Mwana wa ititi wa Mlungu anduangi. 19Nako kutanywa niko uku: Mwengere ghwameria kucha wurumwengunyi, ela wandu wikachikunda kira kuchumba mwengere, angu mabonyo ghawo gherekoghe ghizamie. 20Angu kula umu ubonyagha maza rizamie, wadazamilwa ni mwengere, nao ndechagha mwengerenyi anduangi, mabonyo ghake ghizamie ghichewoneka. 21Ela uo ose ubonyagha maza ra loli, wadacha mwengerenyi, mabonyo ghake ghipate kuwoneka mwengerenyi seji ghabonywa kwa kumsikira Mlungu.”

Jesu na Johane M'baputizi

22Nyuma ya agho, Jesu na wanughi wake wikaghenda isanga ja Judea. Ukakaia aho andwamweri nawo, ukabaputiza. 23Na wokoni Johane orekoghe ukibaputiza Ainoni kaavui na Salemu, angu aho korekoghe na machi mengi; na wandu wikamghendia, ukawibaputiza. 24Ngelo iyo Johane nderengiriloghe kifungonyi anduangi.#Mat. 14.3; Mk. 6.17; Lk. 3.19-20

25Nao kukawuka nganyi aghadi ya wanughi wa Johane na Myahudi umu aighu ya mzango ghwa kukuelesha. 26Wikamghendia Johane wikamzera, “Mwalimu, uja mundu morekwanyeghe kimonu cha Jordani, uo koremshuhudieghe, waawuyabaputiza na wandu wose waawuyamghendia.” 27Johane ukawizera, “Mndungi ndedimagha kukaia na kilambo chingi ngera usenekelo ni Mlungu. 28Inyo mmbeni moko washahidi sa iji nereghambieghe, ‘Ini suo ungi Kristo, ela ini needumwa nikirie imbiri kwake.’#Joh. 1.20 29Uo uko na muka nuo bwana arusi, ela mghenyi wa bwana arusi, uo ukaiagha kimusi na kumsikira, wadaboilwa kumsikira bwana arusi ukideda. Idana kuboilwa kwapo kwakatishwa. 30Ni suti uo uchurikie kukaia m'baa, na ini suti nipunguo.”

Uo uchagha kufuma mlungunyi

31Uo uchagha kufuma aighu ni m'baa kuchumba wose, uo ufumagha ndoenyi ni wa ndoenyi, nao wadadeda ra ndoenyi; ela uo ufumagha mlungunyi oko aighu ya wose. 32Uo wadashuhudia agho oreghiwonieghe na kughisikira, ela ndekuwadie mndungi ughurumiriagha wushuhuda ghwake anduangi. 33Uo ughurumiriagha wushuhuda ghwake wadahakikisha kwa ilagho iji: Mlungu ni mloli. 34Uo udumilo ni Mlungu wadaghora malagho gha Mlungu, angu Mlungu wadamneka roho wake kuseko na kupima. 35Uja Aba wamkunde Mwana, nao wamnekie vilambo vose.#Mat. 11.27; Lk. 10.22 36Uo umrumiriagha Mwana oko na irangi ja kala na kala, ela uo usemsikiragha Mwana, ndechaapata irangi anduangi, ela machu gha Mlungu ghiadua aighu kwake.

Currently Selected:

JOHANE 3: TAITA

Highlight

Copy