JOHANE 20

Kaburi kusighwa nduu

(Mat. 28.1-8; Mk. 16.1-8; Lk. 24.1-12)

1Nao Ituku ja Njumwa kokio, ndoe isetambukie, Maria Magdaleni ukaghenda kaburinyi; ukajiwona igho jainjwa mnyangonyi ghwa kaburi. 2Nao ukawuya na iseghe, ukawighoria Petro na uja mnughi orekundoghe ni Jesu ukighamba, “Wamfunya Bwana kaburinyi, nesi ndedimanyire andu wammbika anduangi.” 3Nao Petro na uja mnughi mzima wikaghenda cha kaburinyi. 4Wikakimbia na iseghe wose wawi, na uja mnughi mzima ukamwida Petro ukakaia wa imbiri kuvika kaburinyi. 5Nao ukaghomeka ukasungia andenyi kaburinyi, ukariwona nguwo ra kitani orerighiriloghe naro, ela nderengirieghe andenyi anduangi. 6Niko Simoni Petro ukacha, ukangia kaburinyi. Ukawona rija nguwo ra kitani riko andonyi, 7na chija kitambaa cherefungiloghe chongonyi kwa Jesu cherekuchiroghe na kuwikwa chiaro. 8Niko uja mnughi mzima wori, uo orezoeghe kuvika, ukangia ukawona, ukarumiria. 9Angu werekoghe wisetambukilo kande ni maa ndiko agho ghighambie angu suti uruke kufuma kwa wafu. 10Nao awo wanughi wikawuya cha mzinyi.

Jesu kumfutukia Maria Magdaleni

(Mat. 28.9-10; Mk. 16.9-11)

11Maria orekoghe kimusi shighadi ya kina ukilila. Hata iji orekoghe ukilila ukasungia andenyi ya kina, 12ukawona weke malaika wawi wirwae nguwo ra chokwa, wasea kidombo andu mumbi ghwa Jesu ghorekoghe, umu cha chongonyi, na umu cha maghunyi. 13Nao wikamkotia, “Wele muka, kuliliaki?” Ukatumbulia, “Ni iji wamwinja Bwana wapo, nani simanyire andu wammbika anduangi.”

14Nao ukighora agho ukaghaluka na nyuma ukammbona Jesu uko kimusi aho, ela nderemmanyireghe ngera ni Jesu anduangi. 15Jesu ukamzera, “Wele muka, kuliliaki? Nani kumlolagha?” Nao Maria ukimririkanya kukaia mlimi ukamzera, “Bwana, ngera ni oho kwamfunya, nighorie ni hao kwammbika, nani nichammbusa.” 16Jesu ukamzera, “Maria!” Maria ukaghaluka ukamzera kwa Kiebrania, “Rabboni!” (kutambua kwaro “Mwalimu.”) 17Jesu ukamzera, “Kusakeniwada, angu sijokie kande kwa Aba, ela ghenda kwa wanidu kuwighorie niajoka kwa Aba na Aba onyu; kwa Mlungu wapo na Mlungu onyu.” 18Maria Magdaleni ukaghenda ukawighoria waja wanughi angu wammbona Bwana, na seji wamghoria agho malagho.

Jesu kuwifutukia wanughi wake

(Mat. 28.16-20; Mk. 16.14-18; Lk. 24.36-49)

19Luma lwa kenyi lwa jija ituku jeni ja Njumwa, wanughi werekoghe wakwanyika andenyi ya nyumba, na minyango yameria kurughwa kwa wundu ghwa kuwiobua Wayahudi. Jesu ukacha, ukakaia aghadi kwawo ukawizera, “Sere ndeikaie konyu.” 20Uendaghora agho, ukawiwonyera mikonu yake, na luwaru lwake. Niko wikaboilwa kwa kummbona Bwana. 21Jesu ukawizera sena, “Sere ndeikaie konyu. Sa iji koni Aba orenidumieghe ini, niko koni namduma inyo.” 22Uendaghora agho, ukawikuya miruke ukawizera, “Wusenyi Roho Mweli. 23Iji mwalekia wandu kaung'a rawo, wialekelwa na iji msewilekie, ndewilekelwaghwa anduangi.”#Mat. 16.19; 18.18

Jesu na Tomasi

24Tomasi, nao ni umu wa waja wanughi ikumi na wawi, (uwangwagha Masa) nderekwanyeghe na wambao iji Jesu orechieghe. 25Waja wanughi wambao wikamzera, “Dammbona Bwana!” Tomasi ukawizera, “Ngera nisewonie na kuriadada alama ra misumari vikotonyi kwake, sena ningire mkonu ghwapo luwarunyi kwake, sichaarumiria anduangi.”

26Nao nyuma ya matuku wunyanya, wanughi wake werekoghe wakwanyika andwamweri sena, na Tomasi orekwanyeghe nawo. Minyango erekoghe irughie, ela Jesu ukangia, ukakaia kimusi aghadi kwawo ukaghamba, “Sere ndeikaie konyu.” 27Nao ukamzera Tomasi, “Reda chala chako kuvizighane vikoto vapo, reda mkonu ghwako kughungire luwarunyi kwapo. Kusakekaia mundu userumiriagha, ela uo urumiriagha!” 28Nao Tomasi ukamtumbulia, “Bwana wapo, na Mlungu wapo!” 29Jesu ukamzera, “Kuarumiria angu kwaniwona? Warasimilwa awa wirumiriagha wisewonie.”

Shekeria ya ichi chuo kuandikwa

30Jesu orebonyereghe weke mwakilimbiti walazi imbiri ya wanughi wake, wiseandikilo aha. 31Ela agha gheandikwa, inyo mpate kurumiria angu Jesu ni Kristo, Mwana wa Mlungu; na kwa kurumiria kwake, mpate kukaia na irangi kwa irina jake.

Currently Selected:

JOHANE 20: TAITA

Highlight

Copy